Pāpode 17–23

2 Nipai 11–25

“Jej M̧ōņōņō ilo Kraist”

M̧aanjabpopo eo am̧ n̄an katakin ej ijjino ilo am̧ riiti 2 Nipai 11–25. Itok, Ļoor Eō—N̄an Kajjojo Armej im Baam̧le ko emaron̄ jipan̄ eok meļeļe jebta kein, im unin tōl in emaron̄ lewaj n̄an eok ļōmņak ko n̄an katakin.

Je En̄jake ko rej Im̧we Eok

Kajjitōk bwe ren Kwaļo̧k

Bar etale ilo tukadu in ippān ajri ro ta eo raar ekkatak kake kōn Rilo̧mo̧o̧r eo im Pinmuur eo an An wiik eo ļo̧k. Eļan̄n̄e rej kwaļo̧ke ta eo raar ekkatak ippān baam̧le ko aer, kōketak er n̄an kōnono kake.

Katakin Katak eo: Ajri ro Reddikļo̧k

2 Nipai 12:2–3

Tampeļ ej m̧weo im̧ōn Irooj.

Kanaan eo an Aiseia kōn “toļ in im̧ōn Jeova” emaron̄ erom juon iien em̧m̧an n̄an katakin ajri ro kōn tampeļ im jipan̄ er erreim̧aanļo̧k n̄an etal n̄ane juon raan.

M̧akūtkūt ko Maron̄ Kōm̧m̧ani

• Kōm̧m̧an bwe juon ajri en jibwe juon pija in juon tampeļ (unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko ewōr juon ie), im kajjitōk ippān ajri ro n̄an kwaļo̧k ta eo rejeļā kōn tampeļ eo. Riiti 2 Nipai 12:3, im kōmeļeļeik bwe ilo eoon in juon rikanaan kar etan Aiseia eaar kanaan bwe enaaj kar wōr tampeļ ko ilo raan ko āliktata. Riiti eoon eo bar juon alen, im kalikkar bwe n̄e jej etal n̄an tampeļ eo, Irooj eo “enaaj katakin kōj kōn iaļ ko an” im jipan̄ kōj “etetal ilo iaļ ko an.”

• Kōm̧m̧ane juon iaļ ioon būļoor eo, im ilo jem̧ļo̧k in iaļ eo, likūt juon pija in tampeļ kōn kalbubuik pija eo. Kōm̧m̧ane bwe ajri ro ren etetal ioon iaļ eo, im ilo aer etetal ie, jipan̄ er āliji eoon eo “etetal ilo iaļ ko an.” N̄e ajri ro rej tōpar jem̧ļo̧k in iaļ eo, kōm̧m̧an bwe ren joļo̧k libooror eo an pija eo. Ta meļeļe in n̄an etetal ilo iaļ ko an Anij?

• Al ippān ajri ro juon al kōn tampeļ āinwōt ““I Love to See the Temple”” (Children’s Songbook, 95). Jipan̄ er pukōt naan ko im eoon ko ilo al eo me rej katakin kōn ta in tampeļ im ta eo jej kōm̧m̧ane ijeņ.

2 Nipai 19:6; 25:26

“Jej m̧ōņōņō ilo Kraist”

Nipai im Aiseia eaar wōr aero naan in kam̧ool ko kōn Rilo̧mo̧o̧r eo, im naan in kam̧ool ko aer raar kōm̧m̧an bwe ren lan̄lōn̄. Jipan̄ ajri ro lo bwe kwoj “m̧ōņōņō ilo Kraist.”

M̧akūtkūt ko Maron̄ Kōm̧m̧ani

• Kajjitōk ippān juon ajri n̄an jibwe juon pija in ļotak eo an Jisōs Kraist (āinwōt Bok in Gospel Pija, nō. 30), im jipan̄ ajri ro pukōt nin̄nin̄ Jisōs ilo pija eo. Riiti 2 Nipai 19:6 ak kwaļo̧k pija eo “A Savior Is Born—Christmas Video” (ChurchofJesusChrist.org), im kajjitōk ippān ajri ro n̄an jitōn̄ļo̧k Jisōs n̄e rej ron̄ naan ko ajri (child) im nejin ļaddik (son). Kōmeļeļeik bwe rikanaan Aiseia, eo eaar je naan ko ilo 2 Nipai 19:6, eaar jeļā kōn ļotak eo an Jisōs bukwi iiō ko m̧okta jān an kar waļo̧k.

