“Eprōļ 27–Māe 3. Mosaia 7–10: ‘Ilo Kajoor an Irooj,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
“Eprōļ 27–Māe 3. Mosaia 7–10,” Itok, Ļoor Eō—N̄an Kajjojo Armej im Baam̧le ko: 2020
Minerva K. Teichert (1888-1976), Amōn im̧aan Kiin̄ Limai, 1949-1951, oil ilo masonite, 35 15/16 x 48 inches. Brigham Young University Museum of Art, 1969.
Eprōļ 27–Māe 3
Mosaia 7–10
“Ilo Kajoor an Irooj”
Ilo am̧ riit, Jetōb eo emaron̄ bōktok n̄an kōļmānļo̧kjeņ eo am̧ jet ennaan ko ak eoon ko. Je ekōjkan am̧ en̄jake bwe eoon kein rej jerbal n̄an eok.
Je En̄jake ko Rej Im̧we Eok
Ke armej ro doon Kiin̄ Mosaia raar lem̧ōņōņō kōn an “wōnm̧anļo̧k in aenōm̧m̧an” ilo Zaraemla (Mosaia 7:1), ļōmņak ko aer raar oktakļo̧k n̄an kumi in armej in Nipai ro jet, ro raar em̧m̧akūt n̄an jokwe ilo ānen in Liai-Nipai elōn̄ iiō ko m̧oktaļo̧k. Epepen ko raar eļļāļo̧k, im armej ro doon Mosaia raar jab ron̄ jabdewōt jān er. Kōn menin Mosaia eaar kajjitōk ippān Ammōn n̄an tōl juon kumi in kappok edik n̄an pukōt armej in Nipai ro raar em̧m̧akūt. Kumi in kappok eo kar lo bwe armej in Nipai ro, “kōnke nana” (Mosaia 7:24), raar pād ilo kaļbuuj n̄an armej in Laman ro. Bōtaab kōn itakļo̧k eo an Ammōn im m̧aan ro jein im jatin, ejjab to eaar wōr kōjatdikdik kōn diwōjļo̧k.
Jet iien jej āinwōt armej in Nipai ro raar kaļbuuj, en̄taan kōnke kōn jerawiwi ko ad, ļōmņak ekōjkan ad naaj lo aenōm̧m̧an bar juon alen. Jet iien jej āinwōt Ammōn, en̄jake im̧we n̄an pukōtļo̧k ro jet im āliktata lo bwe kijejeto ko ad raar im̧we er n̄an “kotak [bōraer], im lan̄lōn̄, im likūt [aer] kōjatdikdik ilo Anij” (Mosaia 7:19). Jekdo̧o̧ņ ta jekjek ko ad, jej aolep aikuj in ukweļo̧k im “oktak tok n̄an Irooj kōn aolepān m̧wilaļ in būruōmi” kōn tōmak bwe “enaaj … kōtļo̧k [kōj]” (Mosaia 7:33).
Ļōmņak ko n̄an Ekkatak Jeje ko Rekwojarjar eo Ippem̧ Make
Eļan̄n̄e ij oktakļo̧k n̄an Irooj, lōke E, im jerbal n̄an E, Enaaj kōtļo̧k eō.
Ioon Ammōn, eo eaar juon armej in Nipai jān Zaraemla, kar leļo̧k n̄an Kiin̄ Limai juon kōjatdikdik, im eaar kōņaan jakeļo̧k kōjatdikdik jab eo n̄an armej ro doon. Ilo am̧ riiti Mosaia 7:14–33, kile ta eo Limai eaar ba n̄an armej ro doon n̄an kōketak er, kōkajoorļo̧k tōmak eo aer, im leļo̧k n̄an er kōjatdikdik eo bwe Anij enaaj kar jipan̄ er. Jekdo̧o̧n n̄e kwoj jamin naaj kar lo ruwōm̧ kōn ejja bōd ko wōt āinwōt ko an armej ro doon Limai, ekōjkan an naan ko an maron̄ jipan̄ eok oktakļo̧k n̄an Irooj? Kwonaaj kile, n̄an waanjon̄ak, bwe Limai eaar kakeememej armej ro doon kōn bwebwenato eo m̧oktaļo̧k kōn an Anij kōtļo̧k (lale eoon ko 18–20). Ekōjkan an bwebwenato kein, barāinwōt bwebwenato ko jet ilo jeje ko rekwojarjar ak en̄jake ko an juon make, jipan̄ eok lōke Anij?
