Jab Meļo̧kļo̧k Kom, jān Jon McNaughton

Juun 1–7

Alma 5–7

“Kom̧ Ar Bōk Ke Oktak in Ekajoor ilo Buruōmi?”

Alma 5–7 emaron̄ jipan̄ eok kakeememej oktaktok eo am̧ n̄an Jisōs Kraist. Ilo am̧ riiti, je ta eo Jetōb ej katakin eok.

Je En̄jake ko Rej Im̧we Eok

Alma ekar jab jeļā ke raan kein renaaj kar m̧wijm̧wij bōro an armej n̄an jānij menono n̄an kōmour armej, rej jāniji juon menono ejorrāān ak ewōr nan̄inmej ie n̄an juon menono eo ewāmouruur. Ak ekar jeļā kōn juon men ekabwilōn̄lōn̄ ļo̧k “oktak in bōro” (Alma 5:26)—juon eo me Rilo̧mo̧o̧r eo ej letok n̄an kōj juon mour in jetōb ekāāl, āinwōt “bar ļotak” (lale Alma 5:14, 49). Alma ekar lo bwe oktak in bōro ekar menin aikuj eļap n̄an elōn̄ iaan RiNipai ro. Jet raar m̧weie im jet raar jeram̧ōl, jet raar uteej bōro im jet raar ettā, jet rikakkure im jet raar en̄taan jān kakkure ko (lale Alma 4:6–15). Ak aolepāer raar aikuj itok n̄an Jisōs Kraist bwe en kōmour er—āinwōt bar aolep kōj. Men̄e jej kappukōt n̄an anjo̧ jān utiej bōro ak n̄an niknik ioon en̄taan ko, enaan eo an Alma ejja en̄eo wōt: “Itok im jab mijak” (Alma 7:15). Kōtļo̧k bwe Rilo̧mo̧o̧r en ukōt juon bōro eo epen, ejerawiwi, ak ekinejnej n̄an juon bōro ettā, erreo, im ekāāl.

Ļōmņak ko n̄an Ekkatak Jeje ko Rekwojarjar eo Ippem̧ Make

Alma 5:14–32

Ij aikuj en̄jake—im wōnm̧aanļo̧k wōt im en̄jake—juon oktak ekajoor.

Kajjitōk ko me eto an Alma ļōmņak kaki ekar kajjitōkin armej in Zaraemla, repād ilo Alma 5:14–33, emaron̄ jipan̄ eok kappukōt jetōb eo am̧ make im meļeļe kōn ta meļeļein n̄an en̄jake juon “oktak ekajoor kōm̧m̧ane ilo bōro” ilo aolepān mour eo am̧. Būreejtōn M. Russell Ballard eaar kōmeļeļeiki aorōkin kajjitōk kein: “Ij aikuj bōk iien n̄an kajjitōkin eō make, ‘Ejet aō pād?’ Ej āinwōt juon intōrpiu ettiņo̧ an juon make, im ej kajjitōkin eok make. … Āinwōt juon unin tōl n̄an n̄a ilo iien intōrpiu in ettiņo̧ im aō make, ikōņaan riit im kejōkļo̧kjeņ kōn naan ko me rej pād ilo ļalem jebta in Alma” (“Bar Ro̧o̧l im Bōk,” Ensign ak Liaona, Māe 2017, 64).

Ļōmņak n̄an riiti kajjitōk ko an Alma āinwōt n̄e kwoj intōrpiuiki eok im etale buruōm̧. Komaron̄ kōņaan je uwaak ko am̧ n̄an kajjitōk ko. Ta eo kwoj en̄jake im ej im̧we eok n̄an kōm̧m̧an āinwōt juon tōprak in intōrpiu eo am̧?

Lale barāinwōt Dale G. Renlund, “Preserving the Heart’s Mighty Change,” Ensign ak Liahona, Nob. 2009, 97–99.

Kajjojo rikaļoor an Kraist ej aikuj en̄jake juon “oktak in bōro.”

Alma 5:33–62

Imaron̄ bōk juon aō make kam̧ool kōn Rilo̧mo̧o̧r im gospel eo An kōn Jetōb Kwojarjar.

Alma eaar kwaļo̧k naan in kam̧ool eo an Ekajoor kōn Rilo̧mo̧o̧r im gospel eo An, im ekar barāinwōt kōmeļeļeik wāween an kar bōk naan in kam̧ool eo. Ke ej kam̧ool, ekar jab ba kōn en̄jake eo an ke ekar lo im ron̄ ainikien juon enjeļ (lale Mosaia 27:10–17) ak ijjeļo̧kin ekar kōmeļeļe kōn wōņeen eo ekar kōļļāiki bwe en kar jeļā m̧ool eo ippān make. Ta eo kwoj ekkatak jān Alma 5:44–51 kōn wāween an Alma kar jeļā kōn m̧ool eo? Ewi wāween am̧ ļoor waanjon̄ak eo an kōn kijejeto ko am̧ n̄an bōk ak kōkajoor naan in kam̧ool eo am̧? Ta eo kwoj ekkatak kōn Rilo̧mo̧o̧r jān katak ko an Alma ilo Alma 5:33–35, 48–50, im 57–60?

Alma 7

Tiljek ilo pokake enaaj jipan̄ eok dāpdep ilo “iaļ eo ej tōl n̄an aelōn̄ in Anij.”

