jerkakpeje Kraist ippān Rijilōk ro An

Kraist im Rijilōk ro, jān Del Parson

M̧aaj 30–Eprōļ 12

Ijtō

“Enaaj Jerkak … kōn Kōmour ilo Pein Bao ko Pein”

Ilo raan ko m̧okta jān Jabōt in Ijtō eo, ļōmņak in kalimjōk wōt ekkatak jeje ko rekwojarjar eo am̧ make im baam̧le eo ilo naan in kam̧ool eo ekajoor an Bok in Mormon kōn mour, mej, Jerkakpeje, im kajoor in pinmuur eo an Jisōs Kraist.

Je En̄jake ko Rej Im̧we Eok

Rijilōk ro etto raar peran ilo naan in kam̧ool ko aer kōn Jisōs Kraist im Jerkakpeje eo An. Milien rej tōmak ilo Jisōs Kraist im kajjieon̄ ļoor E kōnke kōn naan ko aer kar ļo̧o̧ki ilo Baibōļ. Aaet jet remaron̄ ļōmņak, eļan̄n̄e Jisōs Kraist ej Rilo̧mo̧o̧r eo an aolepān laļ in, innām etke eaar jet wōt an rikam̧ool jān juon jikin edik?

Bok in Mormon ej jutak āinwōt juon dam̧oļo̧k, kwaļo̧k kam̧ool bwe Jisōs Kraist ej Rilo̧mo̧o̧r eo an laļ in, “kwaļo̧k e n̄an laļ ko otemjeļo̧k” (taitōļ peij eo an Bok in Mormon) im leļo̧k lo̧mo̧o̧r n̄an aolep ro rej itok n̄an E. Ilo kakobaba, kein kam̧ool in kein karuo ej barāinwōt kalikkar ta meļeļe in lo̧mo̧o̧r. En̄in ej etke Nipai, Jekab, Mormon, im aolep rikanaan ro raar kanooj “niknik jerbal n̄an m̧wijiti naan kein ioon pileij ko”—n̄an kean̄ n̄an epepen ko ilju jekļaj bwe ren barāinwōt “kar jeļā kōn Kraist, im … wōr am kōjatdikdik kōn aiboojoj eo An” (Jekab 4:3–4). Ilo tōre in Ijtō in, kejōkļo̧kjeņ kōn naan in kam̧ool ko ilo Bok in Mormon bwe kajoor eo an Pinmuur eo an Kraist ej jim̧or aolepān laļ in im an juon make—lo̧mo̧o̧ren aolepān laļ in im lo̧mo̧o̧ren eok.

pija ej bōk jikin ekkatak ippem̧ make

Ļōmņak ko n̄an Ekkatak Jeje ko Rekwojarjar Ippem̧ Make

2 Nipai 9:6–15, 22; Alma 11:41–45; 40:21–23; 3 Nipai 26:4–5

Kōnke kōn Jerkakpeje eo an Jisōs Kraist, aolep armej renaaj jerkakpeje.

Ej juon iminene kake ilo Ijtō n̄an kejōkļo̧kjeņ kōn Jerkakpeje eo an Jisōs Kraist, bōtaab ta eo lukkuun in meļeļein n̄an jerkakpeje? Ta meļeļe ko Bok in Mormon ej letok kōn jerkakpeje? Bōlen āinwōt m̧ōttan kautiej Ijtō eo am̧ komaron̄ kōllaajrak m̧ool ko kōn jerkakpeje eo me kwoj loi ilo 2 Nipai 9:6–15, 22; Alma 11:41–45; 40:21–23; im 3 Nipai 26:4–5. Komaron̄ barāinwōt ļo̧o̧ke etke kwoj ļōmņak ej aorōk n̄an jeļā kajjojo m̧ool kein.

Komaron̄ kile bwe m̧ool ko kōn Jerkakpeje eo emakijkij kōn katakin ippān m̧ool ko kōn Ekajet eo Āliktata. Kejōkļo̧kjeņ kōn ta eo me ej katakin eok kōn aorōk eo an Jerkakpeje eo ilo karōk in lo̧mo̧o̧r eo.

