“Māe 25–31. Mosaia 29–Alma 4: ‘Raar Dim im Pen,’” Itok, Ļoor Eō—N̄an Būraimere: Bok in Mormon 2020 (2020)
“Māe 25–31. Mosaia 29–Alma 4,” Itok, Ļoor Eō—N̄an Būraimere: 2020
Alma eo Edik Ej Kwaļo̧k Naan, jān Gary L. Kapp
Māe 25–31.
Mosaia 29–Alma 4
“Raar Dim im Pen”
Ajri ro kwoj katakin er remaron̄ katak eļapļo̧k ilo kūlaaj eo am̧, ak remaron̄ katak eļapļo̧k eļan̄n̄e rej kōm̧m̧ane juon imminene in ekkatak jeje ko rekwojarjar ilo m̧weo. Ļōmņak elmen am̧ maron̄ rōjan̄ im jipan̄ ekkatak gospel eo ilo m̧weo.
Je En̄jake ko Rej Im̧we Eok
Kajjitōk bwe ren Kwaļo̧k
Kajjitōk ippān ajri ro n̄an jijet ioon laļ ilo juon doulul, innām kōdābwiļ juon booļ n̄an juon iaer. Kajjitōk ippān juon ajri bwe en kwaļo̧k men eo ejkab ekkatak kōn gospel eo ilo m̧weo ak ilo Būraimere. Innām kajjitōk ippān juon ajri bwe en kōdābwiļi booļ eo n̄an ro jet. Ālijji m̧ae aolep ajri em̧ōj aer bōk kuņaer n̄an kwaļo̧k jet men.
Katakin Katak: Ajri ro Reddikļo̧k
Āinwōt juon membōr in Kabun̄ in, ij aikuj iakwe im jerbal n̄an ro jet.
Komaron̄ jab kōņaan kwaļo̧k n̄an ajri ro kōn katak ko an Nior, ak remaron̄ in jeraam̧m̧an jen jeļā bwe ilo Kabun̄ in jej jerbal kōnke jej iakwe ro jet, ejjab kōnke jej kōņaan m̧weie ak bun̄bun̄.
Makūtkūt ko Maron̄ Kōm̧m̧ani
-
Kwaļo̧k n̄an ajri ro, ilo jekjek ko repidodo, kōn bwebwenato eo an Alma im Nior (lale Alma 1; “Jebta 20: Alma im Nior,” Bwebwenato ko an Bok in Mormon, 54–55, ak pija in alooj ko rejjejet n̄an katak eo ilo ChurchofJesusChrist.org). Kwaļo̧k bwe men̄e ro m̧ōttan Nior raar lāj n̄an membōr ro an Kabun̄ in, elōn̄ iaan membōr ro an Kabun̄ in raar pād wōt ilo jouj im iakwe.
-
Riiti Alma 1:30 n̄an ajri ro, im jipan̄ er meļeļe bwe armej ro ilo Kabun̄ in raar kwaļo̧k ta eo ewōr ippāer armej ro rej aikuj jipan̄. Jipan̄ ajri ro ļōmņak kōn men ko remaron̄ kwaļo̧k im armej ro remaron̄ kwaļo̧ki n̄an er. Rōjan̄ ajri ro n̄an jin̄aiki kōttōbar ko.
-
Al juon al ippān doon kōn iakwe im jerbal in jipan̄, āinwōt “Kindness Begins with Me” (Children Songbook, 145), im jipan̄ ajri ro ļōmņak kōn m̧akūtkūt ko remaron̄ ļoor al eo.
Anij enaaj uwaake jar ko aō.
Ke Alma im RiNipai ro raar en̄jake “eļap mijak” (Alma 2:23), raar jar kōn jipan̄ im raar kajoorļo̧k. Jipan̄ ajri ro katak jān waanjon̄ok ko aer.
M̧akūtkūt ko Maron̄ Kōm̧m̧ani
-
Kōjerbal pija ko ilo unin tōl eo an wiik in ilo Itok, Ļoor Eō—N̄an Kajjojo im Baam̧le ko ak ilo “Jebta 21: RiAmlijai Ro” (Bwebwenato ko an Bok in Mormon, 56–57, ak pija in alooj ko rejjejet n̄an katak eo ilo ChurchofJesusChrist.org), jiron̄ļo̧k ajri ro elmen an RiNipai ro bōk kajoor n̄an jum̧ae RiAmlijai ro. Kajjitōk ippān ajri ro kōn men ko me rekamijak ak pen n̄an er, im kam̧ool bwe remaron̄ in jar n̄an Jemedwōj Ilan̄ kōn jipan̄ kōn men kein.