• Bwebwenato kōn bwebwenato eo kōn Jisōs Kraist ebōktok lan̄lōn̄ n̄an ro jet, ak kwaļo̧k juon pija āinwōt “Jesus Heals a Man Born Blind” ak “Suffer the Little Children to Come unto Me” (ChurchofJesusChrist.org). Kwaļo̧k iien ko relem̧ōņōņō ilo bwebwenato eo ak pija eo. Riiti 2 Nipai 25:26 im kōnono kōn etke kwoj “m̧ōņōņō ilo Kraist.” Kajjitōk ippān ajri ro n̄an kōnono kōn Jisōs ej bōktok n̄an er lan̄lōn̄.

2 Nipai 21:6–9; 22

Meļļeniōm̧ eo enaaj juon iien aenōm̧m̧an im lan̄lōn̄.

Ālkin Itok Eo An Kein Karuo, Jisōs Kraist enaaj jokwe ippān ajri ro An ilo juon tōre in aenōm̧m̧an kar ņa etan Meļļeniōm̧.

M̧akūtkūt ko Maron̄ Kōm̧m̧ani

• Kwaļo̧k n̄an ajri ro pija in menin mour ko kōnono kaki ilo 2 Nipai 21:6–7, im kajjitōk ippān ajri ro n̄an ba etan menin mour ko. Kōmeļeļeik bwe menin mour in ekkā aer nana, bōtaab Aiseia eaar katakin bwe ālkin an Jisōs Kraist bar itok, enaaj wōr juon iien aenōm̧m̧an, kar ņa etan Meļļeniōm̧, n̄e menin mour ko rejjamin naaj kōmetak doon. Ekōjkan ad maron̄ ļoor waanjon̄ak eo an menin mour kein ilo wāween eo jej kōm̧m̧an n̄an doon? Kajjitōk ippān ajri ro n̄an jin̄aik pija in menin mour kein rej mour ilo aenōm̧m̧an ippān doon.

• Riiti 2 Nipai 22:5, im kajjitōk ippān ajri ro n̄an jipan̄ eok pukōt juon al me ej kōmeļeļeik “men ko rem̧m̧an” Irooj eaar kōm̧m̧ani. Jet waanjon̄ak ko remaron̄ koba “My Heavenly Father Loves Me” (Children’s Songbook, 228–29) ak “How Great Thou Art” (Hymns, nō. 86). Al al eo ippān doon. Kōmeļeļeik bwe ilo Meļļeniōm̧, aolep renaaj jeļā kōn “men ko rem̧m̧an” Irooj eaar kōm̧m̧ani.

Katakin Katak eo: Ajri ro Rōrūttoļo̧k

2 Nipai 12:2–3

Tampeļ eo ej m̧weo im̧ōn Irooj.

Ekōjkan am̧ maron̄ kōjerbal eoon kein n̄an jipan̄ ajri ro reim̧aanļo̧k n̄an raan eo n̄e remaron̄ etal n̄an tampeļ eo?

M̧akūtkūt ko Maron̄ Kōm̧m̧ani

• Kwaļo̧k juon pija in juon tampeļ (unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko ewōr juon ie). Kajjitōk ippān juon ajri n̄an riiti 2 Nipai 12:2–3, im kūr ajri ro jet n̄an ron̄jake un ko etke Aiseia eaar ba jej aikuji tampeļ ko. Komaron̄ kōmeļeļeik bwe Aiseia eaar ņa etan tampeļ “toļ in im̧ōn Jeova.” Etke juon toļ ej juon kōkaļļe em̧m̧an n̄an tampeļ?

• Kajjitōk ippān ajri ro n̄an pijaik juon pija in er make rej etal n̄an tampeļ. Eļan̄n̄e emaron̄, kajjitōk ippān juon likao ak jiron̄ ilo ward eo n̄an jiron̄ ajri ro ta aer en̄jake n̄an kōm̧m̧ani peptaij ko n̄an ro remej ilo tampeļ eo. Armej in edik ak jabdewōt ilo ward eo emaron̄ katakin ajri ro ekōjkan pukōt āt ko etan rūtto ro aer me rej aikuj kain̄i ko an tampeļ.

