Kraist im Rijilōk ro, jān Del Parson

M̧aaj 30–Eprōļ 12

Ijtō

“Enaaj bar Jerkak … kōn Komour ilo Pein”

Jabōt in Ijtō ej juon iien ejjetjet n̄an ro uwaan kūlaaj eo am̧ n̄an aer kōkajoorļo̧k naan in kam̧ool ko aer kōn Jisōs Kraist im Jerkakpeje eo An—im n̄an kōkajoorļo̧k naan in kam̧ool ko an bar juon. Likūt wōt ilo kōļmenļo̧kjeņ ilo am̧ ekkatak jeje ko rekwojarjar ilo m̧aanjabpopo n̄an katak in. Kappukot tōl eo an Jetōb kōn ta eo enaaj un̄ūr būruwōn armej ro ilo kūlaaj eo am̧.

Je En̄jake ko Rej Im̧we Eok

Kajjitōk bwe ren Kwaļo̧k

Ro uwaan kūlaaj eo am̧ remaron̄ in wōr aer en̄jake ko rem̧m̧an ium̧win wiik ko ruo rej mootļo̧k ilo riiti ta eo Bok in Mormon eo ej katakin kōn Jerkakpeje im Pinmuur eo an Jisōs Kraist. Leļo̧k n̄an er jejjo minit ko bwe ren pukot juon eoon im ekar kabwilōn̄ er, im innām kajjitōk ippāer bwe ren kwaļo̧k ta eo rekar loe.

Katakin Katak ko

2 Nipai 9:7–15; Alma 11:41–45; 40:21–23

Jerkakpeje ej bar koba eo an ānbwin im jetōb indeeo.

• Keidi emaron̄ in juon wāween ewājabdik n̄an katakin pedped ko an gospel eo. Bōlen komaron̄ in kajjitōk ippān ro uwaan kūlaaj eo n̄an riiti 2 Nipai 9:7–15 im Alma 11:41–45 im kalikkar naan ko im meļeļe ko ilo eoon kein me rej katakin kōn jerkakpeje. Ta eo mej ej keidi n̄ane? Ewi wāween kar kōmeļeļeiki jerkakpeje? Etke jej aikuji juon ānbwinnin em̧ōj an jerkakpeje? (barāinwōt lale K&B 93:33–34). Ro uwaan kūlaaj eo remaron̄ in ekōnono kōn wāween aer maron̄ kōjerbale keidi kein n̄an katakin juon armej kōn jerkakpeje. Ilo aer kwaļo̧k ļōmņak ko aer ippān kūlaaj eo, komaron̄ ekōnono ippāer etke rej kaorōki m̧ool kein kōn Jerkakpeje eo.

• Ļōmņak in kajjitōk ippān ro uwaan kūlaaj eo bwe ren kōm̧m̧an iien ko n̄e rekar en̄jake kam̧oolol kōn jeļāļo̧kjeņ ko aer kōn Jerkakpeje eo. Ewi wāween an jeļāļo̧kjeņ in ikutkutļo̧k an kareel mour ko ad? Komaron̄ jipan̄ ro uwaan kūlaaj eo am̧ uwaake kajjitōk in ilo am̧ kajjitōk ippāer kajjojo n̄an etale 2 Nipai 9:7–15; Alma 11:41–45; ak Alma 40:21–23 im kōlaajrak ioon boot eo m̧ool ko rej loi kōn Jerkakpeje eo. Innām komaron̄ je ioon boot eo jentej kein ruo im kajjitōk ippān ro uwaan kūlaaj eo n̄an kejōkļo̧kjeņ ium̧in jejjo minit m̧okta jān kwaļo̧k wāween aer kadedeļo̧ki: Eļan̄n̄e in kar jab jeļā men kein… im Kōnke Ijeļā men kein….

Gethsemane, jān Michael T. Malm

Mosaia 3:5–7; 15:5–9; Alma 7:11–13

Jisōs Kraist ekar bōk ioon Make jerawiwi ko ad, metak ko, im likjab ko.

