Jerbal wōt n̄an Ami Anij, jān Walter Rane

Eprōļ 20–26

Mosaia 4–6.

“Juon Oktak in Bōro Ekajoor”

Ilo am̧ riti im kejōkļo̧kjeņ kōn Mosaia 4–6, wujlepļo̧k am̧ n̄an im̧we ko an Jetōb Kwojarjar. Ta men ko rem̧m̧an kwoj im̧we n̄an kōm̧m̧ani? (lale Mosaia 5:2).

En̄jake ko Rej Im̧we Eok

Em̧ōj ke am̧ kar ron̄ an juon kōnono im en̄jake im̧we eo n̄an ukōt mour eo am̧? Bōlen kwaar kālet, kōnke kōn ta eo kwaar ron̄, n̄an mour oktakļo̧k jidik—ak em̧ool eļapļo̧k. Kwaļo̧k eo an Kiin̄ Benjamin eaar kain kwaļo̧k eo, im m̧ool ko eaar katakin eaar wōr kain jelet eo ioon armej ro raar ron̄jaki. Kiin̄ Benjamin eaar kwaļo̧k ippān armej ro an ta eo juon enjeļ eaar katakin e—bwe kōjeraam̧m̧an ko raiboojoj raar pidodo būki kōn “bōtōktōkin pinmuur eo an Kraist” (Mosaia 4:2). Ennaan eo an eaar kanooj ukōt wāween eo raar ļōmņak kōn er make (lale Mosaia 4:2), kar ukōt ikdeelel ko aer (lale Mosaia 5:2), im kar im̧we er n̄an bujen ippān Anij bwe renaaj kar iien otemjej kōm̧anm̧an Ankilan (lale Mosaia 5:5). En̄in ej wāween an naan ko an Kiin̄ Benjamin kar jelet armej ro an. Ekōjkan aer naaj kar jelet eok?

Ļōmņak ko n̄an Ekkatak Jejej ko Rekwojarjar eo Ippam̧ Make

Mosaia 4

Kōn Jisōs Kraist, imaron̄ bōk im dāpij wōt juon jeorļo̧k in jerawiwi ko aō.

Anjo̧ ioon lukkuun piktok in armej eo ejjab pidodo. Ej aikuji kijejeto eļap n̄an erom̧ “juon rikwōjarjar kōn pinmuur eo an Kraist Irooj” (Mosaia 3:19). Jet iien, jekdo̧o̧n n̄e kwaar en̄jake jeorļo̧k bōd in jerawiwi ko am̧, komaron̄ in kakkōt n̄an kōjparok en̄jake jab eo im pād ilo iaļ eo an jim̧we. Kiin̄ Benjamin eaar katakin armej ro an ekōjkan n̄an jim̧or bōk im dāpij wōt juon jeorļo̧k in jerawiwi ko im mour jab jokod āinwōt juon rikwojarjar. Ilo am̧ ekkatak jebta 4 in Mosaia, komaron̄ kajjitōk ippem̧ make kajjitōk ko āinwōt kein:

Eoon ko 1–12:Ta kōjeraam̧m̧an ko juon jeorļo̧k in jerawiwi ko ej bōktok n̄an armej ro an Kiin̄ Benjamin? Ta eo Kiin̄ Benjamin eaar katakin n̄an jipan̄ er dāpij wōt jeorļo̧k in jerawiwi ko aer? Ta eo eaar katakin kōn ekōjkan ad bōk lo̧mo̧o̧r? Je ta eo Kiin̄ Benjamin eaar ba jej aikuj “iien otemjej bōk ilo ememļo̧kjeņ” (eoon 11). Ta eo kwoj en̄jake im̧we n̄an kōm̧m̧ane n̄an keememej men kein?

