Ilo Jerbal eo Am̧ an Anij jān Walter Rane

Eprōļ 20–26

Mosaia 4–6

“Juon Oktak Ekajoor”

Riiti Mosaia 4–6, im je en̄jake ko rej im̧we eok. Ilo am̧ bōk en̄jake ko rej im̧we eok, komaron̄ kajjitōk, āinwōt Elder Richard G. Scott ekar ļōm̧ake, “Elōn̄ ke bar men ko Ij aikuj in jeļā? (“To Acquire Spiritual Guidance,” Ensign ak Liahona, Nov. 2009, 8).

Je En̄jake ko Rej Im̧we Eok

Kajjitōk bwe ren Kwaļo̧k

Komaron̄ in jino ekōnono eo an kūlaaj eo am̧ ilo am̧ kajjitōk ippān ro uwaan kūlaaj eo n̄an kwaļo̧k juon iaan katak ko an Kiin̄ Benjamin jān Mosaia 4–5 eo me rekōņaan bwe en em̧m̧anļo̧k aer mour kake ilo mour ko aer.

Katakin Katak eo

Mosaia 4:1–12

Kōn Jisōs Kraist, jemaron̄ in bōk im joļo̧k juon jeorļo̧k in jerawiwi ko ad.

• Jet armej rekar bōd kōn ļōmņak in bwe ukweļo̧k ej bōk jidik kijejeto; ro jet rej tōmak ej bōk eļap kijejeto. N̄an jipan̄ ro uwaak kūlaaj meļeļeļļo̧k kōn ta eo emenin aikuj n̄an bōk juon jeorļo̧k bōd in jerawiwi ko, komaron̄ kajjitōk ippāer n̄an kappukot katak ko an Kiin̄ Benjamin ilo Mosaia 4:1–12, lale jekjek ko ium̧win ta eo Jemedwōj Ilan̄ ej letok juon jeorļo̧k in jerawiwi ko ad. Ro uwaan kūlaaj eo remaron̄ kōlaajraki ilo boot eo ta ko rekar loi. Kajjitōk ippāer n̄an ļōmņak kōn juon bwebwenato n̄an jipan̄ kōmeļeļeik ta eo rekar ekkatak. N̄an waanjon̄ak, remaron̄ keidi jeorļo̧k bōd in jerawiwi ko n̄an juon rim̧uri “bar kōļļā” ak joļo̧k juon m̧uri. Ak remaron̄ keidi im bar bōk juon jeorļo̧k in jerawiwi ko n̄an kōjparok juon men eo ej aikuj kōkāāle aolep iien, āinwōt juon jikin kallib ak juon m̧ōn jokwe.

• Ļōmņak im kajjitōk ippān ro uwaan kūlaaj eo ta eo renaaj ba n̄an juon eo ej ļōmņak eļan̄n̄e ukweļo̧k ej juon ewōr tokjān. Ewi wāween aer jipan̄ juon eo ej ebbeer im en̄jake bwe anjo̧ jān jerawiwi im mōjņo̧ eban tōprak? Komaron̄ jipan̄ kōpooj ro uwaan kūlaaj eo n̄an kain bwebwenato rot in ilo am̧ kajjitōk ippāer n̄an joļo̧k jejjo minit kappukoti naan ko an Kiin̄ Benjamin ilo Mosaia 4:1–12 n̄an m̧ool ko me remaron̄ jipan̄ juon armej ilo juon iaan jekjek kein. Ro uwaan kūlaaj eo remaron̄ kwaļo̧k m̧ool ko rekar loe ippān juon eo ej jijet iturin.

Mosaia 4:11–27

Ilo ad ukweļo̧k, jenaaj obrak kōn iakwe eo an Anij.

• Ewi wāween jeļā eļan̄n̄e jekar bōk juon jeorļo̧k bōd in jerawiwi ko ad? Kiin̄ Benjamin ekar kōmeļeļeiki jet tōprak ko jān m̧ool in ukweļo̧k—kajjitōk ippān ro uwaan kūlaaj eo am̧ n̄an pukoti ilo Mosaia 4:13–16. Komaron̄ barāinwōt kajjitōk ippān n̄an kejōkļo̧kjeņ kōn mour ko aer im etale wāween aer mour kōn katak ko ilo eoon kein. Ta kōkkaļļe ko ro uwaan kūlaaj eo rej loe me rej maron̄ oktak kake? Ewi wāween an jem̧jerā ko ad ippān ro jet oktak ilo ad itok n̄an Kraist kōn ukweļo̧k? Bōlen ro uwaan kūlaaj eo remaron̄ kwaļo̧k wāween aer kar lo an menin waļo̧k ilo mour ko aer.

