“Pāpode 24–M̧aaj 1. 2 Nipai 26–30: ‘Juon Jerbal Ekōppaļpaļ im Kabwilōn̄lōn̄,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
“Pāpode 24–M̧aaj 1. 2 Nipai 26–30,” Itok, Ļoor Eō—N̄an Kajjojo Armej im Baam̧le ko: Bok in: Mormon 2020
Enaaj Tōl Eok kōn Peim, jān Sandra Rast
Pāpode 24–M̧aaj 1
2 Nipai 26–30
“Juon Jerbal Ekōppaļpaļ im Kabwilōn̄lōn̄”
Irooj eaar ba, “Ij jiron̄ aolep … renaaj jeje naan ko Ij kōnono n̄an er” (2 Nipai 29:11). Kōn Jetōb eo, Irooj enaaj kōnono n̄an eok ilo am̧ ekkatak naan eo An. Ļo̧o̧ke ta eo kwoj bōke.
Je En̄jake ko Rej Im̧we Eok
“Ij kanaan n̄an kom̧ kōn raan ko āliktata” Nipai eaar je (2 Nipai 26:14). Ilo bar jet naan, eaar jeje kōn tōre in ad. Im ewōr juon wun n̄an inepata kōn ta eo eaar loe: armej rej kowaan kajoor eo im kabwilōn̄lōn̄ ko an Anij, ajeded in ebanban im jorrāān, tepil eo ej likwōj armej kōn kapo ko rekajoor. Bōtaab ilo kakobaba n̄an raan kein-āliktata, “jerbal ko an marok” (2 Nipai 26:10, 22) kar tōl jān rikapo eo, Nipai eaar barāinwōt kōnono kōn “juon jerbal ekōppaļpaļ im kabwilōn̄lōn̄” kar tōl jān Irooj Make (2 Nipai 27:26). Im ilo ioļapļap in jerbal jab in enaaj juon bok—juon bok me ej kōnono jān bwidej, me ej kwaļo̧k riab ko an Setan, im me ej aiin ro rejim̧we ko rej āinwōt juon kōkaļļe. Bok jab in ej Bok in Mormon, jerbal eo ekabwilōn̄lōn̄ ej jerbal eo an Kabun̄ eo an Irooj ilo raan ko-āliktata, im ekōppaļpaļ eo ej bwe Ej kūr aolepād wōj, kōjekdo̧o̧n m̧ōjņo ko ad, n̄an bōk kūņaan.
Ļōmņak ko n̄an Ekkatak Jeje ko Rekwojarjar Ippam Make
Jisōs Kraist ej kūr aolep n̄an itok n̄an E.
Rikanaan Josep Smith kar katakin bwe Jemedwōj Ilan̄ eļapļo̧k an “ejjeļo̧k dettan meanwōd ko im kōjeraam̧m̧an ko an, jān ad pojak n̄an tōmak ak būki” (The Joseph Smith Papers, “History, 1838–1856, volume D-1,” p. 4 [addenda], josephsmithpapers.org). Riiti ta eo Nipai eaar lo ilo 2 Nipai 26:20–22 im ta eo eaar katakin kōn Rilo̧mo̧o̧r eo ilo eoon ko 23–33, im keidi menin n̄an ennaan eo an Josep Smith. Ta eo kwoj katak kōn meanwōd eo ejjeļo̧k jon̄an an Irooj? Ta eo komaron̄ kōm̧m̧ane āinwōt juon uwaan Kabun̄ eo an Jisōs Kraist n̄an eromļo̧k āinwōt Kraist lo wāween eo kwoj kōm̧m̧ane n̄an ajri ro nejin Anij.
Lale barāinwōt 3 Nipai 18:30–32.
Ta eo bok eo ekar kōnono kake ilo jebta kein?
Kanaan eo an Nipai ilo 2 Nipai 26–27, eo ekajoor an im̧we jān kanaan eo m̧oktaļo̧k an Aiseia (lale Aiseia 29), ej kwaļo̧k kōn waļo̧ktok eo an Bok in Mormon. Kanaan in ej kōmeļeļeik menin:
-
Naan ko an ro ineen Liai (ro bwijjin) kōnono jān “ettā jān būn̄aln̄al” kōn juon “kwominene kake jetōb in” im āinwōt “sili ilo juon bok” (2 Nipaii 26:14–17; lale barāinwōt Aiseia 29:4).
-
Juon m̧ōttan bok eo kar leļo̧k n̄an juon em̧m̧aan eo emeletlet me ej ba, “Ij jab maron̄ kōnono ie” (2 Nipai 27:15–20; Josep Smith—Bwebwenato 1:64–65; lale barāinwōt Aiseia 29:11).
Ilo kakobaba n̄an Aiseia, rikanaan ro jet ilo baibōļ rej kōnono kōn Bok in Mormon, men̄e rejjab kōnono kōn etan. N̄an waanjon̄ak, Ezekiel 37:15–20 ej kōnono kōn “aļaļ eo an Josep,” eo maron̄ keidi n̄an ļo̧o̧k eo an armej in Nipai ro, ro raar ineen Josep. Ļo̧o̧k in emaron̄ erom̧ juon wōt ippān “aļaļ eo an Juda,” meļeļe in Baibōļ eo.
Waanjon̄ak ko jet maron̄ loi ilo unin tōl eo n̄an jeje ko rekwojarjar, “Bok in Mormon” (scriptures.ChurchofJesusChrist.org).
Setan ej pukōt n̄an m̧oņ.
