Jebta 17

Alma im Armej ro An rej Ko

Juon raan ke armej ro an Alma rej jerbal ilo jikin kallib ko, juon jarin tariņae an Rileman ro rej deļo̧n̄eļo̧k āne eo āneer.

Mosaia 23:25

Rinipai ro rekar mijak im ko jān jikin eo bwe ren jokņe. Alma ekar jiron̄ er bwe ren keememej Anij im enaaj jipan̄ er. Rinipai ro rekar jino jar.

Mosaia 23:26–28

Irooj ekar kamed buruōn Rileman ro, im rekar jab m̧an Rinipai ro. Rileman ro rekar jino jebwābwe ke rej kajeon̄ kappukōt armej ro an Kiin̄ Limai.

Mosaia 23:29–30

Rileman ro rekar kallim̧uri Alma bwe reban kabōņōņōiki armej ro an eļan̄n̄e enaaj kwaļo̧k n̄an er ekōjkan aer bar jepļaak n̄an āneo āneer. Alma ekar kwaļo̧k n̄an er iaļ eo.

Mosaia 23:36

Ak Rileman ro rekar jab kōjparok kallim̧ur eo aer. Rej likūt riwaj ro ipeļaakin āne eo, im Alma im armej ro an rekar jab bar anemkwōj.

Mosaia 23:37

Kiin̄ eo an Rileman eo ekar kōm̧m̧an bwe Amulōn en ritōl n̄an armej ro an Alma. Amulōn ekar juon Rinipai im ekar juon pris enana an Kiin̄ Noa.

Mosaia 23:39; 24:8–9

Amulōn ekar kōm̧m̧an bwe armej ro an Alma ren lukkuun buuļ jerbal. Rekar jar kōn jipan̄, ak Amulōn ekar ba jabdewōt eo renej lo an jar renaaj m̧ane. Armej ro rekar wōnm̧aanļo̧k wōt im jar ilo būruōer.

Mosaia 24:10–12

Anij ekar ron̄ jar ko aer im ekar kōkajoorļo̧k armej ro an bwe jerbal ko aer ren meraļo̧k. Armej ro rekar lukkuun m̧ōņōņō im kōmaanwa.

Mosaia 24:14–15

Anij ekar bun̄ buruōn bwe armej ro rekar tōmak wōt. Ekar jiron̄ļo̧k er bwe enaaj jipan̄ er ko jān Rileman ro.

Mosaia 24:16–17

Ilo bon̄ armej ro rekar kepooji m̧ōn̄ā ko kijeer im menin mour ko nejier. Jibbon̄ōn eo tok juon Anij ekar kōm̧m̧an bwe Rileman ro ren kiki wōt ilo an Alma im armej ro an rej ko jān jikin eo.

Mosaia 24:18–20

Ālkin aer ito itak iumin 12 raan ko, armej ro rekar itaakļo̧k Zaraemla, ijo Kiin̄ Mosaia im armej ro an rekar karuwaineneik er.

Mosaia 24:25