Ladawan da Alma ken Amulek, a mawayawayaan manipud iti pagbaludan, ni Andrew Bosley

Hunio 15–21

Alma 13–16

“Sumrek iti Paginanaan ti Apo”

Napateg ti pammaregta a maawatmo bayat ti panangutobmo kadagiti nasantuan a kasuratan. Mabalinmo nga ipakita nga ipategmo daytoy babaen ti panangisurat ken panagtignaymo a mayannurot iti daytoy.

Isuratmo dagiti Impresionmo

Iti adu a wagas, nasayaat ti biag iti Ammonihah para kada Amulek ken ni Zeezrom nga agpadpada. Ni Amulek ket “tao a bigbigen dagiti makaam-ammo kenkuana” nga “adu ti kakabsat ken gagayyem[na]” ken “nalabon a kinabaknang” (Alma 10:4). Ni Zeezrom ti “kalaingan” kadagiti abogado ket isu ti “kaaduan iti pamastrekan” (Alma 10:31). Kalpasanna dimteng ni Alma iti Ammonihah nga addaan iti nadiosan nga awis nga agbabawi ket “makastrek[da] iti paginanaan ti Apo” (Alma 13:16). Para kada Amulek, Zeezrom, ken dadduma pay, ti panangawat iti daytoy nga awis ket agkasapulan iti sakripisio ken uray pay no agbanag iti dumani saanen a maibturan a rigat.

Ngem kinapudnona saan pay a nalpas ti estoria dita. Iti Alma 13–16, masursurotayo ti maudi a mapasamak kadagiti mamati “iti bileg ni Cristo iti pannakaisalakan” (Alma 15:6). No dadduma adda pannakaisalakan, a no dadduma panangagas—ket no dadduma bambanag a di nalaklaka iti daytoy a biag. Ngem kanayon, nga “awaten ti Apo dagiti[taona] mismo, iti gloria” (Alma 14:11). Kanayon, inikkannatayo ti Apo iti “bileg, a maibatay iti pammati[tayo] nga adda ken ni Cristo” (Alma 14:28). Ket kanayon, a ti “pammati iti Apo” ti mangted kadatayo iti “namnama nga umawat[tayo] iti agnanayon a biag” (Alma 13:29). Bayat ti panangbasam kadagitoy a kapitulo, makagun-odka iti liwliwa kadagitoy a kari, ket mabalin a nasaysayaat a maawatam no ania ti ipaawat ni Alma idi insaona ti “ paginanaan ti Apo.”

Dagiti Kapanunotan para iti Bukod a Panagadal iti Nasantuan a Kasuratan

Alma 13:1–19

Tulongannak dagiti ordinansa ti priesthood nga awatek ti pannakasubbot babaen ni Jesucristo.

Mabalin a malagipmo nga iti Alma 12, insuro ni Alma maipapan iti plano ti Dios iti pannakasubbot (kitaen iti Alma 12:24–27). Iti kapitulo 13, insaona maipapan kadagiti saserdote nga inordenan ti Dios “a mangisuro kadagitoy a banag kadagiti tao” (Alma 13:1). Ipalgak dagiti balikas ni Alma ti adu a nabileg a kinapudno maipapan iti priesthood. Nalabit a mabalinmo a padasen a lasinen ti uray maysa laeng a kinapudno iti kada bersikulo iti Alma 13:1–9. Dagitoy ti sumagmamano a pagbatayan a pangrugiam:

Bersikulo 1:Maawagan pay ti priesthood iti “ti urnos ti Anak [ti Dios] (kitaen met iti DkK 107:1–4).

Bersikulo 2:Ordenan ti Dios dagiti saserdote a tumulong a kumita iti Anakna para iti pannakasubbot.

Bersikulo 3:Naisagana dagiti priesthood holder para kadagiti pagrebbenganda a “manipud iti pamuon ti lubong.”

Ania pay dagiti masarakam? Kasano ti mariknam maipapan iti priesthood bayat ti panangutobmo kadagitoy a kinapudno? Kasano a nakatulong kenka dagiti ordinansa ti priesthood a kumita ken ni Cristo para iti pannakasubbot?

Makaay-ayo a kitaem nga adu kadagiti tao iti Ammonihah dagiti pasurot ni Nehor (kitaen iti Alma 14:18; 15:15). Kasano a maigiddiat ti urnos dagiti saserdote ni Nehor (kitaen iti Alma 1:3–6) kadagiti saserdote a naordenan a “naibatay iti Urnos ti Anak ti Dios” (DkK 107: 3), nga inladawan ni Alma? (kitaen iti Alma 13:1–19).

Kitaen met iti Dale G. Renlund, “The Priesthood and the Savior’s Atoning Power,” Ensign wenno Liahona, Nob. 2017, 64-67.

Tulongannatayo dagiti ordinansa ti priesthood a kumita ken ni Jesucristo para iti pannakasubbot.

Alma 13:3

Dagiti kadi priesthood holder ti kakaisuna a tattao a “naawagan ken naisagana manipud iti pamuon ti lubong”?