-
Kwaļo̧k juon en̄jake kōn iien eo Anij eaar jipan̄ kwe ālkin am̧ kar jar n̄an E. Kajjitōk ippān ajri ro n̄an kwaļo̧k en̄jake ko aer kōn jar.
Aō naan in kam̧ool emaron̄ kōkajoor ro jet.
Emakijkij an “lukkuun naan in kam̧ool” (Alma 4:19) eo an juon ajri maron̄ in bōk eļap im̧we ioon ro jet. Elmen am̧ maron̄ jipan̄ ajri ro lo wāween ko n̄an kwaļo̧k naan in kam̧ool ko aer?
Makūtkūt ko Maron̄ Kōm̧m̧ani
-
Kōpeļļo̧k jeje ko rekwojarjar n̄an Alma 4:19, im kōmeļeļeik bwe ke Alma eaar lo an kar armej ro jerawiwi, eaar kālet wāween eo em̧m̧antata n̄an jipan̄ er ej n̄an kwaļo̧k “naan in kam̧ool eo em̧ool” n̄an er. Kōjerbal peij in m̧akūtkūt eo an wiik in n̄an katakin ajri ro ta in naan in kam̧ool im ta eo ekoba ie. Rōjan̄ er n̄an kwaļo̧k naan in kam̧ool ko aer.
-
Lutōk jidik dān ilowaan juon kab kūlaaj, im kōmeļeļeiki bwe dān eo ej āinwōt naan in kam̧ool ko ad kōnke jemaron̄ kwaļo̧k n̄an ro jet. Lutōk kūlaaj in dān eo ilo kab jidikdik eo an kajjojo ajri, im jiron̄ļo̧k ajri ro ke n̄e jej kwaļo̧k naan in kam̧ool ko ad, jej jipan̄ ro jet bar bōk naan in kam̧ool ko rekajoor.
-
Eļan̄n̄e ajri ro rekōņaan, kōtļo̧k bwe ren kamminene kwaļo̧k naan in kam̧ool ko aer. Kwaļo̧k jet wāween ko remaron̄ kwaļo̧k ke rejeļā gospel in ej m̧ool, ekoba m̧akūtkūt ko aer.
Katakin Katak: Ajri ro Rōtūttoļo̧k
Imaron̄ jeļā n̄an kile katak ko rebōd.
Kōn jet iien ilo mour ko ad, jej aolep maron̄ in jelm̧ae armej ro āinwōt Nior—ro rej kajjieon̄ in m̧ōņe kōj kōn ennaan ko me āinwōt naan kōpaļpaļ ak rej riab im kakkure. Kwaļo̧k bwebwenato in ilo Alma 1:2–9 emaron̄ jipan̄ ajri ro pojak n̄an kain rot in ilo mour ko aer.
Makūtkūt ko Maron̄ Kōm̧m̧ani
-
Jipan̄ ajri ro riiti Alma 1:2–4 n̄an etale jet iaan men ko me Nior, juon rūkaki eriab, eaar kwaļo̧ki. Jipan̄ er ejaake juon teej in m̧ool ak riab kōjerbal naan ko jān eoon kein. Etke Setan jet iien ej kobaik m̧ool ippān riab? Jipan̄ ajri ro ļōmņak kōn jet waanjon̄ok ko.
-
Ālkin etale Alma 1:2–9 ippān doon, kajjitōk ippān kajjojo ajri n̄an riiti jeje kein rekwojarjar: Matu 7:21–23; 2 Nipai 26:29–31; Mosaia 18:24–26; and Hilamōn 12:23–26. Elmen an jeje kein rekwojarjar jum̧ae katak ko an Nior? Elmen ad maron̄ kōjerbal jeje ko rekwojarjar n̄an kapen naan in kam̧ool eo ad make kōn gospel in?
Āinwōt juon membōr in Kabun̄ in, ij aikuj iakwe im jerbal n̄an ro jet.
Jet iien membōr in Kabun̄ in ilo tōre ko an Alma raar iakwe im jouj, im tōre ko jet raar jab jouj im raar utiej bōro. Jipan̄ ajri ro kwoj katakin er n̄an ekkatak jān waanjon̄ok ko aer.
