Jebta 12
Kiin̄ Benjamin
Kiin̄ Benjamin ekar juon kiin̄ em̧m̧an an Rinipai ro. Kōn jipan̄ an em̧m̧aan ro jet rejim̧we, ekar bōktok aeņōm̧m̧an n̄an āne eo.
Kiin̄ Benjamin ekar bwijwōļāļo̧k im ekar kōņaan kōnono n̄an armej ro an. Ekar aikuj ba n̄an er bwe ļeo nejin Mosaia enaaj erom kiin̄.
Armej ro rekar itok jān aolepān āne eo im rekar koba ippān doon iturin tampeļ eo. Rekar kajitļo̧k kōjem̧ in im̧ōn kōppad ko aer n̄an tampeļ eo.
Kiin̄ Benjamin ej kōnono jān juon tawōr bwe Rinipai ro ren maron̄ ron̄ ainikien.
Ekar ba n̄an armej ro an bwe ekar kajeon̄ jon̄an an maron̄ bwe en jipan̄ er. Ekar ba bwe wāween ad jerbal n̄an Anij ej ilo ad jerbal n̄an ro jet.
Kiin̄ Benjamin ekar ba n̄an armej ro bwe ren pokake kien ko an Anij. Ro me rekar lukkuun tiljek ilo kōjparok kien ko renaaj m̧ōņōņō im juon raan renaaj mour ippān Anij.
Kiin̄ Benjamin ekar ba Jisōs Kraist ejjab to enaaj ļōtak ioon laļ in. Etan Jinen naaj kar Meri.
Jisōs enaaj kōm̧m̧ani menin bwilōn̄ ko. Enaaj kōmour rinan̄inmej im kōjerkak ro remej. Enaaj kōm̧m̧an bwe ribilo ren loļo̧kjeņ im rijaron̄ron̄ ren ron̄ļo̧kjeņ.
Jisōs enaaj kar en̄taan im mej kōn jerawiwi ko an aolep armej. Ro rekar ukweļo̧k im ewōr aer tōmak ilo Jisōs naaj jeorļo̧k jerawiwi ko aer.
Kiin̄ Benjamin ekar ba n̄an rinipai ro bwe em̧m̧aan ro renana renaaj den̄ļo̧ke Jisōs. Innem renaaj debwāāle.
Ālkin jilu raan ko Jisōs enaaj kar jerkakpeje.
Ālkin an Kiin̄ Benjamin kar kōnono, Rinipai ro rekar okjak laļļo̧k n̄an laļ. Rekar būromōj kōn jerawiwi ko aer im rekar kōņaan ukweļo̧k.
Armej ro ekar wōr aer tōmak ilo Jisōs Kraist, im rekar jar n̄an jeorļo̧k bōd.
Jetōb Kwojarjar ekar kobrak buruōer. Rekar jeļā bwe Anij ekar jeorļo̧k aer bōd im bwe ej iakwe er. Rekar en̄jake aeņōm̧m̧an im lan̄lōn̄.
Kiin̄ Benjamin ekar ba n̄an armej ro an bwe ren tōmak ilo Anij. Ekar kōņaan bwe ren jeļā ke Anij ekar kōm̧anm̧an men otemjej im bwe e mālōtlōt im kajoor.
Kiin̄ Benjamin ekar ba n̄an armej ro bwe ren ettā im jar aolep raan. Ekar kōņaan bwe armej ro an ren keememej Anij iien otemjej im mour tiljek.
Ekar ba n̄an ro jinen im jemen bwe ren jab kōtļo̧k an ajri ro nejier ire ak akwāāl.
Ekar ba n̄an er bwe ren katakin ajri ro nejier n̄an pokake im iakwe im jerbal n̄an ro jet.
Ekar kakkōļ armej ro bwe ren mejmejkaruo kōn ta ko rej ļōmņaki, ba, im kōm̧m̧ani. Rekar tiljek im kōjparok kien ko ilo aolepān mour ko aer.
Kiin̄ Benjamin ekar kajjitōk ippān armej ro eļan̄n̄e rekar tōmak ilo katak ko an. Rekar aolep ba bwe rej tōmak. Jetōb Kwojarjar ekar ukōt er, im rekar jab bar kōņaan jerawiwi.
Rekar aolep bujen, ak kaliim̧ur, n̄an kōjparok kien ko an Anij. Kiin̄ Benjamin ekar bun̄ buruōn.
Kiin̄ Benjamin ekar leļo̧k ļaddik eo nejin etan Mosaia jim̧we eo bwe en erom kiin̄ eo ekāāl. Jilu iiō tokālik Kiin̄ Benjamin ekar mej.
Mosaia ekar juon kiin̄ ejim̧we. Ekar buuļ jerbal im jipan̄ armej ro an, āinwōt kar jemān.