“M̧aaj 9–15. Jekab 1–4: “Kōllaajak n̄an Anij kōn Pinmuur eo an Kraist,” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
“M̧aaj 9–15. Jekab 1–4,” Itok, Ļoor Eō—N̄an Kajjojo Armej im Baam̧le ko: 2020
Jeorļo̧ki Bōd, jān Greg K. Olsen
M̧aaj 9–15.
Jekab 1–4.
Kōllaajak n̄an Anij kōn Pinmuur eo an Kraist
N̄e kwoj je en̄jake ko rej im̧we eok ilo jetōb, kwoj kwaļo̧k bwe kwoj kōņaan bwe Jetōb Kwojarjar eo en katakin eok. Ilo am̧ riiti Jekab 1–4, ļōmņak in je kōļmenļo̧kjeņ ko am̧.
Je En̄jake ko Rej Im̧we Eok
Armej in Nipai ro raar ļōmņak Nipai eaar “rikōjparok” (Jekab 1:10). Eaar bōbrae er ņae jodik ko jān rikōjdāt ro aer, im eaar kakkōl er kōn kauwōtata ko ilo jetōb. Kiiō eaar jako, im jerbal eo kōn tōl armej in Nipai ro ilo jetōb eaar ilo̧k ioon Jekab, eo Nipai eaar kapiti n̄an erom̧ juon pris im rūkaki an armej ro (lale Jekab 1:18). Kōn im̧we, Jekab eaar kile bwe armej ro an raar aikuj in katakin kōn “kanooj eddo” bwe raar “jino m̧ad ilo jero̧wiwi” (Jekab 2:7, 5). Jerawiwi kein raar kanooj āinwōt ta eo armej ro rej kakkōt kaki rainin: iakwe an m̧weie im jerawiwi an m̧ōm̧ an kanniōk. Im aaet ke Jekab eaar en̄jake bwe eaar aikuj in liaakeļo̧k nana in, būruwōn eaar barāinwōt metak n̄an ro raar ļanotot jān e, ro būruwier raar “deili kōn kinej ko rem̧wilaļ” (Jekab 2:35). Jekab eaar kam̧ool bwe kōmour eo n̄an jim̧or kumi ko—rijerawiwi im ikinejnej ilo jetōb—itok jān Rilo̧mo̧or eo Jisōs Kraist. Ennaan eo an Jekab, āinwōt ennaan eo an Nipai m̧okta jān e, kar juon kūr n̄an “kōllaajak n̄an [Anij] kōn pinmuur eo an Kraist” (Jekab 4:11).
Ļōmņak ko n̄an Ekkatak Jeje ko Rekwojarjar Ippam̧ Make
Irooj ekōņaan bwe in kōļapļo̧k kūr eo aō.
N̄an Jekab, katakin naan eo an Anij eaar ļapļo̧k jān juon ijjitōn̄ jān ļeo jein—eaar juon “ijjilōk jān Irooj,” kōn menin eaar kanooj jerbal tiljek n̄an “kōļapļo̧k kūr eo [an]” (Jekab 1:17, 19). Būreejtōn Gordon B. Hinckley eaar katakin bwe jej kōļapļo̧k kūr ko ad ilo ad jerbal kōn tiljek, ilo ad katak kōn tōmak im naan in kam̧ool, ilo ad ļōn̄aj im kōkajoorļo̧k im kalōk lōke ko an jim̧we ippān ro mour ko aer jej im̧we” (“Magnify Your Calling,” Ensign, May 1989, 47). Ļōmņak kōn [ijjilōk] eo am̧ jān Irooj” ilo am̧ riiti Jekab 1:6–8, 15–19 im 2:1–11. Etke Jekab eaar kanooj in tiljek ilo an jerbal? Ta eo waanjon̄ak eo an ej im̧we eok n̄an kōm̧m̧ane n̄an kōļapļo̧k kūr ko am̧ ilo Kabun̄ in im eddo ko am̧ ilo m̧weo?
