Tōn̄alļo̧k Jān Aolep Tōn̄al jān Miguel Angel González Romero

Jānwōde 20-26

1 Nipai 11–15

“Pojak kōn Jim̧we im kōn Kajoor in Anij”

Komaron̄ ke loe eok make ilo 1 Nipai 11–15? Eoon ta ko rej make wōt em̧m̧an ippam̧ im baam̧le eo am̧?

Je En̄jake ko rej Im̧we Eok

N̄e ewōr juon an Anij jerbal eļap n̄an rikanaan eo An n̄an kōm̧m̧ane, Ekkā an leļo̧k juon visōn eļap bwe rikanaan eo en jipan̄ e meļeļe jibadbad ko an Anij n̄an ro Nejin. Moses eaar lo juon visōn kōn “laļ in, im men ko lowaan, im barāinwōt lan̄ ko” (Moses 1:36). Rijilōk Jon eaar lo bwebwenato in laļ in im Itok eo Kein Karuo an Rilo̧mo̧o̧r (lale bok in Revelesōn). Josep Smith eaar lo Jemed im Nejin (lale Josep Smith—Bwebwenato 1:17–18). Liai eaar lo juon visōn me ej ba kajjien iaļ eo ad ļo̧k n̄an Rilo̧mo̧o̧r im An iakwe.

Ilo an kar ļook ilo 1 Nipai 11–14, Nipai eaar lo jerbal eo an Rilo̧mo̧o̧r eo, ro ineen Liai ilo āneen kallim̧ur, im armej ro āliktata ilo jerbal eo an Anij. Visōn in ekar jipan̄ kōpooj Nipai n̄an jerbal eo epād im̧aan, im emaron̄ bar jipan̄ kōpooj eok—bwe ewōr an Anij jerbal n̄an eok n̄an kōm̧m̧ane ilo aelōn̄ in kiin̄ in An. Kwoj pād ilubwiljin “armej ro rekwojarjar an kabun̄ eo an lam eo” eo Nipai eaar loe, “ro raar ejjeplōklōk ioon aolepān mejān laļ; im raar pojak kōn jim̧we im n̄an kajoor in Anij ilo aiboojoj eļap” (1 Nipai 14:14).

Ļōmņak ko n̄an Ekkatak Jeje ko Rekwojarjar Ippem Make

1 Nipai 11

Anij eaar jilkintok Jisōs Kraist āinwōt juon kōkaļļein Iakwe eo An.

N̄an jipan̄ Nipai meļeļe kōn wōjke eo jemen eaar loe, juon enjeļ eaar kwaļo̧k n̄an e “eo Nejin Jemed Indeeo” (1 Nipai 11:21). Menin ekar tōl ļo̧k Nipai n̄an kwaļo̧k bwe wōjke eo ej pinej jenkwan iakwe eo an Anij. Bōtaab visōn in ekar jab jem̧ļo̧k. Ilo am̧ riit im kōļmenļo̧kjeņ kōn 1 Nipai 11, ta eo kwoj loe ej jipan̄ eok meļeļe etke Jisōs Kraist ej unjen kōkkaļļein Iakwe eo an Anij?

N̄an katak kōn kōkaļļe ko jet ilo ettōņak eo an Liai, lale 1 Nipai 11:35–36; 12:16–18; im 15:21–30.

Bar lale Jon 3:16.

1 Nipai 12–13

Irooj eaar kōpooj iaļ in n̄an Jepļaaktok eo.

Nipai eban kar mour n̄an kam̧ool ta eo eaar lo ilo visōn eo an. Ta eo kwoj ļōmņak etke eaar aorōk bwe Nipai en jeļā men kein? Etke eaorōk n̄an kwe n̄an jeļā men kein? Bōlen komaron̄ kajjitōk kajjitōk in elōn̄ alen ilo am̧ riiti kōn men ko Nipai eaar loi ilo visōn eo an.

Erkein jet iaan men ko Nipai eaar loi: armej ro an tokālik (lale jebta 12), kiene laļ eo an Amedka im Oktak eo Eļap an Armej in Amedka (lale jebta 13:12–19), Bun̄ jen Tōmak eo Eļap (lale jebta 13:20–29), im Jepļaaktok eo an gospel eo (lale jebta 13:32–42).

1 Nipai 13:1–9; 14:9–11

Ta eo “kabun̄ eo eļap im kajjōjō” me Nipai eaar loe?

Elder Dallin H. Oaks eaar kōmeļeļeiki bwe “kabun̄ eo eļap im kajjōjō” kar kōmeļeļeik jān Nipai ej pinej jenkwan “jabdewōt armej im doulul ko rej jum̧ae tōmak ilo Anij. Im bwe ‘kōm̧akoko’ eo me ‘kabun̄’ ej kappukot n̄an bōktok ro rekwojarjar eban āindein ilo dipioin āinwōt kōm̧akoko in pepe ko reriab.” (“Stand as Witnesses of God,” Ensign, Mar. 2015, 32).

1 Nipai 13:12

Wōn em̧m̧aan eo Nipai eaar loe me Jetōb eaar “walaļtak” im wōnm̧aanļo̧k “ioon elōn̄ dān ko”?

