Ladawan da Alma ken Amulek a maisalsalakan manipud iti pagbaludan, ni Andrew Bosley

Hunio 15–21

Alma 13–16

“Sumrek iti Paginanaan ti Apo”

Kaduam dagiti ubbing iti klasem iti ababa laeng a panawen iti tunggal lawas. Mabendisionamto iti dakkel dagiti biagda no maparegtam ida nga agtultuloy nga agsursuro manipud iti Libro ni Mormon iti ruar ti klase—nangnangruna kadagiti pamiliada.

Isuratmo Dagiti Impresionmo

Yawis ti Panagbibinninglay

Ikkam dagiti ubbing kadagiti gundaway a mangibinglay no ania ti ammodan maipapan kadagiti estoria iti Alma 13–16. Tapno matulongam ida, mangipakita kadagiti ladawan kas kadagiti adda iti Umaykayo, Sumurot Kaniak—Para kadagiti Indibidual ken Pamilia wenno “Kapitulo 22: Ti Mision ni Alma iti Ammonihah” (Dagiti Estoria iti Libro ni Mormon, 58–63).

Isuro ti Doktrina: In-inaudi nga Ubbing

Alma 13:1–2, 6, 16

Tulongannak ti priesthood nga umasideg ken ni Cristo.

Sikakararag nga utobem no ania ti kasapulan a maawatan dagiti ubbing iti klasem manipud iti no ania ti insuro ni Alma maipapan iti priesthood kadagitoy a bersikulo.

Dagiti Mabalin nga Aktibidad

• Kiddawem kadagiti ubbing a mangulit a kagiddandaka ti simple a kaipapanan ti priesthood, a kas “ti priesthood ti bileg ti Dios.”

• Lukibem dagiti nasantuan a kasuratan iti Alma 13:2, ken isaritam kadagiti ubbing nga awagan ti Dios dagiti priesthood holder tapno “iti wagas a mabalin a dagiti tao … a mangkita iti masakbayan iti Anakna.” Tapno mailadawan no kasano nga aramiden daytoy dagiti priesthood holder, ipakitam dagiti ladawan dagiti wagas a pakapagserbian dagiti priesthood holder (kitaen iti Libro ti Arte ti Ebanghelio, dagiti num 38–41, 103–9), ket kalpasanna ibinglaymo dagiti estoria maipapan kadagiti wagas a nakapagserbian ni Jesus (kitaen iti Mateo 26:26–28; Marcos 5:22–24, 35–43).

• Lukibem iti Alma 13:6, ken ilawlawagmo a dagiti priesthood holder ket “mangisuro kadagiti bilin ti [Dios] kadagiti annak ti tattao.” Tulongam dagiti ubbing a mangpanunot kadagiti priesthood holder nga am-ammoda. Kasano ti panangisuroda kadagiti bilin? Awisem dagiti ubbing a mangidrowing iti ladawan ti priesthood holder nga am-ammoda a mangisursuro iti maysa a tao kadagiti bilin ti Dios.

Tulongandatayo dagiti ordinansa ti priesthood a kumita ken ni Jesucristo para iti pannakasubbot.

Alma 14:18–29

Papigsaennak ti Nailangitan nga Ama a maibatay iti pammatik.

Makaparegta kadagiti ubbing ti pakasaritaan maipapan kada Alma ken Amulek a naisalakan manipud iti pagbaludan tapno umasideg iti Apo no kasapulanda ti tulong.

Dagiti Mabalin nga Aktibidad

• Ipakitam dagiti ladawan da Alma ken Amulek iti panid ti aktibidad iti daytoy a lawas bayat ti panangisaritam iti estoria iti Alma 14:18–29. Mabalinmo pay ti agibasar iti “Kapitulo 22: Ti Mision ni Alma iti Ammonihah” (Dagiti Estoria iti Libro ni Mormon, 58–63). Pagsisinnublatem dagiti ubbing iti panangusar kadagiti ladawan a mangisarita iti estoria. Yunay-unay a naikkan da Alma ken Amulek iti pigsa nga aglibas iti pagbaludan a “maibatay iti pammati[da] ken ni Cristo” (Alma 14:26).

