Tijemba 30–Jānwōde 5

Peij ko rej kwaļo̧k kadkad in Bok in Mormon

“Bar Juon Kallim̧ur Kōn Jisōs Kraist”

Jino iien kōppopo eo am̧ n̄an katakin kōn riit jān Bok in Mormon taitōļ peij eo im kadkad eo; naan in kam̧ool ko an Rikam̧ool ro Jilu, eo an Rikam̧ool ro Ruwalitōk, im eo an Rikanaan Josep Smith; im “Juon Kōmeļeļe Ekadu Kōn Bok in Mormon an Bok in Mormon eo.” Kejōkļo̧kjeņ kōn wāween am̧ maron̄ im̧we ajri ro n̄an katak jān Bok in Mormon.

Je En̄jake ko Rej Im̧we Eok

Kajjitōk bwe ren Kwaļo̧k

Kūr ajri ro n̄an kwaļo̧k bwebwenato ko rejeļā jān Bok in Mormon, kōjerbal pija ko 67–86 ilo Bok in Gospel pija ak pija ko jet ewōr am̧.

Katakin Katak eo: Ajri ro Reddikļo̧k

Taitōļ peij eo an Bok in Mormon

Bok in Mormon emaron̄ jipan̄ eō bōk tōmak ilo Jisōs Kraist.

Jipan̄ ajri ro lo bwe jibadbad eo an Bok in Mormon ej n̄an kwaļo̧k naan in kam̧ool kōn Jisōs Kraist.

M̧akūtkut ko Maron̄ Kōm̧m̧ani

• Kotak juon kape in Bok in Mormon, im kwaļo̧k n̄an ajri ro taitōļ eo an, Bar Juon Kallim̧ur Kōn Jisōs Kraist. Kōm̧m̧an bwe ajri ro ren kajjojo ba, “Bar juon kallim̧ur kōn Jisōs Kraist.” Jiron̄ ajri ro ilo tukadu in ekōjkan an Bok in Mormon kar kōkajoorļo̧k tōmak eo am̧ ilo Jisōs Kraist.

• Ba juon bwebwenato jān Bok in Mormon me ej katakin kōn Jisōs Kraist, eo āinwōt bwebwenato eo an Samuel Rilaman eo ej kanaan kōn Kraist (lale Helamōn 14–16), Rilo̧mo̧o̧r eo ej kōjeram̧m̧an ajri ro (lale 3 Nipai 17), Ļeo̧ jein im jatin Jared ej lo Jisōs Kraist (lale Ether 2–3). Jebta ko jān Bwebwenato ko jān Buk in Mormon (im pija eo an ilo ChurchofJesusChrist.org) maron̄ jipan̄. Kwaļo̧k n̄an ajri ro ta eo jej katak kōn Jisōs jān bwebwenato kein. Jiron̄ er bwe renaaj katak elōn̄ men ko kōn Jisōs Kraist jān Bok in Mormon iiō in.

• Al juon al kōn Bok in Mormon, eo āinwōt “Book of Mormon Stories” (Children’s Songbook, 118). Al ippān doon al eo jet alen, im kōm̧m̧an bwe ajri ro kajjojo ren jibwe juon pija in Rilo̧mo̧o̧r eo ilo ami al.

Kadkad eo n̄an Bok in Mormon

Bok in Mormon ej dekā in jabōn em̧ n̄an tōmak in ad.

Būreejtōn Thomas S. Monson eaar kōmeļeļeik: “Eļan̄n̄e [Bok in Mormon] em̧ool—im ij kam̧ool bwe em̧ool—innām Josep Smith ekar juon rikanaan … , Kabun̄ eo an Jisōs Kraist im Armej ro Rekwojarjar ilo Raan-ko Āliktata ej Kabun̄ eo an Irooj ioon laļ in, im priesthood eo ekwojarjar an Anij em̧ōj an jepļaaktok” (“Kajoor eo an Bok in Mormon eo,” Ensign ak Kweilo̧k eo Eļap, Māe 2017, 86–87).

