Jebta 4
Pileij Brass ko
Liai ekar ba n̄an Nipai bwe Irooj ekōņaan bwe e im ļōm̧aro jein ren bar ro̧o̧l n̄an Jerusalem. Rekar etal n̄an bōki pileij brass ko jān juon em̧m̧an kar etan Leban.
Pileij brass ko rekar lo̧o̧k ko raorōk. Rekar kwaļo̧k kōn ro jim̧aan Liai im epād ie naan ko an Anij me rekar kwaļo̧k n̄an rikanaan ro.
Leman im Lemuel rekar jab kōņaan bar ro̧o̧l im bōk pileij brass ko. Rekar ba bwe elukkuun pen n̄an kōm̧m̧ane. Rekar jab tōmak ilo Irooj.
Nipai ekar kōņaan pokake Irooj. Ekar jeļā bwe Irooj enaaj jipan̄ e im ļōm̧aro jein n̄an bōk pileij brass ko jān Leban.
Leman, Lemuel, Sam, im Nipai rekar bar ro̧o̧lļo̧k n̄an Jerusalem n̄an bōk pileij brass ko.
Leman ekar etal ippān Leban im kajjitōk ippān kōn pileij ko.
Leban ekar illu im ekar jab leļo̧k n̄an Leman pileij brass ko. Leban ekar kōņaan m̧an Leman, ak Leman ekar ko.
Leman ekar jiron̄ ļo̧m̧aro jatin ta eo ekar waļo̧k. Ekar mijak im ekar ebweer im bar ro̧o̧lļo̧k n̄an ippān jemāer ilo āne jamaden.
Nipai ekar ba rejjab maron̄ jepļaak ilo an jab tōprak pileij brass ko. Ekar ba n̄an ļōm̧aro jein bwe en ļapļo̧k aer tōmak ilo Irooj im renaaj maron̄ bōk pileij brass ko.
Nipai im ļōm̧aro jein rekar etal n̄an m̧weo mweer m̧okta ilo Jerusalem im aini gold im jelba ko aer bwe ren jeniji n̄an pileij ko.
Rekar kwaļo̧k n̄an Leban m̧weie ko aer im rekar leļo̧k n̄an jenij kaki n̄an pileij ko. Ke Leban ej lo gold im jelba ko aer, ekar kōņaan bōki bwe en an im jonamōjļo̧ki.
Leban ekar ba n̄an em̧m̧aan ro an n̄an m̧an ļōmaro nejin Liai. Nipai im ļōm̧aro jein rekar ko im tilekeek ilo juon ron̄. Leban ekar dāpij gold im jelba ko aer.
Leman im Lemuel rekar illu ippān Nipai. Rekar den̄ļo̧ke Nipai im Sam kōn juon aļaļ.
Juon enjeļ ekar waļo̧k im ba n̄an Leman im Lemuel bwe ren bōjrak. Ekar ba Irooj enaaj jipan̄ er bōk pileij brass ko. Ekar barāinwōt ba n̄an Nipai bwe enaaj erom̧ juon ritōl ioon ļōm̧aro jein.
Nipai ekar ba n̄an ļōm̧aro jein bwe ren tōmak ilo Irooj im jab mijak kōn Leban im em̧m̧aan ro an. Nipai ekar rōjan̄ ļōm̧aro jein bwe ren jepļaak n̄an Jerusalem.
Bon̄ōn eo ļōm̧aro jein Nipai rekar tilekeek nabōj in wōrwōr eo an jikin eo ke Nipai ej deļo̧n̄ļo̧k. Ekar etal n̄an m̧weo imōn Leban.
Ke Nipai ej epaakeļo̧k m̧weo imōn Leban, ekar lo juon em̧m̧aan ekar tab kar babu laļ. Ekar Leban.
Nipai ekar lo jāje eo an Leban im bōke. Jetōb Kwojarjar ekar ba n̄an Nipai bwe en m̧an Leban, ak Nipai ekar jab kōņaan m̧an e.
Jetōb Kwojarjar ekar bar ba n̄an Nipai n̄an m̧an Leban bwe Nipai en maron̄ bōk pileij brass ko. Baam̧le eo an Liai rekar aikuji pileij ko bwe ren maron̄ ekkatak gospel eo.
Nipai ekar pokake Jetōb Kwojarjar im ekar m̧an Leban. Innem Nipai ekar kaņōk nuknuk ko an Leban im kein tariņae ko an.
Nipai ekar etal n̄an imōn Leban im ekar ioon Zoram, karejaran Leban. Reitokin im ainikien Nipai ekar āinwōt Leban.
Ekar ba n̄an Zoram bwe en bōktok pileij brass ko. Zoram ekar ļōmņak bwe Nipai ke Leban, kōn menin ekar leļo̧k n̄an e pileij brass ko. Nipai ekar ba n̄an Zoram bwe en ļoor e.
Leman, Lemuel, im Sam rekar lo an Nipai itok im rekar mijak; rekar ļōmņak Leban eo. Rekar jino ko ak rekar bōjrak ke Nipai ej kūr er.
Innem Zoram ekar kile Nipai ejjab Leban, im ekar kajjieon̄ ko. Nipai ekar jibwe Zoram im ekar kallim̧uri bwe eban m̧an e eļan̄n̄e enaaj etal ippān Nipai n̄an āne jamaden.
Zoram ekar errā. Nipai im ļōm̧aro jein rekar bōk Zoram im pileij brass ko im jepļaak n̄an ippān Liai im Saraia.
Rekar leļo̧k pileij brass ko n̄an Liai. E im Saraia rekar m̧ōņōņō kōn ļōmaro nejier bwe em̧ōj kōjparok er. Rekar lan̄lōn̄ im kam̧m̧oolol Anij.
Liai ej riit jān pileij brass ko. Rekar kwaļo̧k kōn Adam im Iv im kōn Kōm̧anm̧an eo an Laļ. Epād ie naan ko an elōn̄ rikanaan ro.
Liai im Nipai rekar m̧ōņōņō kōnke rekar pokake Irooj im rekar maron̄ bōk pileij brass ko.
Baam̧le eo an Liai rekar bōk pileij brass ko ippāer ilo iaļ eo aer ļo̧k bwe ren maron̄ kar katakin ajri ro nejier kien ko me em̧ōj jei ilo pileij ko.