Kar ta ko piliej ko 24 kar loi jān armej ro doon Limai?
Ke juon kumi edik in armej ro doon Limai raar jab tōprak aer kappukōt ānen Zaraemla, raar lo piliej kooļ ko 24 kōn jeje ko ilo juon kajin eo jab jeļā kake. Piliej kein, ko raar āliktata ukook jān Kiin̄ Mosaia, kar kwaļo̧k kōn armej ro kar jeļā kake er āinwōt armej in Jared ro, ro raar itok n̄an āne kallim̧ur jān Tawōr eo an Babel im kar āliktata kakkure (lale Mosaia 28:11–19). Tokālik Moronai eaar kōm̧m̧ane juon kōkadudu kōn piliej kein (lale Ether 1:1–2), eo eaar erom̧ bok in Ether. Kile ilo Mosaia 28:18 jekjek eo waļo̧k jān ļo̧o̧k in ippān armej ro an Mosaia.
Irooj ej letok rikanaan ro, rilolo ro, im rikwaļo̧k revelesōn ro n̄an jeraam̧m̧an eo an aolep armej.
Ke Limai eaar ron̄ kōn naan in kam̧ool eo an Ammōn bwe Irooj eaar kwaļo̧k juon rilolo, Limai “eaar m̧ōņōņō otem m̧ōņōņō,im im leļo̧k kam̧m̧oolol n̄an Anij” (Mosaia 8:19). Etke kwoj ļōmņak eaar en̄jake jekjek jab eo? Ta eo kwoj katak kōn rilolo ro jān naan ko an Ammōn ilo Mosaia 8:13–19? Ilo tōre in ad, “Būreejtōnji eo Kein Kajuon im Ko̧o̧njeļ eo an Jon̄oulruo eo rej rejtak āinwōt rikanaan ro, rilolo ro, im rikwaļo̧k revelesōn ro” (Bible Dictionary, “Seer”). N̄aat eo āliktata kwaar kejkōkļo̧kjeņ kōn kōjeraam̧m̧an eo kōn an wōr rikanaan ro, rilolo ro, im rikwaļo̧k revelesōn ro ioon laļ in? Bōlen komaron̄ ļo̧o̧ke ekōjkan an rikanaan ro, rilolo ro im ribōk revelesōn ro kar erom̧ juon “jeraam̧m̧an eļap” n̄an eok (Mosaia 8:18).
Rikanaan Josep Smith ej juon rilolo eļap eo ej jeban tōre in epepen in ad (lale K&B 21:1; 124:125; Josep Smith—Bwebwenato 1:62). Ekōjkan an kwaļo̧k bwebwenato eo an Ammōn kōn juon rilolo ilo tōre in jerbal in karejar eo an?
Imaron̄ jelm̧ae apan̄ ko aō “ilo kajoor an Anij.”
Zeniff eaar kwaļo̧k bwe eaar kōm̧m̧ani bōd ko. Eaar ilo jet iien ļap an kijejeto, im eaar likūt armej ro an—rūtto ro an armej ro an Limai—ilo juon jekjek epen kōn kōm̧m̧ane juon kon ejjab jim̧we ippān Kiin̄ Laman. Bōtaab tokālik, eaar ilo̧k n̄an tariņae ņae armej in Laman ro, eaar jipan̄ armej ro doon jelm̧ae apan̄ ko aer kōn tōmak. Ilo am̧ riiti Mosaia 9–10, pukōt ta eo armej ro doon Zeniff raar kōm̧m̧ane n̄an kwaļo̧k tōmak eo aer. Ekōjkan an Anij kar kōkajoor er? Ta meļeļe in n̄an eok n̄an wōnm̧aanļo̧k “ilo kajoor an Irooj”? (Mosaia 9:17; 10:10–11).
