“Māe 25–31. Mosaia 29–Alma 4: ‘Raar Dim im Jamin Makūtkūt,’” Itok, Loor Eō—N̄an Kajjojo Armej im Baam̧le ko: Bok in Mormon 2020 (2020)
“Māe 25–31. Mosaia 29–Alma 4,” Itok, Loor Eō—N̄an Kajjojo Armej m Baam̧le ko: 2020
Alma eo Edik ej kwaļo̧k naan, jān Gary L. Kapp
Māe 25–31
Mosaia 29–Alma 4
“Raar Dim im Jamin Makūtkūt”
Riiti jeje ko rekwojarjar ej bōktok revelesōn. Kōpelļo̧k buruōm n̄an enaan ko Irooj ekōņaan lewōj n̄an eok.
Je En̄jake ko Rej Im̧we Eok.
Jet rej ļōmņak bwe karōk eo an Kiin̄ Mosaia n̄an jeneji kiin̄ ro n̄an ri ekajet ro me renej kālet er ej āinwōt juon jerbal in ekāleel an kien. Ak n̄an RiNipai ro, eļaptata n̄an ro me raar pād ium̧win kōmakoko an Kiin̄ Noa, oktak in ekar barāinwōt ļap tokjen ilo mour in jetōb. Raar lo wāween an kiin̄ eo enana kar kōmour “nana” im “ko̧kkure eo eļap” ilubwiljin armej ro an (Mosaia 29:17), im raar “kijooror otem kijooror ” bwe ren eļļā jān kajoor an men kein renana. Oktak in ekar kōm̧m̧an bwe ren eddoik mour wānōk eo aer make im “uwaak kōn jero̧wiwi ko [aer] make” (Mosaia 29:38; bar lale K&B 101:78).
Aaet em̧ool, jemļo̧kin iien tōl eo an kiin̄ ro ekar jab meļeļein ejemļo̧k būrabōļōm ko ilo jukjuk in pād ko an RiNipai ro. Armej ro re etao āinwōt Nior im Amlikai ro rekar kwaļo̧k ļōmņak ko reriab, ro me rejjab tōmak rekar kakkure ro Rekwojarjar, im elōn̄ membōr ilo Kabun̄ eo raar jino utiej bōro im bun̄ jān aer tōmak. Aaet “ro rettā an Anij” raar dāpdep wōt “dim im jamin m̧akūtkūt ” jekdoon ta ko raar waļo̧k ipeļaakier (Alma 1:25). Im kōn oktak eo me Mosaia eaar kapene, rekar “kwaļo̧k ainikier” n̄an jipan̄ jukjuk in pād eo aer ilo em̧m̧an (Alma 2:6).
Ļōmņak ko n̄an Ekkatak Jeje ko Rekwojarjar eo Ippem̧ Make
Imaron̄ erom̧ juon eo me ej kōm̧m̧an em̧m̧an ilo jukjuk in pād eo aō.
Laļem iiō in tōl an riekajet ro, juon būrabōļōm eaar waļo̧k eo me ekar mālijjon̄e enaan eo an Mosaia me eaar ba bwe ainikien armej ro renaaj kālet ta eo ejim̧we (lale Mosaia 29:26). Būrabōļōm eo me ekitbuuj anemkwōj ko an kabun̄: juon em̧m̧aan etan Amlikai eaar kappukōt n̄an “bōbrae [armej ro] jān jim̧we ko aer im anemkwōj ko an kabun̄ eo” (Alma 2:4). Kwoj ke loe ke anemkwōj ko an kabun̄ em̧ōj kajoikiļo̧k ilo laļ eo am̧ ak jukjukin pād eo am̧? Ta eo kwoj ekkatak jān wāween an RiNipai ro jelm̧ae apan̄ in? (lale Alma 2:1–7).