M̧akūtkut ko Maron̄ Kōm̧m̧ani

• Riiti n̄an ajri ro enaan in jān Josep Smith ilo kadkad eo n̄an Bok in Mormon: “Bok in Mormon [ej] dekā in jabōn em̧ n̄an tōmak in ad.” Kōmeļeļeik bwe ejja āinwōt an dekā in jabōn em̧ eo dāpij ippān doon aolepān arch eo, naan in kam̧ool eo ad kōn Bok in Mormon eo ej dāpij im kōkajoorļo̧k naan in kam̧ool eo ad kōn men ko jet, āinwōt Josep Smith im gospel.

• Kūr juon jinen ak jemen an juon iaan ajri ro n̄an kwaļo̧k ekōjkan an kar bōk juon naan in kam̧ool kōn Bok in Mormon. Riit ippān ajri ro kūr eo ilo jem̧ļo̧k in kadkad eo n̄an Bok in Mormon, im jipan̄ kōm̧m̧an kōl kōn men ko remaron̄ kōm̧m̧ani n̄an bōk naan in kam̧ool eo aer make.

“Naan in kam̧ool eo an Rikanaan Josep Smith”

Bok in Mormon kar letok n̄an kōj kōn kajoor eo an Anij.

Naan in kam̧ool eo an Josep Smith emaron̄ jipan̄ ajri ro meļeļe kōn jibadbad kwojarjar eo an Bok in Mormon.

Makūtkūt ko Maron̄ Kōm̧m̧ani

• Jiron̄ ajri ro ilo tukadu in bwebwenato eo an waļo̧ktok eo an Bok in Mormon āinwōt kar kōmeļeļeik ilo “Naan in Kam̧ool eo an Rikanaan Josep Smith.” Komaron̄ barāinwōt kōjerbal “Jebta 1: Ewi Wewin Ad kar Bōk Buk in Mormon” (Bwebwenato Ko Jen Buk In Mormon, 2–4, ak pija eo an ilo ChurchofJesusChrist.org). Jipan̄ ajri ro kōm̧m̧an kōļ kōn bwebwenato eo jet alen ilo am̧ bar ba bwebwenato eo.

• Kwaļo̧k n̄an ajri ro juon pija in jeje ko jān piliej kooļ ko. Kōmeļeļeik bwe Anij eaar jipan̄ Josep ukōt jeje kein n̄an naan ko jemaron̄ riiti im meļeļe.

  

  Josep Smith eaar ukōt jeke ko kar jei ioon piliej kooļ ko.

Katakin Katak eo: Ajri ro Rōrūttoļo̧k

Taitōļ peij eo an Bok in Mormon

Bok in Mormon ej jipan̄ eō wōr tōmak ilo Jisōs Kraist.

Keememej bwe jibadbad eo am̧ ilo katakin ajri ro kōn Bok in Mormon ej n̄an kalōk tōmak eo aer ilo Rilo̧mo̧o̧r eo.

Makūtkūt ko Maron̄ Kōm̧m̧ani

• Ajije kūlaaj eo n̄an ruo iaan ruo. Kūr kajjojo pea ko n̄an riiti perokūrāāp eo kein karuo an Taitōļ peij eo an Bok in Mormon, kappukōt juon men me ej jiron̄ er ta kōttōpar eo an Bok in Mormon. Innām kūr kajjojo pea n̄an kwaļo̧k ippān kūlaaj eo.

• Jipan̄ ajri ro pukōt ilo taitōļ peij eo eoon eo “karreel RiJu im Riaelōn̄ ko bwe Jisōs ej RiKraist.” Ekōjkan an Bok in Mormon maron̄ karreel kōj bwe Jisōs ej RiKraist? Kūr er n̄an kwaļo̧k juon bwebwenato jān Bok in Mormon me eaar kōkajoorļo̧k tōmak eo aer ilo Kraist, ak kwaļo̧k eo am̧ make.

Kadkad eo n̄an Bok in Mormon

Bok in Mormon ej dekā in jabōn em̧ n̄an tōmak in ad.