Eoon ko 12–16:Ekkar n̄an eoon kein, ta eo ej waļo̧k ilo mour ko ad eļan̄n̄e jej kōm̧m̧ane men ko kar kōmeļeleik ilo eoon 11? Em̧ōj ke am̧ kar en̄jake oktak kein ilo mour eo am̧? Ekōjkan am̧ keidi n̄an oktak ko kar kōmeļeļeik ilo Mosaia 3:19?

Eoon ko 16–30:Ekōjkan an kwaļo̧k ippān ro rejeram̧ōl jipan̄ kōj dāpij wōt juon jeorļo̧k in jerawiwi ko ad? Ekōjkan am̧ maron̄ kōjerbal eoon 27 n̄an kijejeto ko am̧ n̄an erom̧ āinwōt Kraist?

Lale barānwōt David A. Bednar, “Iien Otemjej Jeorļo̧k Jero̧wiwi Ko Ami,” Ensign ak Kweilo̧k eo Eļap, Eprōļ 2016, 59–62; Dale G. Renlund, “Preserving the Heart’s Mighty Change,” Ensign ak Liahona, Nov. 2009, 97–99.

Mosaia 5:1–7

Jetōb eo an Irooj emaron̄ kōm̧m̧ane juon oktak in bōro ekajoor ilo būruwō.

Ejjab juon men ekāāl n̄an an armej ba , “Ijjab maron̄ oktak. Bwe en̄in ej jekjek eo aō in.” Ilo jim̧we, en̄jake eo an armej ro an Kiin̄ Benjamin ej kwaļo̧k n̄an kōj ekōjkan an Jetōb eo an Irooj maron̄ lukkuun in ukōt būruwōd. Būreejtōn Russell M. Nelson eaar katakin: “Jemaron̄ ukōt m̧wiliid. Ikdeelel ko relukkuun in maron̄ oktak. … Oktak eo em̧ool—oktak eo indeeo—maron̄ itok wōt kōn kōmour, karreo, im kajoor in kōmaron̄ eo an Pinmuur eo an Jisōs Kraist. … Gospel eo an Jisōs Kraist ej juon gospel in oktak!” (“Jokālet ko n̄an Indeeo,” Ensign ak Kweilo̧k eo Eļap, Okt. 2013, 108).

Ilo am̧ riit kōn oktak eo me armej ro an Kiin̄ Benjamin raar en̄jake, ļōmņak kōn ekōjkan an “oktak in bōro eo ekajoor” tōl n̄an oktak eo em̧ool eaar waļo̧k—ak maron̄ waļo̧k—ilo mour eo am̧. Wōr jet iien ko “rekajoor” rej bōkļo̧k oktak in bōro eo am̧, ak oktak eo am̧ eaar ke waļo̧k eļapļo̧k an jidik kōn jidik?

Lale barāinwōt Ezekiel 36:26–27; Alma 5:14; David A. Bednar, “Oktaktok n̄an Irooj,” Ensign ak Liahona, Nov. 2012, 106–9.

Rilo̧mo̧o̧r eo emaron̄ ukōt būruwōd im mour ko ad. Pein Kōmour ko, jān Adam Abram

Mosaia 3:5–15

Ij bōk ioō make etan Kraist n̄e ij kōm̧m̧ani bujen ko.

Juon wun Kiin̄ Benjamin eaar kōņaan kōnono n̄an armej ro an eaar n̄an “leļo̧k n̄an armej rein juon āt.” Jet raar armej in Nipai im ro jet raar ro ineen Mulek, bōtaab kein raar jab āt ko eaar kōņaan liļo̧k. Eaar kūr armej ro n̄an bōk ioer make “etan Kraist” āinwōt m̧ōttan bujen pokake eo aer n̄an Anij (Mosaia 1:11; 5:10). Ta eo kwoj katak jān Mosaia 5:7–9 kōn ta meļeļe in n̄an bōk ioom̧ make etan Kraist?

