Liai ej Ito-Itak Iturin Lom̧aļo̧ Ekilm̧ur, jān Gary Smith

Jānwōde 6–12

1 Nipai 1–7

“Inaaj Ilo̧k im Kōm̧m̧ani”

Ilo am̧ riiti 1 Nipai 1–7, ļōmņak kōn eoon ko, en̄jake ko, kajjitōk ko, im kein jipan̄ ko jet kwoj en̄jake reim̧we n̄an jipan̄ katakin ajri ro. Makūtkūt ko ilo unin tōl in emaron̄ in jerbal n̄an ajri ro rōrūtto im reddik.

Je En̄jake ko rej Im̧we Eok

Kajjitōk bwe ren Kwaļo̧k

Jet iaan ajri ro ilo kūlaaj eo am̧ remaron̄ kar ron̄ kake ak riiti en̄jake ko an baam̧le eo an Nipai ilo 1 Nipai 1–7. Kajjitōk ippāer n̄an kwaļo̧k ta eo rejeļā. Eļan̄n̄e ajri ro rejjab lukkuun jeļā kōn en̄jake ko an Nipai, leļo̧k n̄an er iien em̧m̧an ilo jem̧ļo̧kin ļo̧k katak eo n̄an kwaļo̧k ta eo raar ekkatak.

Katakin Katak ko: Ajri ro Reddikļo̧k

1 Nipai 2:16

Ij aikuj aō make naan in kam̧ool.

Nipai eaar tōmak naan ko an jemen kōnke eaar wōr an ikdeelel n̄an jeļā kōn e make im eaar jar n̄an Irooj. Jipan̄ ajri ro katak jān waanjon̄ok eo an.

M̧akūtkūt ko Maron̄ Kōm̧m̧ani

• Bōktok juon bo̧o̧k ippān tok juon pija in Rilo̧mo̧o̧r ilowaan, im leļo̧k n̄an kajjojo ajri ro n̄an bōk kūņaer juon ilo̧k juon n̄an lale ta eo ilowaan bo̧o̧k eo. Jiron̄ļo̧k ajri ro bwe Nipai eaar kōņaan bōk juon An make naan in kam̧ool bwe Irooj eaar kean̄ baam̧le eo an n̄an em̧m̧akūt jān Jerusalem. Kajjitōk ippān ajri ro n̄an ron̄jake ta eo Nipai eaar kōm̧m̧ane n̄an bōk naan in kam̧ool eo an make ilo am̧ riiti 1 Nipai 2:16. Kam̧ool bwe ilo kajjojo iien kōmij itōn kōpeļļo̧k bo̧o̧k eo n̄an lale ta eo ilowaan, jej barāinwōt aikuj in kajjitōk ippān Anij n̄an bōk naan in kam̧ool eo ad make.

• Bōktok pija ak juon men me ej bōk jikin men ko me ajri ro remaron̄ pukot juon naan in kam̧ool kake, āinwōt pija in Jisōs Kraist, Bok in Mormon, ak pija in rikanaan eo emour. Kajjitōk ippān ajri ro n̄an kālet juon pija ak men im kwaļo̧k naan in kam̧ool ko aer kōn men eo n̄an kūlaaj eo.

1 Nipai 2:2–4; 3–4

Anij enaaj jipan̄ eō kōjparok kien ko An.

Elmen am̧ maron̄ kōjerbal bwebwenato kein n̄an jipan̄ ajri ro meļeļe bwe Anij ej jipan̄ kōj kōjparok kien ko An, men̄e repen n̄an pokake?

M̧akūtkūt ko Maron̄ Kōm̧m̧ani

• Riiti 1 Nipai 2:2–4 n̄an ajri ro, im kwaļo̧k jejjo̧ pija in men ko me baam̧le eo an Liai raar būki ippāer ļo̧k n̄an āne jem̧aden, āinwōt juon em̧ nuknuk, ko̧o̧j, lippo̧ņ im m̧ade. Kajjitōk ippāer n̄an anto̧o̧ne elmen aer nej kar en̄jake eļan̄n̄e raar etal jān kapijuknen ko aer im etal n̄an āne jem̧ade. Ta eo Irooj ej kajjitōk ippād n̄an pokake E rainin?

