armej ro rej m̧ōn̄ā leen wōjke in mour

Tōn̄alļo̧k jān Aolep Men Retōn̄al, jān Miguel Angel González Romero

Jānwōde 20–26

1 Nipai 11–15

“Raar pojak kōn Jim̧we im kōn Kajoor an Anij”

Riiti 1 Nipai 11–15 ilo bōro ippān ajri ro kwoj katakin, im je en̄jake ko am̧ kwoj en̄jaki.

Je En̄jake ko rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Kwaļo̧k juon pija in visōn eo an Liai kōn wōjke in mour, im kajjitōk ippān ajri ro n̄an kwaļo̧k ta eo rej keememej ilo aer kar ekkatak kōn visōn in ilo wiik eo ļo̧k. Kajjitōk ippāer eļan̄n̄e ekar lōn̄ men ekāāl rekar ekkatak jān e jān iien eo.

pija ej bōk jikin katakin

Katakin Katak eo: Ajri ro Redikļo̧k

1 Nipai 11:16–33

Jemedwōj Ilan̄ ekar jilkintok Jisōs Kraist n̄an laļ in kōnke Ej iakwe kōj.

Nipai ekar lo mour im iien kwaļo̧k naan eo an Jisōs Kraist ilo juon visōn. Kejōkļo̧kjeņ kōn ta eo ajri ro ilo kūlaaj eo remaron̄ ekkatak kōn Rilo̧mo̧o̧r eo jān 1 Nipai 11.

Makūtkūt ko Maron̄ Kōm̧m̧ani

• Leļo̧k n̄an kajjojo ajri juon pija eo me ej kōmeļeļeiki juon iaan m̧akūtkūt ko jān mour eo an Jisōs me kar kanaan kake ilo 1 Nipai 11:20, 24, 27, 31, and 33 (lale Gospel Art Book, nos. 30, 35, 39, 42, 57). Ilo am̧ riiti eoon kein, kajjitōk ippān ajri ro n̄an kajutak pija ko aer n̄e rej ron̄ eoon eo me ejejjet n̄an e.

• Ba n̄an ajri ro kōn jet iaan men ko me Nipai ekar ekkatak me Jisōs Kraist en kar kōm̧m̧ane ilo mour eo An (lale 1 Nipai 11:16–33), im kwaļo̧k jet iaan pija in makūtkūt ko (lale, n̄an waanjon̄ak, Gospel Art Book, nos. 41, 46, 47, 49, 56, 57, 58, 59). Kwaļo̧k ta eo Rilo̧mo̧o̧r eo em̧ōj an kōm̧m̧ane n̄an eok. Kwaļo̧k pija ko n̄an jipan̄ ajri ro ļōmņak kōn wāween ko me jemaron̄ kwaļo̧k iakwe eo an Anij (lale Gospel Art Book, nos. 109, 110, 115).

1 Nipai 13:26–29, 35–36, 40

Bok in Mormon ej katakin m̧ool ko raorōk.

Etke kwoj kam̧m̧oolol kōn Bok in Mormon eo? Ļōmņak kōn wāween am̧ maron̄ kwaļo̧k naan in kam̧ool eo am̧ kōn Bok in Mormon ippān ajri ro.

Makūtkūt ko Maron̄ Kōm̧m̧ani

• Jin̄aiki juon pija ioon boot eo, im kūr ajri ro n̄an ukōt ak joļo̧k m̧ōttan ko ilo pija eo me ej n̄an kōm̧m̧an bwe pija eo en oktak. Jipan̄ er meļeļe bwe, āinwōt pija in, jet men ko ilo Baibōļ rekar oktak im kar juļo̧ki ilo elōn̄ tōre ko. Riiti m̧ōttan ko ilo 1 Nipai 13:40 me ej katakin wāween an Bok in Mormon (eo me Nipai ekar ņa etan “rekoot kein āliktata”) ej jipan̄ kōj meļeļe kōn “m̧ōttan ko realikkar im kanooj aorōk” me rekar jako jān Baibōļ.

• Nooji pija ko ilo ruum̧ eo me ej bōk jikin m̧ool ko an gospel eo me rej alikkar ilo Bok in Mormon, āinwōt Peptaij, kwojkwoj, im jerkakpeje. Kajjitōk ippān ajri ro n̄an kapukkōt pija ko. Kōmeļeļe bwe Bok in Mormon ekar karool tok m̧ool ko an gospel eo me rekar jako.