Elder D. Todd Christofferson eaar katakin, “Pedped eo [an kajoor an kanniōk im jetōb] ej Anij. Ad bōk kajoor jab in ej kōn bujen ko ad Ippān” (“The Power of Covenants,” Ensign ak Liahona, May 2009, 20). Ilo am̧ riiti Mosaia 5:5–15, kōm̧m̧ane juon laajrak in kōjeraam̧m̧an ko me renaaj itok n̄an mour eo am̧ ilo am̧ kōjparok bujen ko kwaar kōm̧m̧an ippān Anij. Ekōjkan an kōjparok bujen ko am̧ jipan̄ eok dāpij wōt “oktak in bōro eo ekajoor” ļōme ilo kwe kōn Jisōs Kraist im Pinmuur eo An?

Ļōmņak ko n̄an Ekkatak Jejej ko Rekwojarjar eo an Baam̧le im Nokon in Jota eo an Baam̧le

Ilo am̧ riiti jeje ko rekwojarjar ippān baam̧le eo am̧, Jetōb eo emaron̄ jipan̄ eok jeļā ta pedped ko n̄an kalikkari im ekōnono n̄an maron̄ tōpar aikuj ko an baam̧le eo am̧. Erkein rej jet ļōmņak ko.

Mosaia 4:9–12

Ekōjkan an baam̧ļe eo am̧ ļapļo̧k an”lōke Anij (Mosaia 4:9) im “im iien otemjej bōk ilo ememļo̧kjeņ, ļap eo an Anij”? (Mosaia 4:11) Bōlen ro uwaan baam̧le eo remaron̄ riiti Mosaia 4:9–12 im kwaļo̧k ennaan ko me rej jipan̄ kalōk tōmak eo aer ilo Anij. Innām remaron̄ je ennaan kein im likūt er ilowaan aolepān m̧weo āinwōt kakeememej ko. Ekōjkan an keememej men kein naaj jipan̄ kōj “m̧ōņōņō iien otemjej” im “bōk jeorļo̧k eo kōn jero̧wiwi ko [ad]”? (Mosaia 4:12)

Mosaia 4:14–15

Ta eo jej ekkatak kōn ire im akweel jān eoon kein?

Mosaia 4:16–26

Ilo jekjek rōt jej aolep ruwar? Ekkar n̄an eoon kein, ekōjkan ad kōm̧m̧an n̄an aolep ajri ro nejin Anij? (Mosaia 4:26). Wōn eo ej aikuji jipan̄ eo ad?

Mosaia 4:27

Baam̧le eo am̧ ej ke kajjieon̄ kōm̧m̧an eļapļo̧k jān jon̄an aer maron̄? Bōlen komaron̄ kūr ro uwaan baam̧le eo n̄an etale m̧akutkūt ko aer n̄an lale bwe rej niknik ak barāinwōt lo̧ļe.

Mosaia 3:5–15

Ta eo bōk etan Kraist iood ej kwaļo̧k kōn kadkad eo ad Ippān? Emaron̄ jipan̄ n̄an kōnono kake etke armej ro jet iien rej je etaer ilo men ko me m̧wier. Ekōjkan ad maron̄ kwaļo̧k bwe jej “an” Rilo̧mo̧o̧r eo?

N̄an eļapļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Kōkōm̧anm̧anļo̧k Ad Katakin

Kalōk juon mejatoto eo em̧m̧an. Wāween eo ro uwaan baam̧le eo rej kōm̧m̧an n̄an doon emaron̄ kajoor an kareel jetōb eo an m̧weo im̧ōm̧. Jipan̄ aolep ro uwaan baam̧le eo kōm̧m̧ane ijo kuņaer n̄an kalōk juon im̧ōn iakwe, kautiej bwe aolep renaaj en̄jake ineem̧m̧an ilo kwaļo̧k en̄jake ko, kajjitōk ko, im naan in kam̧ool ko. (Lale Teaching in the Savior’s Way, 15.)

Ilo Kōjparok Eo An Ejjab Jokod, jān Greg K. Olsen