Visōn eo an Liai kōn wōjke in mour

Ettōņak eo an Liai, jān Steven Lloyd Neal

Jānwōde 13–19

1 Nipai 8–10

“Itok im m̧ōn̄ā Leen”

N̄an kobaļo̧k ilo am̧ lo eok make ilo visōn eo an Liai, kajjieon̄ kalimjōk ajri ro kwoj katakin er. Ewi wāween an visōn in iookļo̧k mour ko aer?

Je En̄jake ko rej Im̧we Eok

pija ej bōk jikin kwaļo̧k

Kajjitōk n̄an Kwaļo̧k

Kōnono ippān jejjo ajri m̧okta kadede im kajjitōk ippāer n̄an ļōmņak kōn en̄jake ko aer ak eoon ko me remaron̄ kwaļo̧ki me ekar jipan̄ er en̄jake iakwe eo an Anij.

pija ej bōk jikin katakin

Katakin Katak in: Ajro ro Redikļo̧k

1 Nipai 8:2, 5–34

Naan eo an Anij ej tōl eō n̄an Anij im ej jipan̄ eō en̄jake iakwe eo An.

Ilo visōn eo an Liai, em̧ōj karuwaineneik kōj n̄an en̄jake iakwe eo an Anij, kōkkaļļein wōjke eo im leen. Ewi wāween jemaron̄ jipan̄ ajri ro rej bōk kūr in?

Makūtkūt ko me Remaron̄ Bōk Jikier

• Kajjitōk ippān ajri ro n̄an jipan̄ eok kwaļo̧k bwebwenato in visōn eo an Liai jān 1 Nipai 8:10–34. N̄an jipan̄ er loļo̧kjeņ kōn bwebwenato in, komaron̄ kwaļo̧k juon pija in visōn eo an Liai, (lale unin tōl eo an wiik in ilo Itok, Ļoor Eō—N̄an Kajjojo im Baam̧le ko) ak pija ko ilo “Jebta 6: Ettōņak eo an Liai” (Bwebwenato ko ilo Bok in Mormon, 18–20, ak pijaan alooj eo ekkar im jejjet ilo ChurchofJesusChrist.org). Lukkuun lale bwe ajri ro ren jeļā ke aen in dāpdep eo ej jutak kōn naan ko an Anij, eo me jej riiti ilo eoon ko im ron̄ jān rikanaan ro ad remour. Jipan̄ er meļeļe ke wōjke eo ej jutak kōn iakwe eo an Anij.

• Bōktok juon to killep n̄an bōk jikin aen in dāpdep eo ilo visōn eo an Liai. Kajjitōkin ajri ro n̄an dāpdep wōt ilo am̧ tōl er ipeļaakin ruum eo n̄an juon pija in juon wōjke. Jipan̄ er m̧eļeļe ke naan an Anij ej kepaakļo̧k kōj n̄an E, āinwōt an to in ekilep bōk jikin aen in dāpdep eo me ej tōl kōj n̄an wōjke eo. N̄an kwaļo̧k ke wōjke eo ej jutak kōn iakwe eo an Anij, komaron̄ kwaļo̧k juon pija in men ko me Anij ekar letok n̄an kōj me ej kwaļo̧k An iakwe kōj, āinwōt Rilo̧mo̧o̧r, baam̧le ko ad, im laļ eo eaibojooj.

• Bōktok jejjo leen wōjke ko ippān tok juon love ej ettoto ippān tok. Leļo̧k n̄an ajri ro leen n̄an edjon̄e im kajjitōkin er kōn leen wōjke ko ennotata ippāier. Kōmeļeļeiki ke leen ko ilo visōn eo an Liai ekar jet le ko relukkuun tōņal me ejkab kar edjon̄e, im ekar kobrak an kōn lan̄lōn̄. Āinwōt an leen ko retōn̄al kam̧ōņōņōiki eok, jenaaj em̧ōņōņō n̄e jej ļoor Jisōs im mour bar juon alen ippān Jemedwōj Ilan̄.

• Riiti 1 Nipai 8:12, im kajjitōk ippān ajri ro n̄an lukkuun ron̄jake kōn ta eo me Liai ekar kōņaan kōm̧m̧ane ālkin an kar edjon̄e leen eo. Kōtļo̧k bwe ajri ro ren bōk koņaer n̄an erom āinwōt n̄e er Liai im kūr tok ro jet n̄an edjon̄e leen eo. Ta eo jemaron̄ kōm̧m̧ane n̄an kūr ro jet n̄an itok im m̧ōņōņō kōn kōjeraam̧m̧an ko an gospel eo ippādwōj?

