Panangisuro iti Pudno a Doktrina, ni Michael T. Malm

Hunio 8–14

Alma 8–12

Umayto ni Jesucristo a Mangsubbot kadagiti Taona

Mangyawis iti paltiing ti panagadal kadagiti nasantuan a kasuratan. Isu a bayat ti panangbasam iti Alma 8–12, isuratmo dagiti impresion ti Espiritu kabayatan ti panangisurona kenka manipud kadagiti mensahe da Alma ken Amulek.

Isuratmo dagiti Impresionmo

Saanto a mapaay ti aramid ti Dios. Ngem dagiti panagkagumaantayo a makatulong iti aramidna no dadduma ket kasla mapaay—laeng, no saantayo a dagus a makita dagiti pagbalinanna a namnamaentayo. No dadduma mabalin a mariknatayo bassit a kas ken ni Alma idi inkasabana ti ebanghelio iti Ammonihah—di naawat, tinupraan, ken napapanaw. Ngem idi binilin isuna ti maysa nga anghel nga agsubli ket padasenna manen, situtured ni Alma a “nagsubli a dagus” (Alma 8:18), ket insagana ti Dios ti wagas iti sangona. Saan laeng nga impaayanna ni Alma iti taraon a kanen ken lugar a pagdagusanna, ngem insaganana pay ni Amulek, a nagbalin a kaduana nga agtartrabaho, maysa a maingel a mangsalsalaknib iti ebanghelio, ken maysa a napudno a gayyem. No maipasangotayo kadagiti tubeng ken pannakapaay bayat ti panagserbitayo iti pagarian ti Apo, mabalintayo a laglagipen no kasano a tinulongan ken inturong ti Dios ni Alma, ket makapagtalektayo a tulongannatayo ken iturongnatayonto met ti Dios, uray pay kadagiti narikut a kasasaad.

Dagiti Kapanunotan para iti Bukod a Panagadal iti Nasantuan a Kasuratan

Alma 8

Dagiti panagkagumaanko a mangibinglay iti ebanghelio ket mabalin nga agkasapulan iti panagpursigi ken kinaanus.

Uray no mabalin a di awaten ti maysa a tao ti pammaneknekmo iti ebanghelio, saan a kaipapanan daytoy a nasken a pukawem ti namnama—kalpasan ti amin, saanto a sumuko ti Apo iti dayta a tao, ket iturongnakanto no kasano ti agtignay. Iti pagarigan ni Alma, binilin isuna ti maysa nga anghel nga agsubli iti Ammonihah a mangikasaba iti ebanghelio uray no siuulpit nga inumsi idin dagiti tao . (kitaen iti Alma 8:14–16 Ania ti masursurom manipud iti pagwadan ni Alma iti panangikasabana iti ebanghelio iti baet dagiti karit ken supiat? Ania kadagiti bersikulo iti Alma 8ti mangpadakkel iti tarigagaymo a mangibinglay iti ebanghelio?

Kitaen met iti 3 Nephi 18:30–32; Jeffrey R. . Holland, “The Cost—and Blessings—of Discipleship,” Ensign wenno Liahona, Mayo 2014, 6–9.

Alma 9:18–25; 10:16–23

Ukomen ti Dios dagiti annakna a mayannurot iti silaw wenno lawag ken pannakaammo nga adda kadakuada.

Idi basbasaem ti maipapan ti wagas a panangtrato dagiti Nephite iti Ammonihah kadagiti katulongan ti Apo, nalaka a lipaten nga iti naminsan nagbibiagda iti ebanghelio, “naidaddaduma a tao ti Apo” (Alma 9:20). Kinapudnona, paset iti mensahe ni Alma kadagiti tao ti Ammonihah ket gapu ta pinatangkenda ti puspusoda iti baet ti nawadwad unay a pannakabendisionda, dakdakes ti kasasaadda ngem dagiti Lamanite, a kaaduan panagbasol iti kinakunengda. Ania iti isuro kadatayo daytoy a paggidiatan maipapan iti no kasano a kedngan ti Dios dagiti annakna?

Bayat ti panangbasam maipapan kadagiti naindaklan a bendision nga inted ti Dios kadagiti tao ni Nephi (kitaen nangnangruna iti Alma 9:19–23), utobem dagiti naindaklan a bendision nga intedna kenka. Ania ti ar-aramidem tapno agbalinka a napudno kadagitoy a bendision? Ania dagiti panagbalbaliw a mariknam a kasapulam nga aramiden?

Kitaen met iti Doktrina ken Katulagan 82:3.

Alma 11–12

Ti plano ti Dios ket plano ti pannakasubbot.

Nagusar dagiti propeta iti Libro ni Mormon iti nadumaduma a kita dagiti nagan a mangiladawan iti plano ti Dios para kadagiti annakna, a kas iti plano ti pannakaisalakan wenno ti plano ti kinaragsak. Iti Alma 11–12, imbasar da Alma ken Amulek daytoy a kas plano ti pannakasubbot. Bayat ti panangbasam kadagitoy a kapitulo utobem no apay a ti balikas a “pannakasubbot” ti naaramat a mangiladawan iti plano. Mabalin met nga isuratmo ti ababa a pakagupgopan ti no ania ti insuro da Alma ken Amulek maipapan kadagiti sumaganad nga aspeto ti plano.

