Liai im Liaona eo, jān Josep Brickey

Jānwōde 27–Pāpode 2

1 Nipai 16–22

“Inaaj Kōpooj juon Iaļ Im̧aami”

Ilo am̧ katak 1 Nipai 16–22, pukot eoon ko me rej im̧we en̄jake eo am̧. Jet armej em̧m̧an ippāer kōkaļļeik eoon rot in ilo jeje ko aer rekwojarjar; jet rej je kakeememej ko ilo jeje eo. Ļōmņak kilen am̧ naaj je en̄jake ko rej im̧we eok.

Je En̄jake ko Rej Im̧we Eok

Ke baam̧le eo an Liai rej jibadōkļo̧k āneen kallim̧ur, Irooj eaar kōm̧m̧ane kallim̧ur in: “Inaaj kōpooj juon iaļ im̧aami, n̄e kom̧ij kōjparok kien ko Aō” (1 Nipai 17:13). Alikkar, bwe kallim̧ur in eaar jab meļeļein bwe ito-itak in enaaj kar pidodo—ro uwaan baam̧le in renaaj ioon wōt inepata, libpen eo eaar jorrāān, im armej ro raar kwole im mej, ak raar etal wōt im jek wa eo jān kein bobo ko. Ijoke, ke baam̧le eo an raar ioon idajon̄jon̄ ko ak jerbal ko reppen, Nipai eaar jeļā bwe Irooj ejjab ettoļo̧k. Eaar jeļā bwe Anij ej “naajdik [ro retiljek], im kōkajoor er, im kwaļo̧k wāween ko im remaron̄ kōtōprak men eo Eaar kakien er” (1 Nipai 17:3). N̄e kwaar ļōmņak etke men ko renana rej waļo̧k n̄an armej ro rem̧m̧an āinwōt Nipai im baam̧le eo an, komaron̄ lo ļōmņak ko ilo jebta kein. Bōlen eo eaorōktata, kwonaaj lo ta eo armej ro rem̧m̧an rej kōm̧m̧ane n̄e men ko renana rej waļo̧k.

Ļōmņak ko n̄an Ekkatak Jeje ko Rekwojarjar Ippem Make

1 Nipai 16–18

N̄e ij kōjparok kien ko, Anij enaaj jipan̄ eō jelm̧ae apan̄ ko.

Jebta 16–18 in 1 Nipai ej kōmeļeļeik jet apan̄ ko me baam̧le eo an Nipai raar iooni, ekoba ioon an juon bwilo̧k libboņ(lale 1 Nipai 16:17–32), mej eo an Ishmael (lale 1 Nipai 16:34–39), jek wa eo (lale 1 Nipai 17:7–16; 18:1–4), an baam̧le jum̧ae (lale 1 Nipai 18:9–22). Elmen an Nipai kar uwaaki apan̄ kein roktak jān uwaak ko jet an ro uwaan baam̧le eo an? Ta kar jekjek ko an uwaak kein?

Emaron̄ in jipan̄ n̄an je ta eo kwoj loe ilo juon tebōļ ilōn̄ āinwōt kein: “Apan̄,” “Uwaak eo an Nipai,” “Uwaak ko Jet,” im “Tōprak ko.” Etke kwoj ļōmņak Nipai eaar pād wōt ilo tiljek ke ro jet raar jab? Kōļmenļo̧kjeņ kōn waanjon̄ok ko an Nipai im baam̧le eo an me remaron̄ jipan̄ eok kōn apan̄ ko am̧.

Bar lale pija in alooj ko jet ilo Bok in Mormon Video collection ilo ChurchofJesusChrist.org ak Gospel Library app eo.

1 Nipai 16:10–16, 23–31; 18:11–22

Irooj ej tōl eō ilo men ko reddik im reļļam waan.

Ke Anij eaar tōlļo̧k baam̧le eo an Liai n̄an āne jem̧aden, Eaar jab baj leļo̧k wōt karōkin in aer ito-itak n̄an āneen kallim̧ur. Ak Eaar leļo̧k n̄an Liai juon Liaona n̄an tōl baam̧le eo an kajjojo raan ilo iaļ eo aer ļo̧k. Ta eo Jemedwōj Ilan̄ eaar lewaj n̄an kwe n̄an im̧we im tōl? Ta am̧ ļōmņak meļeļein bwe “kōn men ko reddik Irooj emaron̄ kwaļo̧k men ko reļļap”? (1 Nipai 16:29).

Ilo am̧ riiti 1 Nipai 16:10–16, 23–31 im 18:11–22, ļōmņak in kōm̧m̧ane juon laajrak in pedped in katak ko me rej kwaļo̧k an Anij tōl ro Nejin (n̄an waanjon̄ok, 1 Nipai 16:10 emaron̄ kwaļo̧k bwe jet iien Anij ej tōl kōj ilo wāween ko jab jeļā kake). Ta en̄jake ko am̧ kōn pedped in katak kein?

Bar lale Alma 37:7, 38–47; Katak im Bujen ko 64:33–34.

Eļan̄n̄e Kom̧ij Kōppopo Kom̧ Jamin Mijak jān Clark Kelly Price

1 Nipai 19:23–24; 20–22

Imaron̄ “karōki tok jeje ko rekwojarjar” n̄an n̄a make.

