Oktak tok eo an Alma eo Edik, jān Gary L. Kapp

Māe 18–24

Mosaia 25–28

“Im Raar Kūr er Armej ro an Anij”

Jemedwōj Ilan̄ ejeļā ta aikuj ko an ajri ro ilo kūlaaj eo am̧ n̄an ekkatak im jipan̄ er. Kappukōt tōl eo An ilo am̧ riiti Mosaia 25–28 im etale kōlaajrak in.

Je En̄jake ko Rej Im̧we Eok

Kajjitōk bwe ren Kwaļo̧k

Kwaļo̧k pija in ilo kōlaajrak eo an wiik in ilo Itok, Ļoor Eō—N̄an Kajjojo Armej im Baam̧le ko, im kajjitōkin ajri ro n̄an kōmeļeļeik ta eo ej waļo̧k ilo pija eo. Eļan̄n̄e ajri ro rejeļā kōn bwebwenato in Alma eo Edik im ļōmaro nejin Mosaia, kōtļo̧k bwe ren kwaļo̧k ta eo rejeļā kake.

Katakin Katak eo: Ajri ro Reddikļo̧k

Mosaia 26:30–31

Irooj ekōņaan bwe in jeorļo̧k bōd.

Irooj ekar katakin Alma bwe Ej jouj in jeorļo̧k bōd ran ro rej ukweļo̧k. Jej aikuj ļoor waanjon̄ak ko An ilo ad jeorļo̧k bōd an ro me rej bōd ņae kōj.

Makūtkūt ko Maron̄ Kōm̧m̧ani

• Riit n̄an ajri rein naan in jān Mosaia 26:31: “Kom̧ naaj barāinwōt jeorļo̧k an doon bōd.” Kōtļo̧k bwe ajri ro ren kamineneik er ba “Ij jeorļo̧k am̧ bōd” jejjo kōttan, im lale eļan̄n̄e rejeļā ta meļeļein jeorļo̧k bōd. Kwaļo̧k juon en̄jake jān mour eo am̧ ke kwar jeorļo̧k an juon armej bōd ak juon armej ekar jeorļo̧k am̧ bōd.

• Jipan̄ ajri ro n̄an kwaļo̧k kilen jeorļo̧k an doon bōd. Kajjitōk ippān juon ajri n̄an kōtōnn̄e em̧ōj an kar kōm̧m̧ane juon men n̄an kōmetak ak kaenepataik bar juon ajri. Ta eo ajri eo juon emaron̄ ba ak kōm̧m̧ane n̄an kwaļo̧k an jeorļo̧k bōd?

• Kajjitōk ippān ajri ro n̄an jin̄n̄aik juon mej eo ekaburomōjmōj ilo rājet in peba eo im juon mej eo elem̧ōņōņō ilo rājet eo juon ilo ejja peba eo wōt. Kajjitōk ippāer bwe ren kajutak juon peba eo ej kwaļo̧k kōn juon en̄jake ke juon jatier ak jeier ak m̧ōttāer ekar illu ippāer. Kajjitōk ippāer bwe ren kajutak juon peba eo ej kwaļo̧k kōn mej eo elem̧ōņōņō ilo aer ba wāween aer kar jeorļo̧k bōd ak an naaj armej eo jeorļo̧k aer bōd.

Mosaia 27:8–37

Gospel eo ej jipan̄ armej oktak im erom̧ āinwōt Jisōs.

Oktak eo an Alma eo Edik im ļōmaro nejin Mosaia ej kwaļo̧k bwe kōn Jisōs Kraist im kōn gospel eo An, jabdewōt armej remaron̄ oktak im erom̧ āinwōt Jisōs.

Makūtkūt ko Maron̄ Kōm̧m̧ani

• Kakaduik bwebwenato in mour eo an Alma eo Edik im ļōmaro nejin Mosaia ke rekar oktak, āinwōt an kōmeļeļeik ilo Mosaia 27:8–37. N̄an Jipan̄, lale “Jebta 18: Alma eo Edik ej Ukweļo̧k” (Bwebwenato ko ilo Bok in Mormon, 49–52, ak pija in alooj ko me rejjejet n̄an katak eo ilo ChurchofJesusChrist.org). Innām bar kwaļo̧k bwebwenato eo, kōtļo̧k bwe ajri ro ren kwaļo̧k meļeļe ko me rekeememeji. Kōtļo̧k bwe ren tieta kōn bwebwenato eo, im jipan̄ er lo oktak eo ikōtaan mour eo an Alma im ļōmaro nejin Mosaia m̧okta jān aer kar ukweļo̧k im mour eo aer ālkin.

