Liai im Liaona eo, jān Joseph Brickey

Jānwōde 27–Pāpode 2

1 Nipai 16–22

“Inaaj Kōpooj Juon Iaļ Im̧aami”

Bwebwenato ko reim̧we ilo 1 Nipai 16–22 rej katakin m̧ool ko me remaron̄ kōjeraam̧m̧an ajri ro ilo kūlaaj eo am̧. Riiti jebta kein im je im̧we ko kwoj būki.

Je En̄jake ko rej Im̧we Eok

Pija eo ej Bōk Jikin Kajjitōk n̄an Kwaļo̧ke

Je naan kein ioon boot eo, ak kwaļo̧k pijaier: Liaona eo, libben eo, im wa eo. Kajjitōk ippān jilu ajri n̄an bōk juon iaan naan ko ak pija ko im kwaļo̧k m̧ōttan bwebwenato eo an Nipai ilo men kein. Leļo̧k jipan̄ eļan̄n̄e emenin aikuj.

Katakin Katak: Ajri ro Reddikļo̧k

1 Nipai 16:10, 28–29; 18:8–13, 20–22

Irooj emaron̄ tōl im im̧we eō.

Katakin ajri ro bwe men̄e rej ioon apan̄ ko reppen, Irooj emaron̄ tōl er (lale 1 Nipai 16:29).

Makūtkūt ko Maron̄ Kōm̧m̧ani

• Kwaļo̧k n̄an ajri ro juon kambōj, juon māāp, ak jet men ko me rej jipan̄ kōj ba kajien ad iaļ, im kōmeļeļeik elmen kōjerbal kein jerbal kein. Keidi kein jerbal kein n̄an juon liaona ilo am̧ kōmeļeļeik bwebwenato eo ilo 1 Nipai 16:10, 28–29 im 18:9–13, 20–22. Kwaļo̧k bwe ke baam̧le eo an Liai rejjab pokake, Liaona eo ejjab jerbal (bar lale 1 Nipai 18:9–12, 20–22). Ta eo ej jipan̄ kōj n̄an ba kajjien ad ro̧o̧lļo̧k n̄an Jemedwōj Ilan̄?

• Bōktok juon bo̧o̧k ewōr ie jet kļu ko rej kōmeļeļeik juon jikin ak peļaakin juon m̧ōnjar. Kōjerbal bo̧o̧k eo im kūļu ko n̄an bōk jikin liaona eo, im kōm̧m̧an bwe ajri ro ren bōk kuņaer kālet kūļu ko im kajidede jikin ta eo. Innām etal ippān doon n̄an jikin eo. Kōmeļeļeik bwe n̄e jej kwaļo̧k tōmak im ļoor tōl eo Irooj ej letok n̄an kōj, Enaaj jipan̄ kōj ro̧o̧lļo̧k n̄an Ippān (lale Alma 37:38–42). Elmen an Jemedwōj Ilan̄ tōl kōj ilo ad ro̧o̧ļo̧k n̄an Ippān?

1 Nipai 16:14–32

Imaron̄ juon waanjon̄ok n̄an baam̧le eo aō.

An Nipai iiaio̧ ippān baam̧le eo an ilo juon iien epen emaron̄ jipan̄ ajri ro loe men̄e rej iddik wōt, remaron̄ waanjon̄ok n̄an baam̧le ko aer.

Makūtkūt ko Maron̄ Kōm̧m̧ani

• Jitōn̄ kajjojo ajri n̄an jin̄aik juon pija in jet men jān bwebwenatoin an jorrāān lippo̧ņ eo an Nipai (lale 1 Nipai 16:14–32), āinwōt Nipai, juon lippo̧ņ, ak juon Liaona. Innām kōjerbal pija ko n̄an kwaļo̧k bwebwenato eo n̄an kūlaaj eo, im kōtļo̧k bwe ajri ro ren bōk kuņaer kōm̧m̧an āinwōt. Elmen ad āinwōt Nipai n̄e baam̧le ko ad rej dipuki men ko reppen?

