Jebta 21
Riamlijai ro
Amlijai ekar juon em̧m̧aan emālōtlōt im enana eo me ekar kōņaan bwe en erom̧ kiin̄ an Rinipai ro. Ekar bwijin rikaļooran.
Rinipai ro rem̧m̧an rekar jab kōņaan bwe Amlijai en aer kiin̄. Rekar jeļā ke ekōņaan kakkure Kabun̄ eo an Anij.
Rinipai ro rekar kuk ippān doon ilo elōn̄ kurup ko n̄an kāālōt eļan̄n̄e Amlijai ej aikuj erom̧ juon aer kiin̄. Elōn̄ iaan armej ro rekar jab kōņaan, im ear jab erom kiin̄.
Amlijai im rikaļooran rekar jino illu. Rekar etal jān Rinipai ro, im rekar kōm̧m̧an bwe Amlijai en aer kiin̄, im rekar ņa etaer Riamlijai. Amlijai ekar ba ren tariņaeik Rinipai ro.
Rinipai ro rem̧m̧an rekar m̧aanjabpopo im jojomare er make kōn libbon̄, m̧ade, jāje, im kein tariņae ko jet.
Riamlijai ro rekar jodik, im Rinipai ro, ro rekar bōk tōl jān Alma im bōk kajoor jān Irooj, rekar m̧an elōn̄ iaer. Aolepān Riamlijai ro jet rekar ko.
Alma ekar jilkinļo̧k riaron̄ron̄ ro bwe ren waje Riamlijai ro. Riaron̄ron̄ ro rekar lo aer kobaļo̧k ippān juon jarin tariņae an Rileman ro im jodiki Rinipai ro me rej jokwe epaakeļo̧k Zaraemla
Rinipai ro rekar jar, im Anij ekar bar jipan̄ er. Rekar m̧an elōn̄ iaan ritariņae ro an Rileman Riamlijai ro.
Alma im Amlijai rekar tariņaeiki doon kōn jāje ko. Alma ekar jar bwe en jab mej, im Anij ekar leļo̧k n̄an e kajoor bwe en m̧an Amlijai.
Rinipai ro rekar likwarkware Rileman ro im Riamlijai ro n̄an āne jam̧aden. Elōn̄ ro rekar ikinejnej rekar mej ijo im menin mour ko rekar kan̄ er.
Āinwōt Rileman ro, Riamlijai ro rekar kōkaļļeik er make kōn būrōrō, eo me ekar kakūrm̧ool juon kanaan. Riamlijai ro rekar kōjeņoļo̧k er make jān kōjeram̧m̧an ko an gospel eo.