Minerva K. Teichert (1888–1976), Pangpakada a Bitla ni Ari Benjamin,1935, oil on masonite, 36 x 48 inches. Brigham Young University of Art

Abril 13–19

Mosiah 1–3

“Napno iti Ayat iti Dios ken iti Amin a Tao”

Nangted iti maysa a gapu ni Ari Benjamin iti pannakaisurat dagiti naespirituan nga impresion: “Ta saan koma a mabalin a malagip ti amatayo, a ni Lehi, amin dagitoy a banag, a naisurona kadagiti annakna, no saan a gapu iti tulong dagitoy a pinanid” (Mosiah 1:4).

Isuratmo dagiti Impresionmo

No mangngegmo ti balikas nga ari, mabalinmo a panunoten maipapan kadagiti korona, kastilio, katulongan, ken trono. Iti Mosiah 1–3, mabasamto ti maipapan iti nadumaduma a kita ti ari. Imbes nga agbiag a di makipagtrabaho kadagiti tattaona, ni Ari Benjamin ket “nagbannog kadagiti bukod[na] nga ima” (Mosiah 2:14). Imbes nga agserbi dagiti dadduma kenkuana, nagserbi kadagiti taona “iti amin a kabaelan, panunot ken pigsa nga inted ti Apo [kenkuana]” (Mosiah 2:11 Saan a tinarigagayan daytoy nga ari a dayawen dagiti taona isuna; ngem ketdi, insurona ida nga agdaydayawda iti maysa nga Ari a nabilbileg ngem isuna, agsipud ta naawatanna nga isu “ti Apo a Mannakabalin nga agturay” (Mosiah 3:5). Kas iti amin a naindaklan a dadaulo iti pagarian ti Dios, dagiti balikas ken pagwadan ni Ari Benjamin ti mangitudo kadatayo iti Nailangitan nga Ari, nga isu ti Mangisalakan, ni Jesucristo. Impaneknek ni Ari Benjamin a ni Jesus “bimmaba manipud iti langit” ket napan “nakilangen kadagiti tao, nagaramid kadagiti naisangsangayan a milagro. … Ket adtoy, agdisnudo nga umay, tapno maisalakan dagiti annak ti tao babaen ti pammati iti naganna” (Mosiah 3:5, 9).

Dagiti Kapanunotan para iti Bukod a Panagadal iti Nasantuan a Kasuratan

Mosiah 2:1–9

Ti panangawat iti balikas ti Dios ket agkasapulan iti panagsagana.

Idi nangibaon ni Ari Benjamin iti balikas a tinarigagayanna nga isarita kadagiti tattaona, immay ti adu a tattao “ket saan a mabilang amin ida” (Mosiah 2:2). Immayda, a napasenpaset, gapu iti panagyaman ken ayatda para iti dadauloda. Ngem ti napatpateg, immayda tapno masuruan iti balikas ti Dios.

Bayat ti panangbasam iti Mosiah 2:1–9, sarakem no ania ti inaramid dagiti tattao a nangipakita nga impategda ti balikas ti Dios. Ania ti kiniddaw ni Ari Benjamin nga aramidenda tapno agsagana a dumngeg iti balikas ti Dios? (kitaen iti bersikulo 9). Kasano a nasaysayaat a maisaganam ti bagim nga umawat iti balikas ti Dios iti bukod ken sangapamiliaan a panagadalyo ken kabayatan dagiti miting ti Simbaan?

Kitaen met iti Mateo 13:18–23; Alma 16:16–17.

Mosiah 2:10–16

No agserbiak kadagiti dadduma, agserserbiak pay iti Dios.

Ikarigatam kadi ti maaddaan iti panawen nga agserbi wenno tarigagayam a ti panagserbim ket mangisangbay kenka iti ad-adu pay a rag-o? Ania iti panagkunam a sungbat koma ni Ari Benjamin no saludsodem kenkuana no apay a nagserbi isuna iti amin “kabaelan, panunot, ken pigsa[na]”?? (Mosiah 2:11). Bayat ti panangbasam iti Mosiah 2:10–26, ilasinmo dagiti kinapudno nga insuro ni Ari Benjamin maipapan iti panagserbi ket utoben no kasano a mausarmo dagitoy iti biagmo. Kas pagarigan, ania ti kaipapanan kenka tapno maammuam a no agserbika iti dadduma a tao,agserserbika pay iti Dios?(kitaen iti Mosiah 2:17). Mangpanunot iti maysa a wagas a pakapagserbiam iti maysa a tao iti daytoy a lawas!

Kitaen met ti Mateo 25:40

No agserbiak kadagiti dadduma, agserserbiak pay iti Dios.

Mosiah 3:1–20

Maparmekko ti nailubongan a tao ket agbalinak a santo babaen ti Pannubbot ni Jesucristo.