• Kūrtok ajri ro kajjojo n̄an m̧wijiti juon peba doulul im jin̄aik juon mejen būrom̧ōj ilo turājet eo juon im juon mejen m̧ōņōņō ilo turājet eo juon. Ilo am̧ kwaļo̧k bwebwenato kōn an jorrāān lippo̧ņ eo an Nipai, kajjitōk ippān ajri ro n̄an kōjerbal mej ko n̄an kwaļo̧k elmen an baam̧le eo an Nipai en̄jake ilo m̧ōttan ko an bwebwenato in. Elmen an kar Nipai jipan̄ kōm̧m̧an bwe baam̧le eo an ren m̧ōņōņō? Ta eo jemaron̄ kōm̧m̧ane bwe baam̧le eo ad en m̧ōņōņō?

1 Nipai 17:7–19; 18:1–4

Jemedwōj Ilan̄ emaron̄ jipan̄ eō kōm̧m̧ani men ko reppen.

Āinwōt Nipai, ajri ro kwoj katakin rej ekkatak n̄an kōm̧m̧ani men ko reppen. En̄jake eo an Nipai emaron̄ jipan̄ er jeļā bwe Jemedwōj Ilan̄ enaaj jipan̄ er n̄e rej kajjitōk.

Makūtkūt ko Maron̄ Kōm̧m̧ani

• Bwebwenato n̄an ajri ro kōn bwebwenato eo an Nipai ke kar kakien bwe en jek juon wa, kōjerbal 1 Nipai 17:7–19 im 18:1–4. Komaron̄ bar kōjerbal “Jebta 7: Jek juon Wa” (Bwebwenato ko an Bok in Mormon, 21–22) ak pija in alooj ko ilo Bok in Mormon ChurchofJesusChrist.org. Peij in m̧akūtkūt eo an wiik in emaron̄ kapenļo̧k pedped in katak eo bwe Jemedwōj Ilan̄ eaar jipan̄ Nipai, im Enaaj jipan̄ kōj.

• Al ippān doon eoon ruo in “Nephi’s Courage” (Children’s Songbook, 120–21). Ta eo eaar jipan̄ Nipai bwe en bōk peran ke ļōm̧aro jein raar kajjirere kōn an kajjieon̄ jek wa eo?

Katakin Katak: Ajri ro Rōtūttoļo̧k

1 Nipai 16:10, 28–29; 17:13–15; 18:8–13, 20–22

N̄e ij kōjparok kien ko, Irooj ej tōl eō.

Kōjerbal bwebwenato in baam̧le eo an Liai kar tōl jān Liaona eo n̄an kwaļo̧k n̄an ro nejin armej elmen an Anij tōl er ilo aer kajjieon̄ kōm̧anm̧an Ankilaan.

Makūtkūt ko Maron̄ Kōm̧m̧ani

• Kālet juon ak elōn̄ļo̧k jān ennaan kein im riit ļo̧k n̄an ajri ro: 1 Nipa 16:10, 28–29; 17:13–15; im 18:8–13, 20–22. Kajjitōk ippāer n̄an lale ta eo jemaron̄ kōm̧m̧ane n̄an bōk tōl im im̧we jān Anij im kōnono ta eo raar ekkatak.

• Ālkin etale bwebwenat ko ilo 1 Nipai 16–18, intōrpiuiki jet ajri āinwōt n̄e ren kar ito-itak ippān baam̧le eo an Liai. Komaron̄ kajjitōk kajjitōk kein: Etke kwon kar kam̧m̧oolol kōn Liaona eo? Ta eo kwon kar kōm̧m̧ane bwe Liaona eo en jerbal? (Lale 1 Nipai 16:28–29). Kajjitōk ippān kūlaaj eo n̄an kōnono kōn men ko Irooj eaar letok n̄an tōl kōj rainin.

• Kajjitōk ippān ajri ro n̄an ļōmņake elmen aer maron̄ kar kōjerbal bwebwenato in Liaona eo n̄an jipan̄ juon eo m̧ōttāer n̄an kōm̧m̧ane juon kālet eaorōk. Kwaļo̧k bwe ilo kakkobaba in 1 Nipai 16:10, 26–31 im 18:9–22, remaron̄ bar etal n̄an Alma 37:38–44. Kwaļo̧k juon en̄jake ilo an Jemedwōj Ilan̄ kar jipan̄ eok ilo iien ko reppen, ak kajjitōk ippān ajri ro n̄an kwaļo̧k juon. Ta eo jej aikuj kōm̧m̧ane n̄an bōk An jipan̄?

