“Māe 4–10. Mosiah 11–17: ‘Juon Meram … Eo Emaron̄ Jab Tinaad,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
“Māe 4–10. Mosaia 11–17,” Itok, Ļoor Eō—N̄an Kajjojoj Armej im Baam̧le ko: 2020
Abinadai Ej Pād Im̧aan Mejān Kiin̄ Noa, jān Andrew Bosley
Māe 4–10.
Mosaia 11–17
“Juon Meram … Eo Emaron̄ Jab Tinaad”
Naan ko an Abinadai raar kōm̧m̧ane juon oktak ekajoor ilo juon iaan ro uwaan jikin ekajet eo an Kiin̄ Noa (lale Mosaia 17:2–4). Riiti Mosaia 11–17 ippān juon jar ilo būruwōm̧ bwe kwonaaj bōk im̧we ko kōn ekōjkan am̧ maron̄ oktak.
Je En̄jake ko Rej Im̧we Eok
Kijeek ko reļļap remaron̄ jino jān juon jekadļo̧k. Abinadia eaar juon wōt em̧m̧aan ej kam̧ool ņae juon kiin̄ ekajoor im jikin ekajet eo an. Naan ko an kar julo̧ki elōn̄ wōt iaer, im kar liakeļo̧k n̄an mej. Aaet an naan in kam̧ool kōn Jisōs Kraist , eo ej “meram eo … eo emaron̄ jab tinaad” (Mosaia 16:9), kar kairuj juon men itulowaan pris eo edik Alma. Im bwe jekadļo̧k in oktaktok eo eaar jino eddōkļo̧k ilo an Alma kar bōktok elōn̄ ro jet n̄an ukweļo̧k im tōmak ilo Jisōs Kraist. Uruur ko me kar m̧an Abinidai āliktata kar mājkunļo̧k, bōtaab kijeek in tōmak eo me naan ko an raar ejaaki maron̄ kar wōr juon kilaan aitok kitien ioon Rinipai ro—im ioon ro rej riiti naan ko an rainin. Elōn̄ iaad naaj jamin jelm̧ae āinwōt ta eo Abinidai eaar jelm̧ae kōnke kōn naan in kam̧ool ko ad, bōtaab ewōr ad aolep iien ko n̄e ļoor Jisōs Kraist ej juon idajon̄jon̄ in peran im tōmak eo ad. Bōlen ekkatak kōn naan in kam̧ool eo an Abinadai enaaj kōkajoorļo̧k kijeek ko an naan in kam̧ool eo im peran eo ilo būruwōm̧ barāinwōt.
Ļōmņak ko n̄an Ekkatak Jeje Ko Rekwojarjar eo Ippem̧ Make
Imaron̄ jutak kōn jim̧we eo, jekdo̧o̧n n̄e ij makeļo̧k iaō.
Ļōmņake ekōjkan an kar kabwerer kar n̄an Abinadai n̄an kwaļo̧k kōn ukweļo̧k n̄an armej ro me raar jab āinwōt itoklimo in ukōt wāween ko renana aer. Ennaan eo an kar kowaane im bar kowaane. Aaet Abinadai eaar jab ebbeer.
N̄aat eo kwaar en̄jake āinwōt kwaar makeļo̧k iaam̧ ilo jutak kōn m̧ool eo? Ilo am̧ riiti Mosaia 11–13 im 17, ta eo kwoj katak me emaron̄ jipan̄ eok pojak n̄e Irooj ej aikuji eok n̄an jutak kōn gospel eo An? Ta pedped ko jet kwoj katak jān waanjon̄ak eo an Abinadai?
Ij aikuj in kōjerbal būruwō n̄an meļeļe naan eo an Anij.
Pris ro an Kiin̄ Noa raar jeļā kōn naan ko an Anij—raar maron̄ kōnono eoon ko an jeje ko rekwojarjar im ba rej katakin kōn kien ko. Bōtaab kien kein raar “rejjab jeje ilo [būruwier],” im raar jab “jab ajeļo̧k [būruwier] n̄an meļeļe” kake (Mosaia 13:11; 12:27). Āinwōt juon tōprak, mour ko aer raar pād wōt ilo aer kar jab oktak.
Ilo am̧ riiti Mosaia 12:19–30, kejōkļo̧kjeņ kōn ta meļeļe in n̄an ajeļo̧k būruwōm̧ n̄an meļeļe naan eo an Anij. Menin ej ke im̧we eok n̄an kōm̧m̧an jabdewōt oktak ko ilo wāween eo kwoj kalimjōk ekkatak kōn gospel eo?
Irooj enaaj rejtake ro Rikarejeran ilo jerbal eo An.
Ilo juon jekjek, en̄jake eo an Abinadai ej letok elōn̄ waanjon̄ak ko kōn ekōjkan an Irooj rie ro Rikarejeran—komaron̄ lo jet kain waanjon̄ak kein ilo Mosaia 13:1–9. Ilo bar juon jekjek, Irooj eaar barāinwōt kōtļo̧k bwe Abinadai en liaakeļo̧k, kaļbuuj, im m̧ane kōn naan in kam̧ool eo an. Ta eo kwoj lo ilo eoon kein me rej kwaļo̧k bwe Abinadai eaar lōke Irooj? Ekōjkan an waanjon̄ak eo an Abinadai jelet wāween eo kwoj kalimjōk kūr ko am̧ im eddo ko?
Jisōs Kraist eaar en̄taan kōn eō.