• Mosaia 4:11–12 im 14–16 emaron̄ im̧we juon iien ekōnono kōn ta eo ej im̧we wāppen ilo karrūtoļo̧k ajri ro. Ta eo eoon kein rej katakin kōn wāween erom̧ ro jinen im jemān rem̧m̧anļo̧k?

• Eļan̄n̄e kwoj en̄jake n̄an kōm̧m̧ane juon iien ekōnono kōn katak ko an Kiin̄ Benjamin kōn kōjparok ro rejeramōļ im aikuj, komaron̄ kajjitōk ippān ro uwaan kūlaaj eo bwe ren taake doon ilo riiti eoon kein jān Mosaia 4:16–17. Ālkin riiti kajjojo eoon, armej eo ekar riiti emaron̄ in kwaļo̧k ilo tukadu naan ko an make kōt ta eo Kiin̄ Benjamin ekar katakin. Ennaan ko an Elder Jeffrey R. Holland “Jejjab Aolep Ruwo̧o̧r ke?” (Ensign ak kweilo̧k eo Eļap, Nob. 2014, 40–42) remaron̄ jerbal n̄an kobaiktok ekōnono in. Ewi wāween ad maron̄ ļoor kapilōk in an Kiin̄ Benjamin n̄an jab “ettōr m̧ōkajļo̧k jān kajoor eo [ewōr ippād]”? (Mosaia 4:26–27). Ewi wāween an kien eo n̄an “leļo̧k m̧ōttan m̧weiuk ko [ad] n̄an ro rijeram̧ōl” ejelet ukweļo̧k jān jerawiwi ko ad?

Mosaia 4:29–30

Jej aikuj etale ļōmņak ko ad, naan ko ad, im kōm̧anm̧an ko ad.

• Jet iien ej āinwōt enaaj lukkuun pidodo eļan̄n̄e Irooj ekar letok n̄an kōj juon laajrak emōj kōmeļeļe kōn aolep jerawiwi ko remera. Ijjelo̧kin, Eje jiron̄ kōj, “lale kom̧ make … im wōnm̧aanļo̧k ilo tōmak kōn ta kom̧ ar ron̄ kōn itok eo an Irooj” (Mosaia 4:30). N̄an jipan̄ ro uwaan kūlaaj eo am̧ ekōnono kōn pedped in katak in, komaron̄ kajjitōk ippāer kajjitōk ko āinwōt kein: Ewi wāwee an ļōmņak ko ad, naan ko ad, im kōm̧anm̧an ko ad jelet kōj make im ro jet? Ta meļeļein menin “wōnm̧aanļo̧k ilo tōmak”? Ta naan in rōjan̄ eo jemaron̄ kwaļo̧k ippān ro jet n̄an jipan̄ kōj “lale” kōj make?

Mosaia 5:1–7

Jetōb eo an Irooj emaron̄ kōm̧m̧ane juon oktak eļap ilo būruwōd.

• N̄an jino juon iien ekōnono kōn oktak in ban keidi me gospel eo an Jisōs Kraist emaron̄ bōktok n̄an mour ko ad, komaron̄ kajjitōk ippān ro uwaan kūlaaj eo bwe ren kwaļo̧k jet un ko etke emakijkij an pen oktak ko rej wōnm̧aanļo̧k wōt ilo mour ko ad. Innām kajjitōk ippāer n̄an riiti Mosaia 5:1–5, pukot “oktak eo eļap” me armej ro an Kiin̄ Benjamin rekar en̄jake. Ta m̧ool ko kōn juon oktak in bōro jemaron̄ ekkatak jān en̄jake ko aer? Ļōmņak in kajjitōk ippān jejjo ro uwaan kūlaaj eo n̄an kwaļo̧k ewi wāween an Jetōb Kwojarjar kar jipan̄ er ukōt būruweer. Komaron̄ barāinwōt alooje juon in pija in alooj ko elmakoti ilo “Kein Jipan̄ ko jet.”