Kālet ko aō remaron̄ kareel epepen ko.
Ekkar n̄an Mosaia 10:11–17, ekōjkan an kar m̧akūtkūt ko im m̧wil ko an rūtto ro an armej in Laman ro bōbrae armej in Laman ro jān jeļā m̧ool eo? Ekōjkan an kar kālet ko an rūtto ro an armej in Laman ro jelet epepen ko tokālik? Ļōmņak kōn armej ro me remaron̄ in kar reel jān tōmak ko im kālet ko am̧; ta eo kwoj kōm̧m̧ane n̄an jipan̄ er ļapļo̧k an wōr aer tōmak ilo Kraist?
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kake n̄an tōpar aikuj ko an baam̧le eo am̧. Erkein rej jet ļōmņak ko.
Mosaia 7:19–20
Kile waanjon̄ak ko me Limai eaar kwaļo̧ki n̄an maron̄ kōketak armej ro doon n̄an an wōr aer tōmak. Ta waanjon̄ak ko jān jeje ko rekwojarjar rej im̧we kōj n̄an “lōke ilo Anij”? Ta meļeļe in n̄an likūt ad lōke ilo Anij? (lale barāinwōt Mosaia 9:17; 10:19). Ta bwebwenato ko jān mour ko ad ak mour ko an rūtto ro ad jemaron̄ kwaļo̧ki n̄an im̧we eļapļo̧k lōke ilo Anij?
Mosaia 7:26–27
Ta eo jej ekkatak kōn Rilo̧mo̧o̧r eo jān eoon kein? (lale barāinwōt K&B 130:22). Etke jej kam̧m̧oolol n̄an jeļā men kein?
Mosaia 8:13–18
N̄an jipan̄ ro uwaan baam̧le eo ad meļeļe ta eo rilolo, bōlen komaron̄ kwaļo̧k n̄an er pija ko kōn kein jerbal ko me rej jipan̄ kōj lo men ko jejjab maron̄ kar loi, āinwōt baikūlaaj ko, telescope, ak microscope. Ekōjkan an kein jerbal kein āinwōt juon rilolo? (lale Moses 6:35–36). Ta eo rilolo ro rej loe me jejjab loe? Ta kein kam̧ool eo ewōr ippād bwe Josep Smith eaar juon rilolo?
Komaron̄ kwaļo̧k pija ko an rikanaan ro ad remour, rilolo ro, im ribōk revelesōn ro im kajjitōk ippān baam̧ļe eo ta eo rejeļā kōn er. Ekōjkan ad ļoor er?
Mosaia 9:14–18; 10:1–10
Ke armej in Laman ro raar jodik er, armej ro doon Zeniff raar pojak ilo kanniōk im ilo jetōb. Ta eo jemaron̄ katak jān Zeniff im armej ro doon kōn m̧aanjabpopo n̄an apan̄ ko?
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Kōkōm̧anm̧anļo̧k Am̧ Make Ekkatak
Kappukōt meļeļe ko am̧ make ilo jetōb. Laajrak in ej kwaļo̧k eoon ko im pepded ko n̄an kalimjōki, jab kōtļo̧k bwe elmakot kein rej kōm̧m̧an jon̄an ekkatak eo am̧. Komaron̄ in im̧we jān eoon kein ak lo pedped ko rejjab kwaļo̧k kaki ijin. Kōtļo̧k an Jetōb eo tōl eok.
Visiōn n̄an Josep Smith, jān Clark Kelley Price