Adam and Iv, jān Douglas Fryer

Pāpode 3–9

2 Nipai 1–5

“Kōm ar Mour ilo juon Wāween Elem̧ōņōņō”

Liai ekar katakin kajjojo ajri ro nejin ekkar n̄an aikuj ko aer kajjojo im jekjek ko repād ie. Ļoor waanjon̄ak eo an ilo am̧ kōpooj n̄an katakin ajri ro ilo kūlaaj eo am̧.

Je En̄jake ko rej Im̧we Eok

Kajjitōk bwe ren Kwaļo̧k

Ālkin am̧ kōmeļeļe ke Liai ekar katakin baam̧le eo an kōn anemkwōj n̄an kōm̧m̧an kālet ko ad make, kajjitōk ippān ajri ro n̄an kwaļo̧k en̄jake ko aer ke rekar kālet ta eo ejim̧we. Ewi wāween aer kar en̄jake ālkin aer kar kōm̧m̧ane kālet eo? Ewi wāween aer maron̄ keememej n̄an kālet ta eo ejim̧we ilju im jekļaj?

Katakin Katak eo: Ajri ro Reddikļo̧k

2 Nipai 1:20

Eļap aō jeraam̧m̧an n̄e ij pokake.

Katak eo ej waļo̧k ilo eoon in—pokake ej bōktok jeraam̧m̧an ko—ekkā an kōmeļeļei ilo Bok in Mormon. Ļōmņak wāween am̧ maron̄ jipan̄ ajri ro en̄jake ilo mour ko aer make.

Makūtkūt ko Maron̄ Kōm̧m̧ani

• Kajjitōk ippān ajri ro n̄an jipan̄ eok kōmeļeļeik naan in kien ko im kōm̧m̧an juon laajrak in kien ko. Riiti 2 Nipai 1:20, im kwaļo̧k ke jenaaj “jeraam̧m̧an,” ak bōk jeraam̧m̧an, n̄e jej kōjparok kien ko. Ewi wāween en̄jaake eo ad n̄e jej m̧ool?

• Kwaļo̧k n̄an ajri ro men ko me rej letok n̄an kōj kōjparok, āinwōt juuj, at, im kuļo̧o̧p. Kōtļo̧k bwe ren kanōki. Ewi wāween an men kein kōjparok kōj? Ba n̄an er bwe kien ko an Jemedwōj Ilan̄ remaron̄ kōjparok kōj jān kauwōtata ko an Jetōb. Kwaļo̧k juon am̧ en̄jake ke kwar en̄jake kōjparok ilo am̧ kar kōjparok kien ko.

2 Nipai 2:11, 16, 27

Anij ekar letok n̄an eō anemkwōj in kālet.

Kōn kālet ko aer, Adam im Iv rekar etal jān jikin kallip Iden. Ewi wāween am̧ katakin ajri ro bwe kālet eo an Adam im Iv ekar kōtļo̧k bwe jen kōjerbal anemkwōj in kālet eo ad n̄an kālet Jemedwōj Ilan̄ rainin?

Makūtkūt ko Maron̄ Kōm̧m̧ani

• Jin̄aik juon pija in juon armej eo eanemkwoj im juon armej eo ej mour ium̧win kōmakoko (bolen juon armej ilo kaļbuuj), im kajjitōk ajri ro n̄an jitōn̄ ļo̧k pija eo ejim̧we n̄e ej riit naan ko anemkwoj im kōmakoko ilo 2 Nipai 2:27. Kwaļo̧k naan kein “anemkwoj n̄an kālet,” im kajjitōk ippān kajjojo ajri n̄an ālij.

• Etale bwebwenato in Adam im Iv ippān ajri ro (lale 2 Nipai 2:17–19; bar lale “Jebta 3: Adam and Eve,” Bwebwenato ko ilo Kallim̧ur Mokta, 15–18, ak pija in alooj ko me rejejjet n̄ane ChurchofJesusChrist.org) im kālet ko me rekar kōm̧m̧ani ilo jikin kallip Iden. Jipan̄ ajri ro kōlaajrak jet iaan kālet ko me rej kōm̧m̧ani aolep raan. Kwaļo̧k am̧ kam̧ool ke Jemedwōj Ilan̄ ekar letok n̄an kōj anemkwoj n̄an kālet ikōtaan em̧m̧an im nana, im kōtļo̧k ajri ro n̄an ekkāke ak kappokpok n̄an m̧ōņōņo̧ bwe ewōr aer anemkwoj n̄an kālet.

