“Jānwōde 6–12. 1 Nipai 1–7: ‘Inaaj Ilo̧k im Kōm̧m̧ani,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
“Jānwōde 6–12. 1 Nipai 1–7,” Itok, Ļoor Eō—N̄an Kajjojo Armej im Baam̧le ko: 2020
Liai ej Ito-Itak Iturin Lom̧aļo̧ Ekilm̧ur, jān Gary Smith
Jānwōde 6–12
1 Nipai 1–7
“Inaaj Ilo̧k im Kōm̧m̧ani”
Nipai eaar ļooke “men ko an Anij” (1 Nipai 6:3). Ilo am̧ ekkatak ļook ko an Nipai, lukkuun lale men ko an Anij kwoj loi, eļaptata im̧we ko jān Jetōb eo.
Je En̄jake ko Rej Im̧we Eok
Bok in Mormon eaar jino kōn juon bwebwenato in juon baam̧le eo eaar lukkuun ioon apan̄ ko. Eaar waļo̧k ilo 600 MK, ak elōn̄ men ko jet kōn bwebwenato in me emaron̄ emakijkij an baam̧le ko rainin ron̄. Baam̧le in raar jokwe ilo juon laļ eo eļap nana ie, ak Irooj eaar kallim̧uri er bwe eļan̄n̄e renaaj ļoor E, Enaaj tōl ļo̧k er n̄an kōjparok. Ilo iaļ eo aer ļo̧k, ekar wōr aer iien em̧m̧an im iien ko renana; raar en̄jake eļap kōjeraam̧m̧an im kabwilōn̄lōn̄ ko, ak raar bar kwaļo̧k aer iakwelel im jum̧ae. Ilo jeje ko rekwojarjar ejeja an wōr ie bwebwenato aetok kōn an juon baam̧le kar kajjieon̄ mour kōn gospel in: baba eo epen an im̧we baam̧le eo an kōn tōmak, ļaddik ro rej ļōmņak eļan̄n̄e renaaj tōmak e, m̧am̧a eo ej mijak kōn jokne eo an ro nejin, im ļaddik ro rej jemjānjem jāti rej ebanban im jum̧ae—jet iien rej jeo̧rļo̧k an doon bōd. Ilo kobain aolep, ewōr kajoor ilo waanjon̄ok kein ilaļ kōn tōmak eo an baam̧le in—kejōkdo̧o̧n jab wānōk ko aer—kar kōmeļeļeiki.
Ļōmņak ko n̄an Ekkatak Jeje ko Rekwojarjar Eo Ippem Make
Jeje ko rekwojarjar eļap aorōkier.
Jebta ko jiljino im̧aantata ilo Bok in Mormon eo epād ie elōn̄ eoon ko n̄an bok in ekwojarjar, ļook ko rekwojarjar, im naan in Irooj. Ilo am̧ riiri 1 Nipai 1–6, ta eo kwaar ekkatak kōn etke naan in Anij “wōr tokjen”? (1 Nipai 5:21). Ta eoon ko rej katakin eok kōn jeje ko rekwojarjar? Ta eo kwoj loe me ej im̧we eok n̄an pukot jeje ko rekwojarjar kōn eļap wujlepļo̧k?
Bar lale “Scriptures Legacy” (video, ChurchofJesusChrist.org).
Bok in Mormon eo ej kam̧ool kōn Jisōs Kraist.
Jibadbad eo em̧ool ej waļo̧k ilo taitōļ in peij eo—n̄an kareel aolep bwe Jisōs ej RiKraist eo—bwe Bok in Mormon ej kwaļo̧k kōn visōn eo ekabwilōn̄lōn̄ an Liai kōn Rilo̧mo̧o̧r eo. Ta eo kwaar ekkatak kōn Jisōs Kraist jān ta eo Liai eaar loe? Ta jet iaan “ļap im kabwilōn̄lōn̄ ko” an Rilo̧mo̧o̧r raar waļo̧k ilo mour eo am̧? (1 Nipai 1:14).
N̄e ij pukote im lōke Irooj, Ej kōmeraikļo̧k būruwō.
Men̄e Leman, Lemuel, im Nipai raar rūttoļo̧k ilo juon wōt baam̧le im kar bōk juon wōt kain en̄jake ko, ewōr jidik oktak ikōtaan wāween aer uwaak n̄an tōl in ekwojarjar jān jemāer kar bōke ilo jebta in. Ilo am̧ riiti 1 Nipai 2, lale n̄e komaron̄ kwaļo̧k unin an būruwōn Nipai kar pidodo ilo an būruwōn ļōm̧aro jein jab. Komaron̄ bar ļōmņak kōn uwaak ko am̧ make n̄an tōl jān Irooj, men̄e jān Jetōb Kwojarjar ak An rikanaan. N̄e kwaar en̄jake an Irooj kapidodoik būruwōm̧ kwon ke kar m̧ōņōņō in bōk tōl eo An im kapilōk?
Anij enaaj kōpooj juon iaļ n̄an eō n̄an kōm̧m̧ane Ankilaan.
