“Pāpode 3–9. 2 Nipai 1–5: ‘Kōm ar Mour ilo Juon Wāween Elem̧ōņōņō,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)

“Pāpode 3–9. 2 Nipai 1–5,” Itok, Ļoor Eō—N̄an Kajjojo Armej im Baam̧le ko: 2020

Pija

Adam im Iv rej em̧m̧akūt jān Jikin Kallip Iden

Adam im Iv, jān Douglas Fryer

Pāpode 3–9

2 Nipai 1–5

“Kōm ar Mour ilo Juon Wāween Elem̧ōņōņō”

Jeje ko Rekwojarjar remaron̄ kōppeļļo̧k kōjām in revelesōn an juon make. Ilo am̧ riiti 2 Nipai 1–5, komaron̄ loe bwe ewōr juon men Irooj Ekōņaan katakin eok.

Je En̄jake ko Rej Im̧we Eok

Eļan̄n̄e kwaar jeļā bwe mour eo am̧ ekar tin jem̧ļo̧k, ta ennaan ko āliktata kwon kar kwaļo̧k n̄an ro kwoj lukkuun iakwe er? Ke rikanaan Liai eaar en̄jake ke epaak an jem̧ļo̧k mour eo an, eaar aiintok ajri ro nejin ippān doon bar juon alen n̄an kanaan im kwaļo̧k m̧ool ko an gospel eo me eaar lukkuun aorōk ippān, ippān armej ro raar lukkuun aorōk ippān. Eaar katakin er kōn anemkwoj, pokake, Wōtļo̧k eo an Adam im Iv, lo̧mo̧o̧r kōn Jisōs Kraist, im lan̄lōn̄. Ejjab aolep ro nejin raar bōk naan in kam̧ool eo an āliktata, ak ro rekar—ippān ļo̧k milien ro rej riiti rainin—kar loe ilo naan in kam̧ool eo an kōn pedped in katak ko kōn mour “ilo juon wāween elem̧ōņōņō” (2 Nipai 5:27).

Pija

pija ej bōk jikin ekkatak ippam̧ make

Ļōm̧ņak ko n̄an Ekkatak Jeje Ko Rekwojarjar Ippam̧ Make

2 Nipai 2

Ij anemkwoj n̄an kālet mour indeeo.

Elder D. Todd Christofferson eaar ba: “Anij ekōņaan bwe ro Nejin ren aikuj mour ekkar n̄an anemkwoj in kanniōk eo Eaar leļo̧k n̄an er. … Ej An karōk im Ankilaan bwe jen bōk pedped in jokālet ilo mour eo ad make” (“Anemkwōj Indeeo, n̄an M̧akūtkūt n̄an er Make,” Ensign ak Liaona, Nob. 2014, 16). Ilo katak ko an kōn anemkwoj, Liai eaar kalikkar jekjek ko raorōk me ekōm̧m̧an bwe anemkwoj en jerbal n̄an kōmaron̄ kōj n̄an tōpar aorōk eo ad ekwojarjar, ekoba men kein ilaļ:

Juon jeļāļo̧kjeņ kōn em̧m̧an im nana (2 Nipai 2:5)
Juon kien kar leļo̧k n̄an ro nejin armej (2 Nipai 2:5)
Jum̧ae, ilo kapo ko (2 Nipai 2:11
Kajoor n̄an jerbal (2 Nipai 2:16)

Ilo am̧ riiti 2 Nipai 2, ta eo kwaar ekkatak kōn kajjojo jekjek kein kōn anemkwoj im jem̧jerā eo aer n̄an doon? Ta eo enaaj waļo̧k n̄an anemkwoj eo ad eļan̄n̄e juon ak elōn̄ iaan jekjek kein raar jako? Ta ko jet kwaar ekkatak kōn anemkwoj jān naan ko an Liai?

2 Nipai 2:22–29

Wōtļo̧k eo im Pinmuur eo an Jisōs Kraist rej m̧ōttan ko raorōk ilo karōk eo an Jemedwōj Ilan̄.