1 Nipai 10:17, 19

Anij ekar kwaļo̧k m̧ool eo n̄an eō kōn kajoor eo an Jetōb Kwojarjar.

Ālkin an ron̄ kōn visōn eo an Jemān, Nipai ekar wōr juon an ikdeleel bwe ej aikuj wōr ippād wōj aolep—ikdeleel eo n̄an jeļā m̧ool ippa make.

Makūtkūt ko Maron̄ Kōm̧m̧ani

• Riiti 1 Nipai 10:19, im kajjitōk ippān ajri ro n̄an kotak peier n̄e rej ron̄ naan in “erļo̧ki” im “Jetōb Kwojarjar.” Jipan̄ ajri ro meļeļe eoon in, eo me ej katakin bwe Jetōb Kwojarjar enaaj jipan̄ kōj jeļā uwaak ko n̄an kajjitōk ko ad. N̄an jipan̄ ajri ro loļo̧kjeņ kōn ta meļeļein ke m̧ool enaaj “erļo̧ki,” bōktok juon bōļan̄kōj em̧ōj limi ippān juon pija in Rilo̧mo̧o̧r ilowaan, im kajjitōk ippān ajri ro n̄an kōpelļo̧ke.

• Al juon al ippān ajri ro kōn kappukot m̧ool eo, āinwōt “Search, Ponder, and Pray” (Children’s Songbook, 109). Kwaļo̧k pija ko me rej kōmeļeļeik naan ko ilo al eo n̄an jipan̄ ajri ro keememej wāween an Jetōb Kwojarjar katakin kōj.

• Ļōmņak kōn am̧ kwaļo̧k juon en̄jake eo me Jetōb Kwojarjar ekar jipan̄ eok jeļā ke juon men ekar m̧ool. Ba n̄an ajri ro wāween an Jetōb Kwojarjar kōnono n̄an eok.

pija ej bōk jikin katakin

Katakin Katak eo: Ajri ro Rerūtto

1 Nipai 8:2, 5–34

Naan eo an Anij ej tōl eō n̄an Anij im ej jipan̄ eō en̄jake iakwe eo An.

Ilo an ajri ro ilo kūlaaj eo am̧ ekkatak kōn visōn eo an Liai, rōjan̄ er n̄an ekkatak naan ko an Anij im kwaļo̧k eo an Anij n̄an ro jet.

Makūtkūt ko Maron̄ Kōm̧m̧ani

• Ilo an ajri ro riiti eoon ko em̧ōj kāleti jān 1 Nipai 8, kajjitōk ippāer n̄an pukot meļeļe ko jān eoon kein ilo juon pija in visōn eo an Liai (āinwōt men eo juon ilo unin tōl eo an wiik in ilo Itok, Ļoor Eō—N̄an Kajjojo im Baam̧le ko). Ak kajjitōk ippāer n̄an jin̄n̄aiki ilo bo̧o̧t eo kōn meļeļe ko rekar riiti. Innām jipan̄ ajri ro kappukot ta ko kōkaļļe ko ilo ettōņak eo an rej bōk jikin (lale 1 Nipai 11:21–22; 12:16–18; 15:23–33, 36).

• N̄e emaron̄, bōktok juon m̧ōttan aen ak jet metōļ n̄an kūlaaj eo im kajjitōk ippān ajri ro n̄an kōmeļeļeiki tokjen im men ko me emaron̄ jerbal n̄an e. Ewi wāween an naan ko an Anij āinwōt juon aen in dāpdep? Ia eo jemaron̄ lo naan an Anij? Etke aen in dāpdep eo elukkuun aorōk ilo visōn eo an Liai?

  Liai ej m̧ōn̄ā leen wōjke in mour eo

  Liai ej m̧ōn̄ā leen wōjke in mour eo. Wōjke in Mour, jān Marcus Alan Vincent

• Kajjitōk ippān ajri ro n̄an je ilo juon m̧ōttan peba en̄jake eo aer kōn an naan in Anij kar jipan̄ er jeļā ta eo rej aikuj kōm̧m̧ane ak kar jipan̄ er epaakeļo̧k Jemedwōj Ilan̄. Ilo aer kwaļo̧k ta eo rej je, karuwaineneik er n̄an limi pepa eo n̄an kōm̧m̧ane āinwōt jekjekin juon aen. Komaron̄ tāāpe “aen ko” an ajri ro ippān doon āinwōt juon aen in dāpdep ilo ettōņak eo an Liai.