• Jipan̄ ajri ro kōjerbale peij in makūtkūt eo an wiik in n̄an kwaļo̧k bwebwenato in Alma im ļōmaro nejin Mosaia. Riiti Mosaia 27:24, im jipan̄ ajri ro meļeļe ke Alma im ļōmaro nejin Mosaia rekar oktak kōnke rekar ukweļo̧k jān jerawiwi ko aer im kar mour kōn gospel eo an Jisōs Kraist.

  

  Jemān Ej Lan̄lōn̄, jān Walter Rane

Mosaia 28:1–8

Imaron̄ kwaļo̧k gospel eo.

Ālkin aer kar oktak, ļōmaro nejin Mosaia rekar kijoroor n̄an kwaļo̧k kōn gospel eo n̄an aolep armej, ekoba aer rikōjdat, RiLaman ro.

Makūtkūt ko Maron̄ Kōm̧m̧ani

• Kōjerbal Mosaia 28:1–8 n̄an kwaļo̧k n̄an ajri ro kōn an ļōmaro nejin Mosaia kālet n̄an kwaļo̧k gospel eo n̄an RiLaman ro. N̄an jipan̄, lale “Jebta 19: Ajri ro Nejin Mosaia rej Erom̧ Mijenede” (Bwebwenato ko ilo Bok in Mormon, 53, ak pija in alooj ko me rejejjet n̄an katak eo ilo ChurchofJesusChrist.org). Etke rekar kōņaan kwaļo̧k kōn gospel eo? (lale eoon 3).

• Jipan̄ kajjojo ajri bwe ren ļōmņak kōn juon eo me ej aikuj jeļā eļapļo̧k kōn gospel eo. Jipan̄ ajri ro karōke ta eo renaaj ba n̄an armej ro me rej ļōmņak kaki.

• Al ippān doon juon al kōn kwaļo̧k kōn gospel eo āinwōt “I Want to Be a Missionary Now” (Children’s Songbook, 168). Kwaļo̧k naan ko ilo al eo me ej kōmeļeļeik wāween jemaron̄ kwaļo̧k gospel eo n̄an ro jet.

Katakin Katak in: Ajri ro Rerūttoļo̧k

Mosaia 26:22–23, 29–30; 27:8–37

Anij ej jeorļo̧k bōd an ro rej ukweļo̧k.

Eļan̄n̄e jabdewōt ilo kūlaaj eo am̧ ej ļōmņak bwe emaron̄ lukkuun jeorļo̧k bōd ilo m̧ool, naan ko an Anij n̄an Alma eo Erūtto im en̄jake ko an Alma eo Edik remaron̄ jipan̄.

Makūtkūt ko Maron̄ Kōm̧m̧ani

• Kajjitōk ippān ajri ro n̄an kōtōnn̄e rej kōnono n̄an juon eo me ejjab tōmak ke Anij emaron̄ jeorļo̧k an bōd n̄an jidik. Kajjitōk ippāer n̄an etale naan ko an Anij n̄an Alma eo me Erūtto ilo Mosaia 26:22–23, 29–30. Ta eo rekar lo me enaaj kar jipan̄ armej eo?

• Mokta jān kūlaaj, kajjitōk ippān juon iaan ajri ro bwe en riiti kōn an kar Alma eo Edik kar oktak, ej pād ilo Mosaia 27:8–37, im pojak n̄an kwaļo̧k bwebwenato in n̄an kūlaaj eo āinwōt n̄e e Alma eo Edik. (Eļan̄n̄e emenin aikuj, kajjitōk bwe en kajjitōkin ro jinen im jemān n̄an jipan̄.) Ilo an ajri ro kwaļo̧k bwebwenato eo, kajjitōk kajjitōk ko āinwōt “Ewi wāween am̧ kar en̄jake ke … ?” ak “Ta eo ekar waļo̧k tokālik?”

• Kajjitōk ippān ajri ro n̄an kōm̧m̧ane juon laajrak jān Mosaia 27:8–10 me ej kōmeļeļe mour eo an Alma im ļōmaro nejin Mosaia m̧okta jān aer kar oktak. Innām kajjitōk ippāer n̄an kōm̧m̧ane bar juon laajrak jān Mosaia 27:32–37 me ej kōmeļeļeik mour eo aer ālkin wōt. Ekkar n̄an eoon ko 24–29, ta eo ekar kōm̧m̧an oktak in eļap ilo Alma?