Elōn̄ būrabōļōm rōt kein me relukkuun aorōk kwoj jelm̧aeiki ilo jukjukin pād eo am̧? Ewi wāween komaron̄, āinwōt RiNipai ro, lukkuun lale bwe ainikiem en kobaļo̧k ilo “ainikien armej ro”? Bōlen kwoj jokwe ilo juon jikin ijo ejjab ļap tokjen ainikien armej ro ilo kien eo; eļan̄n̄e āindein, elōn̄ ke bar jet wāween ko komaron̄ erom̧ juon eo ej kōm̧m̧an em̧m̧an ilo jukjuk in pād eo am̧?
Imaron̄ kile im kajjejtokjen katak ko rebōd.
Men̄e Nior ekar kwaļo̧k ruōn kōn ta ko ekar katakin rebōd, katak ko an rekar jelōt RiNipai ro ium̧win elōn̄ iiō ko (lale Alma 1:15–16; 2:1–2; 14:14–18; 15:15; 21:4; 24:28). Etke armej ro remaron̄ kar likūt bwe katak ko an Nior ej kareel er? Ilo am̧ riiti Alma 1:2–4, lale eļan̄n̄e komaron̄ kile katak ko rebōd an Nior; komaron jeļā ke rej katakin jidikin katak ko rem̧ool.
Gideon eaar anjo̧ ioon Nior “kōn naan ko an Anij” (Alma 1:7, 9). Komaron̄ ke ļōmņak kōn eoon ko me rej kam̧ool kōn riab ko an Nior? Erkein jet waanjon̄ak ko, ak elōn̄ ļo̧k waanjon̄ak ko jet: Matu 7:21–23; 2 Nipai 26:29–31; Mosaia 18:24–26; im Hilamōn 12:25–26. Ewi wāween an eoon kein jipan̄ eok kam̧ool kōn riab ko me rej katakin ilo raan kein?
Bar juon wāween n̄an jino ekkatak eo am̧ Alma 1 ej n̄an keidi Nior im armej ro an (eoon ko 3–9, 16–20) ippān “armej ro an Anij” (eoon ko 25–30; bar lale 2 Nipai 26:29–31). Ewi wāween am̧ maron̄ erom āinwōt armej ro an Anij? Kwoj ke ello jabdewōt “priestcraft” ilo jerbal ko am̧ make?
Rikaļoor ro rem̧ool an Jisōs Kraist rejjab likūt buruōer ilo m̧weie ko.
Jebta ko 1 im 4 an Alma ej jim̧or kōmeļeļeiki tōre ko Kabun̄ eo eaar jeraam̧m̧an, ak membōr ro ilo Kabun̄ eo rekar okkōtaktak aer en̄jake kōn jeraam̧m̧an ko ilo kajjojo wāween ko. Ta oktak ko kwoj loi? Pedped ioon ta eo kwoj loe, ewi wāween am̧ kōmeļeļeiki m̧wil eo me an “ro rettā an Anij” (Alma 4:15) ņae mweie im menin jeraam̧m̧an ko? Ta eo en̄jake eo am̧ eo ej im̧we eok n̄an ukōt m̧wil eo m̧wilim make?
“Naan in Anij” im “naan in kam̧ool” remaron̄ ukōt bōro ko.
Ta eo ekar kōm̧m̧an bwe Alma en “lukkuun būrom̧ōj” (Alma 4:15) ilo Alma 4? Jet remaron̄ ba bwe opiij eo an riekajet eo eutiej emaron̄ kar likūt Alma ilo juon jerbal em̧m̧antata n̄an ņa mejļan būrabōļōm me ekar loe ippān armej ro an. Ak Alma ekar en̄jake bwe ekar bar wōr juon wāween em̧m̧anļo̧k. Ta eo ekar kabwilōn̄ eok kōn wāween an tin jipan̄ armej ro an? Ekkatak ko am̧ remaron̄ im̧we ļōmņak ko am̧ kōn wāween am̧ kareel ro peļaakim ilo erreo; eļan̄n̄e āindein, kōm̧m̧an ekkar n̄an ļōmņak ko.