• Kajjitōk ippān ajri ro n̄an riiti 1 Nipai 8:10–12 im kōmeļeļeiki ta eo Liai ekar loe. Kajjitōk ippān ro jet n̄an riiti 1 Nipai 11:20–23 im kōmeļeļe ta eo Nipai ekar loe. Etke enjeļ eo ekar kwaļo̧k n̄an Nipai nin̄nin̄ Jisōs n̄an katakin e kōn iakwe eo an Anij? N̄an jipan̄ uwaake kajjitōk in, riit ippān doon Jon 3:16 ak al ippān doon juon al kōn Rilo̧mo̧o̧r, āinwōt “He Sent His Son” (Children’s Songbook, 34–35). Ba n̄an ajri ro wāween am̧ kar en̄jake iakwe eo an Jemedwōj Ilan̄ im eo Nejin Jisōs Kraist ilo mour eo am̧.

• Je ilo bo̧o̧t eo: Ta eo jej ekkatak jān waanjon̄ak eo an Liai? Kajjitōk ippān ajri ro n̄an ļōmņak kōn visōn eo an Liai im je uwaak ko jon̄an wōt eo remaron̄e. Kajjitōk ippāer n̄an kwaļo̧k uwaak ko aer ilo kūlaaj eo. Innām kajjitōk ippān ajri ro n̄an ļōmņak kōn juon eo me remaron̄ kwaļo̧k m̧ōņōņō eo ej itok jān gospel eo.

1 Nipai 10:17–19; 11:1

Anij ekar kwaļo̧k m̧ool eo n̄an eō kōn kajoor eo an Jetōb Kwojarjar.

Eļan̄n̄e jej kajjitōk ippān Jemedwōj Ilan̄ ilo tōmak, m̧ool enaaj “erļo̧ki n̄an [kōj] kōn kajoor in Jetōb Kwojarjar” (1 Nipai 10:19). Ewi wāween komaron̄ jipan̄ ajri ro kwoj katakin er meļeļe m̧ool in?

Makūtkūt ko Maron̄ Kōm̧m̧ani

• Kajjitōk ippān ajri ro n̄an kōnono kōn wāween aer maron̄ lo uwaak ko n̄an juon kajjitōk. Rojan̄ ajri ro n̄an riiti 1 Nipai 10:17–19 im 11:1. Ta eo Nipai en kar ba eļan̄n̄e juon ekar kajjitōk ippān ewi wāween an lo uwaak ko n̄an juon kajjitōk kōn gospel eo? Ewi wāween an Anij katakin kōj jān Jetōb Kwojarjar? (lale K&B 8:2).

• Kajjitōk ippān ajri ro n̄an kōnono kōn juon iien eo me Jetōb Kwojarjar eo ekar jipan̄ er jeļā bwe juon men em̧ool. Kajjitōk ippāer n̄an ļōmņak n̄e en kar wōr juon m̧ōttāer eo me ej ļōmņak eban maron̄ bōk uwaak ko jān Jetōb Kwojarjar. Ta eo remaron̄ kwaļo̧k jān 1 Nipai 10:17–19 im 11:1 n̄an jipan̄ eo m̧ōttaer?

pija ej bōk jikin ekkatak

Kōketak Ekkatak ilo Mweo

Rōjan̄ ajri ro n̄an kōjerbal peij in makūtkūt ko an wiik in n̄an kwaļo̧k n̄an baam̧le ko aer ta ko rekar ekkatak kōn visōn in wōjke in mour eo an Liai.

Kōkm̧anm̧anļo̧k Ad Katakin

Ajri ro rej ekkatak ilo elōn̄ kain wāween ko. Ajri ro rej m̧ōņōņō ilo aer ekkatak jān en̄jake ko reokkotaktak. Kōjerbal makūtkūt ko me rej jipan̄ er itok limoer, kōjerbal aolep en̄jake ko, im kajjieon̄ kōjerbal men ko rekāāl. (Lale Teaching in the Savior’s Way, 25–26.)

Peij in makūtkūt: naan eo an Anij ej jipan̄ eō en̄jake iakwe eo An