“M̧aaj 23–29. Inōs–Naan ko an Mormon: Ej Jerbal ilo N̄a n̄an Kōm̧anm̧an Ankilan” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
“M̧aaj 23–29. Enos–Naan ko an Mormon,” Itok, Ļoor Eō—N̄an Kajjojo Armej im Baam̧le ko: 2020
Jekab im Inōs, jān Scott Snow
M̧aaj 23–29.
Inōs–Naan ko an Mormon
Ej Jerbal ilo N̄a n̄an Kōm̧anm̧an Ankilan
Ilo am̧ riiti Inōs n̄an Naan ko an Mormon, pukōt ennaan ko me renaaj aorōk n̄an eok ak baam̧le eo am̧.
Je En̄jake ko Rej Im̧we Eok
Inōs eaar etal n̄an wōjke ko n̄an kakidudu, bōtaab eaar pād ijo n̄an jar, “aolepān raan eo … im ke bon̄ōn eo eaar itok” (Inōs 1:3–4). Kōnke an eaar m̧ool an ikdeelel n̄an bōk juon jeorļo̧k in jerawiwi ko an, Inōs eaar m̧ōņōņō in jar aitokan wōt en ej menin aikuj im em̧ool n̄an “likarōk” im̧aan Anij (Inōs 1:2). En̄in ta eo m̧ool in jar ej: ejjab ļap wōt kajjitōk kōn aolep men jej kōņaan bōtaab juon kijejeto em̧ool n̄an kōnono ippān Anij im kajjejet ankilaad n̄an eo An. N̄e kwoj jar lo wāween in, n̄e ainikiōm̧ ej “tōpar lan̄ ko” kwoj lo āinwōt kar Inōs bwe Anij ej ron̄jake eok, im em̧ool Ej kea kōn eok, ro kwoj iakwe er, im jekdo̧o̧n rikejdāt ro am̧ (lale Inōs 1:4–17). Ilo iien kein, Anij emaron̄ kwaļo̧k Ankilan n̄an eok, im enaaj ļapļo̧k am̧ m̧ōņōņō im maron̄ kōm̧anm̧an Ankilan kōnke kwoj koba Ippān. Āinwōt Mormon, komaron̄ “jab jeļā men otemjej; a Irooj ejeļā men otemjej ko … [im] e ej jerbal ilo [kwe] n̄an kōm̧m̧an ekkar n̄an ankilaan” (Naan ko an Mormon 1:7).
Ļōmņak ko n̄an Ekkatak Jeje ko Rekwojarjar Ippam̧ Make
Naan ko an juon jinen ak jemen emaron̄ aitok kilaan.
Ta ennaan ko eoon kein ewōr aer n̄an ro jinen im jemen im n̄an ajri ro?
Jar ko aō rem̧ool renaaj uwaak.
En̄jake ko an Inōs kōn jar ej juon iaan ememļo̧kjeņ eo eļaptata ilo jeje ko rekwojarjar. En̄jake ko am̧ remaron̄ dik aer jelet, bōtaab rejjab aikuj in dik meļeleier. En̄jake ko an Inōs remaron̄ in kwaļo̧k wāween ko n̄an kōkōm̧anm̧anļo̧k jar ko am̧. Ijin rej jet kajjitōk ko n̄an kejōkļo̧kjeņ kaki:
-
Ta naan ko rej kōmeļeļeik kijejeto ko an Inōs ke eaar jar?
-
Ta eo Inōs eaar jino jar kake? (lale Inōs 1:4). Ta eo komaron̄ katak jān uwaak ko an Inōs ālkin an kar bōk juon uwaak? (lale Inōs 1:5–7).
-
Ekōjkan an kar Inōs jerbale uwaak ko eaar būki?
-
Ta eo komaron̄ katak jān Inōs kōn ekōjkan bōk juon “jamin em̧m̧akūt” tōmak ilo Irooj? (Inōs 1:11).
Irooj enaaj kōjeraam̧m̧an eō n̄e ij kōjparok kien ko.
Juon iaan kallim̧ur ko an Anij eļaptata āliji ilo Bok in Mormon ej bwe eļan̄n̄e armej in Nipai ro raar kōjparok kien ko, renaaj kar jeraam̧m̧an (lale 2 Nipai 1:20; Jarom 1:9–12; Omnai 1:6). Bok ko an Jarom im Omnai rej kwaļo̧k juon wāween me kallim̧ur in eaar kūrm̧ool. Ta eo kwoj katak jān bwebwenato kein me remaron̄ jipan̄ eok “jeram̧m̧an ilo āneo”?
Wōn ro raar armej in Zarahemla?
Ālkin an armej in Nipai ro kar ko jān ānen Nipai, raar lo elōn̄ armej ro rej jokwe ilo juon jikin kar ņa etan Zarahemla. Armej in Zarahemla ro raar ro ineen juon kumi in armej in Israel ro me, āinwōt baam̧le eo an Liai, kar em̧m̧akūt jān Jerusalem im kar tōl jān Anij n̄an ānen in kallim̧ur eo. Ilubwilijin kumi eo eaar Mulek, juon iaan ļadik ro nejin Zedekiah, kiin̄ in Juda eo me kar kaļbuuji jān armej in Babylon ro ilo enan̄in 587 BC (lale Jeremaia 52:1–11; Mosaia 25:2; Helamōn 8:21).
