Minerva K. Teichert (1888-1976), Kiin̄ Limai im Armej ro An rej ko, 1949-1951, oil on masonite, 35 7/8 x 48 inches. Brigham Young University Museum of Art, 1969.

Māe 11–17

Mosaia 18–24

Emōj Ad kar Deļo̧n̄e juon Bujen Ippān

Ilo am̧ riiti Mosaia 18–24, ļōmņak kōn ajri ro kwoj katakin. Jetōb Kwojarjar eo emaron̄ jipan̄ eok kalikkari m̧ool ko me renaaj ekkar n̄an er.

Je En̄jake ko Rej Im̧we Eok

Kajjitōk bwe ren Kwaļo̧k

Kwaļo̧k juon pija in juon eo ej peptaij, im kajjitōk ippān ajri ro n̄an kwaļo̧k juon men rejeļā kōn peptaij. Remaron̄ kwaļok juon men raar katak ke rej riiti Mosaia 18–24 ippān baam̧ļe ko aer, ilo aer pād ilo juon iien peptaij, ak ilo bar juon jikin.

Katakin Katak eo: Ajri ro Reddikļo̧k

Mosaia 18:7–16

N̄e ij peptaij, ij kōm̧m̧ane juon bujen ippān Anij.

Juon iaan wāween ko raorōk tata n̄an jipan̄ ajri ro m̧aanjabpopo n̄an peptaij ej n̄an katakin er kōn bujen eo renaaj kōm̧m̧ane n̄e rej peptaij.

M̧akūtkūt ko Maron̄ Kōm̧m̧ani

• Etale bwebwenato eo an Alma im armej ro doon ilo Dān ko an Mormon kōjerbal Mosaia 18:7–16 ak “Jebta 15: Alma ej Katakin im Peptaij” (Bwebwenato ko ilo Bok in Mormon, 43–44, ak pija in alooj ko rejejjet n̄an katak eo ilo ChurchofJesusChrist.org). Kwaļo̧k pija eo ilo unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko, im kōm̧m̧an bwe ajri ro ren jiron̄ eok ta eo rejeļā kōn bwebwenato eo.

• Kōjerbal Mosaia 18:8–10 āinwōt juon unin tōl, katakin ajri ro ilo naan ko am̧ make jet iaan men ko renaaj kallim̧ur n̄an kōm̧m̧ani n̄e rej peptaij. N̄an waanjon̄ak, renaaj kallim̧ur n̄an ļoor Jemedwōj Ilan̄ im Jisōs Kraist ilo kaenōm̧m̧an armej ro me rej būrom̧ōj. Kwaļo̧k juon bwebwenato kōn ekōjkan am̧ ak jabdewōt armej kwojeļā ke rekar dāpij wōt kallim̧ur kein. (Bar lale K&B 20:77, 79; Carole M. Stephens, “We Have Great Reason to Rejoice,” Ensign ak Liahona, Nov. 2013, 115–17.)

• Kōmeļeļeik bwe n̄e jej peptaij, Jemedwōj Ilan̄ ej barāinwōt kōm̧m̧ani kallim̧ur ko n̄an kōj. Kwaļo̧k kallim̧ur kein, āinwōt kar kōmeļeļeik ilo Mosaia 18:9–10.

Mosaia 18:17–28

N̄e ij peptaij, ij erom̧ juon uwaan Kabun̄ eo an Jisōs Kraist.

Jipan̄ ajri ro meļeļe ta meļeļe in n̄an erom̧ ro uwaan Kabun̄ in kōn peptaij im kepene.

M̧akūtkūt ko Maron̄ Kōm̧m̧ani

• Kajjitōk ippān jabdewōt armej eo ej kab peptaij n̄an kwaļo̧k en̄jake eo an. Riiti Mosaia 18:17, im kōmeļeleik bwe n̄e jej peptaij jej erom̧ ro uwaan Kabun̄ eo an Jisōs Kraist im Armej ro Rekwojarjar ilo Raan-ko Āliktata im kallim̧ur n̄an ļoor Jisōs.