Ke Irooj eaar jiron̄ Liai im baam̧le eo an n̄an būki pileij ko jān Leban, Eaar jab leļo̧k kōmeļeļe ko rekkar kōn kilen kōttōbrak kien in. En̄in ej m̧ool ilo kien ko jet ak revelesōn an juon make jej bōke jān Anij, im menin ej tōl ļo̧k kōj n̄an en̄jake An letok “men eppen” (1 Nipai 3:5). Ta eo ej im̧we eok kōn uwaak eo an Nipai n̄an kean̄ eo an Irooj, waļo̧k ilo 1 Nipai 3:7, 15–16? Ewōr ke jabdewōt men kwaar en̄jake n̄an “ilo̧k im kōm̧m̧ane”?
Ilo am̧ ekkatak 1 Nipai 1–7, pukot wāween ko Anij ej kōpooj juon iaļ n̄an Liai im baam̧le eo an. Elmen An kar kōm̧m̧ane menin n̄an eok?
Bar lale Jabōn Kennaan ko 3:5–6; 1 Nipai 17:3; “Pokake,” Gospel Topics, topics.ChurchofJesusChrist.org; Book of Mormon Videos collection ilo ChurchofJesusChrist.org ak ilo Gospel Library app.
Keememej bwe jerbal ko an Anij remaron̄ letok n̄an eō tōmak n̄an pokake kien ko An.
Ke Leman im Lemuel raar ellotaan, Nipai im Liai raar aolep iien pād iturieer n̄an rōjan̄ im kaenōm̧m̧an er. N̄e kwoj en̄jake am tōn ellotaan, riiti naan ko an Nipai im Liai remaron̄ lewaj kapilōk im jipan̄ eļap. Ekōjkan an kar Nipai im Liai kajjieon̄ jipan̄ ro uwaan baam̧le eo aer kalōk tōmak ilo Anij? (lale 1 Nipai 4:1–3; 5:1–8; 7:6–21). Ta eo kwaar ekkatak jān waanjon̄ok eo aer me emaron̄ jipan̄ eok tokālik n̄e kwoj tin ellotaan ak jum̧ae?
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kake n̄an tōpar aikuj ko an baam̧le eo am̧. Erkein rej jet iaan ļōmņak ko.
1 Nipai 1–7
Ilo aolepān 1 Nipai 1–7, komaron̄ rōjan̄ ro uwaan baam̧le eo n̄an kile m̧akūtkūt ko kōtaan ro uwaan baam̧le eo an Liai im baam̧le eo an Saraia. Ta jemaron̄ ekkatak jān jem̧doon kein me remaron̄ jipan̄ baam̧le eo ad?
Nipai im baam̧le eo an raar kaorōk naan ko an rikanaan ro.
1 Nipai 2:20
Pedped in katak eo ilo 1 Nipai 2:20 ekkā an waļo̧k elōn̄ kōttan ilo aolepān Bok in Mormon eo. Elmen an ro uwaan baam̧le eo am̧ kōjerbale n̄an mour ko aer ilo ami ekkatak Bok in Mormon eo iiō in? Bōlen komaron̄ je juon peba kōn an Irooj kallim̧ur ilo eoon in im likūt ilo m̧weeo im̧ōm̧. Emaron̄ in jerbal āinwōt juon kein kakeememej n̄an kōnono elmen am̧ lo an Irooj kōjeraam̧m̧an baam̧le eo am̧ n̄e kwoj kōjparok kien ko An. Ļōmņak kōn en̄jake kein ioon peba in.
1 Nipai 2:11–13; 3:5–7
Bōlen baam̧le eo am̧ emaron̄ jeraam̧m̧an n̄an kile oktak ko kōtaan uwaak ko an Leman im Lemuel n̄an kean̄ eo an Irooj im uwaak eo an Nipai. Ta eo jemaron̄ ekkatak jān 1 Nipai 2:11–13; 3:5–7 kōn ellotaan? Ta kōjeraam̧m̧an ko rej itok n̄ej jej kōjerbal tōmak?
1 Nipai 3:19–20; 5:10–22; 6
Eoon kein remaron̄ im̧we baam̧le eo am̧ n̄an kōjparok juon ļook in m̧akūtkūt ko raorōk im en̄jake ko jān mour eo am̧. Bōlen komaron̄ jino kōn juon jōnōļ an baam̧le, āinļo̧k wōt ļook ko an Nipai im Liai kar je kōn en̄jake ko an baam̧le eo aer. Ta eo komaron̄ kobaik waj ilo ļook in baam̧le eo am̧?
1 Nipai 7:19–21
Ta ko raar im̧we kōj kōn waanjon̄ok eo an Nipai ilo eoon kein? Elmen an baam̧le eo am̧ jeraam̧m̧an n̄e jej “jeo̧rļo̧k” an doon bōd?
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Kōkōm̧anm̧anļo̧k Ad Katakin
Katak jeje ko rekwojarjar aolep iien. Juon men eaorōk ilo katakin ko retinkwadik ilo m̧weo ej n̄an kōm̧m̧ane juon ikutkut in iien em̧m̧an ekkatak n̄an baam̧le eo am̧. Būreejtōn Thomas S. Monson eaar katakin, “Kooj in ekkatak ko rekkadu rejjab lukkuun wājabdik āinwōt riit im kōjerbale jeje ko rekwojarjar ilo mour ko ad jān raan n̄an raan” (“Be Your Best Self,” Ensign ak Liaona, Māe 2009, 68).
Iaar Pokake Ainikien Jetōb eo, jān Walter Rane