Minerva K. Teichert (1888–1976), Pangpakada a Bitla ni Ari Benjamin, 1935, oil on masonite, 36 x 48 inches. Brigham Young University of Art

Abril 13–19

Mosiah 1–3

“Napno iti Ayat iti Dios ken Amin a Tao”

Bayat ti panangbasam iti Mosiah 1–3, agkararagka tapno maammuan no kasano a matulongam dagiti ubbing a sursuruam a maawatanda dagiti napapateg a kinapudno nga insuro ni Ari Benjamin. Isuratmo dagiti nauneg a pannakaammo ken pannakaawat [insights] nga umay kenka manipud iti Espiritu Santo.

Isuratmo dagiti Impresionmo

Yawis ti Panagbibinninglay

Ipakitam ti ladawan ni Ari Benjamin a mangisursuro, a masarakan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia. Kiddawen kadagiti ubbing a mangibinglay no ania ti ammoda maipapan iti daytoy a ladawan.

Isuro ti Doktrina: In-inaudi nga Ubbing

Mosiah 2–3

No agserbiak kadagiti dadduma, agserserbiak met iti Dios.

Anianto ti aramidem a mangtulong kadagiti ubbing tapno maawatanda a ti panagserbi kadagiti dadduma ket maysa pay a wagas a panagserbi iti Dios?

Dagiti Mabalin nga Aktibidad

• Pagsisinnublatem dagiti ubbing nga agusar iti korona (addaan iti pagarigan ti panid ti aktibidad iti daytoy a lawas) ken agpammarangda a ni Ari Benjamin a nakatakder iti maysa a tugaw wenno bangkito. Mabalinda nga aramiden daytoy bayat ti panangibinglaymo iti sumagmamano a banag nga insuro ni Ari Benjamin kadagiti taona, a masarakan iti Mosiah 2–3. Kitaen met iti “Kapitulo 12: Ari Benjamin” (Dagiti Estoria iti Libro ni Mormon, 32–35 , wenno ti maitutop a video iti ChurchofJesusChrist.org.)

• Awisem dagiti ubbing nga ulitenda a saggaysa ti sumaganad a binatog iti sumagmamano a balikas bayat iti panagsipatda iti tunggal silaba [syllable] a kagiddandaka: “No agserbikayo iti padayo a tao, agserserbikayo laeng iti Dios” (Mosiah 2:17). Uliten daytoy agingga a nasursuro dagiti ubbing ti sumagmamano wenno amin a balikas. Paneknekam a no tulongantayo dagiti dadduma, tultulongantayo met ti Nailangitan nga Ama ken ni Jesus ken parparagsakentayo Ida. Kiddawem kadagiti ubbing a mangibinglay kadagiti wagas a pakatulonganda kadagiti dadduma.

• Tulongam dagiti ubbing a manguged kadagiti imada iti piraso ti papel ket mangidrowingda iti maysa a banag a maaramidda nga agserbi kadagiti pamiliada. Aggigiddan a mangkansion iti maysa a kanta maipapan iti panagserbi, kas iti “When We’re Helping” (Children’s Songbook, 198).

Insuro ni Ari Benjamin a makapagserbitayo iti Dios babaen ti panagserbi kadagiti dadduma.

Mosiah 2:19–25

Aggapu ti Nailangitan nga Ama dagiti amin a bendisionko.

Bayat ti panangbigbig dagiti ubbing ti Dios a kas pagtaudan ti amin a bendision,agbalindanto a napakumbaba ken managyaman.

Dagiti Mabalin nga Aktibidad

• Ilawlawag nga insuro ni Ari Benjamin nga aggapu amin dagiti bendisiontayo iti Nailangitan Nga Ama. Awisem dagiti ubbing a dumngeg iti maysa a bendision nga inted kadatayo ti Nailangitan Nga Ama bayat ti panangbasam iti Mosiah 2:21. Ania dagiti dadduma pay a bendision nga inted ti Nailangitan nga Ama kadatayo? Kasano a maipakitatayo nga agyamyamantayo para kadagitoy a banag? (kitaen iti Mosiah 2:22).