Mosaia 26:29–31

N̄an jeorļo̧k bōd, ij aikuj jeorļo̧k bōd.

Jipan̄ ajri ro lo ippān doon eo ikōtaan jeorļo̧k bōd n̄an ro jet im jeorļo̧k bōd eo me rej kōjatdikdik kake n̄a er make.

Makūtkūt ko Maron̄ Kōm̧m̧ani

• Kajjitōk ippān ajri ro n̄an riiti Mosaia 26:29–31 im bwine jet kōttan an waļo̧k naan in “jeorļo̧k bōd.” Ta eo eoon kein rej katakin kōj kōn jeorļo̧k an ro jet bōd? Ewi wāween an jeorļo̧k bōd jipan̄ jim̧or armej eo me ekar kōm̧m̧ane juon men eo ebōd im armej eo me ekar m̧ōņōņō in jeorļo̧k bōd?

• Kajjitōk ippān juon ajri n̄an jin̄n̄a juon būriij ioon boot eo, im kwaļo̧k naan in me kar kout jān Būreejtōn Thomas S. Monson: “Eo me ejjab maron̄ jeorļo̧k an ro jet bōd ej rube būriij eo me E make ej aikuj ellā jāne eļan̄n̄e enkar tōpar lan̄, bwe aolep rej aikuj jeorļo̧k bōd” (George Herbert, quoted in “Hidden Wedges,” Ensign, May 2002, 19). Jāāre m̧ōttan būriij eo, im kajjitōk ippān ajri ro n̄an jipan̄ eok bar kalōk e jidik kōn jidik, ilo aer kwaļo̧k wāween ko me remaron̄ jeorļo̧k an ro jet bōd. Kajjitōk ippāer n̄an ļōmņak kōn juon eo me rej aikuj jeorļo̧k an bōd.

Mosaia 27:8–24

Imaron̄ jar im jitlo̧k n̄an Anij n̄an kōjeraam̧m̧an ro ij iakwe er.

Ļōmņak kōn wāween am̧ maron̄ jipan̄ ajri ro meļeļe ke jitlo̧k emaron̄ kōkajoorļo̧k tōmak ko aer ilo aer jar kōn armej ro rej iakwe er.

Makūtkūt ko Maron̄ Kōm̧m̧ani

• Riit ippān doon Mosaia 27:8–24, im kajjitōk ippān ajri ro n̄an pukōt ta eo Alma im armej ro an rekar kōm̧m̧ane n̄an jipan̄ Alma eo Edik. Kwaļo̧k juon en̄jake eo me kwar jitlo̧k im jar kōn juon armej, im rōjan̄ ajri ro n̄an kwaļo̧k en̄jake ko aer make.

• Kajjitōk ippān ajri ro n̄an ļōmņak kōn juon eo me rejeļā bwe ej aikuj jipan̄ an Anij ilo mour eo an. Kwaļo̧k am̧ naan in kam̧ool bwe ajri ro remaron̄ jar im jitlo̧k kōn tōmak n̄an Anij bwe en kōjeraam̧m̧an armej in. Kajjitōk ippān ajri ro n̄an jar kōn armej ro me rej ļōmņake im, eļan̄n̄e remaron̄, jitlo̧k kake er barāinwōt.

Kōketak n̄an Ekkatak ilo Mweo

Kajjitōk ippān ajri ro n̄an kālet juon men eo me rekar ekkatak kake kōn en̄jake eo an Alma eo Edik im ļōmaro nejin Mosaia me rekōņaan kwaļo̧k n̄an baam̧le ko aer.

Kōkōm̧anm̧anļo̧k Ad Katakin

Rie ro jinen im jemān. “Ro jinen im jemān rej rūkaki ro raorōktata ilo gospel eo n̄an ajri ro nejier—ewōr ippād jim̧or eddo im kajoor eo eļaptata n̄an ukōt ajri ro nejier (lale Deuteronomi 6:6–7). Ilo am̧ katakin ajri ro ilo mōnjar eo, jar im kappukōt wāween ko n̄an rie ro jineer im jemāer” (Teaching in the Savior’s Way, 25).