Kiin̄ Noa im pris ro an raar tōmak bwe lo̧mo̧o̧r eaar itok kōn kien Moses. Abinadai eaar kōņaan bwe ren jeļā bwe lo̧mo̧o̧r ej itok kōn Messaia eo, Jisōs Kraist Ilo Mosaia 14–15, kūle naan ko im eoon ko me rej kōmeļeļeik Rilo̧mo̧o̧r eo im ta eo Eaar en̄taan kake kōn eok. Eoon ta ko rej kam̧wilaļļo̧k iakwe eo am̧ im kam̧m̧oolol eo am̧ n̄an E?
Ekōjkan an Jisōs Kraist jim̧or Jemen im Nejin?
Eoon kein rej jet iien kapokpok kōnke emaron̄ in āinwōt bwe Abinadai ej katakin bwe Jemedwōj Ilan̄ im Jisōs Kraist rej juon wōt Armej, aaet jej jeļā bwe rej Armej ro renejo̧lo̧k. Ta meļeļe in an Abinadai kar ba? Eaar katakin bwe Anij Nejin—Jeova—enaaj kar Rilo̧mo̧o̧r eo (lale Mosaia 15:1), jokwe ilo kanniōk, erom̧ m̧ōttan armej im m̧ōttan Anij (eoon 2–3). Eaar lukkuun in ajeļo̧k E make n̄an ankilan Anij Jemen (eoon 5–9). Kōnke menin, Jisōs Kraist ej jim̧or Nejin Anij im eo eweppān ioon laļ in ej itok ilo etan Anij Jemen (lale Jon 14:6–10).
Abinadai eaar wōnm̧aanļo̧k wōt kōn kōmeļeļeik bwe Jisōs Kraist ej barāinwōt Jemen ilo ejjab wāween eo wōt me n̄e jej bōk pinmuur eo An, jej erom̧ “ro ineen” (Mosaia 15:11–12). Ilo bar juon wāween ba, jej erom bar ļotak ilo jetōb kōn E (lale Mosaia 5:7).
Lale barāinwōt Jon 5:25–27; 8:28–29; 17:20–23; “The Father and the Son,” Ensign, Apr 2002, 12–18.
Ļōmņak ko n̄an Ekkatak Jeje Ko Rekwojarjar eo an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧ļe eo am̧, Jetōb eo emaron̄ jipan̄ eok jeļā ta pedped ko n̄an āliji im ekōnono kaki n̄an maron̄ tōpar aikuj ko an baam̧le eo am̧. Erkein rej jet iaan ļōmņak ko.
Mosaia 11–13; 17
Abinadai im Alma rej waanjon̄ak ko reim̧we kōn pād wōt ilo m̧ool n̄an m̧ool eo, jekdo̧o̧n n̄e kōm̧m̧ane ejjab bun̄bun̄. Ro uwaan baam̧le eo am̧ remaron̄ jelm̧ae kipel eo an kōtltōl ippān doon (social) eo n̄an kōttāikļo̧k jon̄an ko aer. Ta eo remaron̄ katak jān Abinadai im Alma kōn jutak kōn m̧ool eo? Pija eo rej itok ippān ļaajrak in emaron̄ jipan̄ baam̧ļe eo am̧ pijaikļo̧k bwebwenato eo. Ālkin ekkatak jebta kein, ļōmņak in kōm̧m̧ane juon waanjon̄ak kōn juon jekjek in mour em̧ool bwe ro uwaan baam̧ļe eo am̧ remaron̄ kaminene ņamejļan kipel eo n̄an kōttāikļo̧k jon̄ak ko aer. Ak komaron̄ kwaļo̧k kajjojo en̄jake ko ippān doon kōn ami jutak kōn m̧ool eo.
Mosaia 12:33–37; 13:11–24
Ta meļeļe in n̄an kōm̧m̧an bwe kien ko an Anij ren “jeje ilo [būruwōd]”? (Mosaia 13:11). Bōlen komaron̄ je jet ļōmņak ko (ak jin̄aik pija ko kōn ļōmņak ko am̧) ioon juon peba ekilep jekjek in wōt menono. Etke kien ko rej aorōk n̄an eok? Ekōjkan ad maron̄ je ilo būruwōd?
Ekkatak jeje ko rekwojarjar emaron̄ jipan̄ kōj je kien ko ilo būruwōd.
Mosaia 14
Ilo jebta in kwonaaj lo jet naan ko im eoon ko me rej kōmeļeļeik kōn Jisōs Kraist. Bōlen baam̧ļe eo am̧ remaron̄ kōllaajraki ilo am̧ loi. Ekōjkan an ro uwaan baam̧le eo am̧ en̄jake kōn Rilo̧mo̧o̧r eo ilo ad ekkatak naan kein im eoon kein?
Mosaia 15:26–27; 16:1–13
Eoon kein rej kōmeļeļeik ta eo enaaj kar waļo̧k n̄an ajri ro nejin Anij eļan̄n̄e Jisōs eaar “jab itok n̄an laļ” (Mosaia 16:6) ak eļan̄n̄e raar jab ļoor E. Ta men ko rem̧m̧an me raar waļo̧k kōnke Eaar itok im pinmuur n̄an kōj? Lale barāinwōt pija in alooj eo “Why We Need a Savior” (ChurchofJesusChrist.org).
N̄an eļapļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Kōkōm̧anm̧anļo̧k Ad Katakin
Kōjerbal bwebwenato ko im waanjon̄ak ko n̄an katakin pedped ko an gospel eo. Rilo̧mo̧or eo emakijkij an kōn katakin pedped ko an gospel eo kōjerbal bwebwenato ko im būrabōļ ko. Ļōmņak kōn waanjon̄ak ko im bwebwenato ko jān mour eo am̧ make me emaron̄ kōm̧m̧an bwe juon pedped an gospel eo erom̧ kalimomo n̄an baam̧le eo am̧ (lale Teaching in the Savior’s Way, 22).
Turin Mejān eaar Romaakļo̧k kōn Eļap Meram, jān Jeremy Winborg