Bōk juon naan in kam̧ool kōn Bok in Mormon enaaj jipan̄ kajjojo ajri ro jeļā bwe Kabun̄ eo an Jisōs Kraist im Armej ro Rekwojarjar ilo Raan-ko Āliktata ej Kabun̄ eo em̧ool an Anij.

Makūtkūt ko Maron̄ Kōm̧m̧ani

• Kajjitōk ippān ajri ro n̄an etan ke kwojjan̄in kar ron̄ kōn Bok in Mormon m̧okta. Kūr ajri ro n̄an jerbal ippān juon m̧ōttan n̄an ļōmņak kōn wāween ko remaron̄ kōmeļeļeik n̄an eok ta eo im ia eo eaar itok jān e, kōjerbal tipdik in meļeļe ko jān kadkad in. Innām kōm̧m̧an bwe kajjojo pea ren kajjojo katakin eok. Pija eo The Bible and the Book of Mormon Testify of Christ (ChurchofJesusChrist.org) remaron̄ jipan̄.

• Kūr juon ajri n̄an riiti ennaan eo an Josep Smith ilo pārokūrāāp jiljino an kadkad in eo. Kōjerbal peij in m̧akūtkūt eo an wiik in, kōmeļeļeik ekōjkan an juon dekā in jabōn em̧ dāpij juon arch. Ekkar n̄an pārokūrāāp eo āliktata an kadkad in eo, ta men ko jet jejeļā n̄e ewōr juon ad naan in kam̧ool bwe Bok in Mormon ej m̧ool?

“Naan in Kam̧ool eo an Rikam̧ool ro Jilu”; “Naan in Kam̧ool eo an Rikam̧ool ro Ruwalitōk”

Imaron̄ in juon rikam̧ool kōn Bok in Momron.

Ekōjkan am̧ maron̄ jipan̄ ajri ro bōk im kwaļo̧k naan in kam̧ool ko aer make kōn Bok in Mormon?

Makūtkūt ko Maron̄ Kōm̧m̧ani

• Kajjitōk ippān ajri ro n̄an kōmeļeļeik juon men me rekar loe me ejjan̄in wōr juon ilo kūlaaj eo enan̄in kar loe. Kōm̧eļeļeik bwe Bok in Mormon epād ie naan in kam̧ool ko an armej ro 11 ijello̧kin Josep Smith eo eaar lo piliej kooļ ko me Bok in Mormon eo eaar ukook jāne. Riiti naan in kam̧ool ko ippān doon. Etke rikam̧ool rein rekōņaan bwe armej ro jet ren jeļā kōn naan in kam̧ool ko aer?

• Kajjitōk eļan̄n̄e ewōr jabdewōt iaan ajri ro rekōņaan kwaļo̧k ekōjkan aer jeļā Bok in Mormon ej m̧ool. Riit ippān doon Moronai 10:3–5, im kūr kajjojo ajri n̄an riiti Bok in Mormon ilo iiō in im bōk ak kōkajoorļo̧k naan in kam̧ool eo an bwe ej m̧ool. Jiron̄ ajri ro ekōjkan am̧ kar bōk naan in kam̧ool eo am̧ kōn Bok in Mormon.

Kōketak Ekkatak ilo Mweo

Eļan̄n̄e emaron̄, kanooj lale bwe kajjojo ajri en wōr juon an kape in Bok in Mormon, im kūr er n̄an jino riiti ippāer make im ippān baam̧le ko aer.

Kōkōm̧anm̧anļo̧k Ad Katakin

Kappuōk im̧we eo am̧ make. Ijjello̧kin lali unin tōl kein āinwōt kadkad ko me kwoj aikuj ļoori ilo am̧ katakin, kōjerbali āinwōt juon kein jipan̄ katakin kōn ļōmņak ko n̄an kōketak im̧we eo am̧ make ilo am̧ kejōkļo̧kjeņ kōn aikuj ko an ajri ro kwoj katakin.