1 Nipai 16:14–39; 18:1–5

Mwiļ im kālet ko aō remaron̄ in juon im̧we em̧m̧an n̄an baam̧le eo aō.

Tōmak eo an Nipai eaar juon kōjeraam̧m̧an eļap ke baam̧le eo an raar ioon apan̄ ko. Elmen am̧ maron̄ jipan̄ ajri ro katak jān waanjon̄ok eo an?

Makūtkūt ko Maron̄ Kōm̧m̧ani

• Kajjitōk ippān ajri ro n̄an jin̄aik pija ko rej kwaļo̧k bwebwenato in an jorrāān lippo̧ņ eo an Nipai (lale 1 Nipai 16:14–39). Etale bwebwenato eo ippāer, eļan̄n̄e eaikuji. Ilo aer kwaļo̧k jin̄a ko aer, jipan̄ er kwaļo̧k wāween tiljek eo ekar kōjeraam̧m̧an baam̧le eo an Nipai. Kajjitōk ippān ajri ro n̄an kōļmenļo̧kjeņ kōn apan̄ ko rej ak baam̧le ko rej iooni. Ta eo remaron̄ kōm̧m̧ane n̄an ļoor waanjon̄ok eo an Nipai?

• Riit ippān doon jet eoon jān 1 Nipai 16:21–32. Ekōnono kōn jet kōttōbar ko ewōr ippān baam̧le ko an ajri ro, āinwōt emakijkij innokon in jota an baam̧le ak jar an baam̧le. Elmen an ajri ro jipan̄ baam̧le ko aer tōpar kōttōbar kein? Kajjitōk ippāer n̄an peek n̄an kōm̧m̧ane juon men n̄an jipan̄ baam̧le ko aer tōpar kōttōbar ko aer wiik in.

1 Nipai 19:22–24

Imaron̄ keidi tok jeje ko rekwojarjar n̄an mour eo aō.

Jipan̄ ajri ro lo bwe bwebwenato ko ilo jeje ko rekwojarjar eļapļo̧k jān bwebwenato—epād ie pedped in katak ko me remaron̄ kōjeraam̧m̧an mour ko aer.

Makūtkūt ko Maron̄ Kōm̧m̧ani

• Kajjitōk ippān juon ajri bwe en riiti 1 Nipai 19:22–24 eļaaj, im kajjitōk ippān ajri ro ta eo meļeļein “keidi aolep jeje ko rekwojarjar” n̄an kōj make. Jipan̄ er lo elmen an Nipai kar keidi bwewenato in jeje ko rekwojarjar n̄an en̄jake eo an n̄an bōk pilej brass ko (lale 1 Nipai 4:1–4; bar lale Exodus 14). Keememej bwebwenato in elmen an jipan̄ Nipai im ļōm̧aro jein?

• Etale jet iaan bwebwenato ko me ajri ro raar ekkatak kōn Liai im baam̧le eo an jān 1 Nipai, im kajjitōk ippāer n̄an kwaļo̧k ta eo raar ekkatak jān bwebwenato kein. Jipan̄ er ļōmņake jekjek ko ilo mour ko aer me emaron̄ in āinwōt bwebwenato kein. N̄an waanjon̄ok, Irooj eaar ba Nipai en jek juon wa emaron̄ kakeememej er kōn iien ko me rekar aikuj n̄an kōm̧m̧ane jet men reppen im kar pukot jipan̄ an Irooj.

Kōketak Ekkatak ilo Mweo

Kajjitōk ippān ajri ro n̄an kālet juon bwebwenato jān 1 Nipai 16–22 im kwaļo̧k n̄an baam̧le ko aer elmen aer maron̄ “keidi” bwebwenato eo n̄an mour eo aer.

Kōkōm̧anm̧anļo̧k Ad Katakin

Kōjerbal bwebwenato ko. Bwebwenato ko rej jipan̄ ajri ro meļeļe pedped in gospel in kōnke rej kwaļo̧k elmen an ro jet mour kōn pedped in katak ko.