“Hunio 1–7. Alma 5–7: ‘Limmansad kadi iti Pusoyo Daytoy a Naisangsangayan a Panagbalbaliw?’” Umaykayo, Sumurot Kaniak—Para iti Primary: Libro ni Mormon 2020 (2020)
“Hunio 1–7. “Limmansad kadi iti Pusoyo Daytoy a Naisangsangayan a Panagbalbaliw?,” Umaykayo, Sumurot Kaniak—Para iti Primary: 2020
Saanka a Nalipatan, ni Jon McNaughton
Hunio 1–7
Alma 5–7
“Limmansad kadi iti Pusoyo daytoy Naisangsangayan a Panagbalbaliw?”
Sikakararag nga ibilangmo dagiti pagbatayan iti Alma 5–7 a mariknam a naipangpangruna a napateg kadagiti ubbing a sursuruam.
Isuratmo Dagiti Impresionmo
Yawis ti Panagbibinninglay
Awisem dagiti ubbing a mangibinglay no ania ti malagipda a nasursuro maipapan ken ni Alma nga Ub-ubing sumagmamano a lawas ti napalabas. Ilawlawag a kalpasan a napasurot ni Alma, insurona kadagiti tao dagiti napateg a banag maipapan iti ebanghelio. Paibinglay kadagiti ubbing no ania ti ammoda maipapan kadagiti banag nga insurona.
Isuro ti Doktrina: In-inaudi nga Ubbing
Magun-odko ti bukodko a pammaneknek babaen ti Espiritu Santo.
Mapadur-as dagiti ubbing a sursuruam dagiti bukoda a napigsa a pammaneknek, nupay ubbingda pay laeng.
Dagiti Mabalin nga Aktibidad
-
Usarem ti maysa a ladawan ni Alma nga Ub-ubing (kitaen iti Libro ti Arte ti Ebanghelio, num. 77) tapno irebyu ti pakaammuan maipapan iti panangsarungkar ti anghel kenkuana (kitaen iti Mosiah 27). Kalpasanna kiddawen kadagiti ubbing a mangiladawan no ania ti pammaneknek, ken tulongam ida no kasapulan. Ilawlawag a nagtrabaho ni Alma tapno magun-odna ti pammaneknek kalpasan ti panangsarungkar ti anghel kenkuana. In-inut a basaem ti Alma 5:46 iti sumagmamano a daras, ket awisem dagiti ubbing a dumngeg iti no ania ti inaramid ni Alma ken no kasano ti pannakaammona iti kinapudno. (Mabalin a kasapulam nga ilawlawag a ti panagayuno ket kaipapananna ti saan a pannangan iti taraon ken saan a panaginum iti danum.)
-
Ipakitam dagiti ladawan ti bambanag nga in-inut nga dumakkel ken agkasapulan iti kanayon a panangaywan, a kas iti maysa a mula wenno maysa nga urbon. Kiddawem kadagiti ubbing a mangibinglay no kasano ti panangaywantayo kadagitoy a banag ken makatulong kadagitoy a dumakkel. Ipalagip kadakuada a nasken met ti kanayon a panangaywantayo kadagiti pammaneknektayo.
-
Usarem ti awan nagyanna a lobo a mangibagi iti maysa a pammaneknek ket puyotam iti angin daytoy ti itunggal kanito nga ibinglaymo ti maysa a banag a makatulong a dumakkel dagiti pammaneknek. Siglotam ti balon ket ipasam daytoy iti aglawlaw, a mangkiddaw kadagiti ubbing a mangibinglay iti maysa a banag a maaramidda a makatulong a mangpabileg kadagiti pammaneknekda. Awisem dagiti ubbing a mangidrowing iti bagbagida nga agar-aramid kadagiti banag a mangpapigsanto kadagiti pammaneknekda.
No awatentayo ti ebanghelio, kasla mangrugitayo iti baro a biag.
Inawat ti Mangisalakan iti Bagina dagiti basbasol, sasaem, ken rigrigatko.
Makatulong kadagiti ubbing dagiti kinapudno iti Alma 7:10–13 a mangammo a ni Jesucristo ket maseknan kadakuada ken makatulong kadakuada.