• Tulongam dagiti ubbing a mangiladawan no kasano ti mabalin a narikna da Alma ken Amulek idi addada iti pagbaludan, ket awisem ida a mangyakem kadagitoy a rikna (kitaen iti bersikulo 22). Ilawlawag a nagkiddaw ni Alma iti tulong ti Apo (kitaen iti bersikulo 26). Paneknekam a papigsaennatayonto ti Dios no agkararagtayo nga addaan iti pammati.

• Usaren ti panid ti aktibidad iti daytoy a lawas a mangisuro kadagiti ubbing maipapan iti sumagmamano a wagas a pangpapigsaan ti Dios kadagiti addaan iti pammati Bayat ti panagkolor dagiti ubbing iti panid ti aktibidad, isaritam maipapan iti maysa a panawen idi inikkannaka ti Dios iti pigsa.

Alma 16:1–8

Mabendisionannak no surotek dagiti propeta.

Ammo ni Zoram, ti pangulo a kapitan dagiti buyot a Nephite, a maysa a propeta ni Alma ket nagkalikagum iti pannarabayna. Gapu iti daytoy,nagballigi ni Zoram.

Dagiti Mabalin nga Aktibidad

• Ibinglaymo ti bukodmo a balikas ti pakaammuan iti Alma 16:1–8. Yunay-unay a gapu ta sinurot ni Zoram ken dagiti buyot dagiti Nephite ni propeta Alma, inarayat dagiti Nephite dagiti gagayyemda nga imbalud dagiti Lamanite. Ibinglaymo iti maysa a padas idi nabendisionanka gapu ta sinurotmo ti propeta.

• Ipakitam ti ladawan ti Presidente ti Simbaan, ken ibinglaymo dagiti sumagmamano a banag nga insurona nga aramidentayo. Tulongam dagiti ubbing a mangpanunot kadagiti wagas a pakasurotam ken ni Jesus babaen ti panangaramid iti no ania ti isuro ti propeta kadatayo.

• Ipakitam dagiti ladawan dagiti propeta (kitaen iti Libro ti Arte ti Ebanghelio, num. 6–9, 14, 18, 26–27) bayat ti pannakipagkantam kadagiti ubbing iti kanta maipapan iti propeta kas iti “Follow the Prophet” (Children’s Songbook, 110–11). Yunay-unaymo dagiti ragup ti balikas iti kanta a mangisuro no apay a nasken a surotentayo ti propeta.

Isuro ti Doktrina: In-inauna nga Ubbing

Alma 13:1–19

Tulongannak ti priesthood nga umasideg ken ni Cristo.

Bayat ti panangbasam iti Alma 13:1–19, ania ti makitayo a mangpalaus iti panagraemmo iti priesthood? Ania ti mariknam a makaparegta nga ibinglay kadagiti ubbing a sursuruam? Makatulong kenka dagiti sumaganad a kapanunotan:

Dagiti Mabalin nga Aktibidad

• Basaem a kagiddan dagiti ubbing ti Alma 13:10 ken 13, a mangsapsapul kadagiti kababalin a nasken nga adda iti maysa a priesthood holder. Kiddawem kadakuada a mangpanunot kadagiti tao nga am-ammoda a nasayaat a pagwadan dagitoy a kababalin.

• Tulongam dagiti ubbing a mangaramid iti listaan dagiti ordinansa a maawattayo babaen ti priesthood (kitaen iti “Dagiti Ordinansa” iti Napudno iti Pammati, 109–10). Kiddawem iti maysa a tao a mangbasai ti Alma 13:16. Kasano a matulongandatayo dagitoy nga ordinansa a “panunoten[tayo] ni [Jesucristo] a pakaugasan dagiti basol[tayo]”?

• Saludsodem kadagiti ubbing no ammoda no kasano a naala ti Melchizedek Priesthood ti naganna. Tulongam ida a mangsapul iti sungbat iti Alma 13:14–19 ken Doktrina ken Katulagan 107:1–4. Ania ti masursurotayo manipud ken ni Melchizedek maipapan iti no kasano ti nasken a pannakausar ti priesthood?