M̧akūtkūt ko Maron̄ Kōm̧m̧ani
-
Jipan̄ ajri ro riiti Alma 4:6–13, im kōmeļeļeik naan kein āinwōt “illulu,” “kakure,” im “dike” (kōjerbal juon tikjinede eļan̄n̄e ekkar). Elmen ad en̄jake n̄e armej rej kōm̧m̧an wāween kein n̄an kōj? Kajjitōk ippān ajri ro n̄an pukot naan ko ilo Alma 1:26–30 me ekōmeļeļeik elmen an Jemedwōj Ilan̄ kōņaan bwe jen kōm̧m̧an n̄an ro jet.
-
Kajjitōk ippān ajri ro n̄an riiti Alma 1:27, 30 im kōm̧m̧ane juon laajrakin kain rot armej membōr ro an Kabun̄ in rej jipan̄ er. Kajjitōk ippān ajri ro n̄an ļōmņak kōn armej ro ipeļaakier ak jikuuļ ko me remaron̄ “[pād] ilo aikuj” (Alma 1:30) kōn aer iakwe im jipan̄. N̄an kapen pedped in katak in, al juon al ippān doon kōn jouj, āinwōt “I’ll Walk with You” (Children’s Songbook, 140–41).
Aō naan in kam̧ool emaron̄ kōkajoor ro jet.
Alma eaar jijetļo̧k jen jea eo an āinwōt juon riekajet eoutiej bwe en maron̄ joļo̧k eļap iien n̄an kwaļo̧k naan in kam̧ool eo an im jipan̄ armej ro ukweļo̧k. An waanjon̄ok emaron̄ im̧we ajri ro n̄an emakijkij kwaļo̧k naan in kam̧ool ko aer.
Makūtkūt ko Maron̄ Kōm̧m̧ani
-
Riiti Alma 4:8–12, 15 ippān ajri ro, im kajjitōk ippāer n̄an kwaļo̧k jōrrāān ko raar waļo̧k ilo Kabun̄ in, āinwōt an kōmeļeļe ilo eoon kein. Kajjitōk ippān ajri ro n̄an kwaļo̧k jet iaan men ko Alma emaron̄ kar kōm̧m̧ane n̄an mijaļ jōrrāān kein. Jipan̄ er n̄an pukoti, ilo Alma 4:16–20,, ta eo Alma eaar pepe in kōm̧m̧ane. Etke naan in kam̧ool ekajoor?
-
N̄an jipan̄ ajri ro meļeļe ta in naan in kam̧ool im ta eo ekoba ie, kwaļo̧k pija in alooj eo “Apostle Testimony Montage” (ChurchofJesusChrist.org); al juon al ippān doon kōn unin kōnono in, āinwōt “Testimony” (Hymns, no. 137); ak kōjerbal peij in m̧akūtkūt eo an wiik in. Kajjitōk ippān ajri ro n̄an kwaļo̧k ta eo raar katak kōn naan in kam̧ool ko jān kein jipan̄ kein.
Kōketak n̄an Ekkatak ilo M̧weo
Jipan̄ ajri ro ļōmņak kōn ro jet remaron̄ kwaļo̧k aer naan in kam̧ool ilo wiik eo tok. Rōjan̄ er n̄an je juon pepe n̄an jipan̄ er n̄an kadedeļo̧k kōttōbar eo aer.
Kōkōm̧anm̧an Ad Katakin
Kajjitōk kajjitōk ko me ekaaltok naan in kam̧ool. “Kajjitōk kajjitōk ko me elōn̄aj rikatak ro n̄an kwaļo̧k naan in kam̧ool ko kōn pedped in katak ko kar kwaļo̧ki me emaron̄ bōktok juon wāween ekajoor n̄an kūrtok Jetōb” (Teaching in the Savior’s Way, 32). N̄an kajjitōk ippān ajri ro n̄an kwaļo̧k naan in kam̧ool, kajjitōk kajjitōk ko me eim̧we er n̄an ļōmņak kake im kwaļo̧k elmen aer en̄jake kōn Rilo̧mo̧o̧r im gospel eo An. Komaron̄ bar kajjitōk kōn en̄jake ko aer kōn jar, jerbal in jipan̄, kain̄i ko an peptaij, ak en̄jake in im̧we ko an Jetōb Kwojarjar.