“Pāpode 17–23. 2 Nephi 11–25: ‘Jej Mōņōņō ilo Kraist,’” Itok, Ļoor Eō—N̄an Kajjojo Armej im Baam̧le ko: Book in Mormon 2020 (2020)
“Pāpode 17–23. 2 Nipai 11–25,” Itok, Ļoor Eō—N̄an Kajjojo Armej im Baam̧le ko: 2020
Pāpode 17–23
2 Nipai 11–25
“Jej Mōņōņō ilo Kraist”
Nipai eaar kwaļo̧k bwe naan ko an Aiseia “raar kajoor n̄an aolepen ro me raar obrak kōn jetōbin kanaan” (2 Nipai 25:4). Ilo am̧ riiti, pukot jetōbin kanaan n̄an kōpooj eok make ilo jetōb, ron̄jake Jetōb, im je en̄jake ko rej im̧we eok.
Je En̄jake ko Rej Im̧we Eok
Jeje ioon pileij ko ejjab pidodo, im pileij ko reddik an Nipai eaar jab bwe. Kōn menin etke Nipai eaar itōn kapeik aolepān naan ko an Aiseia n̄an jeje ko an? Eaar kōm̧m̧ane “bwe jabdewōt … renaaj loe naan kein remaron̄ kotak burueer im lan̄lōn̄” (2 Nipai 11:8). Ilo allikar in, juon kajjitōk n̄an riiti naan ko an Aiseia ej juon kajjitōk n̄an m̧ōņōņō. Komaron̄ in bōk meram, āinwōt kar Nipai, ilo kanaan ko an Aiseia kōn aiintok eo an Israel, itok eo an Messaia, im aenōm̧m̧an eo kar kallim̧ur kake n̄an ro rōwānōk. Komaron̄ m̧ōņōņō men̄e ilo raan in “inepata, im marok,” kwaar “bōk juon meram eļap” (2 Nipai 18:22; 19:2). Komaron̄ lan̄lōn̄ bwe kwon maron̄ “itōk dān jān aebōj in lo̧mo̧o̧r” (2 Nipai 22:3). Ilo naan ko jet, “komaron̄ m̧ōņōņō ilo Kraist” (2 Nipai 25:26).
Ļōmņak ko n̄an Ekkatak jeje ko Rekwojarjar Ippem Make
Elmen aō maron̄ meļeļe ļo̧k katak ko an Aiseia?
Nipai eaar kile bwe jet, “naan ko an Aiseia rejjab lem waan” (2 Nipai 25:4). Menin emaron̄ m̧ool n̄an ro rejjab jeļā kōn m̧anit eo an Riju im bwebwenato eo im āinwōt kar Nipai (lale 2 Nipai 25:6.). Ak Nipai eaar bar letok kapilōk n̄an jipan̄ kōj lo meļeļe ilo jeje ko an Aiseia:
-
“Keidi naan ko n̄an” eok make (2 Nipai 11:2).Elōn̄ katak ko an Aiseia ewōr meļeļeier im rekkar. N̄an waanjon̄ok, jeje ko an kōn aiin Israel emaron̄ in im̧we eok n̄an kōļmenļo̧kjeņ kōn aikuj eo am̧ n̄an “bar kōro̧o̧ltok” er n̄an Rilo̧mo̧o̧r eo.
-
Pukote n̄an “obrak kōn jetōbin kanaan in” (2 Nipai 25:4).Wāween eo em̧m̧antata n̄an meļeļe kanaan ko an Aiseia ej n̄an pukot im̧we jān Jetōb. Jar kōn tōl an jetōb. Komaron̄ jab meļeļe aolep men otemjeļo̧k ilo juon wōt iien, ak Jetōb emaron̄ jipan̄ eok jeļā ta eo kwoj aikuji n̄an mour eo am̧ rainin.
Komaron̄ bar lo jipan̄ n̄an etal n̄an jipan̄ in ekkatak ko ilo jeje ko rekwojarjar, ekoba footnote ko, jebta heading ko, Unin Tōl eo n̄an Jeje Ko Rekwojarjar, im ko jet.
“Wāween eo ejim̧we ej n̄an tōmak ilo Kraist.”
Nipai eaar jim̧or kwaļo̧k kadkadin im kadedeļo̧k naan eo an Aiseia ilo an kwaļo̧k an naan in kam̧ool kōn Jisōs Kraist (lale 2 Nipai 11:2–8; 25:19–29). Ta eaar im̧we eok kōn naan in kam̧ool eo an? Ilo am̧ ekkatak wiik in, ļōmņak kōn kōņaan eo an Nipai n̄an “kareel ro [nejin] … n̄an tōmak ilo Kraist, im n̄an jepļaaktok n̄an Anij”2 Nipai 25:23), im keememej eoon ko me rekareel eok n̄an tōmak im ļoor Jisōs Kraist.
Emaron̄ jipan̄ n̄an keememej bwe elōn̄ katak ko an Aiseia kōn Rilo̧mo̧o̧r rej waļo̧k ilo kōkkaļļe ko. N̄an waanjon̄ok, komaron̄ lo Rilo̧mo̧o̧r ilo kōkkaļļe ko āinwōt irooj an juon jikin kallib (lale 2 Nipai 15:1–7), juon dōkā (lale 2 Nipai 18:14), im juon meram (lale 2 Nipai 19:2). Ta kōkkaļļe ko jet kōn Jisōs Kraist kwoj loe ilo jebta kein? Ta kōkkaļļe ko rej katakin eok kōn E?