• Agay-ayam iti maysa nga ay-ayam a pangipasaan dagiti ubbing iti maysa a banag [object] bayat ti panagkansionda iti maysa a kanta maipapan iti panagyaman wenno dumngeg iti maysa a musika (kitaen iti “Gratitude” ti indeks dagiti topiko iti Children’s Songbook). Agsardeng ti panagkanta wenno isardeng ti musika , ken awisem ti asino man a nakaiggem iti daytoy a banag a mangibinglay iti maysa a bendision a pagyamyamananna.

Mosiah 3:1–20

Mamatiak ken ni Jesucristo.

Imbaga ti maysa nga anghel ken ni Ari Benjamin dagiti napapateg a kinapudno maipapan iti biag ken panagserbi ni Jesucristo. Sapulem kadagitoy a bersikulo dagiti kinapudno maipapan ken ni Jesus a mariknam a napateg a sursuruen dagiti ubbing.

Dagiti Mabalin nga Aktibidad

• Iparang dagiti ladawan ti sumagmamano a pasamak a nadakamat iti Mosiah 3:5–10 (kitaen, kas pagarigan, iti Libro ti Arte ti Ebanghelio, num. 30, 41, 42, 57, 59). Saludsodem kadagiti ubbing no ania ti mapaspasamak kadagiti ladawan, ken tulongam ida no kasapulan. In-inut a basaem ti Mosiah 3:5–10, ket awisem dagiti ubbing a mangingato kadagiti imada no mabasam ti maipapan iti maysa kadagiti ladawan. Awisem dagiti ubbing a mangibinglay kadagiti sabali pay a banag nga ammoda nga inaramid ni Jesus idi adda Isuna iti daga.

• Agdrowing ti maysa nga init iti ngatuen ti pisarra a mangibagi iti langit. Agdrowing kadagiti sumagmamano a dana a mangiturong iti nadumaduma a lugar iti lawlaw ti pisarra ngem maysa laeng a dana nga agturong iti langit. Kiddawem kadagiti ubbing a mangsapul iti dayta a dana ket ikabil ti maysa a ladawan ni Jesus iti daytoy. Basaen ti Mosiah 3:17, ken paneknekam a ti panangsurot ken ni Jesucristo ti kakaisuna a dalan nga agsubli iti Nailangitan nga Ama.

Isuro ti Doktrina: In-inauna nga Ubbing

Mosiah 2:11–18

No agserbiak kadagiti dadduma, agserserbiak met iti Dios.

Kasano a matulongam dagiti ubbing a makasursuro manipud iti pagwadan ti panagserbi ni Ari Benjamin?

Dagiti Mabalin nga Aktibidad

• Ipakita kadagiti ubbing ti maysa a ladawan ni Ari Benjamin a mangisursuro kadagiti tao (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia wenno Libro ti Arte ti Ebanghelio, num. 74). Tulongam dagiti ubbing a mangbirok iti Mosiah 2:11–18 tapno maammuan no ania ti inaramid ni Ari Benjamin a makapagserbi. Apay a nagserbi isuna kadagiti taona? Apay a nasken nga agserbitayo iti tunggal maysa?

• Isurat iti pisarra dagiti ragup ti balikas manipud iti Mosiah 2:16–17 nga awan dagiti sumagmamano a balikas. Awisem dagiti ubbing a mangkita kadagiti awan a balikas iti nasantuan a kasuratan. Kiddawem kadakuada a mangilawlawag no ania ti kaipapanan kadakuada dagitoy a bersikulo. Awisem ida a mangibinglay kadagiti padas idi nagserbi kadakuada dagiti dadduma wenno nagserbida kadagiti dadduma. Kasano ti riknada kadagitoy a padas?

• Ikkam dagiti ubbing kadagiti piraso ti papel a pagsuratanda kadagiti wagas a pakapagserbianda kadagiti miembro ti pamiliada, ken ikkam ti tunggal ubing iti maysa a bag a pangikabilanna kadagiti papel. Allukoyem dagiti ubbing a mangiruar iti maysa a piraso ti papel iti bag iti tunggal aldaw ken aramidem dayta nga serbisio para iti maysa a tao.

