Ejjab Ankilaō, Ak En Ankilaam̧ jān Harry Anderson

Pāpode 10–16

2 Nipai 6–10

“O Ewi Jon̄an an Ļap Karōk eo an Ad Anij!”

Ilo am̧ riiti 2 Nipai 6–10, pukot tōl eo jān Jetōb eo kōn ta eo n̄an katakin. Unin tōl in im Itok, Ļoor Eō—N̄an Kajjojo Armej im Baam̧le ko emaron̄ im̧we elōn̄ļo̧k ļōmņak ko.

Je En̄jake ko rej Im̧we Eok

Kajjitōk bwe ren Kwaļo̧k

Kōketak ajri ro n̄an kajjojo kwaļo̧k juon men raar katak kōn Jisōs Kraist im Pinmuur eo An ke raar ekkatak 2 Nipai 6–10 ippāer make ak ippān baam̧le ko aer.

Katakin Katak eo: Ajri ro Reddikļo̧k

2 Nipai 9:7–13, 20–23

Jisōs Kraist ej lo̧mo̧o̧ren eō jān jerawiwi im mej.

Ekōjkan am̧ maron̄ kōjerbal 2 Nipai 9:7–13 im 20–23 n̄an jipan̄ ajri ro meļeļe bwe Jisōs Kraist ej lo̧mo̧o̧ren aolep jān mej im ej kōm̧m̧an bwe en pidodo n̄an kōj n̄an ukweļo̧k jān jerawiwi?

M̧akūtkūt ko Maron̄ Kōm̧m̧ani

• Bwebwenato n̄an ajri ro juon bwebwenato kōn juon armej me eaar wōtlo̧k ilo juon ro̧n̄ ekanooj m̧wilaļ jon̄an ejjab maron̄ tallōn̄ lōn̄ļo̧k. Juon armej ekar itok im kar kotak lōn̄tak armej in jān ro̧n̄ eo. Komaron̄ kōņaan jin̄aik juon pija in bwebwenato in ioon boot eo akm̧akūtkūt ekkar n̄ane ippān ajri ro. Kōmeļeļeik bwe ro̧n̄ in ej āinwōt mej im armej eo ekar jipan̄ armej eo ej āinwōt Jisōs Kraist, eo eaar lo̧mo̧o̧ren aolep armej jān mej ilo an letok n̄an kōj menin letok eo an jerkakpeje. Kwaļo̧k n̄an ajri ro bwe ejja armej in wōt eaar wōtlo̧k ilowaan bar juon ro̧n̄. Iien in rilo̧mo̧oren eo ekar leļo̧k n̄an armej eo juon jikinuwe n̄an kōjerbal n̄an wanlōn̄tak jān lowaan ro̧n̄ eo. Kōmeļeļeik bwe ro̧n̄ in ej āinwōt jerawiwi im jikinuwe eo ej Pinmuur eo an Jisōs Kraist, eo ej kōm̧m̧an bwe jān ukweļo̧k im jeorļo̧k jerawiwi ko ad. Riiti 2 Nipai 9:22–23, im kwaļo̧k naan in kam̧ool eo am̧ kōn Jisōs Kraist im Pinmuur eo An.

• Al ippān doon juon al kōn iakwe eo an Jisōs Kraist, eo āinwōt “I Feel My Savior’s Love” (Children’s Songbook, 74–75). Kajjitōk ippān ajri ro n̄an jin̄aik pija ko kōn men ko me rej jipan̄ er jeļā bwe Rilo̧mo̧o̧r ej iakwe er.

2 Nipai 9:49

“Buruō ej m̧ōņōņō ilo jim̧we.”

Ekōjkan am̧ maron̄ kōketak ajri ro kwoj katakin n̄an “[m̧ōņōņō] ilo jim̧we,” ak lan̄lōn̄ ilo pokake Irooj? (2 Nipai 9:49).

M̧akūtkūt ko Maron̄ Kōm̧m̧ani

• Riiti 2 Nipai 9:49 n̄an ajri ro, im jipan̄ er kappukot im meļeļe ta eo Jekab eaar ba me ej iakwe im ej dike. Kwaļo̧k jekjek ko me juon ajri ej kōm̧m̧ane juon kālet em̧m̧an im juon kālet enana, im kajjitōk ippān ajri ro n̄an jutak n̄e kālet ej bōktok lem̧ōņōņō im jijet n̄e kālet eo ej bōktok būrom̧ōj. Etke kālet jim̧we eo ej bōktok n̄an kōj lan̄lōn̄? N̄aat eo kwar en̄jake m̧ōņōņō kōnke kwaar kōm̧m̧ane kālet eo ejim̧we?

