“Hunio 22–28. Alma 17–22: ‘Aramidenkayonto a Ramit,’” Umaykayo Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Hunio 22–28. Alma17–22,” Umaykayo, Sumurot Kaniak—Para kadagiti Indibidual ken Pamilia: 2020
Da Ammon ken Ari Lamoni, ni Scott Snow
Hunio 22–28
Alma 17–22
“Aramidenkayonto a Ramit”
Bayat ti panangbasam iti Alma 17–22, ilistam dagiti impresion nga umay kenka ket agtignayka a mayannurot kadagitoy. Ti panangaramid ti daytoy ti mangipakitanto iti kinatallugodmo nga umawat iti ad-adu pay a bukod a paltiing.
Isuratmo dagiti Impresionmo
Panunotem ti amin dagiti gapu a mabalin nga ited dagiti tao iti saanda a panangibinglay iti ebanghelio: Awan umdas nga ammok” wenno “Diak sigurado no interesadoda” wenno nalabit “Kasano no mapasakitak ida?” Nalabit nasarakam iti bagim nga agpampanunot kadagiti isu met la a banag no dadduma. Adda nayon a gapu dagiti Nephite iti saanda a panangibinglay iti ebanghelio kadagiti Lamanite: isuda ket dagidi “atap ken nasukir ken nakaam-amak a tattao; tattao nga agragsak iti panagpapatay kadagiti Nephite” (Alma 17:14; kitaen met iti Alma 26:23–25). Ngem dagiti lallaki nga annak ni Mosiah nga addaan iti napigpigsa pay a gapu no apay nariknada a nasken nga ibinglayda ti ebanghelio kadagiti Lamanite: “Tinarigagayanda a maipakdaar koma ti pannakaisalakan iti amin a parsua, ta dida maawat a matay ti ania man a kararua” (Mosiah 28:3). Daytoy nga ayat a nangparegta ken ni Ammon ken dagiti kakabsatna a lallaki ket mabalin a paregtaennaka met a mangibinglay iti ebanghelio iti pamiliam, gagayyem, ken kapulapolmo—uray dagitay mabalin a kasla saan nga umawat iti daytoy.
Dagiti Kapanunotan para iti Bukod a Panagadal iti Nasantuan a Kasuratan
Bayat ti panangpapigsak iti bukodko a pammati, nasamsamay a maiburayko ti ebanghelio.
Napadasam kadin ti nakikaykaysa manen kadagiti nabayagen a gagayyem ket nariknam ti kas iti narikna ni Alma—nalaus ti ragsakda gapu ta nagtalinaedda a napigsa iti pammati? (kitaen iti Alma 17:1–2). Ania ti masursurom manipud kadagiti annak a lallaki ni Mosiah maipapan iti no kasano a pagtalinaedem ti pammatim iti ebanghelio ken ti natibker a panagkumitmo iti daytoy? Kabayatan ti panangutobmo iti naespirituan a pigsa dagiti lallaki nga annak ni Mosiah, ania ti mariknam a makaparegta nga aramidem?
Kasano nga inaringan ti naespirituan a panagsagana dagiti lallaki nga annak ni Mosiah ti aramid dagiti Lamanite? Nalabit a mabalinmo nga aramaten daytoy a gundaway a mangamiris dagiti panagkagumaanmo a mangisuro iti ebanghelio nga “addaan iti bileg ken turay ti Dios” (Alma 17:3).
Makapagbalinak a ramit kadagiti ima ti Dios a mangyeg iti pannakaisalakan kadagiti annakna.
Kinuna ni Presidente Thomas S. Monson, “Kanayon a kayatko a maammuan ti Apo a no kasapulanna ti mangibaon agtarayka, ni Tom Monson agtarayto a mabaon para Kenkuana” (“On the Lord’s Errand: The Life of Thomas S. Monson,” video, ChurchofJesusChrist.org). Bayat ti panangbasam iti Alma17:6–12, sarakem no ania ti inaramid dagiti annak a lallaki ni Mosiah tapno makapagbalinda a ramit kadagiti ima ti Dios. Kasano a makapagbalinka a ramit kadagiti ima ti Dios a mangbendision kadagiti dadduma? Ania ti masursurom manipud iti pagwadanda a mangted kenka iti tured nga agaramid no ania ti kasapulan ti Apo kenka nga aramidem?
Kitaen met iti Dallin H. Oaks, “Sharing the Restored Gospel,” Ensign wenno Liahona,Nob. 2016, 57–60.
Matulongak dagiti dadduma nga agsagana nga umawat iti ebanghelio.
Ni Lamoni ti dadaulo dagiti “atap ken nasukir ken nakaam-amak a tattao” (Alma 17:14), ngem pinarmekna dagiti tawen ti kannawidan ken inawatna ti ebanghelio ni Jesucristo. Bayat ti panangbasam maipapan kadagiti pannakipulapol ni Ammon ken ni Lamoni, kitaem no ania ti inaramid ni Ammon a nakatulong koma nga ad-adda a managawat iti mensahena. No dumteng kenka ti kapanunotan maipapan iti no ania ti maaramidmo tapno mangibinglay iti ebanghelio kadagiti dadduma, isuratmo dagitoy a parikna [promptings].