Mosiah 2:15–25

Nasken a saanko nga ipannakkel ti panagserbik ken dagiti nasayaat nga aramidko.

Panunotem no kasano a matulongam dagiti ubbing a sursuruam a makaawat a nasken a maparegta ti panagserbitayo babaen ti panagayattayo kadagiti dadduma ken iti Dios.

Dagiti Mabalin nga Aktibidad

• Awisem dagiti ubbing a mangibinglay iti no kasano a mailawlawagda ti balikas nga agpannakkel, wenno tulongam ida a mangsapul ti kayulogan iti maysa a diksionario. Tulongam ida a mangbirok iti Mosiah 2:15–24, a mangsapsapul kadagiti rason no apay a saan a nagpannakkel ni Ari Benjamin maipapan ti panagserbina kadagiti dadduma. Apay a nasken nga agserbitayo kadagiti dadduma? Kalpasan ti panangibinglay dagiti ubbing kadagiti kapanunotanda, tulongam ida a makaawat a nasken nga agkalikagumtayo nga agserbi kadagiti dadduma gapu ta ay-ayatentayo ida ken ti Dios, saan a gapu ta nasayaatto ti panagkita kadatayo dagiti dadduma.

• Kiddawem kadagiti ubbing a mangibinglay kadagiti kasasaad a mabalin a pagpannakkelan wenno pagpang-asan ti maysa a tao maipapan iti maysa a banag. Apay a biddut ti agpannakkel kadagita a kasasaad? Awisem ida a mangusar iti balakad manipud iti bitla ni Ari Benjamin iti Mosiah 2:15–24 a makatulong kadakuada kadagiti sungbatda.

Mosiah 3:19

Dalusannak ni Jesuscristo manipud iti basol ken tulongannak nga agbalin a maysa a santo.

Tapno agbalintayo a kas iti Nailangitan nga Amatayo, kasapulantayo ti ad-adda pay ngem iti panangdalus manipud kadagiti basbasoltayo—nasken nga agbalbaliw dagiti puspusotayo. Kas iti insuro ni Ari Benjamin, nasken a parmekentayo dagiti managbasol a tarigagaytayo ket agbalin a sasanto babaen iti Pannubbot ti Mangisalakan.

Dagiti Mabalin nga Aktibidad

• Mangidrowing ti dua a tao iti pisarra—maysa a mangibagi iti “nailubongan a tao” ken maysa pay timangibagi iti “santo.” (Mabalin a kasapulam ti mangilawlawag iti kaipapanan dagitoy a balikas.) Aggigiddan a mangbasa iti Mosiah 3:19, ket awisem dagiti ubbing a mangsapul kadagiti panagbalbaliw a kasapulan nga aramiden ti nailubongan a tao tapno agbalin a maysa a santo. Ania dagiti dadduma pay a balikas ken ragup ti balikas a mabalin a kasapulan dagiti ubbing a makatulong iti pannakaawatda?

• Nakatulong kadi dagiti ubbing a sursuruam kadagiti nagannakda a mangisagana iti taraon babaen iti panangusar iti resipe? No kasta, mabalin nga awisem ida a mangusar iti Mosiah 3:19 tapno makaaramidda iti “resipe” para iti no kasano a makapagbalintayo a kas ken ni Jesucristo. Apay a ti Pannubbot ni Jesucristo ti kapatgan a “ramen”?

Yallukoy ti Panagsursuro iti Pagtaengan

Awisem dagiti ubbing a mangusar iti panid ti aktibidad iti daytoy a lawas tapno mangibinglay kadagiti pamilia wenno gagayyemda no kasano ti panangsurotda iti pagwadan ni Ari Benjamin ken panagserbi kadagiti dadduma.

Panangpadur-as iti Panangisurotayo

Mangted pagsayaatan kadagiti ubbing ti panangdagdagullit. Saanka nga agbuteng a mangulit kadagiti aktibidad iti mamin-adu a gundaway nangnangruna kadagiti in-inaudi nga ubbing. Ti panangdagdagullit ket makatulongto kadagiti ubbing a manglagip iti no ania ti masursuroda.