“Eprōļ 13–19. Mosaia1–3: ‘Obrak kōn Iakwe n̄an Anij im Armej Otemjeļo̧k,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
“Eprōļ 13–19. Mosaia 1–3,” Itok, Ļoor Eō—N̄an Kajjojo Armej im Baam̧le ko: 2020
Minerva K. Teichert (1888–1976), Ennaan in Iakiakwe eo an Kiin̄ Benjamin, 1935, oil ilo masonite, 36 x 48 inches. Brigham Young University of Art
Eprōļ 13–19
Mosaia 1–3
“Obrak kōn Iakwe n̄an Anij im Armej Otemjeļo̧k”
Kiin̄ Benjamin eaar letok juon un kōn ļo̧o̧ke im̧we ko ad ilo jetōb: “Bwe eļan̄n̄e eaar jab maron̄ bwe jemād, Liai, en kar keememej aolep men kein, n̄an kar katakini n̄an ro nejin, ijello̧kun wōt n̄e eaar jab jipan̄ jān pileij kein” (Mosaia 1:4).
Je En̄jake ko Rej Im̧we Eok
N̄e kwoj ron̄ naan eo kiin̄, komaron̄ ļōmņak kōn kūrauun ko, em̧ killep ko, rijerbal ro, im tūro̧o̧n ko. Ilo Mosaia 1–3, kwonaaj riit kōn juon kiin̄ eo eoktak. Ijello̧kin mour jān jerbal ko an armej ro an, Kiin̄ Benjamin “kar jerbal kōn[ pein] make” (Mosaia 2:14). Ijello̧kin an mour jān jerbal an ro jet, eaar jerbal n̄an armej ro an, “kōn aolepān aō maron̄, ļōmņak im kajoor eo Irooj [eaar] letok n̄an [e]” (Mosaia 2:11). Kiin̄ in eaar jab kōņaan bwe armej ro an ren kabun̄-jar n̄an e; ijello̧kin, eaar katakin er n̄an kabun̄-jar n̄an juon Kiin̄ eļapļo̧k jān e make, bwe eaar meļeļe bwe ej “Irooj Ekajoor Bōtata eo ej irooj” (Mosaia 3:5). Āinwōt aolep ritōl ro reļļap ilo aelōn̄ in kiin̄ eo an Anij, naan ko an Kiin̄ Benjamin im waanjon̄ak eo rej tōlļo̧k kōj n̄an Kiin̄ in Lan̄ eo, eo ej Rilo̧mo̧o̧r eo, Jisōs Kraist. Kiin̄ Benjamin eaar kam̧ool bwe Jisōs eaar “wanlaļtak jān lan̄” ilubwiljin ro nejin armej, jerbali mennin kabwilōn̄lōn̄ ko rekajoor. … Im lo, E ej itok n̄an ro An, bwe lo̧mo̧o̧r en maron̄ itok n̄an ro nejin armej em̧ool kōn tōmak ilo etan”(Mosaia 3:5, 9).
Ļōmņak ko n̄an Ekkatak Jeje ko Rekwojarjar Ippem̧ Make
Bōk Naan an Anij kōppopo ej menin aikuj.
Ke Kiin̄ Benjamin eaar jilkinļo̧k naan bwe eaar kōņaan kōnono n̄an armej ro an, elōn̄ armej ro raar itok “jon̄an lōn̄ eo raar jab maron̄ bwine er” (Mosaia 2:2). Rekar itok, ilo m̧ōttan, kōnke aer kam̧oolol im iakwe n̄an ritōl eo aer. Ak men eo eaorōkļo̧k, rekar itok bwe ren ekkatak naan eo an Anij.
Ilo am̧ riiti Mosaia 2:1–9, pukōt ta eo armej ro raar kōm̧m̧ane n̄an kwaļo̧k bwe raar kaorōk naan an Anij. Ta eo Kiin̄ Benjamin eaar kajjtiōk ippāer n̄an kōppopo n̄an ron̄ naan an Anij? (lale eoon 9). Ekōjkan an em̧m̧anļo̧k am̧ kōpooj eok make n̄an bōk naan an Anij ilo ekkatak eo am̧ make im an baam̧ļe im ilo iien kweilo̧k ko an Kabun̄?