• Kejōkļo̧kjeņ im ekōnono kōn en̄taan eo an Rilo̧mo̧o̧r eo ilo etad emaron̄ karuwaineneik Jetōb eo im im̧we en̄jake iakwe im kam̧oolol n̄an Rilo̧mo̧o̧r eo. N̄an rōjan̄ kain kejōkļo̧kjeņ im ekōnono rot in, komaron̄ jin̄aik juon jaat ioon boot eo āinļo̧k wōt eo kar elmakote ilo unin tōl eo an wiik in ilo Itok, Ļoor Eō—N̄an Kajjojo Armej im Baam̧ļe ko im kajjitōk ippān ro uwaan kūlaaj n̄an kadedeļo̧k kōjerbale Mosaia 3:5–7; 15:5–9; im Alma 7:11–13 im en̄jake ko aer make. Āinwōt an Jetōb eo tōl, komaron̄ barāinwōt kajjitōk ippān ro uwaan kūlaaj eo n̄an kwaļo̧k an doon en̄jake kōn ta eo Jisōs Kraist ekar kōm̧m̧ane n̄an er.

• Al ko rekwojarjar remaron̄ in karuwaineneik Jetōb eo im kapenļo̧k katak eo kwoj katakin. Bōlen ro uwaan kūlaaj eo remaron̄ etale Mosaia 3:5–7; 15:5–9; im Alma 7:11–13 im pukot im al al ko me rej en̄jake an jejjet n̄an ennaan ko ilo eoon kein (komaron̄ barāinwōt kajjitōk ippān juon bwe en al ak kōjan̄i al ko). Index eo an jeje ko rekwojarjar ilo jem̧ļo̧kin bok in al eo emaron̄ jipan̄, im al ko jet rej elmakoti ilo “Kein Jipan̄ ko jet.” Rōjan̄ ro uwaan kūlaaj eo n̄an kwaļo̧k ennaan ko jān al ko im jeje ko rekwojarjar me rej jipan̄ er kam̧oolol katok eo an Rilo̧mo̧o̧r eo.

Inōs 1:1–19; Mosaia 5:1–2; 27:8–28:4; Alma 24:7–19

Pinmuur eo an Jisōs Kraist ej karreoik kōj im jipan̄ kōwāppene kōj.

• Juon wāween ewājabdik n̄an ekkatak kōn kajoor eo an Rilo̧mo̧o̧r eo n̄an ukōt mour ko ad ej n̄an katak waanjon̄ak ko kōn wāween An kar ukōt mour ko an ro jet ilo aer ukweļo̧k im kar itok n̄an E. Bok in Mormon elōn̄ waanjon̄ak ko ie. Bōlen komaron̄ jitōn̄ kajjojo ro uwaan kūlaaj eo n̄an riit kōn juon iaan waanjon̄ak kein, āinwōt Inōs (lale Inōs 1:1–19), armej ro an Kiin̄ Benjamin (lale Mosaia 5:1–2), Alma eo Edik (lale Mosaia 27:8–28:4), ak Antai-Nipai-Liai (lale Alma 24:7–19), ak remaron̄ ļōmņak kōn waanjon̄ak ko an ro jet jān jeje ko rekwojarjar. Innām jejjo ro uwaan kūlaaj eo remaron̄ kwaļo̧k tukaduin en̄jake ko rekar riiti. Bōlen ro uwaan kūlaaj eo am̧ renaaj lan̄lōn̄ kōm̧m̧ane menin ilo aer kōddāpe n̄an jipan̄ ro jet uwaan kūlaaj eo ro rej kōmeļeļeiki. Remaron̄ barāinwōt ekōnono kōn kajjitōk ko āinwōt kein: Ewi wāween an armej ro ilo waanjon̄ak kein oktak? Ta kar jerbal eo an Rilo̧mo̧o̧r eo ilo oktak eo aer? Bōlen jejjo ro uwaan kūlaaj eo remaron̄ kōnono kōn wāween an kar Rilo̧mo̧o̧r eo jerbale “juon oktak ekajoor … ilo [būruweer]” (Mosaia 5:2). N̄an ekkatak elapļo̧k kōn wāween an Rilo̧mo̧o̧r eo ukōt kōj—im etke oktak in elukkuun aorōk—komaron̄ kwaļo̧k ippān ro jet ilo kūlaaj eo wāween keidi in kar letok jān Būreejtōn Dallin H. Oaks ilo “Kein Jipan̄ ko Jet.”