• Ikkure kōn juon ikkure eo me kwoj ba juon naan (āinwōt meram) im ajri ro rej ba oktak eo an naan eo (marok). Āliji ikkure in jejjo kōttan. N̄an jipan̄ ajri ro meļeļe wāween an oktak ko jipan̄ kōj kōm̧m̧ani kāleti ko, riiti jimettan in 2 Nipai 2:11 im 2 Nipai 2:16. Bwebwenato n̄an ajri ro bwebwenato ko kōn juon ajri eo me kar mālijjon̄ e bwe en kālet juon men ebōd. Jipan̄ ajri ro ļōmņak ta oktak eo an kālet eo, im kajjitōk ippāer n̄an mour kake. Kam̧ool bwe Jemedwōj Ilan̄ ej kōjeraam̧m̧an kōj n̄e jej kālet men ko rejim̧we.

• Al ippān doon juon al kōn wāween kōm̧m̧an kālet ko, āinwōt “I’m Trying to Be like Jesus” or “Choose the Right Way” (Children’s Songbook, 78–79, 160–61), im kajjitōk ippāer ta eo rej ekkatak jān al eo me ej kōn kōm̧m̧ani kālet ko.

Katakin katak eo: ajri ro rerūttoļo̧k

2 Nipai 1:20

Eļap aō jeraam̧m̧an n̄e ij pokake.

N̄e ewōr an ajri ro tōmak bwe Anij enaaj kōjeraam̧m̧an er n̄an kōjparok kien ko—men̄e kōjeraam̧m̧an ko rejjab maron̄ itok ilo iien eo emōkajtata—epidodo n̄an er bwe ren kōm̧m̧ani kālet ko rejim̧we.

Makūtkūt ko Maron̄ Kōm̧m̧ani

• Jipan̄ ajri ro etale jet iaan kālet ko me Nipai im ļōm̧aro jein im jatin rekar kōm̧m̧ane. N̄an jet waanjon̄ak, lale 1 Nipai 2:11–16; 3:5–7; im 18:9–11. Kajjitōk ippāer n̄an riiti 2 Nipai 1:20 ippān doon im kwaļo̧k etke rej ļōmņak bwe Liai en kar kwaļo̧k enaan in n̄an ajri ro nejin.

• Je naan ko jān 2 Nipai 1:20 ilo juon m̧ōttan peba, im kōnono kōn ta meļeļein naan ko. Kajjitōk ippān ajri ro n̄an likūt pija ko ilo laajrak eo ejim̧we ioon boot eo. N̄an kōmeļeļeik ikōtaan jeraam̧m̧an im bukweļo̧k, kwaļo̧k n̄an ajri ro juon menin eddōk eo ewāmourrur im juon bōļōk ak ra eo me em̧ōj m̧wijit im joļo̧ke jān menin eddōk eo. Ta oktak eo ikōtaan juon bōļōk eo me ej eddōk ilo menin eddōk eo im eo juon me em̧ōj bukweļo̧k. Ewi wāween ad āinwōt bōļōk kein ilo menin eddōk in n̄e jej pokake kien ko an Anij? Kajjitōk ippān ajri ro n̄an je ilo jōnōļ ko aer wāween an Anij kōjeraam̧m̧an er n̄e rej kālet men eo ejim̧we.

2 Nipai 2:22–28

Anij ekar letok anemkwoj in kālet.

Jisōs Kraist ekar lo̧mo̧o̧ren kōj jān mej an kanniōk im mej an jetōb (jepelļo̧k jān Anij kōn jerawiwi) kōn Pinmuur eo An im An Jerkakpeje. Bwe jen mour ippān Jemedwōj Ilan̄ bar juon alen, jej aikuj kōjerbal anemkwoj in kālet ko n̄an wōnm̧anļo̧k wōt im ukweļo̧k im kajjieon̄ mour jim̧we.