Elōn̄ armej ro rej lo wōtļo̧k eo an Adam im Iv āinwōt juon jorrāān ļapļap. Ijoke, katak ko an Liai kōn Wōtļo̧k eo ej kwaļo̧k unin an kar aorōk m̧ōttan in ilo karōk eo an Jemed kōn eddōkļo̧k eo ad indeeo. Ilo am̧ riiti eoon kein, pukot etke Wōtļo̧k eo ekar aikuj bwe en kōm̧m̧an bwe kōj—ajri ro nejin Jemedwōj Ilan̄—ren eddōkļo̧k. Elmen an katok in pinmuur eo an Kraist lo̧mo̧o̧ren kōj jān Wōtļo̧k eo?

Bar lale Moses 5:9–12; 6:51–62; “Fall of Adam and Eve,” Gospel Topics, topics.Churchof JesusChrist.org.

2 Nipai 3:6–24

Josep Smith kar kālet e m̧okta jān an kar ļotak tok n̄an kōjepļaaktok gospel eo.

Ilo m̧ōttan eo āliktata ilo 2 Nipai 3 ej kwaļo̧k juon kanaan kar letok jān Josep eo Egypt kōn juon rilolo ilju im jekļaj eo enaaj ettōņake etan (lale eoon 14–15)—Josep Smith. Ej barāinwōt kwaļo̧k kōn jerbal eo an Josep Smith. Ta eo eoon 6–24 ej ba bwe Josep Smith, juon “rilolo kar kālete,” naaj kōm̧m̧an n̄an kōjeraam̧m̧an armej ro an Anij? Elmen an jerbal eo an Josep Smith “aorōk” n̄an eok?

M̧ōttan eo eaorōk ilo jerbal eo an Josep Smith ekar bōktok jeje ko an ro ineen Josep, ko rej waļo̧k ilo Bok in Mormon. Ta eo kwaar ekkatak jān jebta in kōn aorōk eo an Bok in Mormon eo?

Bar lale Joseph Smith Translation, Genesis 50:24–38 (in Bible appendix).

2 Nipai 4:15–35

Imaron̄ oktakļo̧k n̄an Anij kōn m̧ōjņo̧ ko aō.

Nipai eaar būrom̧ōje jemen. Eddo eo n̄an tōl baam̧le eo an eaar pād ioon. Eaar jepooļ kōn kapo im kar inepata kōn jerawiwi ko an. Men̄e jekjek ko am̧ roktak jān Nipai, komaron̄ keidi n̄an jet iaan ļōm̧ņak im en̄jake ko an kar je ilo 2 Nipai 4:15–35. Ta eo eaar jipan̄ Nipai ilo apan̄ ko an? An kar Nipai anjo̧ ioon apan̄ ko, elmen an jipan̄ eok jelm̧ae men ko reppen?

2 Nipai 5

Mōņōņō maron̄ loe ilo gospel in.

Elmen am̧ kōmeļeļeik m̧ōņōņō? Nipai eaar je bwe armej ro an raar mour “ilo juon wāween elem̧ōņōņō” (2 Nipai 5:27). Komaron̄ pukot kālet ko Nipai im armej ro an raar kōm̧m̧ani me rekar tōlļo̧k n̄an lem̧ōņōņō—wāween ko raar jipan̄ doon im baam̧le ko aer, ta eo raar kaorōke ilo jukjukinpād eo aer, im ko jet. Ta eo kwaar ekkatak me ejipan̄ eok kalōk juon mour elem̧ōņōņō, āinwōt kar armej ro an Nipai?

2 Nipai 5:20–21

Ta kar lia eo me eaar itok ioon Rileman ro?

Ilo raan ko an Nipai lia eo an Rileman ro ekar bwe raar “m̧wijkōk jān im̧aan mejān [Irooj] … kōn aer nana” (2 Nipai 5:20–21). Menin ekar meļeļein bwe Jetōb eo an Irooj ekar ilo̧k jān mour ko aer. Tokālik ke Rileman ro raar kaorōk gospel eo an Jisōs Kraist,“kalia an Anij eaar jab bar ļoor er” (Alma 23:18).