Lale barāinwōt Luk 24:36–43; Jerbal 24:15; 1 Korint 15:12–23.

Mosaia 3:7; 15:5–9; Alma 7:11–13

Jisōs Kraist eaar bōk ioon Make jerawiwi ko aō, metak ko, im nan̄inmej ko.

Baibōļ eo ej alikkar an katakin bwe Jisōs Kraist eaar en̄taan kōn jerawiwi ko ad. Bok in Mormon, ijowōt ke, ej kedepakpakļo̧k ad meļeļe kōn en̄taan eo an Kraist im en̄taan eo ilo wāween ko raorōk. Komaron̄ lo jet iaan katak kein ilo Mosaia 3:7; 15:5–9; im Alma 7:11–13. Ālkin am̧ riiti eoon kein, ļōmņak in ļo̧o̧ke ta eo kwoj loe ilo juon jaat āinwōt in:

Ta eo Rilo̧mo̧o̧r eo eaar en̄taan kake?	Etke Eaar en̄taan kake?	Ta meļeļe in menin n̄an eō?
Ta eo Rilo̧mo̧o̧r eo eaar en̄taan kake?	Etke Eaar en̄taan kake?	Ta meļeļe in menin n̄an eō?

Lale barāinwōt Aiseia 53; Hibru 4:14–16.

Kraist ej jar ilo Jikin Kallib Gethsemane

Gethsemane, jān Michael T. Malm

Mosaia 5:1–2; 27:8–28; Alma 15:3–12; 24:7–19

Pinmuur eo an Jisōs Kraist ej karreoik eō im jipan̄ koweppāļo̧k n̄a.

Emaron̄ in kar ba bwe Bok in Mormon eļaptata kōn bwebwenato in armej ro me raar oktak kōnke kōn Pinmuur eo an Jisōs Kraist. Ilo m̧ool, jet iaan armej ro raar kom̧m̧ani jerawiwi ko reļļap tata im raar em̧ool rikejdāt ko an armej ro an Anij m̧okta jān an kajoor eo an Rilo̧m̧o̧or eo jerbal ilo er juon oktak ekajoor ekkar n̄an tōmak eo aer ilo E. Komaron̄ riiti jet iaan en̄jake kein ilo Mosaia 5:1–2; 27:8–28; im Alma 15:3–12; 24:7–19; komaron̄ ļōmņak kōn waanjon̄ak ko jet n̄an ekkatak kaki barāinwōt. Ta eo kwoj kile bwe kajjojo en̄jake kein ewōr juon men rej juon wōt ie? Ta oktak ko kwoj kili? Ta eo bwebwenato kein rej katakin eok kōn ekōjkan an Pinmuur eo an Rilo̧mo̧o̧r eo maron̄ ukōt eok?

Lale barāinwōt Alma 5:6–14; 13:11–12; 18; 19:1–16; 22:1–26; 36:16–21; Ether 12:27; Moronai 10:32–33.

pija ej bōk jikin ekkatak an baam̧le

Ļōmņak ko n̄an Ekkatak Jeje ko Rekwojarjar eo an Baam̧le im Nokon in Jota eo an Baam̧ļe

Ilo am̧ kememe Ijtō ippān baam̧ļe eo am̧, kappukōt wāween ko n̄an katak ippān doon kōn Rilo̧mo̧o̧r eo im Pinmuur eo An, ekoba Jerkakpeje eo. Erkein rej jet ļōmņak ko.