Lale barāinwōt “Rise to Your Call” (video, ChurchofJesusChrist.org).
Irooj ej laudin̄din̄ ilo mour erreo.
Jerawiwi ewōr an kaje ko n̄an kajjojo armej im n̄an jukjuk in pād ko. Ilo kōnono kōn jewawiwi an m̧ōm̧ an kanniōk, Jekab eaar kakkōl kōn jim̧or kaje ko n̄an kajjojo armej im jukjuk in pād ko. N̄e kwoj riiti Jekab 2:31–35 im 3:10, kappukōt wāween mour nana ko eaar jelet armej in Nipai ro āinwōt juon armej im āinwōt kajjojo armej. Ekōjkan an wāween kein ainļo̧k wōt n̄an kaje ko an mour nana eo kwoj loe ilo laļ in rainin? Ta eo kwoj loe ilo naan ko an Jekab me emaron̄ jipan̄ eok katakin juon eo kwoj iakwe kōn aorōk eo an mour erreo? Ekōjkan am̧ kar jeraam̧m̧an jān kijejeto ko am̧ n̄an erreo?
Jeļā bwe Jekab eaar barāinwōt kōnono kōn imminene eo kōn lōn̄ļo̧k jān juon pāleen kōrā. Ta eo kwoj loe ilo Jekab 2:23–30 me ej jipan̄ eok meļeļe etke Irooj eaar, ilo jekjek ko ewōr jon̄aer, kar kakien armej ro An n̄an kōm̧m̧an m̧are eļapļo̧k jān juon? Ekōjkan An en̄jake kōn ro me rej kōm̧m̧ane ilo an ejjeļo̧k mālim jān E?
Imaron̄ in kōllaajak n̄an Anij kōn Pinmuur eo an Kraist.
Jekab eaar akweļap ippān armej ro an n̄an “kōllaajrak n̄an [Anij] kōn pinmuur eo an Kraist” (Jekab 4:11). Ta eo kwoj ļōmņak ej meļeļe in? Enaaj ke jipan̄ n̄an lale kōllaajrak ilo jon tikjinede? Bōlen komaron̄ lo naan ko an eoon ko ilo jebta in me rej kwaļo̧k n̄an eok ekōjkan am̧ maron̄ itok n̄an Kraist bwe kwon maron̄ kōllaajrak n̄an Anij. N̄an waanjon̄ak, Jekab eaar katakin bwe kien Moses kar leļo̧k juon unin tōl n̄an armej ro n̄an Jisōs Kraist (lale Jekab 4:5). Ta eo Anij eaar leļo̧k n̄an ba kajien n̄an eok Kraist? Ekōjkan am̧ kōjerbal men kein n̄an erom̧ epaakeļo̧k Anij?
Lale barāinwōt 2 Nipai 10:24.
Imaron̄ joļo̧k tōl pilo ilo jetōb kōn kalimjōk wōt Rilo̧mo̧o̧r eo.
Āinwōt Jekab eaar kappukōt n̄an kanooj tōl armej ro an n̄an Irooj, eaar kakkōl er n̄an jab pilo ilo jetōb im jab kowaan “naan ko ralikkar an gospel eo” (lale Jekab 4:13–14). Elder Quentin L. Cook eaar kakkōl kōn ejjab jorrāān ko wōt ilo tōre in ad: “Ewōr juon iminene ilubwilijin jet iaad n̄an ‘reilo̧k eļļāļo̧k jān kōkaļļe eo’ ijello̧kin n̄an dāpij wōt juon naan in kam̧ool kōn pedped ko an gospel eo. Jej kōm̧m̧ane menin n̄e jej bōk jikin tōmak ko an armej n̄an m̧ool ko an gospel eo, erom kōraat kōn jet men ilo gospel eo, … ak lelōn̄ļo̧k kakein ko ioon katak ko. Joļo̧k m̧wil kein naaj jipan̄ kōj joļo̧k pilo an kabun̄ im pere eo me Jekab eaar kōmeļeļeik” (“Looking beyond the Mark,” Ensign, Mar. 2003, 42).
