Jebta 15
Alma ej Katakin im ej Kōpeptaij
Alma ej ko jān rijerbal ro an Kiin̄ Noa im kitileek ium̧win elōn̄ raan ko. Ke ej tilekeek, ekar je ta eo rikanaan Abinedai ekar katakin.
Alma ekar ukweļo̧k jān jerawiwi ko an im ekar etal n̄an ippān Rinipai ro ilo ittino, katakin er enaan ko an Abinedai. Alma ekar jiron̄ armej ro bwe ren tōmak ilo Jisōs Kraist im ukweļo̧k.
Ilo raan eo Alma ekar kitileek ilo wōjke ko reddik me epaake juon ļe kar etan Dān ko an Mormon.
Ro rekar tōmake katak ko an Alma rekar deļo̧n̄e Dān ko an Mormon im rekar peptaij. Alma ekar peptaiji 204 armej ro n̄an Kabun̄ eo an Kraist.
Alma ej kapit pris ro n̄an katakin armej ro. Ekar jiron̄ pris ro bwe ren ukweļo̧k im tōmak ilo Jisōs Kraist. Ekar bar jiron̄ er bwe rej aikuj jab akwāāl ak ren juon wōt.
Armej ro an Alma rekar iakwe doon im jipan̄ doon. Rekar ajeej aolep men ko aer im rekar kam̧m̧oolol bwe rekar maron̄ ekkatak kōn Jisōs Kraist, aer Ripinmuur.
Rijerbal ro an Kiin̄ Noa rekar lo an Alma katakin armej ro. Kiin̄ eo ekar ba Alma ekar ukōt Rinipai ro ņae e, kōn menin ekar jilkinļo̧k juon jar in tariņae bwe ren m̧an er.
Anij ekar kakkōļ Alma bwe jarin tariņae eo an Kiin̄ Noa ej itok. Armej ro rekar kobaik baam̧le ko aer, menin mour ko, im m̧weik ko jet aer im ko n̄an āne jamaden.
Anij ekar kōkajoorļo̧k armej ro an Alma bwe ren maron̄ ko jān jarin tariņae eo an Kiin̄ Noa. Jarin tariņae eo ekar kappukōt er ak rekar jab lo er.
Ālkin aer ito itak ilo āne jamaden iumin rualitōk raan ko, armej ro an Alma rekar itok n̄an juon jikin aibojooj me ewōr dān erreo ie eo ej toorļo̧k. Ijin rekar ekkat keinnikan ie im kalōk im̧ōko.
Armej ro rekar kōņaan bwe Alma en erom̧ juon aer kiin̄, ak Alma ekar ba Anij ejjab kōņaan bwe en kiin̄ n̄an er. Anij ekar kōņaan bwe ren anemkwōj.