Minerva K. Teichert (1888-1976), Ammon before King Limhi, 1949-1951, oil on masonite, 35 15/16 x 48 inches. Brigham Young University Museum of Art, 1969.

Eprōļ 27–Māe 3

Mosaia 7–10

“Ilo Kajoor an Irooj”

Lukkuun jar ilo am̧ riiti Mosaia 7–10, kejōkļo̧kjeņ kōn im̧we ko kwaar būki. Ewi wāween an m̧ool ko ilo jebta kein jipan̄ tōpar aikuj ko an ajri ro kwoj katakin?

Je En̄jake ko Rej Im̧we Eok

Kajjitōk n̄an Kwaļo̧k

Rōjan̄ ajri ro n̄an kwaļo̧k jabdewōt men eo remaron̄ jeļā kōn m̧akūtkūt ko ilo jepta kein. Komaron̄ bōk jipan̄ ilo “Jebta 13: Zeniff” (Bwebwenato ko ilo Bok in Mormon, 36–37, ak pija in alooj ko rejjejet n̄an katak eo ilo ChurchofJesusChrist.org).

Katakin Katak ko: Ajri ro Reddikļo̧k

Mosaia 7:18–20, 33

Anij ekar jipan̄ armej ro ilo jeje ko rekwojarjar, im E emaron̄ jipan̄ eō.

Armej ro an Limai, ro me rekar rikōm̧akoko n̄an riLaman ro, kar aikuj tōmak bwe Anij en jipan̄ er, kōn menin Limai ekar kakeememej er kōn iien ko me Anij ekar jipan̄ armej ro An.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an kwaļo̧k juon iien eo me rekar aikuj jipan̄. Kōmeļeļe bwe armej ro an Kiin̄ Limai rekar pād ilo jorrāān, kōn menin ekar kwaļo̧k juon bwebwenato n̄an jipan̄ er bwe en wōr aer tōmak. Riiti Mosaia 7:19 n̄an ajri ro, im kwaļo̧k juon pija in ro nejin Israel ilo aer kar depļo̧ke Lomaļo̧ Ekilmir (lale Moses Parting the Red Sea, ChurchofJesusChrist.org). Etale bwebwenato in im bwebwenato in manna eo, im jipan̄ ajri ro m̧akūtkūt ļoor bwebwenato ko (lale jebta ko 17 im 18 ilo Bwebwenato ko ilo Kallim̧ur Mokta, ak pija in alooj ko rejjejet n̄an katak eo ilo ChurchofJesusChrist.org). Ewi wāween an kar Irooj jipan̄ armej ro? Kam̧ool bwe Irooj emaron̄ bar jipan̄ kōj.

• Riiti Mosaia 7:33 n̄an ajri ro, im jipan̄ er meļeļe ta eo eoon in ej katakin kōj n̄an kōm̧m̧an bwe jān bōk jipan̄ jān Irooj. Jipan̄ ajri ro ļōmņak kōn makūtkūt ko me remaron̄ bōk jikin men kein, im āliji ilo aer kōm̧m̧ane makūtkūt ko. Ta jet iaan men ko jej aikuj jipan̄ kake? Ewi wāween ad maron̄ kwaļo̧k ke jej lōke Irooj? Kwaļo̧k juon am̧ en̄jake ke kwar lōke Irooj im Ekar jipan̄ eok.

• Kālet jet iaan eoon ko jān “Bwebwenato ko ilo Bok in Mormon” ak “Nephi’s Courage” (Children’s Songbook, 118–19, 120–21) n̄an al ippān ajri ro. Jipan̄ er kile wāween an Irooj kar jipan̄ armej ro ilo Bok in Mormon. Kwaļo̧k bwebwenato ko ilo jeje ko rekwojarjar me kwoj en̄jake renaaj jipan̄ ajri ro katak n̄an lōke Irooj.

Mosaia 8:16–17

Anij ekar letok n̄an kōj rikanaan, rilolo, im rikwaļo̧k revelesōn.

Ewi wāween am̧ maron̄ kōjerbal Mosaia 8:16–17 n̄an katakin ajri ro kōn eddo eo an juon rikanaan āinwōt juon rilolo?

