“Māe 18–24. Mosaia 25–28: ‘Kar Kūr Er Armej ro an Anij,’” Itok, Loor Eō—N̄an Kajjojo Armej im Baam̧le ko: Bok in Mormon 2020 (2020)
“Māe 18–24. Mosaia 25–28,” Itok, Loor Eō—N̄an Kajjojo im Baam̧le ko: 2020
Oktak tok eo an Alma eo Edik, jān Gary L. Kapp
Māe 18–24
Mosaia 25–28
“Kar Kūr Er Armej ro an Anij”
Ālkin “ainikien Irooj eaar itok n̄an [Alma],” eaar je men ko Irooj eaar ba n̄an e “bwe en maron̄ wōr ippān” (Mosaia 26:13, 33). Ewi wāween am̧ naaj ļoor waanjon̄ak eo an Alma?
Je En̄jake ko Rej Im̧we Eok
Ālkin an epaakeļo̧k jilu epepen in aer kar jokwe ettoļo̧k jān doon, RiNipai ro raar bar ippān doon im juon wōt. Armej ro an Limai, armej ro an Alma, im armej ro an Mosaia—barāinwōt armej ro an Zaraemla, ro me rejjab bwijin Nipai—kiiō rekar aolep “bōnbōn ippān RiNipai ro” (Mosaia 25:13). Elōn̄ iaer raar barāinwōt kōņaan erom̧ membōr in Kabun̄ eo me Alma eaar ejaake. Kōn menin aolep ro “raar kōņaan bōk ioer etan Kraist” raar peptaij, “im raar kūr er armej ro an Anij” (Mosaia 25:23–24). Ālkin iiō in poktak im kōm̧akoko ko, ilo kalimjōkeļo̧k āinwōt n̄e RiNipai ro raar lukkuun m̧ōņōņō kōn juon iien aenōm̧m̧an.
Ak ejjab to, ro me rejjab tōmak raar jino kakkure ro me raar tōmak. Ta eo eaar kōm̧m̧ane bwe menin eļap an kaburomōjmōj eaar bwe elōn̄ iaan rein me rejjab tōmak rekar ro nejin ritōmak—ro “rej epepen tokālik” (Mosaia 26:1), ekoba ļōmaro nejin Mosaia im juon nejin Alma. Innām juon menin kabwilōn̄lōn̄ eaar waļo̧k, im bwebwenato in kabwilōn̄lōn̄ in eaar letok juon kōjatdikdik n̄an ro jinen im jemān ro me eto im to aer inepata. Ak bwebwenato in oktaktok eo an Alma ejjab n̄an ro jinen im jemān ro wōt me rebōt ajri ro nejier. M̧ool in oktak tok eo ej juon menin kabwilōn̄lōn̄ me, ilo juon ak ruo wāween, ej aikuj waļo̧k n̄an kōj aolep.
Ļōmņak ko n̄an Ekkatak Jeje ko Rekwojarjar eo Ippem̧ Make
N̄aij eddoiki tōmak eo aō make im aō naan in kam̧ool.
Ro me raar ron̄ katak ko an Kiin̄ Benjamin raar en̄jake juon oktak ekabwilōn̄lōn̄ (lale Mosaia 5:1–7), ak oktak tok ej an juon make en̄jake me ejjab maron̄ bar leļo̧k āinwōt bōdan̄ n̄an eo nejin. Kōj aolep jej aikuj en̄jake oktaktok eo ad make n̄an gospel eo an Jisōs Kraist. Ilo am̧ riiti Mosaia 26:1–6 kōn “ro rej epepen tokālik” in RiNipai ro ejjeļo̧k aer tōmak, je ta ko raar waļo̧k kōn aer kar jab tōmak. Komaron̄ bar ļōmņak kōn armej ro me kwōj kōņaan bwe kwon bōktok er n̄an Kraist. Ilo am̧ jab maron̄ kwaļo̧k kōn kar oktak tok eo am̧, Jetōb emaron̄ unoojdikdik kōn men ko komaron̄ kōm̧m̧ani n̄an jipan̄ er bwe en wōr aer tōmak. Ilo am̧ riiti Mosaia 25–28 kōn wāween an Alma im membōr ro jet ilo Kabun̄ in kar jipan̄ ro ilo epepen ko tokālik, ļōmņak ko jet remaron̄ itok ilo kōļmenļo̧kjen eo am̧.
Bar lale Katak im Bujen ko 68:25–29.
Rijerbal eo an Anij em̧ool ej kappukōt n̄an kōm̧m̧an Ankilaan.
Jet iien jemaron̄ ļōmņak bwe juon ritōl an Kabun̄ in āinwōt Alma aolep iien ejeļā men eo ejim̧we n̄an kōm̧m̧ane. Ilo Mosaia 26 jej riit kōn juon būrabōļōm ilo Kabun̄ in me Alma ejjan̄in kar madmōde, im “eaar mijak bwe enaaj kōm̧m̧an bōd ilo mejān Anij” (Mosaia 26:13). Ta eo Alma eaar kōm̧m̧ane ilo jekjek in? (lale Mosaia 26:13–14, 33–34, 38–39). Ta eo me en̄jake eo an Alma ej kwaļo̧k kōn wāween am̧ maron̄ jelm̧ae apan̄ ko reppen ilo baam̧le eo am̧ ak ilo iien jar ko ilo Kabun̄ in?
Emaron̄ bar kabwilōn̄lōn̄ n̄an kōlaajrak m̧ool ko me Anij eaar kwaļo̧k n̄an Alma, epād ilo Mosaia 26:15–32. Keememej bwe jet iaan m̧ool ko rejjab kajju kar uwaak kajjitōk eo an Alma. Ta eo menin ej kwaļo̧k n̄an eok kōn jar im bōk revelesōn ko an juon make?