Dagiti Mabalin nga Aktibidad
-
Ipakita kadagiti ubbing ti maysa a ladawan ni Jesus. Ilawlawag nga ammona no ania ti rikna ti madangran, maliday, wenno mabuteng. Basaem dagiti sumagmamano a balikas iti Alma 7:11–13 a mangiladawan no ania ti sinagaba ti Mangisalakan, ket ilawlawag dagiti balikas a mabalin a saan a maawatan dagiti ubbing. Ilawlawag a matulongan ken maliwliwanatayo ni Jesus no nalidaytayo. Ibinglay no kasano a natulongan ken naliwliwanaka ti Mangisalakan.
-
Kiddawem kadagiti ubbing a mangibinglay kadagiti padas idi nagsakit wenno nakariknada iti saem wenno naaddaan iti sabali pay a problema a nagpaliday kadakuada. Ibinglaymo ti pammaneknekmo a sinagaba met ti Mangisalakan dagita a banag ken ammona no kasano a matulongannatayo.
Nalinteg ti dana nga agsubli iti Nailangitan nga Ama ken ni Jesucristo.
Kasano a mausarmo ti panangiladawan ni Alma iti dana nga agsubli iti Nailangitan nga Ama tapno matulongan dagiti ubbing nga agsursuro nga agaramid kadagiti nasayaat a pili?
Dagiti Mabalin nga Aktibidad
-
Ibasam ti Alma 7:19 kadagiti ubbing, ket ilawlawagmo a no agaramidtayo kadagiti nasayaat a pili, addatayo iti dana a mangiturong nga agsubli iti Nailangitan nga Ama. Ikkam dagiti ubbing kadagiti napagsasaganad a pili wenno tignay (kas iti panagbalin a natangsit kadagiti miembro ti pamilia wenno panagserbi kadakuada). Kiddawem kadakuada nga ibagada kenka no nasayaat ti tunggal pili ken mangiturong nga agsubli iti Dios wenno no dakes daytoy ken mangyadayo Kenkuana.
-
Basaem ti Alma 7:20 ken tulongam dagiti ubbing a makaawat kadagiti balikas kadagitoy a bersikulo a mangiladawan iti dana nga agsubli iti Dios. Idrowing iti pisarra ti maysa a nalinteg a dana manipud kadatayo agingga iti Nailangitan nga Ama. Kalpasanna idrowing ti maysa a killo a dana a mangiraman kadagiti naserraan nga ungto a mangyadayo manipud iti Dios. Awisem dagiti ubbing a mangtunton babaen kadagiti ramay ti imada dagiti agpada a dana. Ania kadagitoy a dana ti nasaysayaat? Tulongam ida nga agpanunot kadagiti nasayaat a pili a mangtulongto kadakuada nga agtalinaed iti nalinteg a dana.
Isuro ti Doktrina: In-inauna nga Ubbing
Alma 5:12–14, 27–28, 57; 7:14–24
Nasken a mayanakak manen ken kalpasanna surotek ti dana a mangiturongto nga agsubli iti Dios.
Kasano a matulongam dagiti ubbing a makaawat no ania ti kayat a sawen ti pannakayanak manen?
Dagiti Mabalin nga Aktibidad
-
Ipakitam kadagiti ubbing ti ladawan ti maysa a maladaga, ken awisem ida a mangisarita maipapan iti no ania ti langa ti maysa a maladaga idi umuna a maipasngay. Awisem ti maysa nga ubing a mangbasa iti Alma 5:14. Tapno matulongan dagiti ubbing a makaawat no ania ti kaipapanan ti “naespirituan … a maipasngay iti Dios,” kiddawem kadakuada a mangpanunot no kasano ni Alma nga Ub-ubing sakbay a napasurot isuna. Kasano isuna kalpasanna? (Kitaen iti Mosiah 27:23–32 ken Alma 36:12–24.) Ilawlawag a no adda pammatitayo ken ni Jesucristo ken agtungpal iti ebangheliona, kasla nagrugitayo iti baro a biag, kas iti maysa a maladaga.