  

  Rilo̧mo̧o̧r eo emaron̄ ukōt būruwōd im mour ko ad. Pein Kōmour ko, jān Adam Abram

• Ālkin ekōnono kōn m̧ool ko ilo Mosaia 5:1–7, jet uwaan kūlaaj eo remaron̄ in bwilōn̄ etke oktak eo an būruweer ejjab āinwōt mōkaj ak kiiō wōt waļo̧k āinwōt en̄jake eo an armej ro an Kiin̄ Benjamin. Ennaan eo jān Elder D. Todd Christofferson ilo “Kein Jipan̄ ko jet” rej uwaake kajjitōk in. Ta eo jemaron̄ in ekkatak jān Elder Christofferson kōn oktak?

Mosaia 5:5–15

Anij ej kajjitōk ippa n̄an kōm̧m̧an bujen Ippān.

• Mosaia 5:5–15 emaron̄ jipan̄ ro uwaan kūlaaj meļeļe kōjeraam̧m̧an ko rej būki n̄e rej kōm̧m̧an im kōjparok bujen ko ippān Anij. Komaron̄ kajjitōk ippāer n̄an etale eoon kein ippān bujen peptaij ko im kain̄i eo an kwojkwoj eo ilo ļōmņak im kwaļo̧k ta eo rej ekkaktak. (Lale barāinwōt K&B 20:77, 79.)

Kōketak Ekkatak ilo M̧weo

Elōn̄ membōr ro an kūlaaj eo am̧ remaron̄ en̄jake ak kar en̄jake juon en̄taan ak mālijjon̄ ippāer make. Jiron̄ er bwe ilo Mosaia 7–10 renaaj riit kōn juon kūrub in armej ro rekar ekkatak wāween lōke Irooj ilo iien mālijjon̄ ko aer.

Kein Jipan̄ ko jet

Pija in alooj ko ilo ChurchofJesusChrist.org kōn juon “oktak Ekajoor” (Mosaia 5:2).

• “Pilawe Aolep Raan: Oktak”

• “Oktak in juon Bōro”

• “Juon Oktak Ekajoor: Oktak”

Oktak ej juon jerbal emakijkij.

Elder D. Todd Christofferson ekar kōnono kōn oktak in bōro eo ekajoor kar kōmeļeļeiki ilo jeje ko rekwojarjar:

Komaron̄ in kajjitōk, etke oktak in bōro in ekajoor emōkajļo̧k an waļo̧k n̄an n̄a? Kwoj aikuj keememej bwe waanjon̄ak ko rekabwilōn̄lōn̄ an armej ro an Kiin̄ Benjamin, Alma, im ro jet ilo jeje ko rekwojarjar rej ba—kabwilōn̄lōn̄ im jab kwaļo̧k m̧wil. N̄an elōn̄ iaad wōj, oktak ko eļapļo̧k aer ejaak ak waļo̧k ium̧win elōn̄ iien. Bar ļotak, ejjab āinwōt ļotak ilo ānbwin, eļapļo̧k āinwōt juon jerbal im jab juon m̧akūtkūt. Im ekkejel ilo jerbal eo inej jibadbad eo eaorōk ilo mour in.

“Ilo ejja iien in wōt, jen jab kwaļo̧k kōj make ilo juon kijejeto ej bajjōk. Jen jab jum̧ae n̄an ba bōk jet rekkar n̄an kōm̧m̧ane men eo enana. Jen erreo ilo bōk m̧ōttan kwojkwoj eo kajjojo wiik im wōnm̧aanļo̧k wōt n̄an kepaakļo̧k Jetōb Kwojarjar eo n̄an tūm̧ jān unin men dikdik ko rejjab erreo ilo kōj. Ij kam̧ool bwe ilo am̧ wōnm̧aanļo̧k ilo iaļ in bar ļotak ilo jetōb, tiriam̧o in pinmuur eo an Jisōs Kraist enaaj bōkļo̧k jerawiwi ko am̧ im meer in jabdewōt jerawiwi ko ilo kwe, kapo ko renaaj waļo̧k, im jān Kraist kwonaaj jino erre, āinwōt E im Jemed rej kwojarjar (“Born Again,” Ensign ak Liahona, May 2008, 78).

Kōkōm̧anm̧an Ad Katakin

Pukot waanjon̄ak ko rem̧m̧an ilo jeje ko rekwojarjar. Ilo am̧ riiti kōnono eo an Kiin̄ Benjamin n̄an armej ro an, pukot katak ko ilo waanjon̄ak eo an me remaron̄ jipan̄ eo erom̧ juon rūkaki em̧m̧an. Ilo tukadu in, ta eo Kiin̄ Benjamin ekar kōm̧m̧ane n̄an lale eļan̄n̄e armej ro an rekar meļeļe ta eo ekar katakin?