Alma 14:18–29

Papigsaennak ti Nailangitan nga Ama a maibatay iti pammatik.

Adda da Alma ken Amulek iti pagbaludan iti uneg ti adu nga aldaw sakbay a winayawayaan ida ti Apo. Makatulong daytoy nga estoria kadagiti ubbing a makasursuro a dagiti pannubokda ket mabalin nga awanan kadagiti madagdagus wenno nalaka a pangrisut, ngem papigsaento ida ti Apo a “maibatay iti pammati[da]” (Alma 14:26).

Dagiti Mabalin nga Aktibidad

• Isurat dagiti saludsod iti pisarra tapno matulongan dagiti ubbing nga agsukisok kadagiti detalye manipud iti Alma 14:18–29, a kas iti Ania ti inaramid dagiti ukom kada Alma ken Amulek iti pagbaludan? wenno Kasano nga impakitada ti pammatida ken ni Jesucristo? Mangted iti tunggal ubing iti maysa wenno dua a bersikulo a basaenda, nga agsapsapul kadagiti sungbat dagiti saludsod.

• Awisem dagiti ubbing a mangidrowing kadagiti ladawan dagiti buya manipud iti Alma 14:18–29, ken ipausarmo kadakuada dagiti ladawanda a mangisarita iti estoria. Kasano nga agbalintayo a kas kada Alma ken Amulek?

• Ibinglaymo iti maysa a padas a nangipakitaam iti pammati iti Apo ken inikkannaka iti pigsa a mangparmek wenno agibtur iti maysa a pannubok. Allukoyem dagiti ubbing a mangibinglay kadagiti isu met la a padas a napasaranda.

Alma 15:3–12

Ti ebanghelio ti makapagbalbaliw kadagiti puso.

Sireregget a sinuppiat ni Zeezrom da Alma ken Amulek iti damo, ngem dagiti pammaneknekda ti nangtukay iti pusona ken nangparegta kenkuana nga agbabawi. Bayat ti panagadalmo kadagitoy a bersikulo, ibilangmo no kasano a mangparegta ti padas ni Zeezrom kadagiti ubbing a sursuruam.

Dagiti Mabalin nga Aktibidad

• Irebyum kadagiti ubbing no ania ti nasursuroda maipapan ken ni Zeezrom itay napalabas a lawas. Aggigiddan a mangbasa iti Alma 15:3–12 tapno mangtakuat no kasano ti panagbalbaliwna.

• Awisem dagiti ubbing a mangipapana naam-ammodan ni Zeezrom sakbay a ti panagbabawina. Ania koma ti ibagada a mangtulong kenkuana a mamati iti ebanghelio? Mabalinmo nga idilig ti no ania koma ti ibagada iti no ania ti insuro da Alma ken Amulek ken ni Zeezrom (kitaen iti Alma 11:40–46; 15:6–11). Apay a makatulong ti panangammo kadagitoy a kinapudno iti maysa a tao nga agtarigagay nga agbalbaliw?

Yallukoy ti Panagsursuro iti Pagtaengan

Awisem dagiti ubbing a mangpanunot iti maysa a banag a mabalinda nga aramiden iti daytoy a lawas a mangipakita iti pammatida iti Apo. Allukoyem ida a mangibinglay kadagiti plano ken padasda kadagiti pamiliada.

Panangpadur-as iti Panangisurotayo

Sursuruem ti mangilasin iti paltiing. “Masansan nga umay ti paltiing iti ‘tunggal binatog’ (2 Nephi 28:30), saan nga iti mamimpinsan. … Kabayatan ti panangutobmo no kasano a bendisionanto dagiti pagbatayan ti ebanghelio dagiti miembro ti klasem, umayto dagiti kapanunotan ken impresion iti unos ti inaldaw a panagbiagmo—kabayatan ti panagbiahem a mapan iti trabahom, panangaramidmo kadagiti trabaho iti balay, wenno pannakipulapolmo iti kapamilia wenno gagayyem” (Panangisuro iti Wagas ti Mangisalakan, 12).