• Jipan̄ ajri ro kōļare im m̧wijiti peba ko ilo peij in m̧akūtkūt eo an wiik in; innām kajjitōk ippāer n̄an kōjerbal peba ko n̄an kōmeļeļeiki bwebwenato eo an Nipai im ļōm̧aro jein aer bōk pileij brass ko (lale 1 Nipai 3–4). Al eo “Nephi’s Courage” (Children’s Songbook, 120–21) im “Jebta 4: Pileij Brass Ko” (Bwebwenato ko ilo Bok in Mormon, 8–12; bar lale video ko ilo ChurchofJesusChrist.org) emaron̄ jipan̄ eok kwaļo̧k bwebwenato in.

• Kōjerbal pija 103–15 ilo Bok in Gospel Pija n̄an jipan̄ ajri ro ļōmņake men ko Irooj eaar jiron̄ kōj n̄an kōm̧m̧ani. Elmen ad jeraam̧m̧an n̄e jej pokake E? Jipan̄ ajri ro kainōnōki pāāj ko me rej ba Inaaj ilo̧k im kōm̧m̧ani men ko Irooj eaar kain̄” (1 Nipai 3:7). Ālijji naan ko ippān doon.

1 Nipai 3:19–21; 5:19–22

Jeje ko rekwojarjar eļap aer aorōk.

Elmen am̧ maron̄ jipan̄ im̧we ajri ro n̄an kaorōk jeje ko rekwojarjar, ak naan ko an Anij?

M̧akūtkūt ko Maron̄ Kōm̧m̧ani

• Kwaļo̧k n̄an ajri ro jet men (ak juon pija in juon men) me elukkuun in aorōk n̄an kwe. Kōnono kake elmen am̧ kaorōke im kōjparoke. Kōmeļeļe bwe n̄an baam̧le eo an Liai, jeje ko rekwojarjar raar lukkuun aorōk, āinwōt juon men eaorōk.

• Kajjitōk ippān ajri ro n̄an jipan̄ eok kwaļo̧ke ak jerbale ta eo Nipai im ļōm̧aro jein raar kōm̧m̧ane n̄an bōk pileij brass ko: raar etal ettoļo̧k, kōjekdo̧o̧n gold im silver, im kar em̧ooj ilo juon kom̧laļ n̄an lo̧mo̧o̧ren mour ko aer. Riiti 1 Nipai 5:21. Etke jeje ko rekwojarjar raar lukkuun aorōk n̄an baam̧le eo an Liai? Elmen ad kōjparok jeje ko rekwojarjar āinwōt juon men eaorōk?

Liai ej Būki Pileij Brass ko, jān Clark Kelley Price

Katakin Katak ko: Ajri ro Rerūttoļo̧k

1 Nipai 2:16, 19–20

Emaron̄ wōr aō make naan in kam̧ool.

Ta eo kwaar ekkatak jān waanjon̄ok eo an Nipai kōn bōk juon am̧ make naan in kam̧ool? Elmen am̧ maron̄ jipan̄ ajri ro katak jān waanjon̄ok eo an?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an pukote 1 Nipai 2:16, 19 n̄an loe elmen an kar Nipai bōk juon an naan in kam̧ool kōn naan ko an jemen. Kajjitōk ippāer n̄an je jerbal ko an Nipai ioon būļaak ko ak men ko jet innām aiini men ko ioon doon n̄an bōk jikin elmen an men ko jipan̄ kōj kalōk juon naan in kam̧ool.

• Jiron̄ļo̧k ajri ro elmen am̧ kar bōk naan in kam̧ool eo am̧ kōn gospel in. Kajjitōk ippāer n̄an kwaļo̧k ejja kain en̄jake in kar aer, im rōjan̄ er n̄an ļoor waanjon̄ok eo an Nipai n̄an kōkajoorļo̧k naan in kam̧ool ko aer. Elmen an naan in kam̧ool eo ad maron̄ jipan̄ kōj?