Armej ro an rekar ioon ejja būrabōļōm ko wōt an armej ro an Zaraemla, kōn menin Jetōb eo ekar jipan̄ Alma kile aikuj ko aer im katakin er ekkar n̄an jekjek ko aer (lale Alma 7:17, 26). Komaron̄ kile jet iaan oktak ko ikōtaaan enaan ko an Alma ilo Zaraemla (lale Alma 5) im ilo Gideon. N̄an waanjon̄ak, Alma ekar kile bwe armej ro an Gideon rekar “pād ilo iaļ eo ej tōl n̄an aelōn̄ in Anij” (Alma 7:19). Ilo aolep iien kwaļo̧k eo an n̄an er, Alma ekar katakin er elōn̄ men ko kōn wāween aer pād wōt ilo iaļ eo (lale Alma 7). Ta naan in kapilōk eo ekar leļo̧k n̄an er? Ta eo komaron̄ katak jān e im mour kake kiiō?

Alma 7:7–16

Rilo̧mo̧o̧r eo ekar bōk ioon Make jerawiwi ko aō, metak, im en̄taan ko aō.

Em̧ōj ke am̧ kar en̄jake ke ejjeļo̧k emeļeļe kōn apan̄ ak mōjņo ko am̧? Eļan̄n̄e āindein, kar katakin kōn m̧ool ko ilo Alma 7:7–16 emaron̄ jipan̄. Elder David A. Bednar ekar kam̧ool: “Ak Nejin Anij ejeļā im emeļeļe kaki, kōnke Eaar en̄jake im kar ineek eddo ko ad kajjojo. Im kōn katok eo eļap im ejeļo̧k jem̧ļo̧kin (lale Alma 34:14), Eļap an jouj im emaron̄ erļo̧ke Pein Tūriam̧o eo An” (“Bear Up Their Burdens with Ease,” Ensign ak Liaona, Māe 2014, 90).

Ilo am̧ riiti Alma 7:7–16, kakeememej kōn ta eo me eoon kein rej jipan̄ kōj meļeļe kōn un ko unin katok eo an Rilo̧mo̧o̧r. Ewi wāween ad bōk kajoor eo An ilo mour ko ad? Ļōmņak in je en̄jake ko am̧.

Bar lale Aiseia 53:3–5.

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le

Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kake n̄an tōpar aikuj ko an baam̧le eo am̧. Erkein rej jet iaan ļōmņak ko.

Alma 5:6–13

Etke Alma ekar kōņaan bwe armej ro an ren keememej tūriam̧o̧ an Irooj n̄an ro jibūer eto? Ta bwebwenato ko jān menmenbwij in baam̧le eo am̧ me ej katakin eok kōn tūriam̧o eo An? Bōlen komaron̄ lale familysearch.org/myfamily n̄an je bwebwenato ko am̧.

Alma 5:14–33

Ro uwaan baam̧le eo am̧ emaron̄ jeļā ta en̄jake eo n̄an pojak—ak jab ojak—n̄an juon iien kāām, juon teej ilo jikuuļ, ak juon intōrpiu n̄an jerbal. Ta en̄jake ko me remaron̄ kwaļo̧k n̄an kōmeļeļe kōn aorōkin m̧aanjabpopo? Komaron̄ karuwaineneik ro uwaan baam̧le eo am̧ n̄an etale Alma 5:14–33 im pukōt kajjitōk ko me Alma ekar kajjitōkin kaki n̄an kōpooj armej ro an n̄an ioon Anij. Bōlen kajjojo membōr remaron̄ kar kālet juon kajjitōk im kwaļo̧k wāween an jipan̄ kōj m̧aanjabpopo n̄an iioon Anij. Baam̧le eo am̧ emaron̄ kar kwaļo̧k ipeļaakin m̧weo imōm jet iaan kajjitōk ko an Alma n̄an ro uwaan baam̧le eo bwe ren kejōkļo̧kjeņ kake.

Alma 6:4–6

Ta jet iaan un ko me jej aiin doon āinwōt Armej ro Rekwojarjar? Ewi wāween ad kōm̧m̧an iien ko ad ilo m̧ōn jar eo bwen ļapļo̧k an jipan̄ kōj make im ro jet?

Alma 7:9–16

Ta eo jej ekkatak ilo eoon kein me ej jipan̄ kōj “jab mijak” (Alma 7:15) n̄e jej aikuj ukweļo̧k im oktak? Ta eo eoon kein rej katakin kōj kōn oktakļo̧k n̄an Rilo̧mo̧o̧r eo n̄e jej aikuj jipan̄? Ta men ko jet me em̧ōj ad kōm̧m̧ani n̄an bōk An jipan̄? Ewi wāween An jipan̄ kōj?

Alma 7:23

Wōn eo jejjeļā me ej juon waanjon̄ak kōn m̧wil kein rej ellaajrak ilo eoon in? Etke eaorōk n̄an kōļapļo̧k m̧wil kein?

Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Kōkōm̧anm̧anļo̧k Ad Katakin

Kajjitōkin kajjitōk ko me rej karuwaineneiki ro uwaan baam̧le eo n̄an kōm̧m̧ane. Ļōmņak kōn kajjitōk ko me ej im̧we ro uwaan baam̧le eo am̧ n̄an kejōkļo̧kjeņ kōn wāween aer maron̄ ļapļo̧k aer mour kōn gospel eo. “Men kein ejjab lukkun jet kajjitōk ko n̄an kōnono kaki; rej ememļo̧kjeņ an juon make” (Teaching in the Savior’s Way, 31).

Ad Rijojomar, jān Jay Bryant Ward