Lale barāinwōt Matu 13:18–23; Alma 16:16–17.
N̄e ij jerbal n̄an ro jet, ij barāinwōt jerbal n̄an Anij.
Kwoj ke kakkōt n̄an kappukōt iien n̄an jerbal ak kōņaan bwe jerbal in jipan̄ eo am̧ en kar bōktok n̄an eok eļapļo̧k lan̄lōn̄? Ta eo kwoj ļōmņak Kiin̄ Benjamin enaaj kar ba eļan̄n̄e kwar kajjitōk ippān etke eaar jerbal kōn aolepān an “maron̄, ļōmņak im kajoor”? (Mosaia 2:11). Ilo am̧ riiti Mosaia 2:10–26, kile m̧ool ko me Kiin̄ Benjamin eaar katakin kōn jerbal in jipan̄ im kejōkļo̧kjeņ kōn ekōjkan am̧ maron̄ kōjerbali ilo mour eo am̧. N̄an waanjon̄ak, ta meļeļe in n̄an eok n̄an jeļā bwe n̄e kwoj jerbal n̄an ro jet, kwoj barāinwōt jerbal n̄an Anij? (lale Mosaia 2:17). Ļōmņak kōn juon wāween komaron̄ jerbal n̄an ro jet wiik in!
Lale barāinwōt Matu 25:40.
N̄e ij jerbal n̄an ro jet, ij barāinwōt jerbal n̄an Anij.
Imaron̄ anjo̧ ioon lukkuun piktok in armej im erom̧ juon rikwojarjar kōn Pinmuur eo an Jisōs Kraist.
Kiin̄ Benjamin, āinwōt aolep rikanaan ro, kar kam̧ool kōn Jisōs Kraist bwe armej ro an “emaron̄ bōk jeorļo̧k in jero̧wiwi ko an, im m̧ōņōņō kōn lan̄lōn̄ eo ekanooj ļap” (Mosaia 3:13). Eaar barāinwōt katakin bwe Rilo̧mo̧o̧r eo, kōn Pinmuur eo An, ejjab karreoik kōj wōt ak barāinwōt letok n̄an kōj kajoor n̄an utūkļo̧k “armej eo ilo lukkuun biktokin” im erom̧ “juon rikwōjarjar” (Mosaia 3:19; lale barāinwōt Unin Tōl eo n̄an Jeje Ko Rekwōjarjar, “Armej ilo Lukkuun Biktokin,” scriptures.ChurchofJesusChrist.org).
Elder David A. Bednar eaar kōmeļeļeik: “Ej Pinmuur eo an Jisōs Kraist me ej letok jim̧or juon karreo in kajoor in lo̧mo̧o̧r eo me ej jipan̄ kōj anjo̧ ioon jerawiwi ko im juon juon kajoor in kōkwojarjar im kōkajoorļo̧k me ej jipan̄ kōj erom̧ em̧m̧anļo̧k jān kar m̧okta maron̄ jān ad pedped wōt ioon kajoor eo ad make. Pinmuur eo eļap ej n̄an jim̧or eo ejerawiwi im n̄an rikwojarjar eo ilo kōj kajjojo” (“Clean Hands and a Pure Heart,” Ensign ak Liahona, Nov. 2007, 82).
Erkein rej jet kajjitōk ko n̄an kejōkļo̧kjeņ kaki ilo am̧ riiti naan in kam̧ool eo an Kiin̄ Benjamin kōn Rilo̧mo̧o̧r ilo Mosaia 3:1–20:
-
Ta eo ij katak jān eoon kein kōn Rilo̧mo̧o̧r eo im mijen eo An?