Nipai eaar lo bwe Jetōb Kwojarjar emaron̄ kar im̧we Christopher Columbus bwe en jerak ļo̧k n̄an Amedka. Ilo Maaj 14, 1493, Columbus eaar je kōn ejerakrōk in: “Tōprak in eļap im kabwilōn̄lōn̄ rejjab jān jabdewōt bōklekōt eo aō make … ; bwe kōn jab jeļāļo̧kjeņ an armej emaron̄ jab kam̧bōj, ak Jetōb in Anij eaar letok ioon armej, bwe Anij ej ron̄ jar ko an ro Nejin ro An iakwe ekabwilōn̄lōn̄ n̄an kōm̧m̧ane menin ejeno̧ļo̧k” (The Annals of America [Encylopia Britannica, Inc., 1976], 1:5).

1 Nipai 13:20–42

Jeje ko rekwojarjar an raan ko āliktata rej kōjepļaaktok “men ko ralikkar im raorōk.”

Nipai eaar lo ilo visōn bwe Baibōļ eo—eo ej kōmeļeļeiki āinwōt “ļook eo an Riju ro”—elōn̄ men ko ralikkar im raorōk kar būkļo̧k jān[i]” (1 Nipai 13:23 28). Ijoke, eaar bar lo bwe Anij ekar kōjepļaaktok men ko ilo “bok ko jet”—ilo Bok in Mormon im jeje ko rekwojarjar jet an raan ko āliktata (lale 1 Nipai 13:39–40). Ta jet iaan m̧ool ko ralikkar me Bok in Mormon eo ej ipan̄ kōj em̧m̧anļo̧k ad meļeļe? Elmen an mour eo am̧ oktak kōn wōt men ko ralikkar im raorōk ko emōj aer jepļaaktok?

Bok in Mormon eo ej kōjepļaaktok m̧ool ko raar jako jān bun̄ jān tōmak eo.

Bar lale “Plain and Precious Truths,” Ensign, Mar. 2008, 68–73; Russell M. Nelson, “Bok in Mormon eo: Eļan̄n̄e en kar Ejjeļo̧k Elmen Nej Kar Mour eo Am̧?” Ensign ak Liaona, Nov. 2017, 60–63.

1 Nipai 15:1–11

Irooj enaaj uwaake eō eļan̄n̄e ij kajjitōk kōn tōmak kōn juon bōro erub.

Kwonan̄in ke kar en̄jake ke kwojjan̄in bōk revelesōn eo am̧ make—bwe Anij ejjab kōnono n̄an kwe? Ta kapilōk eo Nipai eaar leļo̧k n̄an ļom̧aro jein ke raar en̄jake wāween in? Elmen am̧ mour kake kapilōk in an Nipai ilo mour eo am̧, im elmen am̧ kōjerbal kapilōk in an n̄an jipan̄ ro jet?

Bar lale Jekab 4:8; Alma 5:46; 26:21–22.

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le

Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kake n̄an tōpar aikuj ko an baam̧le eo am̧. Erkein rej jet iaan ļōmņak ko.

1 Nipai 11–14

Ilo an baam̧le eo am̧ riiti jebta kein, bōjrak kajjo iien im kajjitōk kajjitōk ko āinwōt kein: Ta eo Nipai eaar loe ilo visōn eo an me emaron̄ kar kōm̧m̧an bwe en m̧ōņōņō? Ta emaron̄ kar kōm̧m̧an an inepata? Etke?

1 Nipai 13:20–42

N̄an jipan̄ ro uwaan baam̧le eo am̧ meļeļe aorōk in m̧ool ko “realikkar im kanooj aorōk” ilo Bok in Mormon eo, keidi juon meļeļe eo ealikkar kar je ennaan eo epok. Etke Jemedwōj Ilan̄ ekar maron̄ kōņaan bwe m̧ool ko An ren alikkar kwaļo̧ki? Ro uwaan baam̧le ko remaron̄ kwaļo̧k naan in kam̧ool ko “realikkar im kanooj aorōk” ilo aer kar ekkatak jān Bok in Mormon eo.

1 Nipai 14:12–15

Etke jej “pojak kōn jim̧we im kōn kajoor an Anij” n̄e jej mour jim̧we kōn bujen ko ad ippān Anij?

1 Nipai 15:8–11

Ta en̄jake ko baam̧le eo am̧ remaron̄ in kwaļo̧ki n̄e raar “kajjitōk ippān Anij”? Ta eo jaar ekkatak jān waanjon̄ok eo an Nipai?

N̄an eļapļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Kōkōm̧anm̧anļo̧k Am̧ Ekkatak Ippem Make

Kōjerbal kein jipan̄ ekkatak ko. Footnote ko, the Topical Guide, im kein jipan̄ ekkatak ko jet n̄an lewaj im̧we ko n̄an eoon ko. N̄an waanjon̄ok, ta footnote ko rej jipan̄ eok meļeļe kōn 1 Nipai 14:20–21?

Visōn eo an Nipai kōn Meri, jān James Johnson