• Al ippān doon juon al kōn lan̄lōn̄ me ej itok jān pokake, eo āinwōt “When We’re Helping” (Children’s Songbook, 198), im kajjitōk ippān ajri ro n̄an ron̄jake ta eo ej kōm̧m̧an bwe jān m̧ōņōņō. Kōm̧m̧an bwe ajri ro ren kajjojo āinwōt n̄e rej juon mama ak baba im rej kajjitōk ippān ajri ro jet n̄an kōm̧m̧ane juon men. Kōm̧m̧an bwe ajri ro jet ren kōmālmel lan̄lōn̄ in pokake.

Katakin Katak eo: Ajri ro Rōrūttoļo̧k

2 Nipai 6; 7:1–2

Irooj enaaj iien otemjej kakūrm̧ool kallim̧ur ko An.

Meļeļe bwe Irooj ej dāpij kallim̧ur ko An emaron̄ jipan̄ ajri ro kalōk tōmak eo aer ilo E im aer lōke ilo pokake kien ko An.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an kōnono kōn jet kallim̧ur ko raar kōm̧m̧ani, eo āinwōt kallim̧ur eo raar kōm̧m̧ane n̄an juon m̧ōttaer ak bujen ko raar kōm̧m̧ani ilo iien peptaij. Etke jet iien epen n̄an kōjparok kallim̧ur ko ad? Etke eaorōk n̄an kōjparok kallim̧ur ko ad? Riiti enaan in: “Irooj Anij enaaj kajejjet bujen ko an ko eaar kōm̧m̧ani ippān ro nejin” (2 Nipai 6:12). Kwaļo̧k juon waanjon̄ak kōn ekōjkan an Anij kar kōjparok kallim̧ur ko An, jekdo̧o̧n eļan̄n̄e kōjeraam̧m̧an ko raar jab itok ilo iien eo em̧ōkaj tata.

• Kwaļo̧k juon pija in Jisōs ej pād turin juon pija in juon ajri. Riiti 2 Nipai 7:1, im kōmeļeļeik bwe n̄e armej ro doon Anij ebōjrak aer pokake gospel eo An, ej āinwōt rej “jepel” jān E. Kōm̧akūt pija in ajri eo ettoļo̧k jān pija eo an Jisōs n̄an kwaļo̧k bwe n̄e jejjab kōjparok bujen ko ad, eo āinwōt bujen peptaij eo, jej kōjepeļļo̧k kōj make jān Jemedwōj Ilan̄ im Rilo̧mo̧o̧r. (N̄an bar etale bujen peptaij ko, lale K&B 20:37.) Ekōjkan an Pinmuur eo an Rilo̧mo̧o̧r kar kōtļo̧k bwe jān bar ro̧o̧l epaakeļo̧k E? Ilo am̧ ekōnono kake menin, kajjitōk ippān ajri ro n̄an bar kepaakļo̧k pija ko ippān doon.

2 Nipai 9:10–23

Jisōs Kraist ej lo̧mo̧o̧ren eō jān jerawiwi im mej.

Ekōjkan am̧ maron̄ kōjerbal 2 Nipai 9:10–23 n̄an jipan̄ ajri ro katak bwe Jisōs Kraist ej aer Rilo̧mo̧o̧r?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an jipan̄ eok pijaiki juon iaļ ioon boot eo, im kajjitōk ippāer n̄an kobaik jet kapan̄pan̄ ko ak kabbōjrak ko ilo iaļ eo. Riiti ippān doon 2 Nipai 9:10, im kūr ajri ro n̄an kōkaļļeik kabbōjrak ko ioon iaļ eo kōn naan ko jān eoon in me ej kōmeļeļeik kabbōjrak ko me remaron̄ dāpij kōj jān bar jepļaak n̄an Anij. Innām kōnono kōn ekōjkan an Jisōs Kraist kar anjo̧ ioon kabbōjrak kein n̄an kōj (lale 2 Nipai 9:21–23), im ilo kōm̧m̧ane, kajjitōk ippān ajri ro n̄an jereļok kabbōjrak ko.

