“M̧aaj 16–22. Jekab 5–7: ‘Irooj ej Jerbal Ippād,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
“M̧aaj 16–22. Jekab 5–7,” Itok, Ļoor Eō—N̄an Kajjojo Armej im Baam̧le ko: 2020
Waanjon̄ak eo an Wōjke Olive eo, jān Brad Teare
M̧aaj 16–22
Jekab 5–7
Irooj ej Jerbal Ippād
Riiti jeje ko rekwojarjar ej akjo̧kwetok revlesōn. Kōn menin ilo am̧ riiti Jekab 5–7, pukōt tōl jān Jetōb n̄an jipan̄ eok im baam̧le eo am̧. Ta ennaan ko ewōr ippān Irooj n̄an kwe?
Je En̄jake ko Rej Im̧we Eok
Elōn̄, elōn̄ armej ro me rejjan̄in de ron̄ gospel eo an Jisōs Kraist. Eļan̄n̄e kwoj en̄jake tōr jān jon̄an kōn kilep in dettan jerbal in aiin tok er n̄an Kabun̄ eo an Irooj, waanjon̄ak eo an wōjke olive ko ilo Jekab 5 ewōr juon an kein kakeememej em̧ool: jikin kallib eo ej an Irooj. Eaar letok n̄an kōj kajjojo juon eria edik n̄an jipan̄ ilo jerbal eo An—baam̧le eo ad, doulul in ro m̧ōttad, men ko ewōr kilaad ioer. Im jet iien armej eo m̧oktata jej jipan̄e aiintok ej kōj make. Bōtaab jejjamin n̄an jidik makeļo̧k ilo jerbal in, n̄an Irooj in jikin kallib eo ej jerbal iturin ro Rikarejera (lale Jekab 5:72). Anij ejeļā im iakwe ajri ro Nejin, im Enaaj kōpooj juon wāween n̄an kajjojo iaer n̄an ron̄jake gospel eo An, jekdo̧o̧n ro raar kowaan E m̧okta (lale Jekab 4:15–18). Innām, n̄e jerbal eo ej dedeļo̧k, aolep ro me raar “niknik ilo jerbal [Ippān] … naaj lan̄lōn̄ [ippān] kōnke leen jikin kallib eo [An]” (Jekab 5:75).
Ļōmņak ko n̄an Ekkatak Jeje ko Rekwojarjar Ippam̧ Make
Ta in waanjon̄ak in bwebwenato (allegory)?
Waanjon̄ak in bwebwenato ko (allegory) rej bwebwenato ko me rej katakin m̧ool ko ilo jetōb kōn kōkaļļe ko. Ilo waanjon̄ak in bwebwenato (allegory) eo an wōjke olive ko, n̄an waanjon̄ak, juon vineyard ej jutak kōn laļ in, juon tame wōjke olive ej jutak kōn Israel (ro me raar kōm̧m̧ani bujen ko ippān Anij), im wōjke olive eo eawiia ej jutak kōn lal ko an riaelōn̄ ko (ro raar jab kōm̧m̧ani bujen ko ippān Anij).
Ilo am̧ ekkatak kōn waanjon̄ak in bwebwenato (allegory) eo ilo Jekab 5, kappukōt elōn̄ļo̧k kōkaļļe ko im kejōkļo̧kjeņ kōn ta meļeļe eo aer emaron̄ in. N̄an waanjon̄ak, ta am̧ ļōmņak leen eo em̧m̧an ej bōk jikin? Ta eo leen eo enana emaron̄ in kōkaļļe in?
Jisōs Kraist ej Irooj in jikin kallib eo.
M̧okta jān am̧ jino ekkatak eo am̧ kōn waanjon̄ak in bwebwenato eo an wōjke olive ko ilo Jekab 5, emaron̄ in jipan̄ n̄an etale Jekab 4:10–18 n̄an katak etke Jekab eaar en̄jake im̧we n̄an kwaļo̧k waanjon̄ak in bwebwenato in ippān armej ro an. Ilo Jekab 6:3–5, komaron̄ lo jet dam̧o̧ļo̧k in ennaan ko me Jekab eaar kōņaan bar kalikkari; pukōt ennaan kein ilo waanjon̄ak in bwebwenato (allegory) eo. Ta ennaan ko kwoj loi rej iook waj eok make ilo Jekab 5?
Jekab 5 ej juon jebta aitok—aitoktata ilo Bok in Mormon. Bōlen enaaj jipan̄ n̄an ajije n̄an jekjōn kein, eo ej kōmeļeļeik tōre in iien ko an bwebwenato eo an laļ in:
-
Eoon ko 3–14:Ajeded eo an Israel m̧okta jān iien eo an Kraist
-
Eoon ko 15–28:Jerbal in karejar eo an Kraist im Rijilōk ro
-
Eoon ko 29–49:Bun̄ Jān Tōmak Eo Eļap
-
Eoon ko 50–76:Kobatok eo an Israel ilo raan ko āliktata
-
Eoon ko 76–77:Meļļiniam̧ eo im jem̧ļo̧k eo an laļ
N̄an lōn̄ļo̧k in meļeļe ko kōn waanjon̄ak in bwebwenato (allegory) eo, lale pija eo me ej itok ippān laajrak in.
Jemaron̄ aolep jerbal n̄an Anij kōn jipan̄ E aiintok ajri ro Nejin.
Anij ej kūr eō n̄an jipan̄ E aiintok ajri ro Nejin.
