Jebta 6
Ettōņak eo an Liai
Liai ekar ba n̄an baam̧le eo an kōn juon visōn eaorōk ekar lo ilo juon ettōņak. Ettōņak eo an Liai ekar kam̧ōņōņōik Nipai im Sam ak ekar kaburomōj Leman im Lemuel.
Ilo ettōņak eo an ekar lo juon em̧m̧aan ej kaņōk juon liboror mouj eo ej ba n̄an Liai bwen ļoor e. Liai ekar ļoore em̧m̧aan eo ilo juon āne jem̧aden emarok im ekabūrom̧ōjm̧ōj.
Ālkin aer itok itak ilo marok ium̧win elōn̄ awa ko, Liai ekar jar im kajjitōk kōn jipan̄.
Innem ekar lo juon wōjke im leen emouj. Leen in etōn̄al ekar kōm̧m̧an bwe ro rej m̧ōn̄aik ren m̧ōņōņō.
Liai ekar m̧ōn̄ā leen eo, im ekar obrak kōn lan̄lōn̄. Eaar kōņaan bwe baam̧le eo an en edjon̄e leen eo kōnke rekar jeļā enaaj kar barāinwōt kam̧ōņōņōik er.
Liai ekar lo juon reba eo ej toorļo̧k turin juon wōjke. Ilo jem̧ļo̧kin reba eo ekar lo Saraia, Sam, im Nipai.
Liai ekar lamōjļo̧k n̄an ippān kōrā eo pāleen im ļōmaro nejin bwe ren itok im edjon̄e leen wōjke eo. Saraia, Sam, im Nipai rekar etal im edjon̄e leen wōjke eo, ak Leman im Lemuel rekar makoko.
Liai ekar bar lo juon aen in dāpdep im juon iaļ ejim̧we im eaidik eo ej tōlļo̧k n̄an wōjke eo.
Ekar lo elōn̄ armej ro rej etetalļo̧k n̄an iaļ eo. Kōnke juon marok jilōn̄lōn̄, jet raar jebwābwe jān iaļ eo im jakoļo̧k.
Ro jet rekar jirok likatōttōt ilo aen in dāpdep eo im eļļā jān marok eo n̄an wōjke eo. Rekar edjon̄e leen wōjke eo.
Armej ro ilo em̧ kileplep eo ilo turājet in reba eo rekar kajirere kōn ro me rej m̧ōn̄ā leen wōjke eo. Jet ro me rekar m̧ōn̄ā leen wōjke eo rekar jino jook im etal jān wōjke eo.
Liai ekar lo elōn̄ armej ro ilo ettōņak eo an. Jet rekar jirok likatōttōt ilo aen in dāpdep eo im dipļo̧ke marok eo n̄an wōjke eo. Rekar edjon̄e leen wōjke eo. Ro jet rekar etal n̄an m̧weo eļap ak wōtļo̧k ilo reba eo ak jino jōbwābwe. Leman im Lemuel rekar jab m̧ōn̄ā leen wōjke eo. Liai ekar buromōj kōn er im ekar kajeon̄ jipan̄ er pokake kien ko an Anij.