Jebta 13
Zeniff
Zeniff im juon kumi in Rinipai ro raar em̧akūt jān m̧ōko mōer ilo Zaraemla im etal n̄an āneen Nipai, ijo Rinipai ro jet rekar jokwe ie.
Rekar lo Rileman ro rej jokwe ijeņ. Zeniff im ļōmaro emān m̧ōttan rekar etal n̄an jikin eo n̄an kōnono ippān kiin̄ eo. Rekar kajjitōk ippān Kiin̄ Leman eļan̄n̄e remaron̄ jokwe ilo āneen.
Kiin̄ Leman ekar ba remaron̄ bōk ruo iaan jikin ko an. Kiin̄ eo ekar kōņaan bwe ren jokwe ilo āneen bwe en maron̄ likūt er an rikamakoko.
Armej ro an Zeniff rekar kalōk m̧ōko m̧weer im rekar kōkm̧anm̧an wōrwōr ko ipeļaakin jikin ko aer. Rekar ekkat elōn̄ kain grain im menin eddōk ko. Ekar barāinwōt lōn̄ nejier mennin mour ko.
Kiin̄ Leman ekar ba n̄an armej ro an bwe Rinipai ro rej jino aer kajoorļo̧k. Ejjab to elōn̄ Rileman ro rekar likwarkware Rinipai ro im ko̧o̧ti mennin mour ko nejier im keinnikan ko aer.
Rinipai ro rej ko n̄an jikin eo an Nipai. Ijeņ em̧ōj an Zeniff kar kōpooj armej ro kōn libbon̄ im m̧ade ko, jāje ko, kein den̄den̄, im buwat ko. Rekar etal bwe ren tariņaeik Rileman ro.
M̧okta jān aer kar ire, Rinipai ro rekar jar, kajjitōk ippān Anij bwe en jipan̄. Anij ekar kōjeraam̧m̧an Rinipai ro kōn eļapļo̧k kajoor, im rekar anjo ioon Rilemen ro.
Ālkin pata eo Zeniff ekar likūt riwaj ro ipeļaakin jikin ko an Rinipai ro. Ekar kōņaan kōjparok armej ro an im menin mour ko nejier jān Rileman ro.
Rinipai ro rekar jokwe ilo aeņōm̧m̧an ium̧win elōn̄ iiō ko. Em̧m̧aan ro rekar jerbal ilo jikin kallib ko, im kōrā ro rekar keke im kōm̧m̧an nuknuk.
Kiin̄ Leman ekar mej im ļeo nejin ekar erom kiin̄. Kiin̄ in ekāāl ekar jilkinļo̧k jarin tariņae eo an n̄an tariņae ņae Rinipai ro.
Rinipai ro bar juon alen rej bōk kajoor jān Irooj. Rekar m̧an elōn̄ Rileman ro, im aolepāer rekar ko.