Jepta 1: Ewi Wāween Ad Kar Bōk Bok in Mormon

Ke Josep Smith ekar 14 an iiō, elōn̄ kabun̄ ko rekar watōke er ke rem̧ool, im ekar jab jeļā ewi wōt eo en kobaļo̧k ie.

Juon raan Josep ekar riiti Jemes 1:5 ilo Baibōl eo: “Eļan̄n̄e jabdewōt iaami ej aikuj mālōtlōt en kajjitōk kōn e ippān Anij.” Josep ekar aikuj jeļā ewi wōt kabun̄ eo em̧ool, kōn menin ekar kāālōt n̄an kajjitōk ippān Anij.

Josep Smith—Bwebwenato 1:11–13

Ilo juon jibbon̄ōn spring Josep ekar etal n̄an wōjke ko epaakeļo̧k m̧weo imōn bwen jar.

Josep Smith—Bwebwenato 1:14

Ke ej bukwelōlō im jino jar, Setan ekar kajjieon̄ kabōjrake. Josep ekar lukkuun jar, kajjitōk ippān Jemedwōj Ilan̄ bwen jipan̄.

Josep Smith—Bwebwenato 1:15–16

Jemedwōj Ilan̄ im Jisōs Kraist rekar waļo̧k n̄an Josep ilo juon jurōn meram. Jemedwōj Ilan̄ ekar jitōn̄ļo̧k Jisōs im ba: “En̄in Nejū Jitōnbōro. Ron̄jake E!”

Josep Smith—Bwebwenato 1:16–17

Josep ekar kajjitōk ewi wōt kabun̄ in ej aikuj kobaļo̧k ie. Jisōs ekar ba n̄an e bwen jab kobaļo̧k ilo jabdewōt iaer kōnke aolepāer rebōd.

Josep Smith—Bwebwenato 1:18–19

Ke Josep ekar ba n̄an jet armej ta eo ekar lo im ron̄, rekar kajirere kake. Ritōl ro ilo elōn̄ iaan kabun̄ ko rekar matōrtōre.

Josep Smith—Bwebwenato 1:21–22

Jilu iiō ko tokālik. Juon bon̄ Josep ekar jar n̄an jeorļo̧k jerawiwi ko an im n̄an jeļā ta eo ej aikuj kōm̧m̧ane.

Lale Josep Smith—Bwebwenato 1:29

Juon enjeļ etan Moronai ekar waļo̧k im ba n̄an Josep kōn juon bok eo me em̧ōj jei ilo pileej gold ko. Josep ekar tin ukōti pileej kein n̄an kajin English.

Josep Smith—Bwebwenato 1:33–35

Ālkin an Moronai kar jakoļo̧k, Josep ekar ļōmņak kake ta eo Moronai ekar ba n̄an e. Moronai ekar bar jepļaaktok ruo alen bon̄ōn eo.

Josep Smith—Bwebwenato 1:44–47

Raan eo tok juon Josep ekar etal n̄an ioon bat Kumora, eo me ekar loe ilo juon visōn. Ijo ekar lo juon dōkā kileplep. Ekar kōbakaak dōkā eo kōn juon aļaļ.

Josep Smith—Bwebwenato 1:50–52

Ium̧win dōkā in ekar wōr juon bo̧o̧k kōm̧m̧an jān dōkā. Ke Josep ej lale lowaan bo̧o̧k in, ekar lo pileej gold ko.

Josep Smith—Bwebwenato 1:51–52

Moronai ekar waļo̧k im ba n̄an Josep bwen jab bōk pileej ko ak bwen jepļaak ilo ejja raan eo wōt kajjojo iiō ium̧win emān iiō. Kajjojo iien Josep ekar etal, Moronai ekar katakin e.

Josep Smith—Bwebwenato 1:53–54

Ālkin emān iiō, āliktata, kar kōtļo̧k Josep n̄an bōki pileej gold ko. Ekar kōjerbal Urim im Thummim eo n̄an ukōte jet iaer.

Josep Smith—Bwebwenato 1:59, 62

Rijeje ro rekar jipan̄ Josep ilo aer kar je naan ko me ej ukōti jān pileej gold ko.

Josep Smith—Bwebwenato 1:67

Josep ekar bōk naan ko me em̧ōj ukōti n̄an juon ribūriin im leļo̧k bwe ren kōm̧m̧ani n̄an erom̧ juon bok.

Bwebwenaton an Kabun̄ in 1:71

Bok in ej ņa etan Bok in Mormon. Ej kwaļo̧k kōn armej ro raar jukjuk im amņak ilo Amedka elōn̄ iiō ko rem̧ootļo̧k. Ej barāinwōt kwaļo̧k kōn Jisōs Kraist, eo Nejin Anij.

Kadkad in Bok in Mormon