Aiseia eaar je n̄an aolep ro nejin Israel, im Nipai eaar lo bwe ekoba baam̧le eo an make—ekoba kwe (lale 1 Nipai 19:23–24). Ekkar n̄an naan in kout ko an Nipai jān Aiseia, Būreejtōn Henry B. Eyring eaar ba, “Ij riiti naan ko an Aiseia … jeļā bwe Nipai eaar bōk m̧ōttan ko an Aiseia me ij, ijjab inepata n̄an antoone, emaron̄ kar kajju bōk būruwō āinwōt n̄e Irooj ekar kōnono n̄an eō” (“The Book of Mormon Will Change Your Life,” Ensign, Pād. 2004, 10).

Kōn naan ko an Būreejtōn Eyring, ļōmņak kōn kajjitōk kein ilaļ ilo ami riiti jebta 20–22:

1 Nipai 20:1–9.Ta naan ko ilo eoon kein rej kōmeļeļeik ro nejin Israel? Elmen aer kōmeļeļeik Leman im Lemuel? Ta kakkōl im jerbal eo kwoj loe n̄an kwe make?

1 Nipai 20:17–22.Elmen an kar Irooj tōl ro nejin Israel? Elmen An kar tōl baam̧le eo an Liai? Elmen An kar tōl eok?

Ta ko jet kwaar loi 1 Nipai 20–22 me rekōm̧m̧an am̧ en̄jake āinwōt Irooj ej kōnono n̄an eok? Elmen an naan ko an Nipai ilo jebta 22 jipan̄ eok meļeļe kanaan ko an Aiseia?

1 Nipai 21

Wōn ro ilo m̧weeo im̧ōn Israel im Ro Riaelōn̄ ko?

Mweeo im̧ōn Israel rej bwijin rikanaan Jekab ilo Kallim̧ur Mokta, eo kar ņaetan Israel jān Irooj (lale Jenesis 32:28; 35:10; bar lale Baibōļ Tikjinede, “Israel”). Irooj eaar kōm̧m̧ani jet kallim̧ur ko ippān Israel, im ro bwijin kar ņaetan armej in bujen ro an Anij. Ijoke, epepen ko tokālik, elōn̄ iaer raar oktaļo̧k jān Irooj im kar ejeplōklōk imejen laļ in.

Naan in Riaelōn̄ ko ilo eoon kein rej armej ro me rejjan̄in bōk gospel in (lale Baibōļ Tikjinede, “Riaelōn̄”). Aiseia eaar kwaļo̧k bwe ilo raan ko āliktata ro Riaelōn̄ ko renaaj bōk gospel in im kein jerbal ilo katakin im aiin tok m̧weeo im̧ōn Israel (lale 1 Nipi 21:22; 22:8–12; bar lale Aiseia 60; 66:18–20).

Ļōmņak ko n̄an Ekkatak Jeje ko Rekwojarjar eo an Baam̧le im Nokon in Jota eo an Baam̧le

Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped ko n̄an kwaļo̧ki im kōnono kake n̄an tōpar aikuj ko an baam̧le eo am̧. Erkein rej jet iaan ļōmņak ko.

1 Nipai 17:1–6, 17–22

Bōlen baam̧le eo am̧ emaron̄ keidi bwebwenato eo an Nipai ilo ito-itak ilo āne jem̧aden (lale 1 Nipai 17:1–6) ippān bwebwenato eo an ļōm̧aro jein’ (lale 1 Nipai 17:17–22). Ewi wāween am̧ ļōmņak etke eaar ukoktak aer lo ejja m̧akūtkūt kain m̧akūtkūt ko wōt? Ta eo jemaron̄ ekkatak jān Nipai n̄an bōk juon tōmak?

1 Nipai 17:17–22; 18:9–16

Ta jekjek ko an ebanban, jum̧ae, im ellotan ilo juon baam̧le? Elmen ad anjo̧ jān būrabōlōm̧ kein?

1 Nipai 19:22–24

Nipai eaar karōki tok jeje ko rekwojarjar n̄an baam̧le eo an “bwe en n̄an maron̄ jeram̧m̧an im jeļā” (1 Nipai 19:23). Ewōr jet bwebwenato ko ilo 1 Nipai 16–18 bwe baam̧le eo am̧ emaron̄ karōki tok n̄an kwe make. Bōlen komaron̄ jerbali juon iaan bwebwenato kein im kōnono kaki kilen aer jerbal n̄an baam̧le eo am̧.

1 Nipai 21:14–16

Elmen an ennaan eo ilo eoon kein jipan̄ juon armej eo ej en̄jake ke emōj meļo̧kļo̧ke e?

N̄an eļapļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Kōkōm̧anm̧anļo̧k Ekkatak Ippem Make

Kajjitōk jipan̄ eo an Irooj. Jeje ko rekwojarjar kar letok jān revelesōn, im jej aikuji revelesōn n̄an lukkuun meļeļeik kaki. Irooj eaar “Eļan̄n̄e kom̧ij … kajjitōk ippa ilo tōmak, … em̧ool otem m̧ool men kein naaj kwaļo̧ki n̄an kom̧” (1 Nipai 15:11).

Raar Kōm̧m̧an N̄an Eō kōn Eļap Kōmetak, jān Walter Rane