En Jab Ankilaō, A En Ankilaam̧, jān Harry Anderson

Pāpode 10–16

2 Nipai 6–10

“O Ewi Jon̄an an Ļap Karōk eo an Ad Anij!”

Ilo am̧ riiti 2 Nipai 6–10, kōļmenļo̧kjeņ kōn ta eo Irooj ej kajjieon̄ katakin eok. Ilo am̧ kallikar m̧ool kein, je im lukkuun ļōmņake elmen am̧ maron̄ jerbale ta eo kwaar ekkatak.

Je En̄jake ko Rej Im̧we Eok

Em̧oot ļo̧k 40 iiō jān tōre eo baam̧le eo an Liai raar em̧m̧akūt jān Jerusalem. Raar ruwamejet ilo juon āne kāāl, juon laļ ettoļo̧k jān Jerusalem im ippān aolep armej in bujen ro an Anij. Liai eaar mej, im ro ineen raar jino ta eo eaar jino erom̧ etto kōn jum̧ae eo kōtaan RiNipai ro—“raar tōmak ilo kakkōl ko im revelesōn ko an Anij”—im Rileman ro, ro raar jab (2 Nipai 5:6) Ilo jekjek kein, Jekab, eo eaar jatin Nipai im kiiō kar ekapit āinwōt juon rūkaki n̄an RiNipai ro, ekar kōņaan bwe armej in bujen ro ren jeļā bwe Anij eban meļo̧kļo̧k er, kōn menin rejjab aikuj meļo̧kļo̧k E. En̄in in ej ennaan eo jej lukkuun aikuj ilo laļ in, ijo bujen ko im revelesōn rej kowaani. “Jān keememej E, … bwe jej jab riatajinemjen. … Eaar kwaļo̧k, ak reļļap kallim̧ur ko an Irooj,” (2 Nipai 10:20–21). Ilubwiljin kōjeraam̧m̧an kein, ejjeļo̧k juon kallim̧ur eļapļo̧k jān “pinmuur eo ejjeļo̧k jem̧ļo̧kin” n̄an anjo̧ ioon mej im hell (2 Nipai 9:7). Jekab eaar ba, kōn menin,” “en m̧ōņōņō buruwōmi”! (2 Nipai 10:23).

Ļōmņak ko n̄an Ekkatak Jeje ko Rekwojarjar Ippem Make

2 Nipai 6–8

Irooj ej tiriam̧o kōn armej ro An im naaj kakūrm̧ool kallim̧ur ko An.

N̄an jipan̄ armej ro an meļeļe bwe rej m̧ōttan m̧weeo m̧ōn Israel im maron̄ lōke Anij im kallim̧ur ko An, Jekab eaar kouti kanaan ko an Aiseia, kar ļooki ilo 2 Nipai 6–8 Aiseia eaar kōmeļeļeik kuk eo an Israel im an Rilo̧mo̧o̧r kar kallim̧ur kōn aiintok im lo̧mo̧o̧ren armej ro An. Ilo am̧ riit, kōlmenļo̧kjeņ kōn kajjitōk ko āinwōt kein ilaļ:

• Ta eo iaar ekkatak kōn pinmuur in iakwe eo an Rilo̧mo̧o̧r eo n̄an eō?

• Ta ineem̧m̧an eo Rilo̧mo̧o̧r eaar eo leļo̧k n̄an ro rej pukot E?

• Ta eo imaron̄ kōm̧m̧ane n̄an tiljek ļo̧k “kōttar” Rilo̧mo̧o̧r im kōjeraam̧m̧an in kallim̧ur ko An?

2 Nipai 9:1–26

Kōn Pinmuur eo An, Jisōs Kraist eaar kōtļo̧k aolep armej ro jān mej in kanniōk im jetōb.

Naan ak pija ta ko kwon kar kōjerbali n̄an kōnono n̄an ro jet kōn aikuj eo n̄an juon Rilo̧mo̧o̧r n̄an lo̧mo̧o̧ren kōj jān mej im jerawiwi? Jekab eaar kōjerbale naan in “eakeak” im “nana.” Ta eo Jekab eaar kwaļo̧k kōn “nana, mej im hell” n̄an “rōļo̧k” me Anij eaar kōpooje n̄an kōj? (2 Nipai 9:10). Ilo am̧ riit 2 Nipai 9:1–26, ļōmņak in kōkkalleiki kōn juon kōļar ta eo en kar waļo̧k n̄an kōj eļan̄n̄e eban kar Pinmuur eo an Jisōs Kraist. Innām, ilo bar jet kōļar, komaron̄ kōkkaļļeik ta eo jemaron̄ bōke jān Pinmuur eo an Rilo̧mo̧o̧r eo. Ta m̧ool ko kwoj loi ilo Pinmuur eo an Jisōs Kraist me ekōm̧m̧an bwe kwon nōbar “māletlet an Anij, an tiriam̧o im jouj”? (2 Nipai 9:8).

Bar lale “Atonement of Jesus Christ,” Gospel Topics, topics.ChurchofJesusChrist.org.

2 Nipai 9:27–54

Imaron̄ itok n̄an Kraist im bōk aiboojoj in kōjeraam̧m̧an in Pinmuur eo An.