Ālkin an armej ro an Zarahemla kar itakļo̧k ilo ānen kallim̧ur eo, raar ioon Koriantumr (lale Omnai 1:21), armej in āliktata eaar mour armej in Jared ro, eo bwebwenato eo aer kar kwaļo̧k kake ilo bok in Ether.
Ta in Naan ko Mormon?
Naan ko a Mormon rej jerbal āinwōt juon ekkejel ikōtaan ruo kōro̧ro in piliej ko me rej m̧ōttan Bok in Mormon eo. Ijin Mormon ej letok juon kōmeļeļe in ļo̧o̧k kein ruo, im naan ko an rej katakin juon ennaan eaorōk kōn lōke Irooj, jekdo̧o̧n n̄e ejjab dipio ad meļeļe tōl eo An.
Ke Nipai eaar je ļo̧o̧k eo an armej ro an, Anij eaar tōl e n̄an ejake ruo kōro̧ro in piliej ko, kar ņa etan piliej ko reddik im piliej ko reļļap an Nipai. Nipai eaar jab jeļā etke kar kakien e n̄an ejake ruo kōro̧ro in piliej ko, bōtaab eaar lōke bwe Irooj eaar wōr an “juon un … , ijjab jeļā kake” (1 Nipai 9:5; bar lale “Juon Kōmmeļeļe Ekadu kōn Bok in Mormon”).
Buki iiō ko tokālik, ke Mormon eaar kōkaduduki piliej ko reļļap an Nipai, eaar lo piliej ko reddik. Piliej ko reddik rekitbuuj elōn̄ wōt iaan ejja iien ko wōt kar kōmeļeleik ilo piliej ko reļļap me Mormon em̧ōj an kar kōkaduduki, bōtaab piliej ko reddik raar pedped eļap wōt ioon men ko ilo jetōb im jerbal in karejar im katak ko an rikanaan ro. Anij eaar im̧we Mormon n̄an kōjem̧ļo̧k piliej ko reddik an Nipai ilo ļo̧o̧k eo an ilo kakobaba n̄an piliej ko reļļap. Āinwōt Nipai, Mormon eaar jab meļeļe unin an Anij kar bōk jim̧or kōro̧ro in piliej ko, bōtaab eaar lōke bwe eaar juon “un emālōtlōt” (Naan ko an Mormon 1:7).
Rainin jejeļā ta un eo kar an Anij. Ilo 1828 eo, ālkin an kar Josep Smith ukōt m̧ōttan kōkadudu eo an Mormon in piliej ko reļļap an Nipai (116 peij an jeje ko), Martin Harris eaar luuji peij kein. Anij eaar kakien Josep n̄an jab ukōt m̧ōttan in kōnke armej ro renana renaaj kar ukōt naan ko im kajjieon̄ kariab Josep (lale K&B 10, jekjōn kōmeļeļe eo; K&B 10:14–19, 30–45). Kam̧m̧oolol, Anij eaar lo menin im kar kōpooj piliej ko reddik, eo raar kitbuuj ejja bwebwenato eo wōt me eaar jako ippān peij ko 116. Piliej ko reddik ekoba bok ko me rej itok m̧okta jān Naan ko an Mormon, im kōkadudu eo an Mormon kōn piliej ko reļļap rej ijjino ālkin Naan ko an Mormon.
Mormon ej Kobaik Piliej ko, jān Jorge Cocco
Ļōmņak n̄an Ekkatak Jeje ko Rekwojarjar eo an Baam̧le im Noko in Jota eo an Baam̧le
Ilo am̧ riiti jeje ko rekwojarjar ippān baam̧ļe eo am̧, Jetōb eo emaron̄ jipan̄ eok jeļā ta pedped ko n̄an kalikkari im ekōnono kaki n̄an maron̄ tōpar aikuj ko an baam̧le eo am̧. Ijin rej jet ļōmņak ko.
Inōs 1:1–17
Baam̧le eo am̧ emaron̄ lale pija eo kōn Inōs ej jar im etale Inōs 1:1–17 n̄an naan ko me maron̄ kar kōjerbali āinwōt juon taitōļ n̄an pija eo. Komaron̄ barāinwōt kajjitōk ippān ro uwaan baam̧le eo n̄an pijaik pija ko kōn en̄jake eo an Inōs. Ta eo jej katak jān Inōs kōn pukōt jeorļo̧k bōd?
Jarom 1:2
Ekōjkan an kar ekkatak eo ad kōn Bok in Mormon “kwaļo̧k karōk in lo̧mo̧o̧r eo” n̄an kōj?
Omnai 1:12–22
Ta eo eoon kein rej katakin kōn aorōk eo an wōr naan eo an Anij ilo mour ko ad?
Naan ko an Mormon 1:3–9
Ekōjkan ad naaj jeraam̧m̧an jān kōjparok ļo̧o̧k ko ad make im baam̧ļe? Ekōjkan ad kōļapļo̧k an ļo̧o̧k ko ad pedped ioon Kraist?
N̄an eļapļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Kōkōm̧anm̧anļo̧k Ad Katakin
Kōmakijkij koba ippān doon. Būreejtōn Henry B. Eyring eaar katakin: “Jab likjab kōn juon iien n̄an koba ippān ajri ro n̄an katak kōn katak eo an Jisōs Kraist. Kain iien rōt kein rekanooj jeja ilo keidi ippān kijejeto ko an rikejdāt eo” (“The Power of Teaching Doctrine,” Ensign, May 1999, 74).
Inōs Ej Jar, jān Robert T. Barrett