• Kwaļo̧k n̄an ajri ro pija eo me ej jutak kōn men ko kar kōmeļeļeik ilo Mosaia 18:17–28. N̄ān waanjon̄ak, pija eo Ekapit eo n̄an Priesthood eo (Bok in Gospel Pija, nōm̧ba ko. 106) emaron̄ jutak kōn eoon 18, im pija Kōļļā in Juon M̧ōttan Jon̄oul (Bok in Gospel Pija, nō. 113) emaron̄ jutak kōn eoon 27–28. Kōm̧m̧an bwe ajri ro ren kōmeļeļeik ta eo rej loe ilo pija ko, im kōjerbal pija ko im eoon ko n̄an jipan̄ er lo ta meļeļe in n̄an erom̧ juon uwaan Kabun̄ in.

Jej kōm̧m̧ane juon bujen ippān Anij n̄e jej peptaij.

Mosaia 24:8–17

Anij emaron̄ kōmeraik eddo ko aō.

N̄aat eo Anij eaar kōm̧m̧an bwe en meraļo̧k eddo ko am̧? Ļōmņak kōn wāween ko komaron̄ kwaļo̧k en̄jake ko am̧ im naan in kam̧ool eo ippān ajri ro.

M̧akūtkūt ko Maron̄ Kōm̧m̧ani

• Jipan̄ ajri ro ļōmņak kōn kōl ko repidodo remaron̄ kōm̧m̧ani ilo am̧ kwaļo̧k ta eo eaar waļo̧k n̄an armej ro doon Alma ilo Mosaia 24:8–17. Kwaļo̧k bwe kōnke Alma eaar kālet n̄an ļoor katak ko an Abinadai kōn Jisōs, e im armej ro doon raar kōm̧m̧an ejjab em̧m̧an n̄an er, bōtaab raar jab bōjrak in tōmak ilo Jisōs.

• Riiti Mosaia 24:14–15 n̄an ajri ro. Kanne juon pāāk kōn men ko reddo (bwe en jutak kōn eddo ko), im kūr juon ajri n̄an jibwe pāāk eo. Kōmeļeļeik bwe n̄e jej būrom̧ōj, nan̄inmej, ak wōr inepata ko jet, emaron̄ in āinwōt ineek juon men eddo. Kajjitōk ippān ajri ro n̄an bōk aer iien n̄an jipan̄ ajri eo ineek pāāk eo bwe en meraļo̧k. Kōmeļeļeik bwe Jemedwōj Ilan̄ emaron̄ kōm̧m̧an bwe eddo ko ad ren meraļo̧k n̄e jej kappukot An jipan̄ ilo jar, jerbal n̄an ro jet, im ko jet.

Katakin Katak eo: Ajri ro Rōrūttoļo̧k

Mosaia 18:7–16

N̄e ij peptaij, ij kōm̧m̧ane juon bujen ippān Anij.

Ekōjkan am̧ maron̄ jipan̄ ajri ro kwoj katakin meļeļe kōn bujen eo jej kōm̧m̧ane ilo iien peptaij?

M̧akūtkūt ko Maron̄ Kōm̧m̧ani

• Leļo̧k n̄an kajjojo ajri juon m̧ōttan peba. Riit ippān doon Mosaia 18:8–10, im kūr ajri ro n̄an je ak pijaik ioon jait eo juon ilo peba eo aer kallim̧ūr ko jej kōm̧m̧ani ilo iien peptaij im, ilo turejet eo juon, kōjeraam̧m̧an ko Jemedwōj Ilan̄ ej kallim̧uri kōj. Kōm̧m̧an bwe ren kwaļo̧k ippān kūlaaj eo ta eo rej loe. Ilo aer kwaļo̧k, kajjitōk kajjitōk ko āinwōt kein: Ekōjkan ad maron̄ “būrom̧ōj ippān ro rej būrom̧ōj”? Ta meļeļe in n̄an erom̧ juon rikam̧ool an Anij “ilo aolep jikin ko”? (eoon 9). Ta eo jemaron̄ kōm̧m̧ane n̄an kōjparok bujen ko ad?

• Kajjitōk ippān jet ajri ro me em̧ōj aer peptaij n̄an kwaļo̧k ta eo rej keememej kōn en̄jake eo aer. Ta eo eaar kōm̧m̧an bwe raan eo en aorōk? Elemen aer kar en̄jake? Kōm̧eļeļeik bwe kajjojo Jabōt ej bar kōkāāl bujen peptaij eo aer n̄e rej bōk m̧ōttan kwojkwoj eo. Jipan̄ ajri ro keidi bujen peptaij eo kar kōmeļeļeik ilo Mosaia 18:8–10 ippān jar in kwojkwoj eo (lale K&B 20:77, 79). Ekōjkan ad maron̄ kōm̧m̧ane kwojkwoj eo bwe en juon iien eaorōk, kautieje, ejja āinwōt kar iien peptaij ko ad?