1 Nipai 3:1–8

Imaron̄ uwaak kōn tōmak n̄an kean̄ an Irooj.

Kalōk juon m̧wiļ āinwōt Nipai enaaj jipan̄ ajri ro n̄e Irooj ej kajjjitōk ippāer n̄an kōm̧m̧ani men ko me reppen.

M̧akūtkūt ko Maron̄ Kōm̧m̧ani

• Ajije ajri ro n̄an ruo kurup. Kajjitōk ippān juon kurup n̄an riiti uwaak eo an Leman im Lemuel n̄an Liai (lale 1 Nipai 3:2–5) im kurup eo juon n̄an riiti uwaak ko an Nipai (lale 1 Nipai 3:2–4, 7). Kajjitōk ippān juon ajri n̄an āinwōt Liai im kajjitōk ippān ajri ro jet n̄an āinwōt n̄e rej jepļaakļo̧k n̄an Jerusalem n̄an bōk pileij brass ko. Kajjitōk ippān kajjojo kurup ko n̄an uwaak kōn uwaak ko aer make eļan̄n̄e en kar er eo rej riit kake er. Ta jet iaan men ko Anij ej jiron̄ kōj n̄an kōm̧m̧ani? Elmen ad maron̄ āinwōt Nipai?

• Al juon al ippān doon, āinwōt “Nephi’s Courage” ak “Keep the Commandments” (Children’s Songbook, 120–21, 146–47), im kajjitōk ippān ajri ro n̄an ron̄jake naan ko rej katakin elmen ad uwaak n̄an Irooj.

1 Nipai 3–4

Jetōb Kwojarjar enaaj tōl eō ilo aō pukot n̄an kōm̧anm̧an ankilaan Irooj.

Nipai eaar ļoor Jetōb, “jab jeļā m̧okta men ko [en] kar kōm̧m̧ani” (1 Nipai 4:6). Elmen am̧ maron̄ jipan̄ ajri ro kwoj katakin pukot tōl jān Jetōb Kwojarjar?

Makūtkūt ko Maron̄ Kōm̧m̧ani

• Kajjitōk ippān ajri ro n̄an jerbal e bwebwenato in Nipai im ļōm̧aro jein rej kajjieon̄ in būki pileij brass ko (lale 1 Nipai 3–4). Kajjitōk ippān ajri ro n̄an riiti 1 Nipai 4:6, im kajjitōk ippān kūlaaj eo n̄an ron̄jake ta eo Nipai eaar kōm̧m̧an bwe ren tōprak.

• Kwaļo̧k n̄an ajri ro jet waanjon̄ok in men ko Anij eaar kōņaan bwe ren kōm̧m̧ani, āinwōt m̧ōttāik juon ilo jikin jikuuļ eo ej ajimakeke, jeo̧rļo̧k bōd, ak kwaļo̧k m̧ool ālkin kōm̧m̧ane juon bōd. Kajjitōk ippān ajri ro n̄an kwaļo̧k elmen an Jetōb Kwojarjar maron̄ jipan̄ er ilo jekjek kein. Elmen ad karuwaineneiktok Jetōb Kwojarjar n̄an jipan̄ kōj pokake Anij?

Kōketak Ekkatak ilo Mweo

Kajjitōk ippān ajri ro n̄an kwaļo̧k en̄jake ko aer ippān baam̧le ko ilo aer kar jeraam̧m̧an n̄an kōjparok kien ko. Rōjan̄ er n̄an kajjitōk ippān ro uwaan baam̧le eo n̄an kwaļo̧k ejja en̄jake in.

Kōkōm̧anm̧anļo̧k Ad Katakin

Jipan̄ ajri ro katak jān jeje ko rekwojarjar. N̄an jipan̄ ajri ro katak jān jeje ko rekwojarjar, pedped wōt ioon juon eoon ilo jeje ko rekwojarjar ak juon naan. Komaron̄ kajjitōk ippān ajri ro n̄an jutak ak kajutak peier n̄e rej ron̄ naan eo ak eoon eo. (Bar lale Teaching in the Savior’s Way, 21.)