Ekkar n̄an Jekab 4:8–18, ta eo jemaron̄ kōm̧m̧ane n̄an kalimjōk wōt Rilo̧mo̧or eo im joļo̧k pilo ilo jetōb?
Ļōmņak ko n̄an Ekkatak Jeje ko Rekwojarjar eo an Baam̧ļe im Nokon in Jota eo an Baam̧ļe
Ilo am̧ riiti eoon kein ippān baam̧ļe eo am̧, Jetōb eo emaron̄ jipan̄ eok jeļā ta pedped ko n̄an kalikkari im ekōnono kaki n̄an maron̄ tōpar aikuj ko an baam̧ļe eo am̧. Erkein rej jet ļōmņak ko.
Jekab 1:6–8, 15–19; 2:1–11; 4:18
Ta naan ko im eoon ko ilo eoon kein rej kwaļo̧k iakwe eo an Jekab n̄an ro eaar tōl er? Ta eo em̧ōj an ritōl ro ad ilo Kabun̄ in raar kōm̧m̧ane n̄an jipan̄ kōj en̄jake “ikdeelel eo im inepata eo n̄an menin jeraam̧m̧an ko an [ad] jetōb”? (Jekab 2:3). Bōlen ro uwaan baam̧le eo remaron̄ kwaļo̧k wāween ko jemaron̄ rejtake ritōl ro ad an Kabun̄ in. Komaron̄ karōk n̄an kōm̧m̧an jet men ko āinwōt juon baam̧le n̄an ritōl ro an Kabun̄ in ijo jokwe ie, n̄an waanjon̄ak jeje leta ko n̄an kam̧m̧oolol er kōn jerbal in jipan̄ eo aer ak keememej er im baam̧ļe ko aer ilo jar ko ami.
Jekab 2:8.
Ekōjkan an naan an Anij kōmour “jetōb ikinejnej”?
Jekab 2:12–21
Ta eo eoon kein rej katakin kōn ekōjkan ad aikuj in kalimjōk m̧weie ilo m̧weiuk? Ta eo jenaaj kōm̧m̧ane n̄an tōpar ro jet me rej aikuji jipan̄ eo ad?
Jekab 3:1–2
Ta meļeļe in n̄an “erreo ilo bōro” im reilo̧k n̄an Anij kōn koļmānļo̧kijeņ eo edim”?
Jekab 4:4–11
Juon wāween n̄an jipan̄ baam̧le eo am̧ meļeļe ta meļeļe in n̄an erom̧ “jab maron̄ idiki” ilo tōmak eo enaaj n̄an pukōt juon wōjke ekilep epaak im kajjitōk ippān ro uwaan baam̧ļe eo n̄an idiki kajjojo ra ko. Innām kōm̧m̧an bwe ren kajjieon̄ n̄an idiki dāpdep eo. Etke epenļo̧k n̄an idiki dāpdep eo? Ta eo jemaron̄ ekkatak jān katak ko an Jekab kōn ekōjkan n̄an kōļapļo̧k tōmak eo me ej “jab maron̄ idiki”?
Ejja āinwōt dāpdep eo an juon wōjke, tōmak eo ad ilo Kraist emaron̄ erom̧ “jab maron̄ idiki.”
N̄an eļapļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Kōkōm̧anm̧anļo̧k Ekkatak Ippam Make
Ron̄jake Jetōb eo. Ilo am̧ ekkatak, kanooj lale ļōmņak im en̄jake ko am̧ (lale K&B 8:2–3), jekdo̧o̧n eļan̄n̄e rejjab āinļo̧k wōt n̄an ta eo kwoj riiti. Im̧we kein remaron̄ in kanooj men ko Anij ekōņaan bwe kwon jeļā im kōm̧m̧ani.
Inaaj Jilkinwaj Naan ko Aer (Jacob the Teacher), jān Elspeth Caitlin Young