M̧akūtkūt ko Maron̄ Kōm̧m̧ani

• Kwaļo̧k n̄an ajri ro wāween aer likūt peier n̄an mejeer āinwōt n̄e rej reito reitak kōn māj kūlaaj ko ak pekūlaaj ko. Riiti Mosaia 8:17, im kajjitōk ippān ajri ro n̄an likūt kūlaaj ko aer kajjojo iien ko rej ron̄ naan in “rilolo.” Kōmeļeļe bwe Anij em̧ōj an letok n̄an kōj rikanaan im bwe juon iaan eddo ko an juon rikanaan ej n̄an erom juon “rilolo” kōnke emaron̄ “lo” ta men ko rej itok. Kwaļo̧k jet iaan waanjon̄ak ko in men ko me rikanaan ro em̧ōj aer loe im kwaļo̧k n̄an kōj (ekoba jeje ko rekwojarjar), ak kwaļo̧k juon waanjon̄ak kōn juon rikanaan eo ej jerbal āinwōt juon rilolo (eo āinwōt 1 Nipai 11:20–21).

• Mwijit peba eo āinwōt jekjekin juon ne, im jin̄aik pija ko kōn men ko me rikanaan ro rekar kapilōk kōj n̄an kōm̧m̧ani. Likūt annan̄ in ne ko ilo juon iaļ ipeļaakin ruum̧ eo, im kōmeļeļeik pija ko. Kōtļo̧k bwe ajri ro ren bōk koņaer n̄an erom āinwōt juon rikanaan im tōl ajri ro jet ilo am̧ ļoor annan̄ in ne kein.

• Kwaļo̧k juon pija ilo laajrak eo an wiik in ilo Itok, Ļoor Eō—N̄an Kajjojo Armej im Baam̧le ko, im kajjitōk ippān ajri ro n̄an kōmeļeļeik ta eo rej loe. Kōmeļeļeik bwe Rikanaan Josep Smith ekar juon rilolo. Irooj ekar letok n̄an e kein jerbal ko ņa etaer Urim im Thummim im juon dōkā an rilolo n̄an kōjerbale ilo an kar ukōt Bok in Mormon.

• Kwaļo̧k juon pija eo ekadu kōn juon ennaan jān kweilo̧k eo eļap jān Būreejtōn eo an Kabun̄ in (ak kwaļo̧k juon pijain im riiti juon men eo em̧ōj an kar katakin kake). Kwaļo̧k naan in kam̧ool eo am̧ ke ej juon rikanaan, rilolo, im rikwaļo̧k revelesōn.

Katakin Katak ko: Ajri ro Rerūttoļo̧k

Mosaia 7:18–20, 33; 9:14–19; 10:6–10, 19–21

Anij ekar jipan̄ armej ro ilo jeje ko rekwojarjar, im Emaron̄ jipan̄ eō.

Zeniff im armej ro an, ro me rej jukjuk im amņak ilo āneen riLaman ro, im riLaman ro rekar m̧an er im rekar aikuj jipan̄ an Anij. Ta eo ajri ro remaron̄ katak jān bwebwenato in kōn an Anij jipan̄ ajri ro Nejin?

M̧akūtkūt ko Maron̄ Kōm̧m̧ani

• Ajije ajri ro n̄an jilu kurup ko, im kajjitōk ippān kajjojo kūrub n̄an ekkatak juon iaan bwebwenato ko ilo jeje ko rekwojarjar me rej ellaajrak: RiIsrael ro rej kijoone Lomaļo Ekilmir (lale Exodus 14:10–14, 21–31), baam̧le eo an Liai rej ito itak ilo āne Jem̧aden (lale 1 Nipai 16:9–16; 17:1–6), im armej ro an Zeniff im RiLaman ro rekar jipan̄ er anjo̧ jān kōm̧akoko (lale Mosaia 9:14–19; 10:6–10, 19–21). Ewi wāween an kar armej ro ilo bwebwenato kein kwaļo̧k ke rej lōke Anij? Ewi wāween an kar Anij jipan̄ er? Ewi wāween An jipan̄ kōj n̄e jej lōke E?

• Kajjitōk ippān ajri ro n̄an je juon mālijjon̄ ak apan̄ me rej jelm̧ae ioon boot eo. Kajjitōk ippān juon ajri n̄an riiti Mosaia 7:33, im rōjan̄ ajri ro jet n̄an jāāre juon iaan melejon̄ ko ak apan̄ ko kajjojo iien n̄e rej ron̄ juon men eo me remaron̄ kōm̧m̧ane n̄an bōk jipan̄ eo an Irooj. Ewi wāween ilo ad lōke Irooj maron̄ jipan̄ kōj ellā jān apan̄ ko ad?