-
Ekōjkan an kar Jisōs Kraist jipan̄ eō anjo̧ ioon jerawiwi? Ekōjkan An kar jipan̄ eō ukōt lukkuun piktok in armej eo ilo n̄a im erom̧ āinwōt juon rikwojarjar?
-
Ta eo ij katak kōn erom̧ juon rikwojarjar jān Mosaia 3:19?
Etke Kiin̄ Benjamin eaar kōnono kōn Jisōs āinwōt “Jemen lan̄ im laļ?”
Būreejtōn Joseph F. Smith eaar kōmeļeļeik: “Jisōs Kraist, eo jej barāinwōt jeļā kake āinwōt Jeova, eaar armej eo eaar ļoor tōl ko an Jemen, Elohim, ilo jerbal in kōm̧anm̧an eo. … Jisōs Kraist, āinwōt Rikōm̧anm̧an eo, ej ejjab oktak kar ņae etan Jemen lan̄ im laļ … ; im kōnke An kōm̧anm̧an ko rej jekjek ko aer rej indeeo E elukkuun in jim̧we kar kūri Jemen Indeeo an lan̄ im laļ” (Teachings of Presidents of the Church: Joseph F. Smith [1998], 357).
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kake n̄an tōpar aikuj ko an baam̧le eo am̧. Erkein rej jet ļōmņak ko
Mosaia 1:1–7
Ekōjkan an kar pileij būrāāj ko im pileij ko an Nipai kōjeraam̧m̧an armej ro an Kiin̄ Benjamin? Ekōjkan an jeje ko rekwojarjar kōjeraam̧m̧an baam̧le eo ad?
Mosaia 2–3
Emaron̄ in kam̧ōņōņō n̄an baam̧le eo am̧ n̄an ejaake jekjek eo kōn ennaan eo an Kiin̄ Benjamin. Komaron̄ kōm̧m̧ane juon tawōr jidikdik im kōm̧m̧an bwe ro uwaan baam̧le eo ren bōk aer iien riiti naan ko an Kiin̄ Benjamin ilo aer jutak ioon. Ro jet ilo baam̧le eo remaron̄ ron̄jake jān lowaan juon em̧ nuknuk bajjōk.
Mosaia 2:9–19
Ta eo jej ekkatak kōn jerbal in jipan̄ eo jān katak ko im waanjon̄ak eo an Kiin̄ Benjamin? Ta eo jej en̄jake im̧we n̄an kōm̧m̧ane?
Mosaia 2:15–25
Enaaj ke kōjeraam̧m̧an baam̧le eo am̧ n̄an kōm̧m̧an juon ekōnono kōn ettā? Etke Kiin̄ Benjamin eaar jab kōmmājāje kōn aolep men eaar kōm̧m̧ani? Ta eo jemaron̄ katak jān katak ko an kōn kadkad eo ad ippān Anij?
Mosaia 2:36–41
Ta eo Kiin̄ Benjamin eaar katakin kōn kaje ko kōn jeļā m̧ool ko bōtaab jab mour kaki? Ta eo eaar katakin kōn ekōjkan n̄an bōk m̧ōņōņō eo em̧ool?
Mosaia 3:19
Ta eo jej aikuj kōm̧m̧ane n̄an erom̧ rikwojarjar ro? Ewi wōt paotok ko jān eoon in jemaron̄ m̧ad jake ilo kōļapļo̧k āinwōt juon baam̧le?
N̄an elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Kōkōm̧anm̧anļo̧k Ekkatak Ippem̧ Make
Kōm̧m̧ani menin kōttōbar ko maron̄ kōttōbraki. Joļo̧k men̄e jet minit ko juon raan ekkatak jeje ko rekwojarjar emaron̄ kōjeraam̧m̧an mour eo am̧. Wujlepļo̧k n̄an ekkatak kajjojo raan, im pukōt juon wāween n̄an kakeememej eok make kōn kallim̧ur eo am̧.
Ennaan eo an Kiin̄ Benjamin, jān Jeremy Winborg