-
Aggigiddan a basaen ti Alma 7:19, ket ilawlawag a kalpasan a naipasngaytayo manen, nasken a surotentayo ti “dana nga agturong iti pagarian ti Dios.” Mangillemmeng kadagiti papel iti aglawlaw ti siled nga addaan kadagiti sumaganad a reperensia a naisurat kadagitoy: Alma 5:12–13, 27–28, 57; 7:14–16, 23–24. Awisem dagiti ubbing a mangsarak kadagiti papel, manglukib kadagiti nasantuan a kasuratan, ken mangibinglay no ania ti isuro ti tunggal nasantuan a kasuratan a nasken nga aramidentayo tapno makasubli iti sidong ti Dios.
Magun-odko ti bukodko a pammaneknek babaen ti Espiritu Santo.
Sinarungkaran ti maysa nga anghel ni Alma, ngem ti pammaneknekna ket “naipakaammoda [kenkuana] babaen ti Nasantuan nga Espiritu” (Alma 5:46).
Dagiti Mabalin nga Aktibidad
-
Basaen a kadua dagiti ubbing ti Alma 5:44–46. Ania ti inaramid ni Alma tapno manggun-od ti pammaneknekna maipapan iti ebanghelio? Ikkam ti tunggal ubing iti maysa a panid ti papel ken awisem ida a mangaramid ti plano nga agaramid ti maysa a banag a mangpapigsa kadagiti pammaneknekda iti daytoy a lawas.
-
Ipasam ti maysa a sarming iti aglawlaw ken ipakitam ti anninawda iti sarming bayat ti panangbasam ti Alma 5:14. Ania ti kayat a sawen ti maaddaan iti ladawan ti Mangisalakan iti langatayo? Ibinglaymo dagiti panawen idi kinuna ti maysa a tao wenno nagaramid iti maysa a banag a mangipalagip kenka ti maipapan iti Mangisalakan, ken kiddawem kadagiti ubbing a mangaramid met iti kastoy.
Inawat ti Mangisalakan iti Bagina dagiti basol, saem, ken rigatko.
Bayat ti panagadalmo iti Alma 7, utobem no kasano a mapapigsam ti pammati dagiti ubbing ken ni Jesucristo tapno umasidegdanto Kenkuana no adda dagiti pannubokda.
Dagiti Mabalin nga Aktibidad
-
Awisem dagiti ubbing a mangbasa iti Alma 7:11–13, nga agsapsapul kadagiti banag a nagsagabaan ni Jesucristo. Mabalin nga agtallugodda a mangibinglay kadagiti padasda idi nariknada ti saem, sakit, wenno rigrigat. Segun kadagitoy a bersikulo, apay a nagtallugod a sinagaba ti Mangisalakan ti amin dagitoy? (Ilawlawag a ti “umarayat” kayatna a sawen ti “tumulong.”)
-
Isaritam kadagiti ubbing maipapan iti maysa a sakit, dunor, wenno sabali pay a rigat a napadasamon, ket saludsodem no napadasanda met ti kas kadagitoy. Aggigiddan a mangbasa iti Alma 7:11–13, ken mangilawlawag no ania dagiti sinagaba ni Jesus para kadatayo. Tulongam dagiti ubbing nga agpanunot maipapan kadagiti panawen idi napadasan ti Mangisalakan dagitoy a banag, a kas idi nasulisog Isuna (kitaen iti Mateo 4:1–11) wenno idi agsagsagaba iti Getsemani. Kasano a makatulong kadatayo a mangammo a maawatan ni Jesus dagiti panagkarigatantayo? Ibinglaymo ti pammaneknekmo maipapan iti bileg ni Jesus a mangliwliwa, mangtulong, ken mangpaimbag kadatayo.
Yallukoy ti Panagsursuro iti Pagtaengan
Awisem dagiti ubbing a mangibitin iti maysa a ladawan ni Jesus iti lugar a masansan a makitadanto tapno mangipalagip kadakuada no ania ti nasursuroda maipapan Kenkuana iti agdama.
Panangpadur-as iti Panangisurotayo
Dumur-as a mannursuro a kas ken ni Cristo. Kas maysa a mannursuro, napateg nga utobem maipanggep iti wagas a pakapagdur-asan ti kabaelam a mangtulong kadagiti ubbing a mangpapigsa iti pammatida iti Nailangitan nga Ama ken ni Jesucristo. Ibilangmo ti panangusar kadagiti saludsod iti bukod a panangamiris iti panid 37 ti Panangisuro iti Wagas ti Mangisalakan.