Panangisuro iti Pudno a Doktrina, ni Michael T. Malm

Hunio 8–14

Alma 8–12

Umayto ni Jesucristo a Mangsubbot kadagiti Taona

Bayat ti panangbasam no ania ti insuro da Alma ken Amulek kadagiti tao ti Ammonihah, ania ti mariknam a naipangpangruna a napateg kadagiti ubbing a sursuruam?

Isuratmo Dagiti Impresionmo

Yawis ti Panagbibinninglay

Awisem dagiti ubbing a mangiladawan no ania ti aramiden dagiti misionario ken ibagada kenka maipapan iti asino man nga ammoda nga agserserbi iti mision. Ania ti isuro dagiti misionario kadagiti tao? Tulongam dagiti ubbing a makaawat a misionario da Alma ken Amulek a nangibinglay iti ebanghelio kadagiti tao ti Ammonihah.

Isuro ti Doktrina: In-inaudi nga Ubbing

Alma 8

Maibinglayko ti ebanghelio.

Nagdaliasat ni Alma iti intero a daga a mangikasaba iti ebanghelio, ket nagkasaba ni Amulek iti bukodna a siudad kadagiti gagayyem ken kaarrubana. Kasano a maparegtam dagiti ubbing a mangsurot iti pagwadanda ken mangibinglay iti ebanghelio kadagiti dadduma?

Dagiti Mabalin nga Aktibidad

• Aggigiddan a mangrebyu iti umuna a kagudua ti “Kapitulo 22: Ti Mision ni Alma iti Ammonihah” (Dagiti Estoria iti Libro ni Mormon, 58–63; kitaen met ti maitutop a video iti ChurchofJesusChrist.org). Awisem dagiti ubbing nga aggiiniggemda kadagiti takiagda iti kada paris ken agpammarangda nga isuda da Amulek ken Alma, nga agkadua a nangisuro iti ebanghelio, bayat ti panagkansionda iti maysa a kanta maipapan iti aramid ti misionario, kas iti “I Want to Be a Missionary Now” (Children’s Songbook, 168).

• Tulongam dagiti ubbing a mangulit iti sumagmamano a daras ti maysa a kinapudno ti ebanghelio, kas iti “Agpaneknek ken ni Cristo ti Libro ni Mormon” wenno “Ammok nga ay-ayatennak ni Jesus.” Kalpasanna awisem ti tunggal ubing a mangpraktis iti panangibinglay iti daytoy a kinapudno iti maysa a tao iti klase. Kas paset daytoy nga aktibidad, mabalin a tulongam dagiti ubbing a mangileppas iti panid ti aktibidad iti daytoy a lawas.

• Kiddawem kadagiti ubbing a mangibaga kenka maipapan iti maysa a banag nga imbinglayda iti maysa a miembro ti pamilia wenno gayyem—kas iti maysa nga ay-ayam wenno kendi. Tulongam ida a mangilista iti sumagmamano a napapateg a banag a mabalintayo nga ibinglay kadagiti dadduma maipapan ken ni Jesucristo. Ilawlawag a gapu ta napateg unay ti ebanghelio, napan ni Alma tapno mangibinglay kadagiti tao iti adu a sabsabali pay a siudad tapno masursuruanda no kasano ti agbalin a naragsak.

Alma 8:18–22

Makapagbalinak a maysa a nasayaat a gayyem.

Ti panagserbi ni Amulek ken ni Alma ket maysa a nasayaat a pagwadan kadagiti ubbing no kasano a mabalinda ti agayat ken agserbi kadagiti dadduma.

Dagiti Mabalin nga Aktibidad

• Awisem ti maysa nga ubing nga agpammarang a ni Amulek, ken ti sabali pay nga ubing nga agpammarang a ni Alma bayat ti panangisaritam iti estoria iti Alma 8:18–22. Agpatulongka kadagiti ubbing a mangisarita iti estoria, ken awisem dagiti nadumaduma pay nga ubbing nga agpammarang nga isuda da Alma ken Amulek. Kasano a maysa a nasayaat a gayyem ni Amulek ken ni Alma? Kiddawem kadagiti ubbing a mangisarita iti maipapan iti no kasano a nagbalin a gayyemda ti maysa a tao. Kasano ti panagriknada iti dayta a padas? Apay a kayat ti Dios nga agbalintayo a nasayaat a gagayyem kadagiti dadduma?

