Jebta 28

Rizoram ro im Rameumptōm

Rizoram ro rekar m̧ōttan Kabun̄ eo an Anij ak rekar jino aer nana im rekar kabun̄ n̄an ekjab ko.

Alma 31:1, 8–9

Rileman rekar kōņaan bōbrae Rizoram ro jān aer kobaļo̧k ippān Rileman ro, kōn menin Alma ekar etal ippān mijenede ro jet n̄an kwaļo̧k naan an Anij n̄an Rizoram ro.

Alma 31:4, 11

Mijenede rein rekar bwilōn̄ im illu kōn wāween an Rizoram ro kar kabun̄ jar ilo m̧ōņjar ko aer, kar ņae etaer m̧ōn kweiļo̧k ko.

Alma 31:12

Ilo ioļapļap in m̧ōnjar eo, Rizoram ro rekar kaļōk juon jikin jutak eutiej etan Rameumptōm. Ekar wōr juon jikin wōt n̄an juon armej n̄an jutak ilōn̄ tata.

Alma 31:13, 21

Rizoram ro rej juon ļo̧k juon n̄an jutak ijeņ, rej erļo̧kwe lōn̄ļo̧k peier n̄an lan̄ im jar juon wōt jar ilo juon ainikien ellaaj.

Alma 31:14, 20

Ilo jar in, Rizoram ro raar ba ejjeļo̧k ānbwinin Anij; e ej jetōb wōt Rekar bar ba enaaj kar ejjeļo̧k juon Kraist.

Alma 31:15–16

Rizoram ro rej ļōmņak Anij ekar kāālōt wōt er bwe ren mour ilo aelōn̄ in kiin̄ an lan̄. Rekar leļo̧k kam̧m̧oolol kōnke rej ļōmņak rekar armej ro rem̧m̧an tata ippān Anij.

Alma 31:17–18

Ālkin an Rizoram ro kajjojo kar jar, rekar rool n̄an m̧ōko mōer im rekar jab bar jar ak kōnono kōn Anij ilowaan juon wiik.

Alma 31:12, 23

Rizoram ro remweie rekar iakwe gold im jelba, im rekar kōmjāje kōn menin aorōk ko aer. Alma ekar buromōj in loe jon̄an aer nana.

Alma 31:24–25

Alma ekar jar kōn e im mijenede ro an bwe en wōr aer kajoor, kaeņōm̧m̧an, im jeram̧m̧an ilo jerbal ko aer.

Alma 31:26, 32–33

Ālkin aer kajjitōk jipan̄ n̄an bar karool tok Rizoram ro n̄an m̧ool, Alma im mijenede ro jet rekar obrak kōn Jetōb Kwojarjar.

Alma 31:34–36

Innem mijenede ro rej jepelļo̧k ilo iaļ ko aer n̄an kwaļo̧k naan. Anij ekar kōjeraam̧m̧an er kōn m̧ōn̄ā im nuknuk im kōkajoor er ilo jerbal ko aer.

Alma 31:37–38

Rizoram ro me rekar jeramōl rekar jab maron̄ deļo̧n̄e imōn jar ko. Armej rein rekar jino aer ron̄jake mijenede ro.

Alma 32:2–3

Elōn̄ rekar kajjitōkin Alma ta eo rej aikuj kōm̧m̧ane. Alma ekar jiron̄ er rejjab aikuj pād ilowaan juon mōnjar n̄an jar im kabun̄ n̄an Anij.

Alma 32:5, 10–11

Ekar jiron̄ er bwe en wōr aer tōmak ilo Anij. Innem Amulek ekar katakin er kōn Jisōs Kraist im kōn karōk eo an Anij n̄an ajri ro nejin.

Alma 32:17–21; 34:8–9

Mijenede ro rekar em̧akūt, im Rizoram ro me rekar tōmak er rekar kadiwōjļo̧k er jān jikin eo. Ro rej tōmak rekar etal im jokwe ilo āne Jerson ippān armej ro an Ammōn.

Alma 35:1–2, 6

Men̄e Rizoram ro renana rekar kamijak armej ro an Ammōn, armej ro an Ammōn rekar jipan̄ Rizoram ro rem̧m̧an im leļo̧k kijeer m̧ōn̄ā, nuknuk, im āneer.

Alma 35:8–9