Mosaia 8:12–19

Anij ej letok rikanaan ro, rilolo ro, im ribōk revelesōn ro n̄an jeraam̧m̧an eo an aolep armej.

Jej rejtake Būreejtōnji eo Kein Kajuon im Rijilōk ro Jon̄oulruo āinwōt rikanaan ro, rilolo ro, im ribōk revelesōn ro. Ewi wāween am̧ maron̄ katakin ajri ro kōn aorōk in rikanaan ro?

M̧akūtkūt ko Maron̄ Kōm̧m̧ani

• Kālet jet iaan naan ko reaorōk jān Mosaia 8:12–19, im je ioon boot eo. Kajjitōk ippān juon ajri n̄an riiti eoon kein, im kajjitōk ippān ajri ro jet n̄an kajutak peier n̄e rej ron̄ naan ko ioon boot eo. Bōjrak riit im kōmeļeļeik kajjojo naan ko āinwōt juon kūlaaj.

• Kajjitōk ippān ajri ro n̄an etale Mosaia 8:16–18 n̄an katak ta in rilolo. Je jentōj in ioon boot eo: Juon rilolo ej āinwōt . Jipan̄ ajri ro ļōmņak kōn wāween ko n̄an kadedeikļo̧k juon jentōj n̄an kōmeļeļe etke juon rilolo ej juon kōjeraam̧m̧an n̄an kōj—n̄an waanjon̄ak, juon rilolo ej āinwōt juon rikōjparok mour, eo ej kakkōļ kōj kōn kauwōtata ko.

• Kālet juon naan jān Mosaia 8:16–17, im je ki ņai ioon boot eo, bōk jikin kajjojo naan ko kōn juon men eo ewōr kōkkaļe ie. Leļo̧k n̄an ajri ro juon laajrak in kōkkaļļe ko me rej bōk jikin, im kōtļo̧k bwe ren kwaļo̧k meļeļein ak “ukōte” naan eo āinwōt men ko rilolo ro rej kōm̧m̧ane. Ta wāween ko jet me rikanaan ro, rilolo ro, im ribōk revelesōn ro rej “juon jeraam̧m̧an eļap” n̄an kōj?? (Mosaia 8:18).

Mosaia 9:14–18; 10:10–11

N̄e ij mōjņo̧, Irooj emaron̄ kōkajoor eō.

N̄e ajri ro rej jelm̧ae apan̄ ko, jet iien rej en̄jake m̧ōjņo̧ im ban jipan̄ er make. Kōjerbal bwebwenato eo kōn armej ro an Zeniff n̄an katakin ajri ro bwe ren maron̄ bōk kajoor jān Irooj.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an kwaļo̧k wāween ko me remaron̄ kajoor ilo mour in kanniōk. Ta meļeļein n̄an bōk “kajoor an armej”? (lale Mosaia 10:11). Ta meļeļein n̄an bōk “kajoor an Irooj”? (lale Mosaia 9:17–18; 10:10). Ewi wāween ad bōk kajoor an Irooj?

• Karuwaineneik ajri ro n̄an jin̄aik juon pija in juon armej eo ej en̄jake an wōr ippān kajoor an Irooj im kwaļo̧k etke raar jin̄aik armej in.

Kōketak Ekkatak ilo M̧weo

Kajjitōk ippān ajri ro n̄an kwaļo̧k ippān baam̧le ko aer juon bwebwenato jān jeje ko rekwojarjar me ej im̧we er n̄an “likūt [aer] kōjatdikdik ilo Anij” (Mosaia 7:19).

Kōkōm̧anm̧anļo̧k Ad Katakin

Kajjitōk kajjitōk ko reim̧we. Kajjitōk kajjitōk ko me rej karuwaineneik ajri ro n̄an kwaļo̧k naan in kam̧ool ko aer kōn m̧ool ko an gospel eo. N̄an waanjon̄ak, eļan̄n̄e kwoj ekōnono kōn rikanaan ro, komaron̄ kajjitōk ippān ajri ro n̄an kwaļo̧k wāween an juon rikanaan kar kōjeraam̧m̧an er.