• Mangsapul wenno mangidrowing iti maysa a ladawan a mangibagi iti panaggayyem (kas iti dua a tao nga aginarakup wenno maysa a puso), ken gettengem daytoy tapno agbalin a pedpedaso ti puzzle. Iti likud ti tunggal pedaso ti puzzle, isurat ti maysa a banag nga inaramid da Alma ken Amulek tapno agbalinda a nasayaat nga aggayyem wenno dagiti banag a mabalintayo nga aramiden tapno agbalin a nasayaat a gayyem. Awisem dagiti ubbing nga agsisinnublat a mangpili iti maysa a pedaso ken inayon daytoy iti puzzle bayat ti panangbasam iti no ania ti naisurat iti likud daytoy. Tulongam ida a mangpanunot kadagiti tao a mabalinda a pakigayyeman. Paneknekam a ni Jesucristo ti kaindaklan a gayyem a maaddaantayo.

Makapagbalintayo a nasayaat a gagayyem kadagiti dadduma.

Alma 11:43–44

Kalpasan ti ipapatay, agungarakto.

Insuro ni Amulek kadagiti tao ti Ammonihah maipapan iti Panagungar. Kasano a matulongam dagiti ubbing a sursuruam a makaawat no ania ti kaipapanan ti mapagungar?

Dagiti Mabalin nga Aktibidad

• Usarem ti imam a mangibagi iti espiritu, ket usarem ti guantes a mangibagi iti maysa a bagi. Ikkatem ti imam iti guantes tapno ipakita kadagiti ubbing nga agsinanto dagiti espiritu ken bagitayo iti ipapatay. Kalpasanna isublim ti imam iti guantes tapno ipakita nga agtiponto manen dagiti espiritu ken bagitayo iti Panagungar. Pagsisinnublatem dagiti ubbing a mangisuot kadagiti guantes ken mangikkat iti daytoy bayat ti panangibasam iti Alma 11:43 kadakuada. Ipakitam ti ladawan ni Maria ken ti Nagungar a Jesucristo (Libro ti Arte ti Ebanghelio, num. 59), ken paneknekam nga inaramid a posible ni Jesucristo ti panagungar ti tunggal maysa.

• Awisem dagiti ubbing nga agdrowing kadagiti ladawan dagiti gagayyemda wenno dagiti miembro ti pamiliada, agraman dagiti asideg a kabagyanda. Bayat ti panangibinglay dagiti ubbing kadagiti ladawanda, itudoda iti tunggal gayyem wenno miembro ti pamilia nga indrowingda ket llawlawagda nga agungarto isuna. Paneknekam nga inaramid a posible ni Jesus a makadennatayo dagiti pamiliatayo iti agnanayon.

Isuro ti Doktrina: In-inauna nga Ubbing

Alma 8–10

Maibinglayko ti ebanghelio.

Imbinglay da Alma ken Amulek ti ebanghelio, uray pay no saan a nalaka daytoy. Kasano a makaparegta ti tured ken pammatida kadagiti ubbing a sursuruam?

Dagiti Mabalin nga Aktibidad

• Iti bukodmo a balikas, gupgopem dagiti pasamak iti Alma 8–10. Pumili iti sumagmamano a pagbatayan manipud kadagitoy a pasamak a makatulong kadagiti ubbing a mangibinglay iti ebanghelio, kas iti kinapasnek (kitaen iti Alma 8:8–13), mangipampaneknek ti maipapan ken ni Cristo (kitaen iti Alma 9:26–27), ken ti kaadda iti maysa a kadkadua (kitaen iti Alma 10:7–11). Awisem dagiti ubbing a mangbasa kadagiti napili a bersikulo ket ibagam no ania ti masursuroda maipapan iti panangibinglay iti ebanghelio. Apay a napateg nga ibagatayo kadagiti dadduma maipapan iti ebanghelio?