Jisōs eaar itok “n̄an laļ in bwe en maron̄ lo̧mo̧o̧ren aolep armej eļan̄n̄e renaaj ron̄ ainikien” (2 Nipai 9:21; kakkobaba in katak). Ilo naan ko jet, jej aikuj bōk kōjeraam̧m̧an in lo̧mo̧o̧r ko Ej letok. Ālkin kwaļo̧k karōk in pinmuur eo eļap, Jekab eaar letok kakkōl ko raorōk im kūr ko, loi ilo 2 Nipai 9:27–54, n̄an jipan̄ kōj bōk kōjeraam̧m̧an ko an Pinmuur eo. Ļōmņak in je ioon juon jaat āinwōt in:

Kakkōl ko	Kūr ko
Kakkōl ko	Kūr ko
Kakkōl ko	Kūr ko

Ta eo kwaar en̄jake jān Jetōb n̄an uwaaki kakkōl im kūr kein?

2 Nipai 10:20, 23–25

Kōn katok eo an Jisōs Kraist, imaron̄ “kam̧ōņōņō” buruwō.

Ennaan eo an Jekab eaar juon eo ekalem̧ōņōņō. Eaar ba, “Ij kōnono n̄an kom̧ men kein,” “bwe kom̧in maron̄ lan̄lōn̄, im kotak bōrami indeeo” (2 Nipai 9:3). Ilo am̧ riiti 2 Nipai 10:20, 23–25, ta eo kwoj loe me elewaj kōjatdikdik? Ta ko jet kwaar loe ilo 2 Nipai 9–10 me raar lewaj n̄an eok kōjatdikdik? Ta eo kwonaaj kōm̧m̧ane n̄an keememej men kein n̄e kwoj inepata?

Bar lale Jon 16:33.

Ļōmņak ko n̄an Ekkatak Jeje ko Rekwojarjar eo an Baam̧le im Nokon in Jota eo an Baam̧le

Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped ko n̄an kwaļo̧ki im kōnono kaki n̄an tōpar aikuj ko an baam̧le eo am̧. Erkein rej jet iaan ļōmņak ko.

2 Nipai 8:3–7

N̄e kwoj riiti 2 Nipai 8:3, komaron̄ kwaļo̧k pija in juon āne jem̧aden ak juon jikin kallib. Elmen an Irooj ukōt āne jem̧aden in mour ko ad n̄an jikin kallib? Ilo eoon 4–7, ta eo Irooj ej kapilōk kōj n̄an kōm̧m̧ane n̄an maron̄ bōk m̧ōņōņō eo kar kōmeļeļeiki ilo eoon 3?

2 Nipai 8:24–25

Elmen an naan in kōperan ko an Aiseia n̄an armej ro an Zaion kōkajoorļo̧k kōj ilo kijejeto ko ad n̄an erom̧ eļapļo̧k rikaļoor ro retiljek an Jisōs Kraist? Elmen an jerkak in jibbon̄ im nuknuk āinwōt n̄an ta eo Anij ekōņaan bwe jen kōm̧m̧ane ilo jetōb?

2 Nipai 9:1–26

Ta eo baam̧le eo am̧ ren kar kōm̧m̧ane n̄an meļeļeļo̧k kōn aorōkin “pinmuur eo ejjeļo̧k jem̧ļo̧kin” an Jisōs Kraist? (eoon 7). Bōlen remaron̄ pukote ak ļōmņak kōn men ko me ejjeļo̧k jem̧ļo̧kin ilo bōnbōn—kein m̧wijm̧wij ujooj ilo juon melaaj, pok ko ioon pārijet, ak iju ko ilan̄. Elmen an Pinmuur eo an Rilo̧mo̧o̧r eo ļap? Ta naan ko ilo 2 Nipai 9 ekam̧wilaļļo̧k kam̧m̧oolol eo ad kōn ta eo Rilo̧mo̧o̧r eo eaar kōm̧m̧ane n̄an kōj?

2 Nipa 9:27–44

Bōlen juon raan ilo wiik in baam̧le eo am̧ remaron̄ lale 2 Nipai 9:27–38, pukot kakkōl ko (waļo̧k kōn “wo”). Ta iaan men kein eļaptata an aorōk n̄an an baam̧le eo kōnono kake? Ilo raan ko jet, komaron̄ lale 2 Nipai 9:39–44, pukot ta eo Jekab ej kūr armej ro n̄an keememeje.

2 Nipai 9:28–29, 50–51

Ta jet iaan waanjon̄ok ko an “o pata eo, im m̧ōjņo̧ ko, im jajeļo̧kjeņ eo an armej”? (eoon 28). Ta eo jemaron̄ kōm̧m̧ane n̄an likūt men ko raorōk ļo̧k an Anij im men ko reddik an laļ?

2 Nipai 9:45

Emaron̄ em̧m̧an ippān baam̧le eo am̧ kōm̧m̧ane juon jein in peba innām juon ilo̧k juon en likūti im kōm̧akūtkūti. Elmen an jerawiwi āinwōt jein ko? Elmen an Rilo̧mo̧o̧r jipan̄ kōj eļļā jāni?

N̄an eļapļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Kōkōm̧anm̧anļo̧k Ad Ekkatak

Kwōn pād im pidodo tōpare. “Jet iaan iien ko rem̧m̧an tata n̄an katakin rej ijjino āinwōt juon kajjitōk ak n̄ūrbōktak ilo būruwōn juon [baam̧le] membōr. … Ren jeļā kōn naan im jerbal ko am̧ me kwoj kōņaan bwe ren ron̄” (Teaching in the Savior’s Way, 16).

Rilo̧mo̧o̧r eo enaaj lo̧mo̧o̧ren aolep ro nejin Anij “n̄e renaaj eo̧ron̄ ainikien” (2 Nipai 9:21). Eaar Kōmour Elōn̄ ro Raar Nan̄inmej, jān J. Kirk Richards