Ti Pannakatnag:

Ti Mannubbot:

Panagbabawi:

Ipapatay:

Panagungar:

Panangukom:

Kitaem ti epekto dagiti balikas ni Amulek kadagiti tao (kitaen iti Alma 11:46). Apay iti panagkunam nga addaan dagitoy a pagbatayan iti kasta a nabileg nga impluensia? Kasano nga inimpluensiaan dagitoy ti biagmo?

Kitaen met iti D. Todd Christofferson, “The Resurrection of Jesus Christ,” Ensign wenno Liahona, Mayo 2014, 111–14.

Alma 12:8–18

No diakto patangkenen ti pusok, makaawatak iti ad-adu pay iti balikas ti Dios.

Mabalin a masdaaw ti sumagmamano a tattao no apay a saan nga ipakaammo ti Nailangitan nga Ama ti amin a banag kadatayo. Iti Alma 12:9–14, inlawlawag ni Alma ti maysa a posible a gapu no apay a no dadduma malapdan wenno maipaidam kadatayo dagiti kinadatdatlag ti Dios. Makatulong dagitoy a saludsod kenka a mangutob no ania ti insurona:

• Ania ti kaipapanan ti patangkenen dagiti pusotayo? Makitam kadi daytoy nga ayo iti bagim?

• Apay a mabalin nga ipaidam ti Apo ti balikasna kadagita a nangpatangken iti puspusoda?

• Kasano a napadasam ti kari ti panangawat iti “dakdakkel a paset ti balikas”? (Alma 12:10). Ania ti kayarigan dayta a padas?

• Ania ti maaramidmo tapno masiguradom a “masarakan [kenka]” ti balikas ti Dios? (Alma12:13). No adda ti balikas ti Dios kenka, ania ti epekto daytoy koma kadagiti “balikas,” “aramid,” ken “panunotmo”? (Alma 12:14).

Para iti maysa a pagarigan kadagitoy a pagbatayan, idilig ni Amulek kadagiti dadduma pay a tao ti Ammonihah. Kasano nga iladawan ti padas ni Amulek (kitaen nangnangruna iti Alma 10:1–11) no ania ti isuro ni Alma kadagitoy a bersikulo?

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.

Alma 8:10–18

Ania ti maadaltayo manipud ken ni Alma maipapan iti “agdardaras” a panagtungpal iti Apo (bersikulo 18) uray no mabalin a narigat daytoy? Tapno mapatibker daytoy a pagbatayan kadagiti babassit nga ubbing, mabalinyo ti agay-ayam a pangtedam kadagiti pangiturong para iti maysa nga aramid ket kitaen no kasano ti kadaras dagiti miembro ti pamilia a mangipatungpal iti daytoy. Kas pagarigan, mabalin a kitaem no kasano ti kapardas ti panagkupin iti maysa a lupot.

Alma 10:1–12

Ania ti maadaltayo manipud iti padas ni Amulek kadagitoy a bersikulo? Ania ti epekto ti pammaneknekna kadagita a dumdumngeg? Awisem dagiti miembro ti pamiliam nga agaramid iti plano a mangaramid iti maysa a banag iti daytoy a lawas a maibatay iti no ania ti naadalda manipud iti pagwadan ni Amulek.

Alma 10:22–23

Ania ti masursurotayo manipud kadagitoy a bersikulo maipanggep iti impluensia ti grupo dagiti nalinteg a tao iti maysa a nadangkes a siudad?

Alma 11:34–37

Ania ti pagdumaan ti panangisalakan ni Jesucristo kadatayo iti basbasoltayo ken manipud iti basbasoltayo? (kitaen iti Helaman 5:10; kitaen met iti 1 Juan 1:9–10). Tapno mailadawan no ania ti insuro kenka ni Amulek, mabalinmo nga ibinglay ti estoria iti rugi ti mensahe ni Elder Allen D. Haynie “Remembering in Whom We Have Trusted” (Ensign wenno Liahona, Nob. 2015, 121–23). Kasano nga isalakannatayo ni Jesucristo manipud kadagiti basoltayo?

Para kadagiti dadduma pay a kapanunotan iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Panangpadur-as iti Bukod a Panagadal

Adalem dagiti balikas dagiti propeta ken apostol iti ud-udina nga aldaw. Basaen ti insuro dagiti propeta ken apostol iti ud-udina nga aldaw maipapan kadagiti kinapudno a masarakam kadagiti nasantuan a kasuratan. Kas pagarigan, mabalin a mangilasinka iti maysa a topiko iti Alma 8–12 ket kitaen dayta a topiko iti kallabes unay a sapasap a komperensia (kitaen iti Panangisuro iti Wagas ti Mangisalakan, 21).

Ladawan ni Alma a makipangpangan ken ni Amulek ni Dan Burr