• Awisem dagiti ubbing a mangibinglay kadagiti padas idi nangibinglayda ti ebanghelio iti maysa a tao, wenno ibinglaymo ti bukodmo a padas. Awisem dagiti ubbing a dumngeg kadagiti wagas a pakapagsaganaanda a mangibinglay iti ebanghelio bayat ti panangkansionda iti maysa a kanta maipapan iti aramid ti misionario, kas iti “We’ll Bring the World His Truth” (Children’s Songbook, 172). Apay a kayat ti Nailangatan nga Ama nga ibinglaytayo ti ebanghelio? Tulongam dagiti ubbing nga agplano kadagiti wagas a pangibinglayanda iti ebanghelio kadagiti gagayyemda, a kas iti panangted kadakuada iti kopia ti Libro ni Mormon wenno panangawis kadakuada iti maysa nga aktibidad ti Simbaan. Ikkam ida iti umdas a panawen a mangyakem iti no ania ti mabalin nga isao wenno aramidenda kadagitoy a kasasaad.

Alma 11–12

Ti plano ti Dios ket maysa a plano ti pannakasubbot.

Kasano nga usaremto ti Alma 11–12 a “[maipakaammo] [kadagiti ubbing] ti plano ti pannakasubbot”? (Alma 12:30).

Dagiti Mabalin nga Aktibidad

• Isurat iti pisarra dagiti sumagmamano a pagbatayan a mainaig iti plano ti pannakasubbot a masarakan iti Alma 11–12, kas iti Pannakatnag da Adan ken Eva, ti Pannubbot ni Jesucristo, panagbabawi, ipapatay, panagungar, ken panangukom. Basaen ti sumagmamano a bersikulo manipud iti Alma 11 wenno 12 a mangisuro maipapan kadagiti pagbatayan, ken ikkan dagiti ubbing iti gundaway a mangidrowing iti ladawan a mangibagi iti tunggal pagbatayan. Ania ti akem ti Mangisalakan iti daytoy a plano? Kalpasanna awisem dagiti ubbing nga agusar kadagiti ladawan tapno mangyakem iti panangisuro iti maysa a gayyem maipapan iti plano ti Dios.

Alma 12:10

No saanko patangkenen ti pusok, makaawatak ti ad-adu pay a balikas ti Dios.

No maipapan iti panagsursuro kadagiti naespirituan a kinapudno, napateg ti kasasaad ti pusotayo kas iti kinapateg dagiti kabaelan dagiti panunottayo.

Dagiti Mabalin nga Aktibidad

• Aggigiddan a basaen ti Alma 12:10, ken paglilinnawagan no ania ti kayat a sawen ti “patangkenen” dagiti pusotayo. Apay a narigrigat a makasursuro manipud iti Dios ti natangken a puso?

• Tapno mailadawan daytoy a pagbatayan, ipakita kadagiti ubbing ti maysa nga espongha ken maysa a bato ken saludsodem kadakuada no ania ti nasaysayaat nga agsagepsep iti danum. Kasano a maipakitatayo iti Apo a kayattayo a mapalukneng dagiti pusotayo a kas iti espongha?

Yallukoy ti Panagsursuro iti Pagtaengan

Awisem dagiti ubbing a mangsapul kadagiti gundaway a pangibinglayan iti ebanghelio wenno mangtulong ti sabali a tao iti daytoy a lawas.

Panangpadur-as iti Panangisurotayo

Iburaymo ti pammaneknekmo iti klasem. Mabalin a simple ti pamaneknek a kas iti “Ammok nga ay-ayaten ti Nailangitan nga Ama ti tunggal maysa kadakayo” wenno “Nasayaat ti riknak iti kaunggak bayat ti panagsursurok maipapan ken ni Jesucristo.” (Kitaen met iti Panangisuro iti Wagas ti Mangisalakan, 11.)