Ni Ari Benjamin, kas kadagiti amin a propeta, ket nagpaneknek maipapan ken ni Jesucristo tapno dagiti taona “umawat iti pannakapakawan dagiti basolda, ken agrag-odanto iti napalalo” (Mosiah 3:13). Kasta met nga insurona a ti Mangisalakan, babaen ti Pannubbotna, saan laeng a maaramidnatayo a nadalus ngem mangted pay kadatayo iti bileg a mangpukaw iti “nailubongan a tao ” ket agbalin a “maysa a santo” (Mosiah 3:19; kitaen met iti Pangiwanwan iti Nasantuan a Kasuratan, Nailubongan a Tao,” scriptures.ChurchofJesusChrist.org).

Elder David A. Inlawlawag ni Elder David A. Bednar: “Ti Pannubbot ni Jesucristo a mangted iti agpada a pannakadalus ken pannakasubbot a bileg a makatulong kadatayo a mangparmek iti basol ken pangpasanto ken pangpatibker a bilega mangtulong kadatayo nga agbalin a nasaysayaat ngem iti kabaelantayo babaen ti panagpannuray laeng iti bukodtayo a pigsa. Ti awan patinggana a Pannubbot ket agpaay iti agpada a managbasol ken santo iti tunggal maysa kadatayo” (“Clean Hands and a Pure Heart,” Ensign wenno Liahona, Nob. 2007, 82).

Dagitoy ti sumagmamano a saludsod nga utoben bayat ti panangbasam iti pammaneknek ni Ari Benjamin maipapan iti Mangisalakan iti Mosiah 3:1–20:

• Ania ti masursurok manipud kadagitoy a bersikulo maipapan iti Mangisalakan ken ti misionna?

• Kasano a natulongannak ni Jesucristo a mangparmek iti basol? Kasano a natulongannak a mangbalbaliw ti kinataok ket agbalin nga ad-adda a kasla maysa a santo?

• Ania ti masursurok maipapan iti panagbalin a santo manipud iti Mosiah 3:19?

Mosiah 3:8

Apay nga intudo ni Ari Benjamin ni Jesus a kas “ti Ama iti langit ken daga”?

Inlawlawag niPresidente Joseph F. Smith: “Ni Jesucristo, nga am-ammotayo pay a kas Jehova, isu ti agipatpatungpal iti Ama, ni Elohim, iti aramid ti panagparsua. … Ni Jesucristo, nga isu ti Namarsua, ket agtultuloy nga inawaganna ti Ama ti langit ken daga … ; ket agsipud ta agnanayon ti kababalin dagiti pinarsuana Isu ket umisu unay a maawagan iti Agnanayon nga Ama ti langit ken daga” (Teachings of Presidents of the Church: Joseph F. Smith [1998], 357).

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.

Mosiah 1:1–7

Kasano a binendisionan dagiti pinanid a gambang ken dagiti pinanid ni Nephi dagiti tao ni Ari Benjamin? Kasano a bendisionan dagiti nasantuan a kasuratan ti pamiliatayo?

Mosiah 2–3

Mabalin a makaparagsak para iti pamiliam ti mangparnuay iti lugar a pangyebkasan ni Ari Benjamin iti mensahena. Mabalinmo ti agaramid iti bassit a torre ket pagsisinnublatem dagiti miembro ti pamilia nga agbasa kadagiti balikas ni Ari Benjamin kabayatan ti panagtakderna ditoy. Mabalin a dumngeg dagiti dadduma pay a miembro ti pamilia manipud iti uneg ti naaramid a tolda.

Mosiah 2:9–19

Ania ti masursurotayo maipapan iti serbisio manipud kadagiti pannursuro ken padas ni Ari Benjamin? Ania ti mariknatayo a makaparegta nga aramiden?

Mosiah 2:15–25

Makatulong kadi iti pamiliam no adda maysa a panaglilinnawag maipapan iti kinapakumbaba? Apay a saan nga impannakkel ni Ari Benjamin maipapan iti amin nga inaramidna? Ania ti masursurotayo manipud kadagiti pannursurona maipapan iti relasiontayo iti Dios?

Mosiah 2:36–41

Ania ti insuro ni Ari Benjamin maipapan kadagiti bunga ti pannakaammo iti kinapudno ngem saan nga agbibiag iti daytoy? Ania ti insurona maipapan no kasano a magun-odtayo ti pudno a ragsak?

Mosiah 3:19

Ania ti kasapulantayo nga aramiden tapno agbalintayo a santo? Ania a kababalin manipud iti daytoy a bersikulo ti maipamaysatayo a padur-asen kas maysa a pamilia?

Para kadagiti dadduma pay a kapanunotan iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Panangpadur-as iti Bukod a Panagadal

Mangitudingka kadagiti nalaklaka a ragpaten a panggep a tun-oyen [goal]. Ti panangbubos iti uray sumagmamano laeng a minuto iti tunggal aldaw a panagadal kadagiti nasantuan a kasuratan ket mangbendision iti biagmo. Ikumit ti panagadal iti tunggal aldaw, ket mangsapul iti wagas a mangipalagip iti bagim iti panagkumitmo.

Ti Bitla ni Ari Benjamin, ni Jeremy Winborg