Mabalin pay a makatulong a markaan wenno mangisurat kadagiti kinapudno nga insuro ni Ammon ken ni Lamoni (kitaen iti Alma 18:24–39 ken dagiti kinapudno nga insuro ni Aaron iti ama ni Lamoni (kitaen iti Alma 22:1–16). Ania ti isingasing dagitoy a bersikulo kenka maipapan kadagiti kinapudno a mabalinmo nga ibinglay kadagiti dadduma a mangtulong kadakuada nga agkalikagum a manggun-od iti pammaneknek maipapan iti ebanghelio?
Minerva K. Teichert (1888–1976), Isalakan ni Ammon dagiti Arban ti Ari, 1935–1945, oil on masonite, 35 x 48 inches. Brigham Young University Museum of Art
Mabalin nga addaan iti dakkel nga epekto nga impluensia ti pammaneknekko.
Nupay dagiti pakaammuan maipapan iti pannakapasurot a mabasbasatayo kadagiti nasantuan a kasuratan ket masansan a mangiraman kadagiti makaawis-rikna a paspasamak, iti kaungganda masansan a makitatayo dagiti indibidual nga addaan iti tured nga agsao ken mangibinglay iti pammaneknekda kadagiti dadduma. Maysa a wagas a pakaadalan kadagiti pasamak iti Alma 18–22 ket ti panangsapul kadagiti addaan dadakkel nga epekto iti maysa a tao a mangiburburay iti pammaneknekna. Mabalinmo nga isurat no ania ti masarakam iti dayagram a kas iti daytoy:
|
Imbinglay ni Ammon ti ebanghelio ken ni , a nangibinglay iti ebanghelio ken ni , ket ti banagna ket . |
Itanggaya ti Apo ti imana kaniak no agbabawiak.
Iti panaggibus ti pakaammuan maipapan iti pannakapasurot ni Lamoni, insuro ni Mormon ti sumagmamano a napateg a banag maipapan iti kababalin ti Apo. Ania ti isingasing kenka ti Alma 19:36 maipanggep iti kababalin ti Apo? Kaano a nariknam ti takiag ti Apo a nakatanggaya kenka? Kasano a matulongam dagiti ipatpategmo a makarikna ti asina?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
Alma 17–19
Kasano a maaramidmo dagiti pakaammuan kadagitoy a kapitulo a nabiag para iti pamiliam? Mabalinmo a yakem ti estoria ni Ammon a mangsalsalaknib kadagiti karnero wenno tiestoria ni Abish a mangum-ummong iti kaaduan a mangsaksi iti pannakabalin ti Dios. Nalabit a mabalin nga agdrowing dagiti miembro ti pamiliam kadagiti ladawan dagiti nadumaduma a paset ti estoria ket aramaten dagiti ladawan a mangisarita iti estoria. Anianto ti aramiden ti pamiliam a mangsurot kadagiti pagwadan da Ammon ken Abish?
Alma 18:24–39
Nalabit a mabalin a basaen nga aggigiddan dagiti miembro ti pamiliam ti Alma 18:24–39 ket ilasin dagiti kinapudno nga insuro ni Ammon ken ni Lamoni. Apay iti panangkunam nga insuro ni Ammon nga immuna dagitoy a kinapudno ken ni Lamoni? Apay a napateg nga addaantayo iti pammaneknek maipapan kadagitoy a kinapudno?
Alma 20:8–15
Ania ti masursurotayo manipud iti no kasano a nagresponde ni Lamoni iti amana? Kasano a masurottayo ti pagwadan ni Lamoni iti panangitakderna iti no ania ti umno? (Para iti sumagmamano a pagarigan, kitaen iti video “Dare to Stand Alone“ iti ChurchofJesusChrist.org.)
Alma 22:15–18
Irebyum ti Alma 20:23 tapno kitaen no ania ti siaayat nga isuko ti ama ni Lamoni tapno maisalakanna ti biagna. Kalpasanna irebyum ti Alma 22:15 tapno makitam no ania ti siaayat nga isukona tapno maawatna ti rag-o ti ebanghelio. Ania ti siaayat nga isukona tapno maam-ammona ti Dios? (kitaen iti bersikulo 18). Nalabit a makapagsurat iti maysa a plano dagiti miembro ti pamilia iti panangisuko ti sumagmamano a banag tapno naan-anay a maam-ammoda ti Dios.
Para kadagiti dadduma pay a kapanunotan iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Lasinem ken yaplikar dagiti pagbatayan. Nupay dagiti detalye ti estoria iti nasantuan a kasuratan ket mabalin a kasla saan a mayaplikar kenka, masansan a mayaplikar kenka dagiti pagbatayan kadagitoy a pakaammuan. Bayat ti panangbasam maipapan kada Ammon ken Aaron, ania dagiti pagbatayan maipapan iti panagibinglay ti ebanghelio a masarakam?
Ti asawa ni Ari Lamoni ket bimmangon manipud iti daga, a nagdaydayaw ken ni Jesus. O, Napnuan Parabur a Jesus, ni Walter Rane