1 Nipai 15:23–25

Naan ko an Anij ej letok n̄an eō kajoor.

Ewi wāween am̧ maron̄ kōjerbal pija in aen in dāpdep n̄an katakin ajri ro kōn kajoor, kōjparok, im kajoor in naan an Anij?

Makūtkūt ko Maron̄ Kōm̧m̧ani

• Kwaļo̧k juon pija in ettōņak eo an Liai, āinwōt eo ilo unin tōl eo an wiik eo ļo̧k ilo Itok, Ļoor Eō—N̄an Kajjojo Armej im Baam̧le ko. Kajjitōk ippān ajri ro n̄an kappukōt aen in dāpdep eo ilo pija eo, im jipan̄ er meļeļe bwe ilo ad dāpdep ilo aen in dāpdep eo emaron̄ kōjparok kōj (lale 1 Nipai 15:23–24). Leļo̧k n̄an ajri ro men ko āinwōt ļo̧k aen in dāpdep, āinwōt juon paip ak aļaļ, ilo am̧ riiti eoon ko 24. Ia eo jej kappukōt naan an Anij? Ta eo jemaron̄ kōm̧m̧ane n̄an kōm̧m̧an bwe naan an Anij en m̧ōttan ļo̧k mour eo ad aolep raan?

• Jipan̄ ajri ro kōļar e im kadedeikļo̧k peij in makūtkūt eo an wiik in. Ewi wāween ad “jirok likatōttōt” n̄an naan an Anij? (1 Nipai 15:24).

pija ej bōk jikin katakin

Katakin Katak eo: Ajri ro Rerūtto

1 Nipai 11:16–33

Jemedwōj Ilan̄ ekar jilkintok Jisōs Kraist n̄an laļ in kōnke Ej iakwe kōj.

Ekar wōr juon an Nipai visōn eo me ekar kam̧ool e karōk eo an Jemedwōj Ilan̄ n̄an kōj, im Jisōs Kraist ekar m̧ōttan eo ioļaptata ilo visōn eo.

Makūtkūt ko Maron̄ Kōm̧m̧ani

• Kajjitōk ippān ajri ro n̄an māāje eoon ko jān 1 Nipai 11:16–33 ippān pija ko me rej kwaļo̧k ta eo eoon ko rej kōmeļeļe kaki (āinwōt 1 Nipai 11:20, 24, 27, 29, 31, 33; lale Gospel Art Book, nos. 30, 35, 38, 39, 42, 57). Ta eo ajri ro rej ekkatak kōn Kraist jān eoon ko im pija ko?

• Kajjitōkin ajri ro etke Jisōs Kraist eaorōk n̄an kōj. Al juon al kōn Rilo̧mo̧o̧r, āinwōt “He Sent His Son” (Children’s Songbook, 34–35), im kajjitōk ippān ajri ro ta eo al in ej katakin kōn Jisōs. Kajjitōk ippān ajri ro n̄an kōm̧m̧an aer iien ilowaan wiik in n̄an ļōmņak kōn Jisōs Kraist im kwaļo̧k en̄jake ko aer ilo wiik in tok ilo kūlaaj eo.

Kape ko an Bok in Mormon ilo kajin ko kajjojo

Bok in Mormon epād ie gospel eo an Jisōs Kraist.

1 Nipai 13:26–29, 35–36, 40

Bok in Mormon ej katakin m̧ool ko raorōk.

Ta eo ajri ro rejeļā kake kōn marok jilōn̄lōn̄ eo? Ewi wāween am̧ jipan̄ er meļeļe aorōkin Bok in Mormon eo ilo an m̧ool ko an gospel eo jepļaaktok me rekar jako ilo iien marok jilōn̄lōn̄ eo?

Makūtkūt ko Maron̄ Kōm̧m̧ani

• Riiti 1 Nipai 13:26–29 ippān doon, im karuwaineneik ajri ro n̄an lale ta eo ej waļo̧k n̄e armej rejjab jeļā m̧ool ko “realikkar im kanooj aorōk” ilo gospel eo. Ewi wāween an kar Irooj kōjepļaaktok m̧ool ko me rekar jako? (lale eoon ko 35–36, 40). Kajjitōk ippān ajri ro n̄an kwaļo̧k naan in kam̧ool ko aer kōn m̧ool ko me rekar ekkatak kaki jān Bok in Mormon eo, ak kwaļo̧k naan in kam̧ool eo am̧ make.