Bok in Mormon eo ej barāinwōt kwaļo̧k bwe juon kakōļļe in kil ekilmej ekar itok ioon Rileman ro ālkin an Rinipai ro kar jepeļļo̧k jān er. Kōjāllin im paotok eo an kakkōļļe in ekar jab kanooj lukkuun po lel meļeļe kake. Kakkōļļe eo ilo jino in ekar kōjeno̧lok Rileman ro jān Rinipai ro. Tokālik, ke jim̧or Rinipai ro im Rileman ro kajjojo rekar dibuk tōre in nana ko im wānōk ko, kakkōļļe eo ekar jino an jab ekkar āinwōt juon kakkōļļe ilo an Rileman ro jutak im̧aan Anij.

Rikanaan ro raar bar kapene ilo tōre in ad bwe kil kilmej ejjab juon kakkōļļe an jab kōņaan ak lia. Kabun̄ in ej kautiej katak eo an Nipai bwe Irooj “ej kabbōjrak e jān an itok n̄an Ippān, kilmeej im mouj, rilokjak im riaemkwōj, m̧aan im kōrā” )2 Nipai 26:33). Būreejtōn Russell M. Nelson eaar kean̄: “Irooj ej kōļapļo̧k katak eo An emenin aorōk an jokkun wōt juon an iien em̧m̧an n̄an ajri ro Nejin. … Oktak ko ilo m̧anit, kajin, kadkad in (gender), armej in ia (race), im rilaļ (nationality) rej makunļo̧k ilo juon jekjek eļap ilo an ritōmak ro deļo̧n̄e iaļ in bujen eo im itok n̄an ad Ripinmuur eo ejitōnbōro” (“President Nelson Remarks at Worldwide Priesthood Celebration” [June 1, 2018], newsroom.ChurchofJesusChrist.org).

Lale barāinwōt “Till We All Come in the Unity of the Faith” (video ChurchofJesusChrist.org).

Pija

pija eo ej bōk jikin ekkatak an baam̧le

Ļōmņak ko n̄an Ekkatak Jeje ko Rekwojarjar eo an Baam̧le im Nokon in Jota eo an Baam̧le

Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kake n̄an tōpar aikuj ko an baam̧le eo am̧. Erkein rej jet iaan ļōmņak ko.

2 Nipai 1:13–25

Ta eo eoon kein rej katakin kōj kōn kōņaan eo eļap an juon jinen im jemān ro n̄an e ak ajri ro nejin?

2 Nipai 3:6

Riit ippān doon “Rilolo” ilo Baibōļ Tikjinede eo. Elmen an Josep Smith kar juon rilolo? Etke jej kam̧m̧oolol kōn jerbal eo me Josep Smith ekar kōm̧m̧ane? (lale 2 Nipai 3:6–24).

2 Nipai 2:22–25

Ilo am̧ riiti 2 Nipai 4:20–25 ippān doon, bōjrak jidik ilo kajjojo eoon, im kajjitōk ippān baam̧le eo n̄an kwaļo̧k ta eo raar ioone ak en̄jake me Nipai ej kōmeļeļeiki. Ta eo Anij eaar kōm̧m̧ane n̄an baam̧le in ad?

2 Nipai 5

Ta jet iaan wāween ko baam̧le eo am̧ ej mour kake “ilo juon wāween elem̧ōņōņō”? Ilo an baam̧le eo am̧ riiti 2 Nipai 5, komaron̄ kōnono kōn men ko RiNipai ro raar kea kake: baam̧le (eoon 6), kien ko (eoon 10), jeje ko rekwojarjar (eoon 12), jeļāļo̧kjeņ (eoon 15), tampeļ (eoon 16), jerbal (eoon 17), im kūr ko an Kabun̄ (eoon 26). Juon wāween n̄an kōm̧m̧ane menin ej n̄an pukot men ko me rej pinej jenkwan jet iaan men kein im kōnono kōn kilen ad kwaļo̧ki, āinwōt RiNipai ro, rej kaorōk ejja men kein.

Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Kōkōm̧anm̧anļo̧k Ad Katakin

Kwon lale. N̄e kwoj lukkuun lale ta eo ej waļo̧k ilo mour ko an ajri ro nejum̧, kwonaaj lo iien katak ko rem̧m̧an. Kwaļo̧k am̧ ļōmņak kōn ta ko ro nejum̧ rej kōm̧m̧ani ak kajjitōk ko remaron̄ letok iien ko rem̧m̧an n̄an katakin. (Lale Teaching in the Savior’s Way,16).