Jua im m̧weie renaaj ettā.
Nipai eaar lo bwe jua eaar anjo̧ ioon armej ro an (lale 1 Nipai 12:19). Kōn menin eaar jab kabwilōn̄ Nipai bwe en kwaļo̧k n̄an armej ro an kōn naan in kakkōļ eo an Aiseia kōn jua. Ilo jebta 12 im 13, pukot naan ko me Aiseia ej kōjerbali n̄an kōjerbal jua, āinwōt ettoon im nana. Innām komaron̄ kajjieon̄ in kōkaduiki kakkōļ kein ilo naan ko am̧ make, āinwōt n̄e kwon kar je juon ennaan n̄an kwe make kōn jua.
Bar lale “Jebta 18: Ekkōl kōn Jua” (Teachings of Presidents of the Church: Ezra Taft Benson [2014], 229–40).
2 Nipai 12:2–5; 21:9–12; 22; 24:1–3
Ilo Taujin Iiō, armej ro an Anij renaaj m̧ōņōņō ilo aenōm̧m̧an.
Komaron̄ lo eļapļo̧k jipan̄ n̄an pijaik eok make n̄an bōk jikin Nipai im armej ro an. Pijaik am̧ ko jān Jerusalem m̧okta jān kakkure (lale 2 Nipai 25:10.), im kiiō kwoj m̧ōttan wōt an ejeplōklōk Israel. Elmen en̄jake eo n̄an riiti katak ko an Aiseia kōn kobatok eo an Israel ilju im jekļaj im juon aenōm̧m̧an ilo Millennium? Āinwōt Armej ro Rekwojarjar, kar kūr kōj n̄an jipan̄ aiintok armej ro an Anij ilo raan kein āliktata n̄an pojak n̄an an Kraist tōl. Ilo am̧ riiti eoon kein, kōļmenļo̧kjeņ elmen am̧ jipan̄ kakūrm̧ool kanaan ko rej kwaļo̧k. Ta am̧ en̄jake eim̧we n̄an jipan̄ aiintok armej ro an Anij?
Ļōmņak ko n̄an Ekkatak Jeje ko Rekwojarjar eo an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kake n̄an tōpar aikuj ko an baam̧le eo am̧. Erkein rej jet iaan ļōmņak ko.
2 Nipai 12:1–3
Eļan̄n̄e em̧ōj am̧ kar pād ilo tampeļ—“m̧weeo im̧ōn Irooj ioon to̧l”—komaron̄ kwaļo̧k n̄an baam̧le eo am̧ elmen an bujen ko an tampeļ jipan̄ eok “etetal ilo iaļ ko an [Irooj].” Eļan̄n̄e kwojjan̄in kar pād ilo tampeļ, riiti eoon kein ippān doon emaron̄ im̧we juon ekōnono kōn kilen am̧ maron̄ kōppopo n̄an kōjeraam̧m̧an ko an tampeļ.
2 Nipai 15:18–23
Baam̧le eo am̧ remaron̄ ke ļōmņak kōn waanjon̄ok ko raan kein kōn pepe ko rejekkar me eoon kein rej kwaļo̧ki? Elmen ad bōbrae m̧ōņ jān pepe ko reriab kōn em̧m̧an im nana?
2 Nipai 21
Eļan̄n̄e baam̧le eo am̧ eaikuj meļeļe jebta in (eo ej uwaak ko n̄an Aiseia 10), komaron̄ lo en̄jake ilo Katak im Bujen ko 113:1–6, eo me Rikanaan Josep Smith ej uwaaki jet kajjitōk ko kōn Aiseia 11. Ta eo jaar ekkatak kōn Jisōs Kraist jān eoon kein?
2 Nipai 21:9
Ta jet men ko rekkar jemaron̄ kōm̧m̧ani n̄an jipan̄ kobrak laļ in kōn “jeļāļo̧kjeņ eo an Irooj”?
2 Nipai 25:23–26
Elmen am̧ maron̄ jipan̄ baam̧le eo am̧ “m̧ōņōņō ilo Kraist”? Bōlen komaron̄ kajjitōk ippāer n̄an je ioon peba ko men ko Rilo̧mo̧o̧r eaar kōm̧m̧ani me ej bōktok n̄an er m̧ōņōņō. Innām, ilo nokon in jota ko an baam̧le eo tok juon ak ekkatak jeje ko rekwojarjar an baam̧le, juon emaron̄ in riiti peba eo. Ro uwaan baam̧le eo remaron̄ kobaik peba ko ilowaan iiō eo.
N̄an eļapļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Kōkōm̧anm̧anļo̧k Am̧ Ekkatak Ippem Make
Pukot Jon̄ok ko. Ilo jeje ko rekwojarjar jemaron̄ lo jon̄ok ko me rej kwaļo̧k kilen an Irooj jerbale. N̄an waanjon̄ok, ilo 2 Nipai 11–25, komaron̄ lo jon̄ok ko me rej kwaļo̧k wāween an Irooj kakkōļ im jeorļo̧kin bōd.
Panama City Panama Temple “N̄e toļ an im̧ōn Irooj naaj kajutak e ilo ioon toļ ko, … im aolep laļ renaaj ibebļo̧k n̄an e.” (2 Nipai 12:2).