• Kajjitōk ippān juon rioktak ekāāl ej kab oktak n̄an kwaļo̧k ekōjkan an kar katak kōn Kabun̄ in im ekōjkan kar en̄jake eo ke eaar peptaij. Kōm̧m̧an bwe ajri ro ren kajjitōk kajjitōk ko, āinwōt ta eo eaar jipan̄ armej eo kōņaan kōm̧m̧ani kallim̧ur ko ilo Mosaia 18:7–16.

Mosaia 18:17–28

Ij uwaan Kabun̄ eo an Jisōs Kraist im Armej ro Rekwojarjar ilo Raan-ko Āliktata.

Ekōjkan am̧ maron̄ im̧we ajri ro n̄an kam̧m̧oolol kōn kōjeraam̧m̧an ko kōn uwaan Kabun̄ in?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an riiti Mosaia 18:17–28, kappukot katak ko an Kabun̄ eo an Kraist ilo tōre eo an Alma me rejja āinwōt ilo tōre in ad. Je uwaak ko ioon būļak ko ak kab ko, im kōm̧m̧an bwe ajri ro ren kōjerbali n̄an kalōk juon em̧ me ej jutak kōn Kabun̄ eo an Jisōs Kraist.

• Riiti ippān ajri ro naan ko n̄an “The Church of Jesus Christ” (Children’s Songbook, 77), im kajjitōk ippān ajri ro n̄an ļōmņak kōn men ko jej kallim̧ur n̄an kōm̧m̧ani āinwōt ro uwaan Kabun̄ in. Jipan̄ er ļōmņak kōn wāween ko remaron̄ kōjparok kallim̧ur kein.

Mosaia 21:1–5, 13–16; 22:1–11; 24:8–22

Anij emaron̄ kōmeraik eddo ko aō.

Bwebwenato eo an armej ro doon Alma emaron̄ kwaļo̧k n̄an ajri ro bwe jet iien Anij ej jipan̄ ilo kōkajoorļo̧k kōj n̄an niknik ilo mālijjon̄ ko ad ijello̧kin būkiļo̧k jān kōj. Ekōjkan am̧ jipan̄ er katak jān bwebwenato in?

M̧akūtkūt ko Maron̄ Kōm̧m̧ani

• Jipan̄ ajri ro kūle iien ko reļļap jān bwebwenato ko an armej ro doon Limai ilo Mosaia 21:1–5, 13–16; im 22:1–11 im armej ro doon Alma ilo Mosaia 24:8–22. Innām kajjitōk ippān kajjojo ajri n̄an jin̄aik juon iaan iien kein. Kajjitōk ippān ajri ro n̄an likūt pija ko aer ilo laajrak eo ejim̧we n̄an kwaļo̧k bwebwenato eo. Ilo aer kōm̧m̧ane, āliji bwe Anij eaar jipan̄ armej ro ineek eddo ko aer.

• Kajjitōk ippān ajri ro n̄an riiti Mosaia 21:14–15 im 24:13–14. Ekōjkan an Irooj kar uwaake jar ko an armej ro doon Limai im armej ro doon Alma? Kajjitōk ippān ajri ro n̄an kwaļo̧k iien ko ke raar jar kōn jipan̄ kōn juon mālijjon̄ im Jemedwōj Ilan̄ eaar jipan̄ er, ak kwaļo̧k en̄jake eo aer make.

Kōketak n̄an Ekkatak ilo M̧weo

Kajjitōk ippān ajri ro n̄an kōmeļeļeik n̄an juon armej ta eo renaaj kallim̧ur ak kar kallim̧ur n̄an kōm̧m̧ane āinwōt m̧ōttan bujen peptaij eo aer.

Kōkōm̧anm̧anļok Ad Katakin

Leļo̧k Am̧ n̄an ajri ro. Eļan̄n̄e ajri ro rej āinwōt jab tōt, emaron̄ in iien n̄an kajjieon̄e bar juon m̧akūtkūt ak kōm̧m̧ane juon iien etetal ekadu, eikōn̄. Ilo bar juon wāween, eļan̄n̄e rej itok limoier im katak, jab ekairir n̄an wōnm̧aanļo̧k wōt n̄an kadedeļo̧k aolepān kein katak eo.