2 Nipai 15:20

Satan ej kajjieon̄ kapok eō kōn em̧m̧an im nana.

Jej mour ilo juon laļ me, ainwōt Aiseia eaar kanaan kake, armej rej ba nana em̧m̧an im em̧m̧an nana. Ekōjkan am̧ maron̄ jipan̄ ajri ro kile kain m̧oņ in?

M̧akūtkūt ko Maron̄ Kōm̧m̧ani

• Kwaļo̧k n̄an ajri ro juon men emeo̧ ak kōmmōn̄, āinwōt pikōļ ak ļaiim̧, itulowaan juon kilin tōn̄al. Riit ippān doon 2 Nipai 15:20, im kōmeļeļeik bwe Satan ej kajjieon̄ n̄an kōm̧m̧ani men ko me renana ren em̧m̧an. Jipan̄ ajri ro ļōmņak kōn wāween ko me Satan ej kōm̧m̧ane menin. Ekōjkan ad maron̄ kile m̧oņ ko an?

• Kwaļo̧k juon im jimettan minit in pija in alooj eo “You Will Be Freed” (ChurchofJesusChrist.org). Etke rieon̄ad ro raar ukōt m̧ōōran mo̧o̧r eo an? Etke Satan ej ukōt m̧ōōran jerawiwi?

2 Nipai 17:14; 19:6; 25:23–26

“Jej m̧ōņōņō ilo Kraist”

Ajri ro rej aikuj in jeļā bwe gospel eo an Jisōs Kraist ej lan̄lōn̄. Ekōjkan am̧ naaj jipan̄ er “m̧ōņōņō ilo Kraist”?

M̧akūtkūt ko Maron̄ Kōm̧m̧ani

• Jipan̄ ajri ro pukōt āt ko etan Jisōs Kraist ilo 2 Nipai 17:14 im 19:6. Komaron̄ in aikuj in kōmeļeļeik bwe “Immanuel” ej juon iaan at kein, im ej meļeļe in “Anij ippād.” Ta eo āt kein kajjojo rej katakin kōj kōn E?

• Likūt juon pija in Rilo̧mo̧o̧r eo ioon boot eo, im riit ippān doon 2 Nipai 25:26. Etke Nipai eaar kanooj ekōnono im jeje kōn Jisōs Kraist? Kōm̧m̧an bwe kajjojo ajri ro ren je ioon boot eo, turin pija in Jisōs, juon men kōn Rilo̧mo̧o̧r eo me ej bōktok n̄an er lan̄lōn̄.

• Kajjitōk ippān ajri ro n̄an ļōmņak kōn juon rej kōņaan “karreel … n̄an tōmak ilo Kraist” (2 Nipai 25:23). Ekōjkan ad maron̄ kwaļo̧k n̄an ro jet lan̄lōn̄ eo me Rilo̧mo̧or eo ej bōktok n̄an mour ko ad? Kōm̧m̧an bwe ajri ro ren je ak kōm̧m̧an kōl kōn jet men ko remaron̄ kōm̧m̧an n̄an jipan̄ armej eo rej tōmak ej tōmak ilo Jisōs Kraist.

Kōketak n̄an Ekkatak ilo M̧weo

Kajjitōk ippān ajri ro n̄an ļōmņak kōn juon men remaron̄ kōm̧m̧ane n̄an kwaļo̧k n̄an baam̧ļe ko aer bwe rej “m̧ōņōņō ilo Kraist.”

Kōkōm̧anm̧anļo̧k Ad Katakin

Kōm̧m̧an bwe ajri ro ren kapeel (creative). “Ilo am̧ katakin ajri ro, kōtļo̧k bwe ren ekkal, jin̄an, kōļar, jeje, im ejaak. Men kein rej eļapļo̧k jān makūtkūt in kam̧ōņōņō ko—rej aorōk n̄an katak” (Teaching in the Savior’s Way, 25).