• Kwaļo̧k juon pija in Adam im Iv, eo āinwōt Leaving the Garden of Eden (ChurchofJesusChrist.org). Kōmeļeļeik bwe ke Adam im Iv raar kan̄ leen wōjke eo me Anij eaar jiron̄ er n̄an jab m̧ōn̄ā jāne ilo Jikin Kallib Eden, raar bōktok jerawiwi im mej n̄an laļ in. Kwaļo̧k juon pija in Jisōs Kraist. N̄an jipan̄ ajri ro meļeļe ekōjkan an Jisōs kar anjo̧ ioon jerawiwi im mej, bwebwenato kōn bwebwenato eo kōn armej eo eaar wōtlo̧k ilowaan ro̧n̄ eo, loe ilo ļōmņak eo kein kajuon n̄an katakin ium̧win “Ajri ro Reddikļo̧k” ilo unin tōl in. Innām kajjitōk ippān ajri ro n̄an jin̄aik pija ko an bwebwenato in ak kōm̧m̧an m̧akūtkūt ekkar n̄an bwebwenato. Riiti 2 Nipai 9:21–23, im kwaļo̧k naan in kam̧ool eo am̧ kōn Jisōs Kraist im Pinmuur eo An.

• Jipan̄ kajjojo ajri pukot juon al kōn Pinmuur eo an Rilo̧mo̧o̧r jim̧or ilo hymnbook ak Children’s Songbook (index ko emaron̄ jipan̄). Kajjitōk ippān ajri ro n̄an pukōt im kwaļo̧k naan ko jān al eo me ej kōmeļeļeik ta eo Jisōs eaar kōm̧m̧ane n̄an kōj. Kajjitōk ippān ajri ro n̄an kwaļo̧k ļōmņak ko im en̄jake ko aer kōn Pinmuur eo an Rilo̧mo̧or ak kwaļo̧k naan in kam̧ool eo am̧.

2 Nipai 9:20, 28–29, 42–43

Inaaj jeraam̧m̧an n̄e ij ļoor kapilōk eo an Anij.

Jipan̄ ajri ro kalōk juon pedped ekajoor kōn lōke ilo Anij bwe ilo an jeļāļo̧kjeņ eo im maron̄ ko aer eddōkļo̧k, renaaj wōnm̧aanļo̧k wōt n̄an pedped ilo E im ļoor kapilōk ko An.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an jiron̄ eok kōn juon men eļap aer jeļā kake, eo āinwōt juon bok em̧m̧an tata ippāer ak itok limo. Kajjitōk ippān juon ajri n̄an riiti 2 Nipai 9:20, im kam̧ool bwe Anij “[ejeļā] men otemjeļo̧k.” Etke ej aorōk n̄an kōj n̄an meļeļe bwe Anij ejeļā men otemjeļo̧k?

• Kajjitōk ippān ajri ro n̄an pijaik ilo kōļmenļo̧kjeņ bwe raar ron̄ an juon m̧ōttaer ba bwe kien ko ak katak ko an Kabun̄ in rebwebwe. Ta eo renaaj kar ba n̄an eo m̧ōttaer? Etke ej aorōk n̄an lōke kapilōk eo an Anij men̄e jejjab lukkuun meļeļe kake? Kōketak ajri ro n̄an lale ilo 2 Nipai 9:20, 28–29, im 42–43 kōn jipan̄ kōn kejōkļo̧kjeņ im ekōnono kōn kajjitōk kein.

Kōketak n̄an Ekkatak ilo M̧weo

Jipan̄ ajri ro ļōmņak kōn juon wāween remaron̄ katakin baam̧le ko aer ta eo raar katak kōn Jisōs Kraist im Pinmmur eo An. N̄an waanjon̄ak, remaron̄ kōjerbal peij in m̧akūtkūt eo an wiik in n̄an kōmeļeļeik ekōjkan an Rilo̧mo̧or eo jipan̄ kōj anjo̧ ioon jerawiwi im mej.

Kōkōm̧anm̧anļo̧k Ad Katakin

Kōjerbal peij in m̧akūtkūt ko. Ilo an ajri ro jerbale peij in m̧akūtkūt ko, kōjerbal iien eo n̄an jipan̄ er lo ekōjkan an m̧akūtkūt eo ainļo̧k wōt pedped ko jān katak eo im ekōjkan an pedped ko jerbal n̄an mour ko aer.