Jebta 14
Abinedai im Kiin̄ Noa
Zeniff ekar juon kiin̄ ejim̧we an juon kumi in Rinipai ro. Ke ej bwijwōļāļo̧k, ļeo nejin ekar erom juon kiin̄.
Noa ekar jab juon kiin̄ em̧m̧an āinwōt jemān. Ekar nana im ekar jab kōņaan pokake kien ko an Anij.
Ekar kipel armej ro an bwe ren leļo̧k grain ko aer, mennin mour ko, gold, im jelba.
Kiin̄ Noa ekar kōm̧m̧ane menin kōnke ekar lukkun jowan. Ekar kōm̧m̧an bwe Rinipai ro ren leļo̧k n̄an e aolep men ko ekar aikuji.
Ekar joļo̧k pris ro rem̧m̧an me jemān ekar kapit er im likūt pris ro renana. Pris rein renana rekar katakin armej ro bwe ren jerawiwi.
Kiin̄ Noa ekar kōm̧m̧an elōn̄ em̧ ko raibojooj, ekoba juon mōn kileplep ippān juon tūroon. Em̧ kein rekar kainōknōki kōn gold, jelba, im alal ko reļļap wōņeer.
Kiin̄ Noa ekar iakwe m̧weie ko an me ekar bōki jān armej ro an. E im pris ro an rekar joļo̧k iien ko aer kōn kadōk im kōm̧m̧ani men ko renana.
Anij ekar jilkinļo̧k juon rikanaan etan Abinedai n̄an armej ro an Noa. Abinedai ekar kakkōļ er bwe eļan̄n̄e rejjab ukweļo̧k, renaaj erom rikamakoko ro an Rileman ro.
Ke Kiin̄ Noa ekar ron̄ ta eo Abinedai ekar ba, ekar illu. Ekar jilkinļo̧k em̧m̧aan ro n̄an bōktok Abinedai n̄an mweo imōn eļap bwe en maron̄ m̧an e.
Rekar bōkļo̧k Abinedai n̄an kiin̄ eo. Kiin̄ Noa im pris ro an rekar kajjitōk elōn̄ kajjitōk ko. Rekar kajjieon̄ in aujidi e n̄an kwaļo̧k jet uwaak ko rebōd.
Abinedai ekar jab mijak in uwaake aolep kajjitōk ko aer. Ekar jeļā bwe Anij enaaj jipan̄ e. Pris ro rekar bwilōn̄ kōn uwaak ko an Abinedai.
Kiin̄ Noa ekar illu im ekar ba n̄an pris ro an bwe ren m̧an Abinedai. Abinedai ekar ba eļan̄n̄e renaaj jibwe e, Anij enaaj m̧an er.
Jetōb Kwojarjar ekar lo̧mo̧o̧ren Abinedai bwe en maron̄ kadedeikļo̧k an ba naan ko me Irooj ekar kōņaan bwe en kwaļo̧ki. Turin mejān Abinedai ekar eromaakļo̧k. Pris ro rekar mijak in jibwe e.
Kōnono kōn kajoor jān Anij, Abinedai ekar jiron̄ armej ro kōn nana ko aer. Ekar riiti kien ko an Anij n̄an er.
Ekar jiron̄ er bwe Jisōs Kraist enaaj ļōtaktok n̄an laļ in. Jisōs enaaj kōm̧m̧an bwe armej ro ren maron̄ ukweļo̧k, bar jerkakpeje, im mour ippān Anij.
Abinedai ekar jiron̄ armej ro bwe ren ukweļo̧k im tōmak Jisōs Kraist n̄e jaab ban lo̧mo̧o̧ren er.
Kiin̄ Noa im aolep ijjeļo̧kin wōt juon iaan pris ro an rekar makoko in tōmak Abinedai. Noa ekar jiron̄ pris ro bwe ren m̧an Abinedai. Rekar lukwōje im joļo̧k e ilo kalbuuj.
Juon pris eo ekar tōmake Abinedai kar etan Alma. Ekar kajjitōk ippān Kiin̄ Noa bwe en kōtļo̧k Abinedai.
Kiin̄ eo ekar lukkun illu ippān Alma im ba ren jonabōjļo̧k. Innem ekar jilkinļo̧k rijerbal ro an bwe ren m̧an e. Alma ekar ko im tileekek, im rijerbal ro raar jab loe.
Ālkin an kar pād ilo kalbuuj iumin jilu raan, rekar bar bōktok Abinedai n̄an im̧aan mejān Kiin̄ Noa. Kiin̄ eo ekar jiron̄ļo̧k Abinedai bwe en kariab naan ko ekar ba ņae e im armej ro an.
Kiin̄ Noa ekar jiron̄ Abinedai bwe eļan̄n̄e ejjab kariab aolep men ko ekar ba innem, renaaj m̧an e.
Abinedai ekar jeļā ke ekar kōnono m̧ool eo. Ekar kōņaan mej ijjeļo̧kin an kariab ta eo Anij ekar jilkinļo̧k e bwe en kwaļo̧k.
Kiin̄ Noa ekar ba n̄an pris ro an bwe ren m̧an Abinedai. Rekar lukwōj e, den̄ļo̧ke, im tile n̄an mej. M̧okta jān an kar mej, Abinedai ekar jiron̄ļo̧k Kiin̄ Noa bwe enaaj bar mej ilo kijeek.
Jet iaan Rinipai ro rekar jum̧ae Kiin̄ Noa im rekar kajeon̄ m̧an e. Ritariņae ro an Rileman ro rekar bar itok bwe ren tariņae ņae kiin̄ eo im rikaļooran.
Kiin̄ eo im ro rikaļooran rekar ko jān Rileman ro, ak Rileman ro rekar jibwe er im kar m̧an er. Kiin̄ eo ekar jiron̄ļo̧k em̧m̧an ro bwe ren etal jān baam̧le ko aer im ko wōt.
Elōn̄ iaan em̧m̧aan ro rekar jab ko. Rekar po ippān Rileman ro.
Elōn̄ iaan em̧m̧aan ro ro me rekar ko ippān Kiin̄ Noa rekar buromōj. Rekar kōņaan bwe ren bar rool likļo̧k im jipan̄ kōrā ro pāleer im ajri ro nejier im armej ro aer.
Kiin̄ Noa ekar jab kōņaan bwe em̧m̧aan ro ren jepļaak n̄an baam̧le ko aer. Ekar ba n̄an er bwe ren pād wōt ippān.
Em̧m̧aan ro rekar illu ippān Kiin̄ Noa. Rekar tile e n̄an mej, āinwōt an kar Abinedai kar kanaan kake. Innem rekar bar jepļaak n̄an baam̧le ko aer.