Kōketak Ekkatak ilo M̧weo

N̄an im̧we ro uwaan kūlaaj eo n̄an riiti Mosaia 1–3, komaron̄ kajjitōk ippāer n̄an kejōkļo̧kjeņ kōn juon iien ke rekar en̄jake aer kōņaan in lan̄lōn̄ ālkin aer riiti ak ron̄jake juon ennaan jān gospel eo. Kajjitōk ippāer bwe ren kappukot m̧ool ko er remaron̄ lan̄lōn̄ kaki ilo aer riiti Mosaia 1–3

Kein Jipan̄ ko jet

Al ko kōn Pinmuur eo an Rilo̧mo̧o̧r eo.

• “I Believe in Christ,” Hymns, no. 134

• “Ij Jela Bwe Aō Dri Pinmuur Ej Mour,” Al, nō. 28

• “Thy Will, O Lord, Be Done,” Hymns, no. 188

• “That Easter Morn,” Hymns, no. 198

Pija in alooj ko kōn Mormon Tabernacle Choir eo ej al jet iaan al kein maron̄ loi ilo ChurchofJesusChrist.org.

Bwebwenato eo: Jej aikuj eļapļo̧k jān erreo.

Būreejtōn Dallin H. Oaks ekar kwaļo̧k juon wāween keidi eo n̄an kōmeļeļeik ewi jon̄an an Rilo̧mo̧o̧r eo kōpooj kōj n̄an ad ro̧o̧lļo̧k n̄an im̧aan mejān Anij:

“Jej kijon̄ ļōmņak bwe tōprak in ukweļo̧k ej āinwōt ad baj erreo jān jerawiwi, ak menin ej juon ļōmņak ejjab aolepān in. … Juon armej eo ej jerawiwi ej āinwōt juon wōjke eo me epidodo an lā jān kōto ko. Ilo juon kōto im raan eo ewōttuwōt, wōjke eo ej okjakļo̧k ioon bwidej im bōlōk ko rej jino ettonoon kōn pedkat, āinwōt jerawiwi. Eļan̄n̄e jej mijōk wōt jerbal in karreo bōlōk ko, mōjņo̧ eo an wōjke eo me ej kōm̧m̧an an kob im katonoon bōlōkin emaron̄ pād wōt. Ejja āinwōt, juon armej eo ej būrom̧ōj wōt ilo an ettonoon kōn jerawiwi enaaj bar jerawiwi ilo kōto eo ekajoor ej itok wōt. Metak eo ekka an waļo̧k im bar waļo̧k enej wōnm̧aanļo̧k wōt m̧ae iien em̧ōj kōkajoorļo̧k wōjke eo.

“N̄e juon armej ekar dedeļo̧k an pād ilo wāween eo me ej tōprak ko me jeje ko rekwojarjar rej ņaetan ‘juon bōro e rup im jetōb ettā,’ Rilo̧mo̧o̧r eo ej kōm̧m̧ane eļapļo̧k jān karreo armej eo jān jerawiwi. Ej leļo̧k n̄an e kajoor kāāl. Kajoor in eaorōk n̄an kōj n̄an kile jibadbad eo an karreo, eo ej n̄an jepļaakļo̧k n̄an Jemedwōj Ilan̄. Bwe jen maron̄ deļo̧n̄ im pād im̧aan Mejān, jej aikuj eļapļo̧k jān erreo. Jej aikuj barāinwōt oktak jān juon armej eo emōjņo̧ eo ekar jerawiwi n̄an juon armej eo erreo kōn ānbwinnin jetōb n̄an deļo̧n̄e im̧aan mejān Anij” (“Pinmuur eo im Tōmak,” Ensign, Epr. 2010, 33–34).

Kōkōm̧anm̧anļo̧k Ad Katakin

Mour erreo kōn tōl eo an Jetōb N̄e kwoj mour kōn gospel eo, kwoj erreo kōn jem̧jerā eo an Jetōb eo, eo ej rūkaki eo em̧ool. Ilo am̧ kappukot tōl eo An, Jetōb Kwojarjar enaaj lewaj n̄an eok ļōmņak im im̧we ko kōn wāween tōpar aikuj ko an ro kwoj katakin. (Lale Teaching in the Savior’s Way, 5.)