Makūtkūt ko Maron̄ Kōm̧m̧ani

• Kajutak juon pija in Adam im Iv (lale Gospel Art Book, no. 4), im kajjitōk ippān ajri ro n̄an kwaļo̧k ta eo rejeļā kōn ta eo ekar waļo̧k n̄an Adam im Iv ilo jikin kallip Iden. Jipan̄ ajri ro kappukōt uwaak ko ilo 2 Nipai 2:22–27. Kōmeļeļeik bwe kōn kālet eo an Adam im Iv, jej jeraam̧m̧an bwe jekar itok n̄an laļ in im kōjerbal anemkwoj in kālet eo ad n̄an kōm̧m̧ani kālet ko rem̧m̧an im ukweļo̧k kōn Pinmuur eo an Kraist n̄e jej kōm̧m̧ani kālet ko rebōd.

• Je naan ko jān 2 Nipai 2:27 on the boot. Jipan̄ ajri ro kakilōklōke eoon eo ilo aer āliji im aolep ren bōk koņaer jāāri naan ko aolep iien ālikin aer āliji. Jipan̄ ajri ro pijaikļo̧k enej kar elmen mour in n̄e en kar ejjeļo̧k anemkwoj in kālet. Etke jej kam̧m̧oolol kōn anemkwoj in?

• Kajjitōk ippān ajri ro n̄an kwaļo̧k en̄jake ko aer n̄e rej kōm̧m̧ane juon kālet ejim̧we. Ewi wāween aer kar en̄jake ālkin aer kar kōm̧m̧ane kālet eo? Ta eo jemaron̄ kōm̧m̧ane n̄an jipan̄ kōj make kālet men eo ejim̧we n̄e em̧ōj kapo kōj n̄an kōm̧m̧ane juon men ebōd? Ļōmņak in al juon al kōn kōm̧m̧ani kālet ko, āinwōt “Choose the Right” (Hymns, no. 239), im kajjitōk ippān ajri ro n̄an kwaļo̧k taeo rekar ekkatak jān al eo.

2 Nipai 3:6–24

Josep Smith ekar juon “rilolo eo ejenoļo̧k.”

Ilo 2 Nipai 3 Liai ekar kōnono kōn juon kanaan kōn Rikanaan Josep Smith. Komaron̄ kōjerbal menin āinwōt juon iien em̧m̧an n̄an katakin ajri ro kōn mijen eo an ilo raan kein āliktata.

Makūtkūt ko Maron̄ Kōm̧m̧ani

• Kajjitōk ippān ajri ro n̄an kappukōt 2 Nipai 3:6–24 jidik meļeļe kōn wōn rikanaan eo ej kōnono kake. Kōlaajrak jidik meļeļe ko ilo boot eo. Etke Joseph Smith kar ņa etan juon “rilolo eo ejenoļo̧k? Ta eo Josep Smith ekar kōm̧m̧ane me “eo enaaj kanooj aorōk [n̄an em̧m̧aan ro jein im jatin]”? (eoon 7).

• Al juon al kōn Josep Smith āinwōt “Kautiej n̄an Em̧m̧aan eo” (Hymns, no. 27), ak alooje pija in alooj ko me rej kwaļo̧k kōn m̧ōttan ko reoktak kōn mijen eo an, āinwōt men ko me rej waļo̧k ilo history.ChurchofJesusChrist.org/article/joseph-smith-video-downloads. Kajjitōk ippān ajri ro etke rej kam̧m̧oolol kōn Rikanaan Josep Smith.

Kōketak Ekkatak ilo Mweo

Rōjan̄ ajri ro n̄an kappukōt iien ko rem̧m̧an me renaaj jelm̧ae n̄an kōm̧m̧ani kālet ko ilo wiik in. Kajjitōk ippāer bwe ren pojak n̄an kwaļo̧k wiik in tok ta kālet ko me rekar kōm̧m̧ane im tōprak in kālet ko aer.

Kōkōm̧anm̧anļo̧k Ad Katakin

Ajri ro remaron̄ kile im̧we eo an Jetōb eo. Katakin ajri ro bwe en̄jake in aenōm̧m̧an, iakwe, im okmāneen me rej en̄jake ilo aer kōnono ak al kōn Jisōs Kraist im gospel eo An ej itok jān Jetōb Kwojarjar. En̄jake kein remaron̄ kalōk naan in kam̧ool ko ad.