Ļōmņak ko n̄an Ekkatak Jeje ko Rekwojarjar eo an Baam̧le im Nokon in Jota eo an Baam̧le
Ilo am̧ riiti eoon kein ippān baam̧le eo am̧, Jetōb emaron̄ jipan̄ eok jeļā katak ta ko n̄an kwaļo̧k im kōnono kaki bwe en maron̄ ņa mejļan mōjņo̧ ko an baam̧le eo am̧. Erkein rej jet iaan ļōmņak ko.
Alma 1:19–25
Baam̧le eo am̧ emaron̄ jeraam̧m̧an ilo an kile wāween ko reokkotaktak me membōr ro ilo Kabun̄ in rej kōm̧m̧ane n̄an jelm̧ae jum̧ae im kakkure ko ilo eoon kein. Bōlen komaron̄ kaminene wāween ko n̄an jelm̧ae ilo jejjet n̄e ro jet rej kajjieon̄ jum̧ae tōmak ko ad. Pija in alooj ko ilo ChurchofJesusChrist.org/religious-freedom/examples remaron̄ jipan̄.
Alma 3:4
Ta enaan ko me RiAmlikai ro raar kōņaan kwaļo̧k n̄e rej “kakōļļeik er kōn būrōrō idam̧aer”? (lale Alma 3:4, 13). Ta enaan ko me jej kwaļo̧k—ilo ad jeļā ak jab jeļā kake—kōn paaktokid? Emaron̄ juon iien em̧m̧an n̄an etale “Nuknuk im Paaktokim” ilo For the Strength of Youth (2011), 6–8.
Alma 4:2–3
Ta men ko ak en̄jake ko me ekar “karuj er n̄an juon ememļo̧kjeņ kōn [kuņaad]” n̄an Anij? (Alma 4:3). Bolen enaaj lukkuun em̧m̧anļo̧k n̄an kwaļo̧k eoon kein ālkin an baam̧le eo am̧ rūj in jibbon̄. Komaron̄ kōnono kōn wāween an apan̄ ko me rej kōpelļo̧k kōļmenļo̧kjeņ ko ad ilo mour in kanniōk jipan̄ kōj meļeļe kōn apan̄ ko me rej kōpelļo̧k kōļmenļo̧kjeņ ko ad ilo mour in jetōb.
Alma 4:10–11
Ewi wāween jemaron̄ kōm̧m̧an bwe jen jab “ļatipn̄ōl n̄an ro raar jab kobaļo̧k ilo kabun̄ eo”? (Alma 4:10). Emaron̄ bar jerbal n̄an kōnono kōn wāween ad maron̄ lukkuun lale bwe m̧akūtkūt ko ad n̄an ro jet, eļaptata membōr ro ilo Kabun̄ in, ren jab erom̧ menin lōkatiptip ko n̄an eddōkļo̧k eo an jetōb.
Alma 4:19
N̄an jipan̄ baam̧le eo am̧ meļeļe kajoor in naan in kam̧ool, komaron̄ kajjitōk ippāer n̄an ļōmņak kōn juon tōre rekar ron̄jake naan in kam̧ool an juon armej im ekar ļap an un̄ūr er. Etke Alma emaron̄ kar kālet n̄an kōjerbal naan in kam̧ool im naan ko an Anij n̄an un̄ūr buruōn armej ro? (bar lale Alma 31:5). Etke menin eļapļo̧k an em̧m̧an jān wāween ko jet me armej remaron̄ kōjerbale n̄an kipel ro jet bwe ren oktak? Elōn̄ ke armej ro me tōmak ko aer jemaron̄ kōkajoori ilo ad jeer e naan in kam̧ool ko ad ippāier?
N̄an eļapļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Kōkōm̧anm̧anļo̧k Ad Ekkatak
Keidi jeje ko rekwojarjar n̄an mour eo am̧ make. Ļōmņak kōn wāween am̧ mour kaki bwebwenato ko im katak ko ilo jeje ko rekwojarjar. N̄an waanjon̄ak, komaron̄ lo an ejjeļo̧k oktak ikōtaan laļ in rainin im būrabōļōm ko me ri Nipai ro raar iooni ilo jukjukin pād eo aer ilo Alma 1–4.
Alma im Amlikai, jān Scott M. Snow