Maibasar dagiti pannursuro ni Alma iti Alma 13:3 a nangnangruna kadagiti priesthood holder. Nupay kasta, ti pagbatayan nga insurona—nga umawat dagiti indibidual iti naidutok nga aramiden ken agsaganada a mangipatungpal kadagitoy “manipud iti pamuon ti lubong”—ket mayaplikar iti amin kadatayo. Kinuna ni Presidente Spencer W. Kimball: ”Iti lubong sakbay nga immaytayo ditoy, naikkan dagiti napudno a babbai kadagiti masinunuo a pagrebbengan idinto a naordenan idin sakbay a nayanak dagiti napudno a lallaki kadagiti masinunuo a pagrebbengan. Idinto a saantayo itan a malagip dagiti pasamak, saan a daytoy ti mangbaliw iti nagloriaan a kinapudno ti nagaannamongantayo idi” (Teachings of the Presidents of the Church: Spencer W. Kimball [2006], 215–16; kitaen met iti DkK 138:55–56).

Alma 14

No dadduma palugodan ti Dios dagiti nalinteg nga agsagaba.

Isarita ti Alma 14 maipapan kadagiti nalinteg a tao a nagsagaba ken natay a gapu iti pammatida. Mabalin a masdaawka, kas iti adu, no apay a mapasamak dagiti nakaam-ames a bambanag kadagiti tao a mangikarkarigatan nga agbiag a sililinteg. Mabalin a saanmo a masarakan amin dagiti sungbat kadagitoy naririgat a saludsod iti Alma 14, ngem adu ti masursuro manipud iti wagas a panangresponde da Alma ken Amulek kadagiti kasasaad a nakaipasanguanda. Ania ti isuro dagiti balikas ken tignayda maipapan iti no apay a no dadduma ipalubos ti Apo nga agsagaba dagiti nalinteg a tao? Ania ti masursurom manipud kadakuana maipanggep iti panangsango iti pannakaidadanes?

Kitaen met iti Mateo 5:43–44; Marcos 14:55–65; Taga Roma 8:35–39; 1 Pedro 4:12–14; Doktrina ken Katulagan 122:5–9.

Alma 15:16, 18

Agkasapulan ti kinadisipulo iti panagsakripisio.

Mabalin a makaay-ayo nga agaramid iti listaan dagiti banag nga insuko ni Amulek tapno umawat iti ebanghelio (kitaen iti Alma 10:4–5; 15:16) ket idilig daytoy a listaan ti no ania ti nagun-odna (kitaen iti Alma 15:18; 16:13–15; 34: 8). Ania ti sitatallugodmo nga isakripisio tapno agbalinka a maysa a napudpudno a disipulo?

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.

Alma 13

Mabalin a pagimbagan ti pamiliam manipud iti panangisurat iti tunggal kanito a a pannakakita iti balikas a “paginanaan” iti Alma 13. Ania dagiti sabali pay a balikas ken kapanunotan a makita ditoy? Kasano a matulongannatayo daytoy a maawatan ti mabalin a kayat a sawen ti “paginanaan ti Apo”? Kasano a maigiddiat daytoy manipud iti pisikal a panaginana?

Alma 7:10–12

Tapno matulongan ti pamiliam a mangiladawan iti panunotda no ania ti isuro dagitoy a bersikulo, nalabit a mabalinmo a bugguan nga aggigiddan dagiti banag —a kas iti sumagmamano a puraw a lupot. Ania ti mariknatayo no narugittayo? Ania ti mariknatayo no agbalintayo a nadalus manen? Kasano a maipada dagitoy a rikna iti no ania ti mariknatayo no makabasoltayo ket kalpasanna agbalin a nadalus babaen ti Pannubbot ti Mangisalakan?

Alma 15:1–12

Ania ti masursurotayo manipud iti padas ni Zeezrom maipapan iti bileg ti Apo a mangpapigsa ken mangpaimbag kadatayo, uray pay no agaramidtayo kadagiti biddut? Ania ti akem a maiyakem ti kinasaserdote iti pannakaawattayo iti pigsana ken pannakapaimbag?

Alma 16:1–10

Kalpasan ti panangbasa kadagitoy a bersikulo, mabalinmo a basaen ti Alma 9:4. Ania ti masursurotayo babaen ti panangigidiat iti wagas a pannakarikna ni Zoram maipapan kadagiti balikas ti propeta iti wagas a pannakarikna dagiti tao ni Ammonihah? Ania ti ar-aramidentayo tapno napudnotayo kadagiti balikas ti sibibiag a propetatayo?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Panangpadur-as iti Panangisurotayo

Agbalin a kanayon a nakasagana. Alisto nga aglabas dagiti kanito iti panangisuro, isu a napateg a gundawayen dagitoy no dumtengda. Maysa a trahedia iti lubong, kas pagarigan, ket mabalin a maysa a gundaway a pangibinglayan kadagiti pagbatayan manipud iti Alma 14 maipanggep no apay ipalubos ti Apo no dadduma nga agsagaba dagiti awanan iti basol. (Kitaen ti Panangisuro iti Wagas ti Mangisalakan, 16.)

Da Alma ken Amulek iti Pagbaludan, ni Gary L. Kapp