• Kōjo juon pija in alooj “The Book of Mormon—a Book from God” (ChurchofJesusChrist.org) n̄an kōmeļeļeiki wāween an Baibōļ eo im Bok in Mormon eo juon wōt n̄an katakin m̧ool eo. Etke elukkuun ļap an jipan̄ n̄e ej lōn̄ļo̧k jān juon rikam̧ool? Je juon dot ilo boot eo, im kōkaļļeiki Baibōļ, im kajjitōk ippān kajjojo ajri n̄an jin̄n̄aiki juon lain ej kajim̧we n̄an dot eo n̄an kōmeļeļeiki bwe katak ko ilo Baibōl emaron̄ bwōjin kain meļeļeier n̄e Baibōl eo ej make iaan. Jāāri ļain ko, im jin̄aiki dot eo kein karuo im kōkalļeiki Bok in Mormon. Kajjitōk ippān juon ajri n̄an jin̄aiki juon ļain ej kajim̧we n̄an dot eo n̄an kwaļo̧k bwe juon wōt meļeļein gospel eo n̄e Baibōļ eo im Bok in Mormon rej kōjerbali ippān doon.

• Jipan̄ ajri ro kakilōklōke laajrak in tōmak kein karualitōk.

1 Nipai 15:23–25

Naan an Anij ej letok n̄an eō kajoor n̄an anjo̧ jān kapo ko.

Ewi wāween am̧ jipan̄ ajri ro kwoj katakin er kōkajoorļo̧k naan in kam̧ool ko aer kōn jeje ko rekwojarjar? Kejōkļo̧kjeņ kake kajjitōk kein ilo am̧ riiti 1 Nipai 15:23–25, im kōjerbal makūtkūt ko ilaļ n̄an kōļapļo̧k ļōmņak ko am̧ make.

Makūtkūt ko Maron̄ Kōm̧m̧ani

• Kajjitōk ippān ajri ro n̄an kakaduikļo̧k bwebwenato eo kōn visōn in wōjke in mour eo (lale 1 Nipai 8; 11). Ta eo ekar dāpij armej ro jān aer tōpar wōjke eo? Ta eo ekar jipan̄ er tōpare? Kajjitōk ippān ajri ro n̄an riiti 1 Nipai 15:23–25. Ewi wāween an kar aen in dāpdep eo jipan̄ armej ro eļļā jān marok jilōn̄lōn̄ eo? Ewi wāween ilo ad riiti naan an Anij maron̄ jipan̄ kōj eļļā jān kapo ko im marok ilo raan kein?

• Kadedeikļo̧k peij in m̧akūtkūt ko ippān ajri ro. Ilo aer kōm̧m̧ane, kajjitōk ippān ajri ro n̄an kōnono kōn jet iaan kapo ko me ajri ro rej jelm̧aeiki. Ewi wāween aer maron̄ keememej n̄an dāpdep wōt ilo aen in dāpdep eo aolep raan? Al “The Iron Rod” (Hymns, no. 274) āinwōt mōttan ļo̧k makūtkūt in.

pija ej bōk jikin ekkatak

Kōketak Ekkatak ilo Mweo

Rōjan̄ ajri ro n̄an kwaļo̧k n̄an baam̧le ko aer “aen in dāpdep” eo aer me rekar kōm̧m̧ane ilo peij in makūtkūt eo im kwaļo̧k ewi wāween aer maron̄ dāpdep ilo aen in dāpdep eo n̄e rej riiti jeje ko rekwojarjar.

Kōkm̧anm̧anļo̧k Ad Katakin

Kōjerbal pija ko bwe rikatak ro ren bōk koņaer. N̄e kwoj katakin ajri ro juon bwebwenato jān jeje ko rekwojarjar, kappukōt wāween ko n̄an jipan̄ er loļo̧kjeņ ak pijaikļo̧k. Kōjerbal pija ko, pija in alooj ko, puppet ko, nuknuk ko, im ko jet.

Peij in makūtkūt: naan an Anij ej jipan̄ eō anjo̧ jān kapo.