Ro “rikarejeran jet” (Jekab 5:70) me raar kūrļo̧k n̄an lowaan jikin kallib eo an Irooj ekoba armej ro āinwōt kwe—āinwōt ro uwaan Kabun̄ in, jej aolep eddo n̄an jipan̄ Anij aiintok ajri ro Nejin. Ta pedped ko kwoj loi ilo Jekab 5, eļaptata eoon ko 61–62 im 70–75, kōn jerbal ilo jikin kallib eo an Irooj? Ekōjkan am̧ kar en̄jake An kūr eok n̄an jerbal ilo jikin kallib eo An? Ta en̄jake ko kwaar en̄jaki ilo am̧ bōk kuņaam̧ ilo jerbal eo An?
Lale barāinwōt “Missionary Work,” Gospel Topics, topics.ChurchofJesusChrist.org; “Old Testament Olive Vineyard,” “Help the Church Grow” (videos, ChurchofJesusChrist.org).
Imaron̄ jutak pen wōt n̄e ro rej idajon̄jon̄e tōmak eo aō.
Ejja jekjek ko wōt me an Rinipai ro ippān Sherem emakijkij aer waļo̧k rainin: emaron̄ wōr rimāletlet, armej ro rōwejepedik ilo kōnono me rej kajjieon̄ kakkure tōmak eo am̧. Bōtaab Jekab “jab maron̄ em̧m̧akūt” (Jekab 7:5). Ekōjkan an Jekab kar uwaak ke tōmak eo an kar lukwo̧rkwo̧re? Ta eo kwoj katak jān uwaak ko an? Ta eo komaron̄ kōm̧m̧ane kiiō n̄an m̧aanjabpopo n̄an iien ko n̄e tōmak eo am̧ naaj idajon̄jon̄e?
Lale barāinwōt “Answering Gospel Questions,” Gospel Topics, topics.ChurchofJesusChrist.org; Jeffrey R. Holland, “Wōņāān eo—im Kōjeram̧m̧an ko—an Rikaļooran,” Ensign ak Kweilo̧k eo Eļap, Eprōļ 2014, 6–9.
Ļōmņak ko n̄an Ekkatak Jeje ko Rekwojarjar eo an Baam̧ļe im Noko in Jota eo an Baam̧le
Ilo am̧ riiti jeje ko rekwojarjar ippān baam̧ļe eo am̧, Jetōb eo emaron̄ jipan̄ eok jeļā ta pedped ko n̄an kalikkari im ekōnono kaki n̄an maron̄ tōpar aikuj ko an baam̧le eo am̧. Ijin rej jet ļōmņak ko.
Jekab 5
Jet baam̧le ko kar lo ej jipan̄ n̄an pijaik kōkaļļe ko jān waanjon̄ak in bwebwenato (allegory) eo kōn wōjke olive ko ilo aer riiti. Baam̧le eo am̧ emaron̄ lem̧ōņōņō ilo kōm̧m̧ane men jab in, ak emaron̄ bar juon wāween komaron̄ jipan̄ ro uwaan baam̧le eo pijaikļo̧k kōkaļļe ko ilo waanjon̄ak in bwebwenato (allegory) eo. Bōlen komaron̄ kōkaļļeik juon eria ioon juon tebōļ ak laļ n̄an bōk jikin jikin kallib eo (ak laļ in) im jutak kōn wōjke olive eo eawiie (ak im̧ōn Israel) ippān juon men, āinwōt puzzle, me emaron̄ in ajej ilo m̧ōttan ko (n̄an bōk jikin ajededļo̧k eo an Israel) innām bar kakobaiktok er (n̄an bōk jikin kobatok eo an Israel). Ta eo waanjon̄ak in bwebwenato (allegory) in ej katakin kōj kōn Irooj? Kōn ro Rikarejeran?
Jekab 5:70–77
Ilo am̧ riit kōn “iien eo āliktata” me Irooj ej jerbal ilo jikin kallib eo An, ta eo ej im̧we eok im baam̧le eo am̧ n̄an jerbal n̄an Irooj “kōn ami kajoor”? (Jekab 5:71). Komaron̄ kūr ro uwaan baam̧le eo n̄an kōm̧m̧ane eoon 75 n̄an eok make kōn kobaik etaer n̄an eoon in—n̄an waanjon̄ak, “jeram̧m̧an n̄an eok [etam̧]” Bōlen remaron̄ kwaļo̧k en̄jake ko me raar en̄jake lan̄lōn̄ ilo aer jerbal n̄an Irooj an jikin kallib eo, n̄an waanjon̄ak kōn kwaļo̧k gospel eo, jerbal ilo tampeļ eo, ak kōkajoorļo̧k ro uwaan Kabun̄ in. (Lale barāinwōt M. Russell Ballard, “Put Your Trust in the Lord,” Ensign ak Liahona, Nob. 2013, 43–45.)
Jekab 6:4–7
Ekōjkan an Irooj kar eļļo̧ke pein tūriam̧o kake eo An n̄an kōj? Ta meļeļe in naan eo “eddāp” ilo eoon kein? Ekōjkan an Irooj kar eddāp n̄an kōj? Ekōjkan ad maron̄ eddāp n̄an E?
Jekab 7:1–12
Ta eo jej ekkatak jān eoon kein kōn ekōjkan an armej kajjieon̄ tōl ro jet n̄an jōbwābwe? Ekōjkan ad maron̄ ļoor waanjon̄ak eo an Jekab im dim wōt ilo tōmak eo ad ilo Kraist?
N̄an eļapļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Kōkōm̧anm̧anļo̧k Ad Katakin
Kakilōklōke juon eoon. Kālet juon eoon in jeje ko rekwojarjar me eļaptata an ļap meļeļein n̄an baam̧le eo am̧, im kakilōklōke ippān doon. Elder Richard G. Scott eaar katakin, “Kakilōklōke juon eoon ej erom̧ juon m̧ōttad indeeo me ejjab m̧ōjņo̧ļo̧k kōn tōre in iien” (“The Power of Scripture,” Ensign ak Liahona, Nob. 2011, 6).