3 Nipai 11; 17

Jet baam̧ļe ko raar lo bwe ekkatak kōn bwebwenato eo kōn loļo̧k eo an jerkakpeje Rilo̧mo̧o̧r eo n̄an Amedka ewōr meļeļe in ejenolo̧k ilo tōre in iien Ijtō. Kōketak ro uwaan baam̧ļe eo n̄an pijaikļo̧k ta eo enaaj kar āinwōt n̄an en̄jake kinej ko (lale 3 Nipai 11:14–15) ak juon iaan ajri ro Eaar kōjeraam̧m̧an (lale 3 Nipai 17:21). Ekōjkan an bwebwenato in kōļapļo̧k kam̧m̧oolol eo ad kōn Jerkakpeje eo an Rilo̧mo̧o̧r eo? Juon pija ej kwaļo̧k bwebwenato in ej itok ippāntok laajrak in; ko jet maron̄ loi ilo ChurchofJesusChrist.org. Ro uwaan baam̧le eo am̧ remaron̄ bar em̧m̧an ippāer jin̄aiki pija ko aer make kōn ta eo rej riiti.

Ennaan ko jān kweilo̧k eo eļap

Ilo elōn̄ m̧ōttan ko an laļ in, kweilo̧k eo eļap ilo Eprōļ in iiō in eaar bōk jikin ilo jem̧ļo̧kin wiik eo m̧okta jān Ijtō eo. Bōlen ron̄jake ennaan ko an kweilo̧k eo emaron̄ jipan̄ baam̧ļe eo kalimjōk wōt Rilo̧mo̧o̧r eo im Ijtō in. N̄an waanjon̄ak, komaron̄ kūr ro uwaan baam̧ļe eo n̄an ron̄jake ennaan ko an kweilo̧k eo rej kam̧ool kōn Jisōs Kraist im Jerkakpeje eo An—eļaptata jān Rijilōk ro, ro rej rikam̧o̧ol ro rejeno̧lo̧k an Jisōs Kraist. Innām komaron̄ etale ennaan kein ippān doon im kile katak ko me rej kōkajoorļo̧k naan in kam̧ool ko ami kōn Rilo̧mo̧or eo.

“Kraist Eo Emour: Naan in Kam̧ool eo an Rijilōk ro”

Āinwōt juon baam̧ļe, riiti ““Kraist Eo Emour: Naan in Kam̧ool eo an Rijilōk ro”” (Ensign ak Liahona, Māe 2017, im̧aan itulowaan kōbar eo; lale barāinwōt ChurchofJesusChrist.org) im kūr kajjojo uwaan baam̧le eo n̄an kālet juon ennaan an Ijtō jān naan in kam̧o̧ol in n̄an kwaļo̧ke ippān ro jet. N̄an waanjon̄ak, komaron̄ kōm̧m̧ani pija ko n̄an likūti ilo social media, ilo m̧aan kōjām eo am̧, ak ilo juon wintō.

Pija in alooj ko: Special Witnesses of Christ

ChurchofJesusChrist.org im the Gospel Library app ewōr juon kōro̧ro in pija ko ņa etan Special Witnesses of Christ(Rikam̧ool ro Rejeno̧lo̧k kōn Kraist). Ekoba pija ko an kajjojo ro uwaan Būreejtōnji eo Kein Kajuon im Doulul eo an Jon̄oulruo Rijilōk ro rej kwaļo̧k naan in kam̧ool kōn Jisōs Kraist. Baam̧le eo am̧ emaron̄ aloje juon ak lōn̄ļo̧k in pija kein im ekōnono kōn ta eo rej katakin kōj kake ta eo Rilo̧mo̧o̧r eo eaar kōm̧m̧ane n̄an kōj.

N̄an eļapļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Kōkōm̧anm̧anļo̧k Ad Katakin

Mour kōn gospel eo an Jisōs Kraist. Men eo aorōktata komaron̄ kōm̧m̧ane āinwōt juon jinen im jemen ej n̄an mour kōn gospel eo kōn aolepān būruwōm. En̄in ej men eo em̧m̧an tata n̄an karbōb n̄an bōk jemjerā eo an Jetōb Kwojarjar. Kwojjab aikuj in weppān, tiljek kajjieon̄ n̄an kōm̧m̧ane ijo em̧m̧an tata komaron̄e im pukōt jeorļo̧k bōd kōn Pinmuur eo an Kraist. (Lale Teaching in the Savior’s Way, 13–14.)

Kraist ej iak-iakwe armej in Nipai ro

Pija in Kraist ippān armej in Nipai ro jān Ben Sowards