Elōn̄ iaan riab ko im aujiid ko an Setan rej waļo̧k ilo kōmeļeļe eo an Nipai kōn raan ko āliktata 2 Nipai 28. Lale eļan̄n̄e komaron̄ loi (n̄an waanjon̄ak, lale eoon ko 6, 8, 21–23, 29). Etke kwoj aikuj in jeļā kōn riab ko an Setan? Ta eo kwonaaj kōm̧m̧ane n̄e rikapo eo ej kajjieon̄ in m̧oņe eok?
Anij ej wōnm̧aanļo̧k wōt n̄an leļo̧k revelesōn n̄an tōl ajri ro Nejin.
Āinwōt Armej ro Rekwojarjar ilo Raan-ko Āliktata jej jeraam̧m̧an kōn m̧weie in naan an Anij, kōn menin naan in kakkōl ko an Nipai remaron̄ jerbal n̄an kōj: jejjab aikuj in en̄jake bwe “ebwe ippād!” Ilo am̧ riiti naan in kakkōl ko ilo 2 Nipai 28 im 29, kejōkļo̧kjeņ kōn kajjitōk ko āinwōt kein:
-
Ekōjkan an Irooj kōņaan bwe in en̄jake kōn im uwaak n̄an An in naan?
-
Etke armej jet iien rej “illu” kōn bōk eļapļo̧k m̧ool jān Anij? (2 Nipai 28:28). Inan̄in ke kar en̄jake wāween in? Eļan̄n̄e aaet, ekōjkan aō maron̄ ļapļo̧k aō bōk m̧ool eo?
-
Ta meļeļe in n̄an bōk naan an Anij? Ekōjkan aō kwaļo̧k n̄an E bwe ikōņaan bōk eļapļo̧k naan eo An?
Lale barāinwōt Alma 12:10–11; 3 Nipai 26:6–10.
Anij eaar kōpooj Bok in Mormon eo n̄an tōre in ad.
Nipai eaar jeļā kōn revelesōn, em̧ool m̧okta jān an Bok in Mormon eo kar dedeļo̧k kar je, bwe juon raan “renaaj kanooj aorōk n̄an ro nejin armej” (2 Nipai 28:2). Etke Bok in Mormon eo ekanooj aorōk n̄an eok? Ļōmņak kōn kajjitōk in ilo am̧ riiti 2 Nipai 29–30. Ta jet iaan jerbal ko “rekabwilōn̄lōn̄” me Anij ej kōttōpraki ilo laļ in im ilo mour eo am̧ kōn Bok in Mormon eo?
Ļōmņak ko n̄an Ekkatak Jeje ko Rekwojarjar eo an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb eo emaron̄ jipan̄ eok jeļā ta pedped ko n̄an kalikkari im ekōnono kaki n̄an maron̄ tōpar aikuj ko an baam̧le eo am̧. Erkein rej jet iaan ļōmņak ko.
2 Nipai 26:12–13
Nipai eaar katakin bwe Jisōs Kraist ej kwaļo̧k E Make kōn Jetōb Kwojarjar eo. Ta en̄jake ko ro uwaan baam̧le eo remaron̄ kwaļo̧ki ippān doon n̄e naan in kam̧ool ko aer kōn Rilo̧mo̧o̧r eo rekar kōkajoorļo̧k jān Jetōb Kwojarjar eo?
2 Nipai 26:22; 28:19–22
Bōlen baam̧le eo am̧ emaron̄ lem̧ōņōņō kōn katak jān juon men kōmeļeļeik ta eo 2 Nipai 26:22 ej katakin kōn tepiļ. Ilo ami riit kōn aujiid ko an Setan ilo 2 Nipai 28:19–22, komaron̄ pauut pein juon kōn tōreej ko n̄an bōk jikin “juon to iaļo.” Ekōjkan an juon to iaļo āinwōt kapo ko an Setan? Ekōjkan an maron̄ in erom̧ juon to kajoor? Ekōjkan ad maron̄ lo riab ko an Setan?
Nipai ej keidi kapo ko an tepiļ n̄an “juon to iaļo.”
2 Nipai 27:20–21
Ta meļeļe eo an Irooj emaron̄ in kar ke Ej ba, “Imaron̄ make kōm̧m̧ane jerbal eo aō”? Ekōjkan an m̧ool in kareel wāween ad jerbal ilo Kabun̄ eo An?
2 Nipai 28:30–31
Baam̧le eo am̧ emaron̄ ke ļōmņak kōn juon men me, āinwōt revelesōn jān Anij, em̧m̧antata kar bōke jidik in ilo juon iien? Etke Anij ej kwaļo̧k m̧ool eo n̄an kōj “ļain im bar ļain, naan in kain̄i im bar naan in kain̄i, ijin jidik im ijjuweo jidik” ijello̧kin aolep ilo juon wōt iien?
2 Nipai 29:7–9
Ta jibadbad eo an Irooj n̄an kam̧ool ak kwaļo̧k Bok in Mormon eo?
N̄an eļapļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Kōkōm̧anm̧anļo̧k Ekkatak eo Am̧ Make
Kwaļo̧k ļōmņak ko. Ekōnono ippān ro jet kōn ta eo kwoj ekkatak emaron̄ kōkajoorļok meļeļe eo am̧ make. Ālkin riiti 2 Nipai 29:6–14, komaron̄ en̄jake im̧we n̄an kōmeļeļeik n̄an juon m̧ōttam̧ etke jej aikuji Bok in Mormon eo.
Jeje ko an Nipai rej kōnono kōn “juon jerbal ekōppaļpaļ im juon kabwilōn̄lōn̄” me enaaj kar bōk jikin ilo raan ko āliktata (2 Nipai 27:26).