Aolep em̧m̧aan im kōrā ro rej aikuj bar ļotak.
Elukkuun alikkar bwe Alma eo Edik eaar aikuj bwe en bar ļōtak ilo jetōb, bwe e im ļōmaro nejin Mosaia raar “rikajjōjōtata in ro rijero̧wiwi,” ro raar itōn “ko̧kkure kabun̄ eo an Anij” (Mosaia 28:4; 27:10). Ak ejjab to ālkin oktaktok eo an, Alma eaar kam̧ool bwe oktaktok epojak aolep iien—im emenin aikuj im aorōk—n̄an aolep armej: “Kwōn jab bwilōn̄,” eaar ba, “bwe aolep armej … reaikuj bar ļotak” (Mosaia 27:25; kar kojerbal italics). Me, aaet em̧ool, ekitbuuj eok.
Ilo am̧ riiti en̄jake eo an Alma, ej pād ilo Mosaia 27:8–37, komaron̄ kajjieon̄ likūt eok make ilo jekjek eo ekar pād ie. Kwojjab kajjieon̄ n̄an kakkure Kabun̄ eo, ak komaron̄ ļōmņak kōn men ko kōn kwe make me rej aikuj oktak. Wōn, āinwōt Jemān Alma, ej jipan̄ eok im jar kōn eok “kōn eļap tōmak”? Ta en̄jake ko me rekar jipan̄ “karreel [eok] buruōm̧ kōn kajoor im maron̄ an Anij”? (Mosaia 27:14). Ewi “jon̄an men ko Eaar kōm̧m̧an” me em̧ōj an Irooj kar kōm̧m̧ane n̄an kwe ak baam̧le eo am̧ me kwoj aikuj “keememej”? (Mosaia 27:16). Ta eo kwoj ekkatak jān naan ko an Alma eo Edik im m̧akūtkūt ko an kōn ta meļeļein n̄an bar ļotak? Kajjitōk rōt kein remaron̄ jipan̄ eok jeļā eddōkļo̧k eo am̧ ilo jerbal in bar ļotak.
Bar lale Mosaia 5:6–9; Alma 36; “Conversion” (Gospel Topics, topics.ChurchofJesusChrist.org).
Jemān Eaar Lan̄lōn̄, jān Walter Rane
Anij ej ron̄ jar ko im enaaj uwaaki ekkar n̄an Ankilaan.
Bōlen kwojjeļā kōn juon jinen im jemān āinwōt ilo jekjek eo an Alma eo erūtto, eo me ļaddik ak leddik eo nejin ej kōm̧m̧ani kālet ko renana. Ak bōlen kwe eo me kwoj eo jinen im jemān. Ta eo kwoj loe ilo Mosaia 27:14, 19–24 me ej lewaj n̄an eok kōjatdikdik? Ewi wāween an eoon kein im̧we jar ko am̧ ilo etan ro jet?
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kake n̄an tōpar aikuj ko an baam̧le eo am̧. Erkein rej jet iaan ļōmņak ko.
Mosaia 25:5–11
Ewi wāween an armej ro an Mosaia en̄jake ālkin an riit n̄an er kōn bwebwenato in armej ro an Zeniff im armej ro an Alma? Em̧ōj ke an baam̧le eo am̧ ko̧kwon jet bwebwenato ko me komaron̄ kar riiti? Bōlen komaron̄ kobaik n̄an rekoot ko am̧ ak jino kōm̧m̧an am̧ make? Ta eo komaron̄ kobaikļo̧k me emaron̄ jipan̄ baam̧le eo am̧ (ekoba epepen ko ilju im jekļaj) bwe ren “obrak kōn eļap otem ļap lan̄lōn” im ekkatak kōn “m̧ōkain in em̧m̧an an Anij”? (Mosaia 25:8, 10).
Mosaia 25:16
Etke eaorōk bwe armej ro an Limai ren keememej bwe Irooj eaar kanemkwōj er jān kōm̧akoko? Ta eo Irooj em̧ōj an kōm̧m̧ane n̄an kōj me jej aikuj keememej?
Mosaia 26:29–31; 27:35
Ekkar n̄an eoon kein, ta eo juon armej ej aikuj kōm̧m̧ane n̄an bōk jeorļo̧k bōd?
Mosaia 27:21–24
Ilo am̧ riiti eoon kein, ļōmņak kōn juon eo ilo baam̧le eo am̧ me komaron̄ jar im jitlo̧k kake.
Mosaia 27–28
N̄an jipan̄ baam̧le eo am̧ pijaikļo̧k bwebwenato ko ilo jebta ko, komaron̄ karuwaineneik er n̄an jin̄aik pija in armej ro me rej pād ilo bwebwenato eo im kōjerbal pija ko n̄an bar kwaļo̧k bwebwenato eo. Ak remaron̄ m̧ōņōn̄ōļo̧k n̄e rej tieta kōn bwebwenato eo; ewi wāween aer kwaļo̧k oktak eo me Alma im ļōmaro nejin Mosaia raar ioone?
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Kōkm̧anm̧anļo̧k Ad Katakin
Kōjerbal pija ko. “The Gospel Art Book im LDS Media Library ilo ChurchofJesusChrist.org epād ie pija in alooj ko me remaron̄ jipan̄ [baam̧le eo am̧] pijaikļo̧k katak ak makūtkūt ko” (Teaching in the Savior’s Way, 22).
Pija in juon enjeļ ej waļo̧k n̄an Alma eo Edik jān Kevin Keele